ಸ್ತೋತ್ರರತ್ನಮ್

ಶ್ರೀಮದ್ಯಾಮುನಾಚಾರ್ಯವಿರಚಿತಮ್
ಸ್ವಾದಯನ್ನಿಹ ಸರ್ವೇಷಾಂ ತ್ರಯ್ಯನ್ತಾರ್ಥಂ ಸುದುರ್ಗ್ರಹಮ್ .
ಸ್ತೋತ್ರಯಾಮಾಸ ಯೋಗೀನ್ದ್ರಸ್ತಂ ವನ್ದೇ ಯಾಮುನಾಹ್ವಯಮ್ ..

ನಮೋ ನಮೋ ಯಾಮುನಾಯ ಯಾಮುನಾಯ ನಮೋ ನಮಃ .
ನಮೋ ನಮೋ ಯಾಮುನಾಯ ಯಾಮುನಾಯ ನಮೋ ನಮಃ ..

ನಮೋ ಯಾಮುನಪಾದಾಬ್ಜರೇಣುಭಿಃ ಪಾವಿತಾತ್ಮನೇ .
ವಿದಿತಾಖಿಲ ವೇದ್ಯಾಯ ಗುರವೇ ವಿದಿತಾತ್ಮನೇ .. ..

ನಮೋಽಚಿನ್ತ್ಯಾದ್ಭುತಾಕ್ಲಿಷ್ಟ ಜ್ಞಾನವೈರಾಗ್ಯರಾಶಯೇ .
ನಾಥಾಯ ಮುನಯೇಽಗಾಧಭಗವದ್ಭಕ್ತಿಸಿನ್ಧವೇ .. ೧..

ತಸ್ಮೈ ನಮೋ ಮಧುಜಿದಙ್ಘ್ರಿಸರೋಜತತ್ತ್ವ
ಜ್ಞಾನಾನುರಾಗಮಹಿಮಾತಿಶಯಾನ್ತಸೀಮ್ನೇ .
ನಾಥಾಯ ನಾಥಮುನಯೇಽತ್ರ ಪರತ್ರ ಚಾಪಿ
ನಿತ್ಯಂ ಯದೀಯಚರಣೌ ಶರಣಂ ಮದೀಯಮ್ .. ೨..

ಭೂಯೋ ನಮೋಽಪರಿಮಿತಾಚ್ಯುತಭಕ್ತಿತತ್ತ್ವ-
ಜ್ಞಾನಾಮೃತಾಬ್ಧಿಪರಿವಾಹಶುಭೈರ್ವಚೋಭಿಃ .
ಲೋಕೇಽವತೀರ್ಣಪರಮಾರ್ಥಸಮಗ್ರಭಕ್ತಿ-
ಯೋಗಾಯ ನಾಥಮುನಯೇ ಯಮಿನಾಂ ವರಾಯ .. ೩..

ತತ್ತ್ವೇನ ಯಶ್ಚಿದಚಿದೀಶ್ವರತತ್ಸ್ವಭಾವ
ಭೋಗಾಪವರ್ಗತದುಪಾಯಗತೀರುದಾರಃ .
ಸನ್ದರ್ಶಯನ್ನಿರಮಮೀತ ಪುರಾಣರತ್ನಂ
ತಸ್ಮೈ ನಮೋ ಮುನಿವರಾಯ ಪರಾಶರಾಯ .. ೪..

ಮಾತಾ ಪಿತಾ ಯುವತಯಸ್ತನಯಾ ವಿಭೂತಿ
ಸ್ಸರ್ವಂ ಯದೇವ ನಿಯಮೇನ ಮದನ್ವಯಾನಾಮ್ .
ಆದ್ಯಸ್ಯ ನಃ ಕುಲಪತೇರ್ವಕುಲಾಭಿರಾಮಂ
ಶ್ರೀಮತ್ತದಙ್ಘ್ರಿಯುಗಲಂ ಪ್ರಣಮಾಮಿ ಮೂರ್ಧ್ನಾ .. ೫..

