ಬ್ರಹ್ಮಾಣ್ಡಮೋಹನಾಖ್ಯಂ ದುರ್ಗಾಕವಚಮ್

ಬ್ರಹ್ಮಾಣ್ಡಮೋಹನಾಖ್ಯಂ ದುರ್ಗಾಕವಚಮ್

ನಾರದ ಉವಾಚ .
ಭಗವನ್ಸರ್ವಧರ್ಮಜ್ಞ ಸರ್ವಜ್ಞಾನವಿಶಾರದ .
ಬ್ರಹ್ಮಾಣ್ಡಮೋಹನಂ ನಾಮ ಪ್ರಕೃತೇ ಕವಚಂ ವದ .. ೧..

ನಾರಾಯಣ ಉವಾಚ .
ಶೃಣು ವಕ್ಷ್ಯಾಮಿ ಹೇ ವತ್ಸ ಕವಚಂ ಚ ಸುದುರ್ಲಭಮ್ .
ಶ್ರೀಕೃಷ್ಣೇನೈವ ಕಥಿತಂ ಕೃಪಯಾ ಬ್ರಹ್ಮಣೇ ಪುರಾ .. ೨..

ಬ್ರಹ್ಮಣಾ ಕಥಿತಂ ಪೂರ್ವಂ ಧರ್ಮಾಯ ಜಾಹ್ನವೀತಟೇ .
ಧರ್ಮೇಣ ದತ್ತಂ ಮಹ್ಯಂ ಚ ಕೃಪಯಾ ಪುಷ್ಕರೇ ಪುರಾ .. ೩..

ತ್ರಿಪುರಾರಿಶ್ಚ ಯದ್ಧೃತ್ವಾ ಜಘಾನ ತ್ರಿಪುರಂ ಪುರಾ .
ಮಮೋಚ ಬ್ರಹ್ಮಾ ಯದ್ಧೃತ್ವಾ ಮಧುಕೈಟಭಯೋರ್ಭಯಾತ್ .. ೪..

ಸಞ್ಜಹಾರ ರಕ್ತಬೀಜಂ ಯದ್ಧೃತ್ವಾ ಭದ್ರಕಾಲಿಕಾ .
ಯದ್ಧೃತ್ವಾ ಹಿ ಮಹೇನ್ದ್ರಶ್ಚ ಸಮ್ಪ್ರಾಪ ಕಮಲಾಲಯಾಮ್ .. ೫..

ಯದ್ಧೃತ್ವಾ ಚ ಮಹಾಯೋದ್ಧಾ ಬಾಣಃ ಶತ್ರುಭಯಙ್ಕರಃ .
ಯದ್ಧೃತ್ವಾ ಶಿವತುಲ್ಯಶ್ಚ ದುರ್ವಾಸಾ ಜ್ಞಾನಿನಾಂ ವರಃ .. ೬..

ಓಂ ದುರ್ಗೇತಿ ಚತುರ್ಥ್ಯನ್ತಃ ಸ್ವಾಹಾನ್ತೋ ಮೇ ಶಿರೋಽವತು .
ಮನ್ತ್ರಃ ಷಡಕ್ಷರೋಽಯಂ ಚ ಭಕ್ತಾನಾಂ ಕಲ್ಪಪಾದಪಃ .. ೭..

ವಿಚಾರೋ ನಾಸ್ತಿ ವೇದೇ ಚ ಗ್ರಹಣೇಽಸ್ಯ ಮನೋರ್ಮುನೇ .
ಮನ್ತ್ರಗ್ರಹಣಮಾತ್ರೇಣ ವಿಷ್ಣುತುಲ್ಯೋ ಭವೇನ್ನರಃ .. ೮..

ಮಮ ವಕ್ತ್ರಂ ಸದಾ ಪಾತು ಓಂ ದುರ್ಗಾಯೈ ನಮೋಽನ್ತಕಃ .
ಓಂ ದುರ್ಗೇ ಇತಿ ಕಣ್ಠಂ ತು ಮನ್ತ್ರಃ ಪಾತು ಸದಾ ಮಮ .. ೯..

