వక్రతుణ్డగణేశకవచమ్

వక్రతుణ్డగణేశకవచమ్

శ్రీ గణేశాయ నమః .
మౌలిం మహేశపుత్రోఽవ్యాద్భాలం పాతు వినాయకః .
త్రినేత్రః పాతు మే నేత్రే శూర్పకర్ణోఽవతు శ్రుతీ .. 1..

హేరమ్బో రక్షతు ఘ్రాణం ముఖం పాతు గజాననః .
జిహ్వాం పాతు గణేశో మే కణ్ఠం శ్రీకణ్ఠవల్లభః .. 2..

స్కన్ధౌ మహాబలః పాతు విఘ్నహా పాతు మే భుజౌ .
కరౌ పరశుభృత్పాతు హృదయం స్కన్దపూర్వజః .. 3..

మధ్యం లమ్బోదరః పాతు నాభిం సిన్దూరభూషితః .
జఘనం పార్వతీపుత్రః సక్థినీ పాతు పాశభృత్ .. 4..

జానునీ జగతాం నాథో జఙ్ఘే మూషకవాహనః .
పాదౌ పద్మాసనః పాతు పాదాధో దైత్యదర్పహా .. 5..

ఏకదన్తోఽగ్రతః పాతు పృష్ఠే పాతు గణాధిపః .
పార్శ్వయోర్మోదకాహారో దిగ్విదిక్షు చ సిద్ధిదః .. 6..

వ్రజతస్తిష్ఠతో వాపి జాగ్రతః స్వపతోఽశ్నతః .
చతుర్థీవల్లభో దేవః పాతు మే భుక్తిముక్తిదః .. 7..

ఇదం పవిత్రం స్తోత్రం చ చతుర్థ్యాం నియతః పఠేత్ .
సిన్దూరరక్తః కుసుమైర్దూర్వయా పూజ్య విఘ్నపమ్ .. 8..

రాజా రాజసుతో రాజపత్నీ మన్త్రీ కులం చలమ్ .
తస్యావశ్యం భవేద్వశ్యం విఘ్నరాజప్రసాదతః .. 9..

సమన్త్రయన్త్రం యః స్తోత్రం కరే సంలిఖ్య ధారయేత్ .
ధనధాన్యసమృద్ధిః స్యాత్తస్య నాస్త్యత్ర సంశయః .. 10..

అస్య మన్త్రః .
ఐం క్లీం హ్రీం వక్రతుణ్డాయ హుం .
రసలక్షం సదైకాగ్ర్యః షడఙ్గన్యాసపూర్వకమ్ .
హుత్వా తదన్తే విధివదష్టద్రవ్యం పయో ఘృతమ్ .. 11..

యం యం కామమభిధ్యాయన్ కురుతే కర్మ కిఞ్చన .
తం తం సర్వమవాప్నోతి వక్రతుణ్డప్రసాదతః .. 12..

భృగుప్రణీతం యః స్తోత్రం పఠతే భువి మానవః .
భవేదవ్యాహతైశ్వర్యః స గణేశప్రసాదతః .. 13..