ವಿಷ್ಣುಸೂಕ್ತಮ್

.. ವಿಷ್ಣುಸೂಕ್ತಮ್ ..

ಓಂ ವಿಷ್ಣೋ॒ರ್ನುಕಂ॑ ವೀ॒ರ್ಯಾ॑ಣಿ॒ ಪ್ರವೋ॑ಚಂ॒ ಯಃ ಪಾರ್ಥಿ॑ವಾನಿ ವಿಮ॒ಮೇ ರಜಾᳩಸಿ॒ .
ಯೋ ಅಸ್ಕ॑ಭಾಯ॒ದುತ್ತ॑ರᳩಸ॒ಧಸ್ಥಂ॑ ವಿಚಕ್ರಮಾ॒ಣಸ್ತ್ರೇ॒ಧೋರು॑ಗಾ॒ಯಃ ..೧..

ಓಂ ವಿಷ್ಣೋ॑ರ॒ರಾಟ॑ಮಸಿ॒ ವಿಷ್ಣೋಃ᳚ ಪೃ॒ಷ್ಠಮ॑ಸಿ॒ ವಿಷ್ಣೋಃ॒ ಶ್ನಪ್ತ್ರೇ᳚ಸ್ಥೋ॒
ವಿಷ್ಣೋ॒ಸ್ಸ್ಯೂರ॑ಸಿ॒ ವಿಷ್ಣೋ᳚ರ್ಧ್ರು॒ವಮ॑ಸಿ ವೈಷ್ಣ॒ವಮ॑ಸಿ॒ ವಿಷ್ಣ॑ವೇ ತ್ವಾ ..೨..

ತದ॑ಸ್ಯ ಪ್ರಿ॒ಯಮ॒ಭಿಪಾಥೋ॑ ಅಶ್ಯಾಮ್ . ನರೋ॒ ಯತ್ರ॑ ದೇವ॒ಯವೋ॒ ಮದ॑ನ್ತಿ.
ಉ॒ರು॒ಕ್ರ॒ಮಸ್ಯ॒ ಸ ಹಿ ಬನ್ಧು॑ರಿ॒ತ್ಥಾ. ವಿಷ್ಣೋಃ᳚ ಪ॒ದೇ ಪ॑ರ॒ಮೇ ಮಧ್ವ॒ ಉತ್ಥ್ಸಃ॑ ..೩..

ಪ್ರತದ್ವಿಷ್ಣು॑ಸ್ಸ್ತವತೇ ವೀ॒ರ್ಯಾ॑ಯ . ಮೃ॒ಗೋ ನ ಭೀ॒ಮಃ ಕು॑ಚ॒ರೋ ಗಿ॑ರಿ॒ಷ್ಠಾಃ.
ಯಸ್ಯೋ॒ರುಷು॑ ತ್ರಿ॒ಷು ವಿ॒ಕ್ರಮ॑ಣೇಷು. ಅಧಿ॑ಕ್ಷಿ॒ಯನ್ತಿ॒ ಭುವ॑ನಾನಿ॒ ವಿಶ್ವಾ᳚ ..೪..

ಪ॒ರೋ ಮಾತ್ರ॑ಯಾ ತ॒ನುವಾ॑ ವೃಧಾನ. ನ ತೇ॑ ಮಹಿ॒ತ್ವಮನ್ವ॑ಶ್ನುವನ್ತಿ..

ಉ॒ಭೇ ತೇ॑ ವಿದ್ಮ॒ ರಜ॑ಸಿ ಪೃಥಿ॒ವ್ಯಾ ವಿಷ್ಣೋ॑ ದೇವ॒ತ್ವಮ್. ಪ॒ರ॒ಮಸ್ಯ॑ ವಿಥ್ಸೇ ..೫..

ವಿಚ॑ಕ್ರಮೇ ಪೃಥಿ॒ವೀಮೇ॒ಷ ಏ॒ತಾಮ್. ಕ್ಷೇತ್ರಾ॑ಯ॒ ವಿಷ್ಣು॒ರ್ಮನು॑ಷೇ ದಶ॒ಸ್ಯನ್.
ಧ್ರು॒ವಾಸೋ॑ ಅಸ್ಯ ಕೀ॒ರಯೋ॒ ಜನಾ॑ಸಃ. ಊರು॒ಕ್ಷಿ॒ತಿᳩಸು॒ಜನಿ॑ಮಾಚಕಾರ ..೬..