ಓಂ ಹ್ರೀಂ ಶ್ರೀಮಿತಿ ಮನ್ತ್ರೋಽಯಂ ಸ್ಕನ್ಧಂ ಪಾತು ನಿರನ್ತರಮ್ .
ಹ್ರೀಂ ಶ್ರೀಂ ಕ್ಲೀಮಿತಿ ಪೃಷ್ಠಂ ಚ ಪಾತು ಮೇ ಸರ್ವತಃ ಸದಾ .. ೧೦..

ಹ್ರೀಂ ಮೇ ವಕ್ಷಸ್ಥಲೇ ಪಾತು ಹಂ ಸಂ ಶ್ರೀಮಿತಿ ಸನ್ತತಮ್ .
ಐಂ ಶ್ರೀಂ ಹ್ರೀಂ ಪಾತು ಸರ್ವಾಙ್ಗಂ ಸ್ವಪ್ನೇ ಜಾಗರಣೇ ಸದಾ .. ೧೧..

ಪ್ರಾಚ್ಯಾಂ ಮಾಂ ಪಾತು ಪ್ರಕೃತಿಃ ಪಾತು ವಹ್ನೌ ಚ ಚಣ್ಡಿಕಾ .
ದಕ್ಷಿಣೇ ಭದ್ರಕಾಲೀ ಚ ನೈರೃತ್ಯಾಂ ಚ ಮಹೇಶ್ವರೀ .. ೧೨..

ವಾರುಣ್ಯಾಂ ಪಾತು ವಾರಾಹೀ ವಾಯವ್ಯಾಂ ಸರ್ವಮಙ್ಗಲಾ .
ಉತ್ತರೇ ವೈಷ್ಣವೀ ಪಾತು ತಥೈಶಾನ್ಯಾಂ ಶಿವಪ್ರಿಯಾ .. ೧೩..

ಜಲೇ ಸ್ಥಲೇ ಚಾನ್ತರಿಕ್ಷೇ ಪಾತು ಮಾಂ ಜಗದಮ್ಬಿಕಾ .
ಇತಿ ತೇ ಕಥಿತಂ ವತ್ಸ ಕವಚಂ ಚ ಸುದುರ್ಲಭಮ್ .. ೧೪..

ಯಸ್ಮೈ ಕಸ್ಮೈ ನ ದಾತವ್ಯಂ ಪ್ರವಕ್ತವ್ಯಂ ನ ಕಸ್ಯಚಿತ್ .
ಗುರುಮಭ್ಯರ್ಚ್ಯ ವಿಧಿವದ್ವಸ್ತ್ರಾಲಙ್ಕಾರಚನ್ದನೈಃ .. ೧೫..

ಕವಚಂ ಧಾರಯೇದ್ಯಸ್ತು ಸೋಽಪಿ ವಿಷ್ಣುರ್ನ ಸಂಶಯಃ .
ಸ್ನಾನೇ ಚ ಸರ್ವತೀರ್ಥಾನಾಂ ಪೃಥಿವ್ಯಾಶ್ಚ ಪ್ರದಕ್ಷಿಣೇ .. ೧೬..

ಯತ್ಫಲಂ ಲಭತೇ ಲೋಕಸ್ತದೇತದ್ಧಾರಣೇ ಮುನೇ .
ಪಞ್ಚಲಕ್ಷಜಪೇನೈವ ಸಿದ್ಧಮೇತದ್ಭವೇದ್ಧ್ರುವಮ್ .. ೧೭..

ಲೋಕೇ ಚ ಸಿದ್ಧಕವಚೋ ನಾವಸೀದತಿ ಸಙ್ಕಟೇ .
ನ ತಸ್ಯ ಮೃತ್ಯುರ್ಭವತಿ ಜಲೇ ವಹ್ನೌ ವಿಷೇ ಜ್ವರೇ .. ೧೮..

ಜೀವನ್ಮುಕ್ತೋ ಭವೇತ್ಸೋಽಪಿ ಸರ್ವಸಿದ್ಧೀಶ್ವರೀಶ್ವರಿ .
ಯದಿ ಸ್ಯಾತ್ಸಿದ್ಧಕವಚೋ ವಿಷ್ಣುತುಲ್ಯೋ ಭವೇದ್ಧ್ರುವಮ್ .. ೧೯..