ಯನ್ಮೂರ್ಧ್ನಿ ಮೇ ಶ್ರುತಿಶಿರಸ್ಸು ಚ ಭಾತಿ ಯಸ್ಮಿ-
ನ್ನಸ್ಮನ್ಮನೋರಥಪಥಸ್ಸಕಲಸ್ಸಮೇತಿ .
ಸ್ತೋಷ್ಯಾಮಿ ನಃ ಕುಲಧನಂ ಕುಲದೈವತಂ ತ-
ತ್ಪಾದಾರವಿನ್ದಮರವಿನ್ದವಿಲೋಚನಸ್ಯ .. ೬..

ತತ್ತ್ವೇನ ಯಸ್ಯ ಮಹಿಮಾರ್ಣವಶೀಕರಾಣು-
ಶ್ಶಕ್ಯೋ ನ ಮಾತುಮಪಿ ಶರ್ವಪಿತಾಮಹಾದ್ಯೈಃ .
ಕರ್ತುಂ ತದೀಯಮಹಿಮಸ್ತುತಿಮುದ್ಯತಾಯ
ಮಹ್ಯಂ ನಮೋಽಸ್ತು ಕವಯೇ ನಿರಪತ್ರಪಾಯ .. ೭..

ಯದ್ವಾ ಶ್ರಮಾವಧಿ ಯಥಾಮತಿ ವಾಪ್ಯಶಕ್ತ-
ಸ್ಸ್ತೌಮ್ಯೇವಮೇವ ಖಲು ತೇಽಪಿ ಸದಾ ಸ್ತುವನ್ತಃ .
ವೇದಾಶ್ಚತುರ್ಮುಖಮುಖಾಶ್ಚ ಮಹಾರ್ಣವಾನ್ತಃ
ಕೋ ಮಜ್ಜತೋರಣುಕುಲಾಚಲಯೋರ್ವಿಶೇಷಃ .. ೮..

ಕಿಞ್ಚೈಷ ಶಕ್ತ್ಯತಿಶಯೇನ ನ ತೇಽನುಕಮ್ಪ್ಯ-
ಸ್ಸ್ತೋತಾಪಿ ತು ಸ್ತುತಿಕೃತೇನ ಪರಿಶ್ರಮೇಣ .
ತತ್ರ ಶ್ರುಮಸ್ತು ಸುಲಭೋ ಮಮ ಮನ್ದಬುದ್ಧೇ-
ರಿತ್ಯುದ್ಯಮೋಽಯಮುಚಿತೋ ಮಮ ಚಾಬ್ಜನೇತ್ರ .. ೯..

ನಾವೇಕ್ಷಸೇ ಯದಿ ತತೋ ಭುವನಾನ್ಯಮೂನಿ
ನಾಲಂ ಪ್ರಭೋ ಭವಿತುಮೇವ ಕುತಃ ಪ್ರವೃತ್ತಿಃ .
ಏವಂ ನಿಸರ್ಗಸುಹೃದಿ ತ್ವಯಿ ಸರ್ವಜನ್ತೋ-
ಸ್ಸ್ವಾಮಿನ್ವಿಚಿತ್ರಮಿದಮಾಶ್ರಿತವತ್ಸಲತ್ವಮ್ .. ೧೦..

ಸ್ವಾಭಾವಿಕಾನವಧಿಕಾತಿಶಯೇಶಿತೃತ್ವಂ
ನಾರಾಯಣ ತ್ವಯಿ ನ ಮೃಷ್ಯತಿ ವೈದಿಕಃ ಕಃ .
ಬ್ರಹ್ಮಾ ಶಿವಶ್ಶತಮಖಃ ಪರಮಸ್ವರಾಡಿ-
ತ್ಯೇತೇಽಪಿ ಯಸ್ಯ ಮಹಿಮಾರ್ಣವವಿಪ್ರುಷಸ್ತೇ .. ೧೧..

