ವಕ್ರತುಣ್ಡಗಣೇಶಕವಚಮ್

ವಕ್ರತುಣ್ಡಗಣೇಶಕವಚಮ್

ಶ್ರೀ ಗಣೇಶಾಯ ನಮಃ .
ಮೌಲಿಂ ಮಹೇಶಪುತ್ರೋಽವ್ಯಾದ್ಭಾಲಂ ಪಾತು ವಿನಾಯಕಃ .
ತ್ರಿನೇತ್ರಃ ಪಾತು ಮೇ ನೇತ್ರೇ ಶೂರ್ಪಕರ್ಣೋಽವತು ಶ್ರುತೀ .. ೧..

ಹೇರಮ್ಬೋ ರಕ್ಷತು ಘ್ರಾಣಂ ಮುಖಂ ಪಾತು ಗಜಾನನಃ .
ಜಿಹ್ವಾಂ ಪಾತು ಗಣೇಶೋ ಮೇ ಕಣ್ಠಂ ಶ್ರೀಕಣ್ಠವಲ್ಲಭಃ .. ೨..

ಸ್ಕನ್ಧೌ ಮಹಾಬಲಃ ಪಾತು ವಿಘ್ನಹಾ ಪಾತು ಮೇ ಭುಜೌ .
ಕರೌ ಪರಶುಭೃತ್ಪಾತು ಹೃದಯಂ ಸ್ಕನ್ದಪೂರ್ವಜಃ .. ೩..

ಮಧ್ಯಂ ಲಮ್ಬೋದರಃ ಪಾತು ನಾಭಿಂ ಸಿನ್ದೂರಭೂಷಿತಃ .
ಜಘನಂ ಪಾರ್ವತೀಪುತ್ರಃ ಸಕ್ಥಿನೀ ಪಾತು ಪಾಶಭೃತ್ .. ೪..

ಜಾನುನೀ ಜಗತಾಂ ನಾಥೋ ಜಙ್ಘೇ ಮೂಷಕವಾಹನಃ .
ಪಾದೌ ಪದ್ಮಾಸನಃ ಪಾತು ಪಾದಾಧೋ ದೈತ್ಯದರ್ಪಹಾ .. ೫..

ಏಕದನ್ತೋಽಗ್ರತಃ ಪಾತು ಪೃಷ್ಠೇ ಪಾತು ಗಣಾಧಿಪಃ .
ಪಾರ್ಶ್ವಯೋರ್ಮೋದಕಾಹಾರೋ ದಿಗ್ವಿದಿಕ್ಷು ಚ ಸಿದ್ಧಿದಃ .. ೬..

ವ್ರಜತಸ್ತಿಷ್ಠತೋ ವಾಪಿ ಜಾಗ್ರತಃ ಸ್ವಪತೋಽಶ್ನತಃ .
ಚತುರ್ಥೀವಲ್ಲಭೋ ದೇವಃ ಪಾತು ಮೇ ಭುಕ್ತಿಮುಕ್ತಿದಃ .. ೭..

ಇದಂ ಪವಿತ್ರಂ ಸ್ತೋತ್ರಂ ಚ ಚತುರ್ಥ್ಯಾಂ ನಿಯತಃ ಪಠೇತ್ .
ಸಿನ್ದೂರರಕ್ತಃ ಕುಸುಮೈರ್ದೂರ್ವಯಾ ಪೂಜ್ಯ ವಿಘ್ನಪಮ್ .. ೮..

ರಾಜಾ ರಾಜಸುತೋ ರಾಜಪತ್ನೀ ಮನ್ತ್ರೀ ಕುಲಂ ಚಲಮ್ .
ತಸ್ಯಾವಶ್ಯಂ ಭವೇದ್ವಶ್ಯಂ ವಿಘ್ನರಾಜಪ್ರಸಾದತಃ .. ೯..

ಸಮನ್ತ್ರಯನ್ತ್ರಂ ಯಃ ಸ್ತೋತ್ರಂ ಕರೇ ಸಂಲಿಖ್ಯ ಧಾರಯೇತ್ .
ಧನಧಾನ್ಯಸಮೃದ್ಧಿಃ ಸ್ಯಾತ್ತಸ್ಯ ನಾಸ್ತ್ಯತ್ರ ಸಂಶಯಃ .. ೧೦..

ಅಸ್ಯ ಮನ್ತ್ರಃ .
ಐಂ ಕ್ಲೀಂ ಹ್ರೀಂ ವಕ್ರತುಣ್ಡಾಯ ಹುಂ .
ರಸಲಕ್ಷಂ ಸದೈಕಾಗ್ರ್ಯಃ ಷಡಙ್ಗನ್ಯಾಸಪೂರ್ವಕಮ್ .
ಹುತ್ವಾ ತದನ್ತೇ ವಿಧಿವದಷ್ಟದ್ರವ್ಯಂ ಪಯೋ ಘೃತಮ್ .. ೧೧..

ಯಂ ಯಂ ಕಾಮಮಭಿಧ್ಯಾಯನ್ ಕುರುತೇ ಕರ್ಮ ಕಿಞ್ಚನ .
ತಂ ತಂ ಸರ್ವಮವಾಪ್ನೋತಿ ವಕ್ರತುಣ್ಡಪ್ರಸಾದತಃ .. ೧೨..

ಭೃಗುಪ್ರಣೀತಂ ಯಃ ಸ್ತೋತ್ರಂ ಪಠತೇ ಭುವಿ ಮಾನವಃ .
ಭವೇದವ್ಯಾಹತೈಶ್ವರ್ಯಃ ಸ ಗಣೇಶಪ್ರಸಾದತಃ .. ೧೩..