ಆದಿತ್ಯಪುರಾಣಾನ್ತರ್ಗತಂ ಶ್ರೀಗಣೇಶಸ್ತೋತ್ರಮ್

ಶ್ರೀಗಣೇಶಸ್ತೋತ್ರಮ್
ಶ್ರೀಗಣೇಶಾಯ ನಮಃ .

ಸಿನ್ದೂರಕುಙ್ಕುಮಹುತಾಶನವಿದ್ರುಮಾರ್ಕ-
ರಕ್ತಾಬ್ಜದಾಡಿಮನಿಭಾಯ ಚತುರ್ಭುಜಾಯ .
ಹೇರಮ್ಬಭೈರವಗಣೇಶ್ವರನಾಯಕಾಯ
ಸರ್ವಾರ್ಥಸಿದ್ಧಿಫಲದಾಯ ಗಣೇಶ್ವರಾಯ .. ೧..

ಚಿದಚಿತ್ಪದಗಮ್ಭೀರಂ ಗಮಾಗಮಪದೋಜ್ಝಿತಮ್ .
ಗಹನಾಕಾಶಸಙ್ಕಾಶಂ ವನ್ದೇ ದೇವಂ ಗಣೇಶ್ವರಮ್ .. ೨..

ಶ್ರೀಸನತ್ಕುಮಾರ ಉವಾಚ .
ಶಙ್ಕರಾದ್ಬ್ರಹ್ಮಣಾ ಪ್ರಾಪ್ತಂ ಪದ್ಮಯೋನೇರ್ಮಯಾ ಪ್ರಭೋಃ .
ತದಹಂ ಕೀರ್ತಯಿಷ್ಯಾಮಿ ಸ್ತೋತ್ರಂ ಪರಮದುರ್ಲಭಮ್ .. ೩..

ಷಷ್ಠ್ಯಾಂ ಚತುರ್ಥ್ಯಾಮಷ್ಟಮ್ಯಾಂ ಚತುರ್ದಶ್ಯಾಂ ವಿಶೇಷತಃ .
ಪೂಜಯೇಚ್ಚ ಗಣಾಧ್ಯಕ್ಷಂ ಶ್ರದ್ಧಾಭಕ್ತಿಸಮನ್ವಿತಃ .. ೪..

ಅರ್ಘೈಃ ಪುಷ್ಪೈಸ್ತಥಾ ಧೂಪೈರ್ದೀಪೈರ್ಮಾಲ್ಯೈಶ್ಚ ಚಾಮರೈಃ .
ವಸ್ತ್ರೈಃ ಕುಣ್ಡಲಕೇಯೂರೈರ್ಮೌಲಿಭಿಶ್ಚ ವಿತಾನಕೈಃ .. ೫..

ಭಕ್ಷ್ಯೈರ್ಭೋಜ್ಯೈರಪೂಪೈಶ್ಚ ಮತ್ಸ್ಯೈರ್ಮಾಂಸೈಶ್ಚ ಮೋದಕೈಃ .
ಪಾನಕೈಃ ಫಲಮೂಲೈಶ್ಚ ಹೋಮೈರ್ಮನ್ತ್ರಾದಿಭಿಸ್ತಥಾ .. ೬..

ಗಙ್ಗಾಹೃದೇ ತು ಗಾಙ್ಗೇಯಂ ಶ್ರೀಶೈಲೇ ತು ಗಣೇಶ್ವರಮ್ .
ವಾರಾಣಸ್ಯಾಂ ಗಜವಕ್ತ್ರಂ ಗಯಾಯಾಂ ಟಙ್ಕಧಾರಿಣಮ್ .. ೭..

ಪ್ರಯಾಗೇ ತು ಗಣಾಧ್ಯಕ್ಷಂ ಕೇದಾರೇ ವಿಕಟಾನನಮ್ .
ಲಮ್ಬೋದರಂ ಕುರುಕ್ಷೇತ್ರೇ ನೈಮಿಷೇ ಚ ಮದೋತ್ಕಟಮ್ .. ೮..

ಜಮ್ಬುಕಂ ದಣ್ಡಕಾರಣ್ಯೇ ಲೋಕೇಶಂ ಹಿಮವದ್ಗಿರೌ .
ವಿಶ್ವಕ್ಸೇನಂ ತು ವಿನ್ಧ್ಯಾದ್ರೌ ಮಲಯೇ ಹೇಮಕುಮ್ಭಕಮ್ .. ೯..