ಕಶ್ಶ್ರೀಶ್ಶ್ರಿಯಃ ಪರಮಸತ್ತ್ವಸಮಾಶ್ರಯಃ ಕಃ
ಕಃ ಪುಣ್ಡರೀಕನಯನಃ ಪುರುಷೋತ್ತಮಃ ಕಃ .
ಕಸ್ಯಾಯುತಾಯುತಶತೈಕಕಲಾಂಶಕಾಂಶೇ
ವಿಶ್ವಂ ವಿಚಿತ್ರಚಿದಚಿತ್ಪ್ರವಿಭಾಗವೃತ್ತಮ್ .. ೧೨..

ವೇದಾಪಹಾರಗುರುಪಾತಕದೈತ್ಯಪೀಡಾ-
ದ್ಯಾಪದ್ವಿಮೋಚನಮಹಿಷ್ಠಫಲಪ್ರದಾನೈಃ .
ಕೋಽನ್ಯಃ ಪ್ರಜಾಪಶುಪತೀ ಪರಿಪಾತಿ ಕಸ್ಯ
ಪಾದೋದಕೇನ ಸ ಶಿವಸ್ಸ್ವಶಿರೋಧೃತೇನ .. ೧೩..

ಕಸ್ಯೋದರೇ ಹರವಿರಿಞ್ಚಿಮುಖಃ ಪ್ರಪಞ್ಚಃ
ಕೋ ರಕ್ಷತೀಮಮಜನಿಷ್ಟ ಚ ಕಸ್ಯ ನಾಭೇಃ .
ಕ್ರಾನ್ತ್ವಾ ನಿಗೀರ್ಯ ಪುನರುದ್ಗಿರತಿ ತ್ವದನ್ಯಃ
ಕಃ ಕೇನ ವೈಷ ಪರವಾನಿತಿ ಶಕ್ಯಶಙ್ಕಃ .. ೧೪..

ತ್ವಾಂ ಶೀಲರೂಪಚರಿತೈಃ ಪರಮಪ್ರಕೃಷ್ಟ-
ಸತ್ತ್ವೇನ ಸಾತ್ವಿಕತಯಾ ಪ್ರಬಲೈಶ್ಚ ಶಾಸ್ತ್ರೈಃ .
ಪ್ರಖ್ಯಾತದೈವಪರಮಾರ್ಥವಿದಾಂ ಮತೈಶ್ಚ
ನೈವಾಸುರಪ್ರಕೃತಯಃ ಪ್ರಭವನ್ತಿ ಬೋದ್ಧುಮ್ .. ೧೫..

ಉಲ್ಲಙ್ಘಿತತ್ರಿವಿಧಸೀಮಸಮಾತಿಶಾಯಿ-
ಸಮ್ಭಾವನಂ ತವ ಪರಿವ್ರಢಿಮಸ್ವಭಾವಮ್ .
ಮಾಯಾಬಲೇನ ಭವತಾಽಪಿ ನಿಗೂಹ್ಯಮಾನಂ
ಪಶ್ಯನ್ತಿ ಕೇಚಿದನಿಶಂ ತ್ವದನನ್ಯಭಾವಾಃ .. ೧೬..

ಯದಣ್ಡಮಣ್ಡಾನ್ತರಗೋಚರಂ ಚ ಯದ್ದ-
ಶೋತ್ತರಾಣ್ಯಾವರಣಾನಿ ಯಾನಿ ಚ .
ಗುಣಾಃ ಪ್ರಧಾನಂ ಪುರುಷಃ ಪರಮ್ಪದಂ
ಪರಾತ್ಪರಂ ಬ್ರಹ್ಮ ಚ ತೇ ವಿಭೂತಯಃ .. ೧೭..

