આદિત્યપુરાણાન્તર્ગતં શ્રીગણેશસ્તોત્રમ્

શ્રીગણેશસ્તોત્રમ્
શ્રીગણેશાય નમઃ .

સિન્દૂરકુઙ્કુમહુતાશનવિદ્રુમાર્ક-
રક્તાબ્જદાડિમનિભાય ચતુર્ભુજાય .
હેરમ્બભૈરવગણેશ્વરનાયકાય
સર્વાર્થસિદ્ધિફલદાય ગણેશ્વરાય .. ૧..

ચિદચિત્પદગમ્ભીરં ગમાગમપદોજ્ઝિતમ્ .
ગહનાકાશસઙ્કાશં વન્દે દેવં ગણેશ્વરમ્ .. ૨..

શ્રીસનત્કુમાર ઉવાચ .
શઙ્કરાદ્બ્રહ્મણા પ્રાપ્તં પદ્મયોનેર્મયા પ્રભોઃ .
તદહં કીર્તયિષ્યામિ સ્તોત્રં પરમદુર્લભમ્ .. ૩..

ષષ્ઠ્યાં ચતુર્થ્યામષ્ટમ્યાં ચતુર્દશ્યાં વિશેષતઃ .
પૂજયેચ્ચ ગણાધ્યક્ષં શ્રદ્ધાભક્તિસમન્વિતઃ .. ૪..

અર્ઘૈઃ પુષ્પૈસ્તથા ધૂપૈર્દીપૈર્માલ્યૈશ્ચ ચામરૈઃ .
વસ્ત્રૈઃ કુણ્ડલકેયૂરૈર્મૌલિભિશ્ચ વિતાનકૈઃ .. ૫..

ભક્ષ્યૈર્ભોજ્યૈરપૂપૈશ્ચ મત્સ્યૈર્માંસૈશ્ચ મોદકૈઃ .
પાનકૈઃ ફલમૂલૈશ્ચ હોમૈર્મન્ત્રાદિભિસ્તથા .. ૬..

ગઙ્ગાહૃદે તુ ગાઙ્ગેયં શ્રીશૈલે તુ ગણેશ્વરમ્ .
વારાણસ્યાં ગજવક્ત્રં ગયાયાં ટઙ્કધારિણમ્ .. ૭..

પ્રયાગે તુ ગણાધ્યક્ષં કેદારે વિકટાનનમ્ .
લમ્બોદરં કુરુક્ષેત્રે નૈમિષે ચ મદોત્કટમ્ .. ૮..

જમ્બુકં દણ્ડકારણ્યે લોકેશં હિમવદ્ગિરૌ .
વિશ્વક્સેનં તુ વિન્ધ્યાદ્રૌ મલયે હેમકુમ્ભકમ્ .. ૯..

નાયકં પુષ્કરદ્વીપે વિઘ્નેશં શલ્મલે સ્થિતમ્ .
ઇલાવૃતે વિશ્વરૂપં હરિવર્ષે ઘટોદરમ્ .. ૧૦..

ત્રિનેત્રં સિંહલદ્વીપે શ્વેતદ્વીપે તુ વામનમ્ .
ઉજ્જયિન્યાં ચ લમ્બોષ્ટં માલવે શૂર્પકર્ણકમ્ .. ૧૧..

સૌરાષ્ટ્રે વરદં દેવં કશ્મીરે ભીમરૂપિણમ્ .
સિન્ધુસાગરયોર્મધ્યે સ્થિતં વૈ મન્ત્રનાયકમ્ .. ૧૨..

હર્યક્ષં યક્ષભવને હરિયક્ષાભિધં વિભુમ્ .
પદ્માભરણનામાનં કૈલાસે પરમેશ્વરમ્ .. ૧૩..

મહાયોગં મહેન્દ્રે ચ સહ્યે વારાહરૂપિણમ્ .
મહોદરં ચ લુમ્પાયાં ચમ્પાયાં શિખિવાહનમ્ .. ૧૪..