ತ್ರಿರ್ದೇವಃ ಪೃಥಿ॒ವೀಮೇ॒ಷ ಏ॒ತಾಮ್. ವಿಚ॑ಕ್ರಮೇ ಶ॒ತರ್ಚ॑ಸಂ ಮಹಿ॒ತ್ವಾ .
ಪ್ರವಿ॑ಷ್ಣುರಸ್ತು ತ॒ವಸ॒ಸ್ತವೀ॑ಯಾನ್. ತ್ವೇ॒ಷᳩಹ್ಯ॑ಸ್ಯ॒ ಸ್ಥವಿ॑ರಸ್ಯ॒ ನಾಮ॑ ..೭..

ಅತೋ॑ ದೇ॒ವಾ ಅ॑ವನ್ತುನೋ॒ ಯತೋ॒ ವಿಷ್ಣು॑ರ್ವಿಚಕ್ರ॒ಮೇ. ಪೃ॒ಥಿ॒ವ್ಯಾಸ್ಸ॒ಪ್ತ ಧಾಮ॑ಭಿಃ .
ಇ॒ದಂ ವಿಷ್ಣು॒ರ್ವಿಚ॑ಕ್ರಮೇ ತ್ರೇ॒ಧಾ ನಿದ॑ಧೇ ಪ॒ದಮ್. ಸಮೂ॑ಢಮಸ್ಯ ಪಾᳩಸು॒ರೇ ..೮..

ತ್ರೀಣಿ॑ ಪ॒ದಾ ವಿಚ॑ಕ್ರಮೇ॒ ವಿಷ್ಣು॑ರ್ಗೋ॒ಪಾ ಅದಾ᳚ಭ್ಯಃ. ತತೋ॒ ಧರ್ಮಾ॑ಣಿ ಧಾ॒ರಯನ್॑.
ವಿಷ್ಣೋಃ॒ ಕರ್ಮಾ॑ಣಿ ಪಶ್ಯತ॒ ಯತೋ᳚ ವ್ರ॒ತಾನಿ॑ ಪಸ್ಪ॒ಶೇ. ಇನ್ದ್ರ॑ಸ್ಯ॒ ಯುಜ್ಯ॒ಸ್ಸಖಾ ..೯..

ತದ್ವಿಷ್ಣೋಃ᳚ ಪರ॒ಮಂ ಪ॒ದᳩಸದಾ॑ ಪಶ್ಯನ್ತಿ ಸೂ॒ರಯಃ॑. ದಿ॒ವೀವ॒ ಚಕ್ಷು॒ರಾತ॑ತಮ್.
ತದ್ವಿಪ್ರಾ॑ಸೋ ವಿಪ॒ನ್ಯವೋ॑ ಜಾಗೃ॒ವಾᳩಸ॒ಸ್ಸಮಿ॑ನ್ಧತೇ. ವಿಷ್ಣೋ॒ರ್ಯತ್ಪ॑ರ॒ಮಂ ಪ॒ದಮ್ ..೧೦..

ಪರ್ಯಾ᳚ಪ್ತ್ಯಾ ಅನ॑ನ್ತರಾಯಾಯ॒ ಸರ್ವ॑ಸ್ತೋಮೋಽತಿ ರಾ॒ತ್ರ ಉ॑ತ್ತ॒ಮ ಮಹ॑ರ್ಭವತಿ॒
ಸರ್ವ॒ಸ್ಯಾಪ್ತ್ಯೈ॒ ಸರ್ವ॑ಸ್ಯ॒ ಜಿತ್ಯೈ॒ ಸರ್ವ॑ಮೇ॒ವ ತೇನಾ᳚ಪ್ನೋತಿ॒ ಸರ್ವಂ॑ ಜಯತಿ ..೧೧..

.. ಓಂ ಶಾನ್ತಿಃ॒ ಶಾನ್ತಿಃ॒ ಶಾನ್ತಿಃ॑ ..