ವಶೀ ವದಾನ್ಯೋ ಗುಣವಾನೃಜುಶ್ಶುಚಿ-
ರ್ಮೃದುರ್ದಯಾಲುರ್ಮಧುರಸ್ಸ್ಥಿರಸ್ಸಮಃ .
ಕೃತೀ ಕೃತಜ್ಞಸ್ತ್ವಮಸಿ ಸ್ವಭಾವತ-
ಸ್ಸಮಸ್ತಕಲ್ಯಾಣಗುಣಾಮೃತೋದಧಿಃ .. ೧೮..

ಉಪರ್ಯುಪರ್ಯಬ್ಜಭುವೋಽಪಿ ಪೂರುಷಾ-
ನ್ಪ್ರಕಲ್ಪ್ಯ ತೇ ಯೇ ಶತಮಿತ್ಯನುಕ್ರಮಾತ್ .
ಗಿರಸ್ತ್ವದೇಕೈಕಗುಣಾವಧೀಪ್ಸಯಾ
ಸದಾಸ್ಥಿತಾ ನೋದ್ಯಮತೋಽತಿಶೇರತೇ .. ೧೯..

ತ್ವದಾಶ್ರಿತಾನಾಂ ಜಗದುದ್ಭವಸ್ಥಿತಿ-
ಪ್ರಣಾಶಸಂಸಾರವಿಮೋಚನಾದಯಃ .
ಭವನ್ತಿ ಲೀಲಾವಿಧಯಶ್ಚ ವೈದಿಕಾ-
ಸ್ತ್ವದೀಯಗಮ್ಭೀರಮನೋಽನುಸಾರಿಣಃ .. ೨೦..

ನಮೋ ನಮೋ ವಾಙ್ಮನಸಾತಿಭೂಮಯೇ
ನಮೋ ನಮೋ ವಾಙ್ಮನಸೈಕಭೂಮಯೇ .
ನಮೋ ನಮೋಽನನ್ತಮಹಾವಿಭೂತಯೇ
ನಮೋ ನಮೋಽನನ್ತದಯೈಕಸಿನ್ಧವೇ .. ೨೧..

ನ ಧರ್ಮನಿಷ್ಠೋಽಸ್ಮಿ ನ ಚಾತ್ಮವೇದೀ
ನ ಭಕ್ತಿಮಾಂಸ್ತ್ವಚ್ಚರಣಾರವಿನ್ದೇ .
ಅಕಿಞ್ಚನೋಽನನ್ಯಗತಿಶ್ಶರಣ್ಯಃ
ತ್ವತ್ಪಾದಮೂಲಂ ಶರಣಂ ಪ್ರಪದ್ಯೇ .. ೨೨..

ನ ನಿನ್ದಿತಂ ಕರ್ಮ ತದಸ್ತಿ ಲೋಕೇ
ಸಹಸ್ರಶೋ ಯನ್ನ ಮಯಾ ವ್ಯಧಾಯಿ .
ಸೋಽಹಂ ವಿಪಾಕಾವಸರೇ ಮುಕುನ್ದ
ಕ್ರನ್ದಾಮಿ ಸಮ್ಪ್ರತ್ಯಗತಿಸ್ತವಾಗ್ರೇ .. ೨೩..

ನಿಮಜ್ಜತೋಽನನ್ತಭವಾರ್ಣವಾನ್ತ-
ಶ್ಚಿರಾಯ ಮೇ ಕೂಲಮಿವಾಸಿ ಲಬ್ಧಃ .
ತ್ವಯಾಪಿ ಲಬ್ಧಂ ಭಗವನ್ನಿದಾನೀ-
ಮನುತ್ತಮಂ ಪಾತ್ರಮಿದಂ ದಯಾಯಾಃ .. ೨೪..

ಅಭೂತಪೂರ್ವಂ ಮಮ ಭಾವಿ ಕಿಂ ವಾ
ಸರ್ವಂ ಸಹೇ ಮೇ ಸಹಜಂ ಹಿ ದುಃಖಮ್ .
ಕಿನ್ತು ತ್ವದಗ್ರೇ ಶರಣಾಗತಾನಾಂ
ಪರಾಭವೋ ನಾಥ ನ ತೇಽನುರೂಪಃ .. ೨೫..

