బ్రహ్మాణ్డమోహనాఖ్యం దుర్గాకవచమ్

బ్రహ్మాణ్డమోహనాఖ్యం దుర్గాకవచమ్

నారద ఉవాచ .
భగవన్సర్వధర్మజ్ఞ సర్వజ్ఞానవిశారద .
బ్రహ్మాణ్డమోహనం నామ ప్రకృతే కవచం వద .. 1..

నారాయణ ఉవాచ .
శృణు వక్ష్యామి హే వత్స కవచం చ సుదుర్లభమ్ .
శ్రీకృష్ణేనైవ కథితం కృపయా బ్రహ్మణే పురా .. 2..

బ్రహ్మణా కథితం పూర్వం ధర్మాయ జాహ్నవీతటే .
ధర్మేణ దత్తం మహ్యం చ కృపయా పుష్కరే పురా .. 3..

త్రిపురారిశ్చ యద్ధృత్వా జఘాన త్రిపురం పురా .
మమోచ బ్రహ్మా యద్ధృత్వా మధుకైటభయోర్భయాత్ .. 4..

సఞ్జహార రక్తబీజం యద్ధృత్వా భద్రకాలికా .
యద్ధృత్వా హి మహేన్ద్రశ్చ సమ్ప్రాప కమలాలయామ్ .. 5..

యద్ధృత్వా చ మహాయోద్ధా బాణః శత్రుభయఙ్కరః .
యద్ధృత్వా శివతుల్యశ్చ దుర్వాసా జ్ఞానినాం వరః .. 6..

ఓం దుర్గేతి చతుర్థ్యన్తః స్వాహాన్తో మే శిరోఽవతు .
మన్త్రః షడక్షరోఽయం చ భక్తానాం కల్పపాదపః .. 7..

విచారో నాస్తి వేదే చ గ్రహణేఽస్య మనోర్మునే .
మన్త్రగ్రహణమాత్రేణ విష్ణుతుల్యో భవేన్నరః .. 8..

మమ వక్త్రం సదా పాతు ఓం దుర్గాయై నమోఽన్తకః .
ఓం దుర్గే ఇతి కణ్ఠం తు మన్త్రః పాతు సదా మమ .. 9..

ఓం హ్రీం శ్రీమితి మన్త్రోఽయం స్కన్ధం పాతు నిరన్తరమ్ .
హ్రీం శ్రీం క్లీమితి పృష్ఠం చ పాతు మే సర్వతః సదా .. 10..

హ్రీం మే వక్షస్థలే పాతు హం సం శ్రీమితి సన్తతమ్ .
ఐం శ్రీం హ్రీం పాతు సర్వాఙ్గం స్వప్నే జాగరణే సదా .. 11..

ప్రాచ్యాం మాం పాతు ప్రకృతిః పాతు వహ్నౌ చ చణ్డికా .
దక్షిణే భద్రకాలీ చ నైరృత్యాం చ మహేశ్వరీ .. 12..

వారుణ్యాం పాతు వారాహీ వాయవ్యాం సర్వమఙ్గలా .
ఉత్తరే వైష్ణవీ పాతు తథైశాన్యాం శివప్రియా .. 13..

జలే స్థలే చాన్తరిక్షే పాతు మాం జగదమ్బికా .
ఇతి తే కథితం వత్స కవచం చ సుదుర్లభమ్ .. 14..

యస్మై కస్మై న దాతవ్యం ప్రవక్తవ్యం న కస్యచిత్ .
గురుమభ్యర్చ్య విధివద్వస్త్రాలఙ్కారచన్దనైః .. 15..

కవచం ధారయేద్యస్తు సోఽపి విష్ణుర్న సంశయః .
స్నానే చ సర్వతీర్థానాం పృథివ్యాశ్చ ప్రదక్షిణే .. 16..

యత్ఫలం లభతే లోకస్తదేతద్ధారణే మునే .
పఞ్చలక్షజపేనైవ సిద్ధమేతద్భవేద్ధ్రువమ్ .. 17..

లోకే చ సిద్ధకవచో నావసీదతి సఙ్కటే .
న తస్య మృత్యుర్భవతి జలే వహ్నౌ విషే జ్వరే .. 18..

జీవన్ముక్తో భవేత్సోఽపి సర్వసిద్ధీశ్వరీశ్వరి .
యది స్యాత్సిద్ధకవచో విష్ణుతుల్యో భవేద్ధ్రువమ్ .. 19..