પાશહસ્તં ત્રિકૂટે ચ પૂજયેત્સર્વસિદ્ધિદમ્ .
બલમગ્નિગુહાયાં ચ પાટલે સિંહવાહનમ્ .. ૧૫..

પૌણ્ડ્રે રૌદ્રમુખં ચાપિ કલાપિગ્રામકે જયમ્ .
મેરુપૃષ્ઠે કામરૂપં નન્દનં નન્દને વને .. ૧૬..

વિજયં વૈ ગન્ધવને દેવદારુવને ગણમ્ .
આર્તાનાં વિઘ્નહરણં ગઙ્ગાસાગરસઙ્ગમે .. ૧૭..

મહાપથે વિરૂપાક્ષં ચિત્રકૂટે મદોત્કટમ્ .
દુર્જયં યમુનાતીરે સ્તમ્ભનં ગન્ધમાધને .. ૧૮..

ભદ્રવટે ચામ્બરીશં મોહનં હસ્તિનાપુરે .
કિષ્કિન્દાયામુગ્રકેતું લઙ્કાયાં તુ વિભીષણમ્ .. ૧૯..

કલિઙ્ગે વરુણં ચૈવ ગાન્ધારે ચ મદોત્કટમ્ .
અશ્વત્થં ચ તુરુષ્કેષુ ચીને શત્રુજયાવહમ્ .. ૨૦..

વજ્રહસ્તં કોસલેષુ દાક્ષિણાત્યેષુ લોહિતમ્ .
શૂલોદ્ધૃતકરં ચૈવ મધ્યદેશે પ્રકીર્તિતમ્ .. ૨૧..

એકદંષ્ટ્રં પશ્ચિમાબ્ધૌ પૂર્વદેશે પરાજિતમ્ .
ઉત્તરે ચારુવક્ત્રં ચ વરિષ્ઠં ત્રિપુરેષુ ચ .. ૨૨..

સુવર્ણગર્ભં વિઘ્નેશં નદીનાં સઙ્ગમે સ્થિતમ્ .
ગિરિસન્ધિષુ વિજ્ઞેયં હિરણ્યકવચાભિધમ્ .. ૨૩..

સુમુખં નાગરન્ધ્રેષુ નર્મદાયાં ચ ષડ્ભુજમ્ .
મહાપુરે મહામાયાં ભદ્રકર્ણે હ્રદે શિવમ્ .. ૨૪..

ગોકર્ણે ગજકર્ણં તુ કાન્યકુબ્જે વરાનનમ્ .
પદ્માસનં કામરૂપે શ્રીમુખં સર્વતઃ સ્થિતમ્ .. ૨૫..

વેદવેદાઙ્ગશાસ્ત્રેષુ પૂજયેદ્બ્રહ્મણસ્પતિમ્ .
અષ્ટાષષ્ટિસ્તુ નામાનિ સ્તુતાન્યદ્ભુતકર્મણઃ .. ૨૬..

નિત્યં પ્રભાતકાલે તુ ચિન્તયેદ્ગણનાયકમ્ .
એતત્સ્તોત્રં પવિત્રં ચ માઙ્ગલ્યં પાપનાશનમ્ .. ૨૭..

શસ્ત્ર-ખાર્ખોદ-વેતાલ-યક્ષ રક્ષો ભયાપહમ્ .
ચૌરારણ્યભયવ્યાઘ્રવ્યાધિદુર્ભિક્ષનાશનમ્ .. ૨૮..

કૃત્યાદિમાયાશમનં સર્વશત્રુવિમર્દનમ્ .
ત્રિકાલં યઃ પઠેદ્ભક્ત્યા સ ભવેત્સર્વસિદ્ધિભાક્ .. ૨૯..

ગણેશ્વરપ્રસાદેન લભતે શાઙ્કરં પદમ્ .. ૩૦..

ઇતિ આદિત્યપુરાણે ગણેશસ્તોત્રમ્