ನಿರಾಸಕಸ್ಯಾಪಿ ನ ತಾವದುತ್ಸಹೇ
ಮಹೇಶ ಹಾತುಂ ತವ ಪಾದಪಙ್ಕಜಮ್ .
ರೂಷಾ ನಿರಸ್ತೋಽಪಿ ಶಿಶುಸ್ಸ್ತನನ್ಧಯೋ
ನ ಜಾತು ಮಾತುಶ್ಚರಣೌ ಜಿಹಾಸತಿ .. ೨೬..

ತವಾಮೃತಸ್ಯನ್ದಿನಿ ಪಾದಪಙ್ಕಜೇ
ನಿವೇಶಿತಾತ್ಮಾ ಕಥಮನ್ಯದಿಚ್ಛತಿ .
ಸ್ಥಿತೇಽರವಿನ್ದೇ ಮಕರನ್ದನಿರ್ಭರೇ
ಮಧುವ್ರತೋ ನೇಕ್ಷುರಕಂ ಹಿ ವೀಕ್ಷತೇ .. ೨೭..

ತ್ವದಙ್ಘ್ರಿಮುದ್ದಿಶ್ಯ ಕದಾಪಿ ಕೇನಚಿ-
ದ್ಯಥಾ ತಥಾ ವಾಽಪಿ ಸಕೃತ್ಕೃತೋಽಞ್ಚಲಿಃ .
ತದೈವ ಮುಷ್ಣಾತ್ಯಶುಭಾನ್ಯಶೇಷತ-
ಶ್ಶುಭಾನಿ ಪುಷ್ಣಾತಿ ನ ಜಾತು ಹೀಯತೇ .. ೨೮..

ಉದೀರ್ಣಸಂಸಾರದವಾಶುಶುಕ್ಷಣಿಂ
ಕ್ಷಣೇನ ನಿರ್ವ್ಯಾಪ್ಯ ಪರಾಂ ಚ ನಿರ್ವೃತಿಮ್ .
ಪ್ರಯಚ್ಛತಿ ತ್ವಚ್ಚರಣಾರುಣಾಮ್ಬುಜ-
ದ್ವಯಾನುರಾಗಾಮೃತಸಿನ್ಧುಶೀಕರಃ .. ೨೯..

ವಿಲಾಸವಿಕ್ರಾನ್ತಪರಾವರಾಲಯಂ
ನಮಸ್ಯದಾರ್ತಿಕ್ಷಪಣೇ ಕೃತಕ್ಷಣಮ್ .
ಧನಂ ಮದೀಯಂ ತವ ಪಾದಪಙ್ಕಜಂ
ಕದಾ ನು ಸಾಕ್ಷಾತ್ಕರವಾಣಿ ಚಕ್ಷುಷಾ .. ೩೦..

ಕದಾ ಪುನಶ್ಶಙ್ಖರಥಾಙ್ಗಕಲ್ಪಕ
ಧ್ವಜಾರವಿನ್ದಾಙ್ಕುಶವಜ್ರಲಾಞ್ಛನಮ್ .
ತ್ರಿವಿಕ್ರಮ ತ್ವಚ್ಚರಣಾಮ್ಬುಜದ್ವಯಂ
ಮದೀಯಮೂರ್ಧಾನಮಲಙ್ಕರಿಷ್ಯತಿ .. ೩೧..

ವಿರಾಜಮಾನೋಜ್ಜ್ವಲಪೀತವಾಸಸಂ
ಸ್ಮಿತಾತಸೀಸೂನಸಮಾಮಲಚ್ಛವಿಮ್ .
ನಿಮಗ್ನನಾಭಿಂ ತನುಭಧ್ಯಮುನ್ನತಂ
ವಿಶಾಲವಕ್ಷಸ್ಸ್ಥಲಶೋಭಿಲಕ್ಷಣಮ್ .. ೩೨..