ನಾಯಕಂ ಪುಷ್ಕರದ್ವೀಪೇ ವಿಘ್ನೇಶಂ ಶಲ್ಮಲೇ ಸ್ಥಿತಮ್ .
ಇಲಾವೃತೇ ವಿಶ್ವರೂಪಂ ಹರಿವರ್ಷೇ ಘಟೋದರಮ್ .. ೧೦..

ತ್ರಿನೇತ್ರಂ ಸಿಂಹಲದ್ವೀಪೇ ಶ್ವೇತದ್ವೀಪೇ ತು ವಾಮನಮ್ .
ಉಜ್ಜಯಿನ್ಯಾಂ ಚ ಲಮ್ಬೋಷ್ಟಂ ಮಾಲವೇ ಶೂರ್ಪಕರ್ಣಕಮ್ .. ೧೧..

ಸೌರಾಷ್ಟ್ರೇ ವರದಂ ದೇವಂ ಕಶ್ಮೀರೇ ಭೀಮರೂಪಿಣಮ್ .
ಸಿನ್ಧುಸಾಗರಯೋರ್ಮಧ್ಯೇ ಸ್ಥಿತಂ ವೈ ಮನ್ತ್ರನಾಯಕಮ್ .. ೧೨..

ಹರ್ಯಕ್ಷಂ ಯಕ್ಷಭವನೇ ಹರಿಯಕ್ಷಾಭಿಧಂ ವಿಭುಮ್ .
ಪದ್ಮಾಭರಣನಾಮಾನಂ ಕೈಲಾಸೇ ಪರಮೇಶ್ವರಮ್ .. ೧೩..

ಮಹಾಯೋಗಂ ಮಹೇನ್ದ್ರೇ ಚ ಸಹ್ಯೇ ವಾರಾಹರೂಪಿಣಮ್ .
ಮಹೋದರಂ ಚ ಲುಮ್ಪಾಯಾಂ ಚಮ್ಪಾಯಾಂ ಶಿಖಿವಾಹನಮ್ .. ೧೪..

ಪಾಶಹಸ್ತಂ ತ್ರಿಕೂಟೇ ಚ ಪೂಜಯೇತ್ಸರ್ವಸಿದ್ಧಿದಮ್ .
ಬಲಮಗ್ನಿಗುಹಾಯಾಂ ಚ ಪಾಟಲೇ ಸಿಂಹವಾಹನಮ್ .. ೧೫..

ಪೌಣ್ಡ್ರೇ ರೌದ್ರಮುಖಂ ಚಾಪಿ ಕಲಾಪಿಗ್ರಾಮಕೇ ಜಯಮ್ .
ಮೇರುಪೃಷ್ಠೇ ಕಾಮರೂಪಂ ನನ್ದನಂ ನನ್ದನೇ ವನೇ .. ೧೬..

ವಿಜಯಂ ವೈ ಗನ್ಧವನೇ ದೇವದಾರುವನೇ ಗಣಮ್ .
ಆರ್ತಾನಾಂ ವಿಘ್ನಹರಣಂ ಗಙ್ಗಾಸಾಗರಸಙ್ಗಮೇ .. ೧೭..

ಮಹಾಪಥೇ ವಿರೂಪಾಕ್ಷಂ ಚಿತ್ರಕೂಟೇ ಮದೋತ್ಕಟಮ್ .
ದುರ್ಜಯಂ ಯಮುನಾತೀರೇ ಸ್ತಮ್ಭನಂ ಗನ್ಧಮಾಧನೇ .. ೧೮..

ಭದ್ರವಟೇ ಚಾಮ್ಬರೀಶಂ ಮೋಹನಂ ಹಸ್ತಿನಾಪುರೇ .
ಕಿಷ್ಕಿನ್ದಾಯಾಮುಗ್ರಕೇತುಂ ಲಙ್ಕಾಯಾಂ ತು ವಿಭೀಷಣಮ್ .. ೧೯..

ಕಲಿಙ್ಗೇ ವರುಣಂ ಚೈವ ಗಾನ್ಧಾರೇ ಚ ಮದೋತ್ಕಟಮ್ .
ಅಶ್ವತ್ಥಂ ಚ ತುರುಷ್ಕೇಷು ಚೀನೇ ಶತ್ರುಜಯಾವಹಮ್ .. ೨೦..

ವಜ್ರಹಸ್ತಂ ಕೋಸಲೇಷು ದಾಕ್ಷಿಣಾತ್ಯೇಷು ಲೋಹಿತಮ್ .
ಶೂಲೋದ್ಧೃತಕರಂ ಚೈವ ಮಧ್ಯದೇಶೇ ಪ್ರಕೀರ್ತಿತಮ್ .. ೨೧..

ಏಕದಂಷ್ಟ್ರಂ ಪಶ್ಚಿಮಾಬ್ಧೌ ಪೂರ್ವದೇಶೇ ಪರಾಜಿತಮ್ .
ಉತ್ತರೇ ಚಾರುವಕ್ತ್ರಂ ಚ ವರಿಷ್ಠಂ ತ್ರಿಪುರೇಷು ಚ .. ೨೨..

ಸುವರ್ಣಗರ್ಭಂ ವಿಘ್ನೇಶಂ ನದೀನಾಂ ಸಙ್ಗಮೇ ಸ್ಥಿತಮ್ .
ಗಿರಿಸನ್ಧಿಷು ವಿಜ್ಞೇಯಂ ಹಿರಣ್ಯಕವಚಾಭಿಧಮ್ .. ೨೩..

ಸುಮುಖಂ ನಾಗರನ್ಧ್ರೇಷು ನರ್ಮದಾಯಾಂ ಚ ಷಡ್ಭುಜಮ್ .
ಮಹಾಪುರೇ ಮಹಾಮಾಯಾಂ ಭದ್ರಕರ್ಣೇ ಹ್ರದೇ ಶಿವಮ್ .. ೨೪..

ಗೋಕರ್ಣೇ ಗಜಕರ್ಣಂ ತು ಕಾನ್ಯಕುಬ್ಜೇ ವರಾನನಮ್ .
ಪದ್ಮಾಸನಂ ಕಾಮರೂಪೇ ಶ್ರೀಮುಖಂ ಸರ್ವತಃ ಸ್ಥಿತಮ್ .. ೨೫..

ವೇದವೇದಾಙ್ಗಶಾಸ್ತ್ರೇಷು ಪೂಜಯೇದ್ಬ್ರಹ್ಮಣಸ್ಪತಿಮ್ .
ಅಷ್ಟಾಷಷ್ಟಿಸ್ತು ನಾಮಾನಿ ಸ್ತುತಾನ್ಯದ್ಭುತಕರ್ಮಣಃ .. ೨೬..

ನಿತ್ಯಂ ಪ್ರಭಾತಕಾಲೇ ತು ಚಿನ್ತಯೇದ್ಗಣನಾಯಕಮ್ .
ಏತತ್ಸ್ತೋತ್ರಂ ಪವಿತ್ರಂ ಚ ಮಾಙ್ಗಲ್ಯಂ ಪಾಪನಾಶನಮ್ .. ೨೭..

ಶಸ್ತ್ರ-ಖಾರ್ಖೋದ-ವೇತಾಲ-ಯಕ್ಷ ರಕ್ಷೋ ಭಯಾಪಹಮ್ .
ಚೌರಾರಣ್ಯಭಯವ್ಯಾಘ್ರವ್ಯಾಧಿದುರ್ಭಿಕ್ಷನಾಶನಮ್ .. ೨೮..

ಕೃತ್ಯಾದಿಮಾಯಾಶಮನಂ ಸರ್ವಶತ್ರುವಿಮರ್ದನಮ್ .
ತ್ರಿಕಾಲಂ ಯಃ ಪಠೇದ್ಭಕ್ತ್ಯಾ ಸ ಭವೇತ್ಸರ್ವಸಿದ್ಧಿಭಾಕ್ .. ೨೯..

ಗಣೇಶ್ವರಪ್ರಸಾದೇನ ಲಭತೇ ಶಾಙ್ಕರಂ ಪದಮ್ .. ೩೦..

ಇತಿ ಆದಿತ್ಯಪುರಾಣೇ ಗಣೇಶಸ್ತೋತ್ರಮ್