ಚಕಾಸತಂ ಜ್ಯಾಕಿಣಕರ್ಕಶೈಶ್ಶುಭೈ
ಶ್ಚತುರ್ಭಿರಾಜಾನುವಿಲಮ್ಬಿಭಿರ್ಭುಜೈಃ .
ಪ್ರಿಯಾವತಂಸೋತ್ಪಲಕರ್ಣಭೂಷಣ-
ಶ್ಲಧಾಲಕಾಬನ್ಧವಿಮರ್ದಶಂಸಿಭಿಃ .. ೩೩..

ಉದಗ್ರಪೀನಾಂಸವಿಲಮ್ಬಿಕುಣ್ಡಲಾ-
ಲಕಾವಲೀಬನ್ಧುರಕಮ್ಬುಕನ್ಧರಮ್ .
ಮುಖಶ್ರಿಯಾ ನ್ಯಕ್ಕೃತಪೂರ್ಣನಿರ್ಮಲಾ-
ಮೃತಾಂಶುಬಿಮ್ಬಾಮ್ಬುರುಹೋಜ್ಜ್ವಲಶ್ರಿಯಮ್ .. ೩೪..

ಪ್ರಬುದ್ಧಮುಗ್ಧಾಮ್ಬುಜಚಾರುಲೋಚನಂ
ಸವಿಭ್ರಮಭ್ರೂಲತಮುಜ್ಜ್ವಲಾಧರಮ್ .
ಶುಚಿಸ್ಮಿತಂ ಕೋಮಲಗಣ್ಡಮುನ್ನಸಂ
ಲಲಾಟಪರ್ಯನ್ತವಿಲಮ್ಬಿತಾಲಕಮ್ .. ೩೫..

ಸ್ಫುರತ್ಕಿರೀಟಾಙ್ಗದಹಾರಕಣ್ಠಿಕಾ
ಮಣೀನ್ದ್ರಕಾಞ್ಜೀಗುಣನೂಪುರಾದಿಭಿಃ .
ರಥಾಙ್ಗಶಙ್ಖಾಸಿಗದಾಧನುರ್ವರೈ-
ರ್ಲಸತ್ತುಲಸ್ಯಾವನಮಾಲಯೋಜ್ಜ್ವಲಮ್ .. ೩೬..

ಚಕರ್ಥ ಯಸ್ಯಾ ಭವನಂ ಭುಜಾನ್ತರಂ
ತವ ಪ್ರಿಯಂ ಧಾಮ ಯದೀಯಜನ್ಮಭೂಃ .
ಜಗತ್ಸಮಸ್ತಂ ಯದಪಾಙ್ಗಸಂಶ್ರಯಂ
ಯದರ್ಥಮಮ್ಭೋಧಿರಮನ್ಥ್ಯಬನ್ಧಿ ಚ .. ೩೭..

ಸ್ವವೈಶ್ವರೂಪ್ಯೇಣ ಸದಾಽನುಭೂತಯಾ-
ಪ್ಯಪೂರ್ವವದ್ವಿಸ್ಮಯಮಾದಧಾನಯಾ .
ಗುಣೇನ ರೂಪೇಣ ವಿಲಾಸಚೇಷ್ಟಿತೈ-
ಸ್ಸದಾ ತವೈವೋಚಿತಯಾ ತವ ಶ್ರಿಯಾ .. ೩೮..

ತಯಾ ಸಹಾಸೀನಮನನ್ತಭೋಗಿನಿ
ಪ್ರಕೃಷ್ಟವಿಜ್ಞಾನಬಲೈಕಧಾಮನಿ .
ಫಣಾಮಣಿತ್ರಾತಮಯೂಖಮಣ್ಡಲ-
ಪ್ರಕಾಶಮಾನೋದರದಿವ್ಯಧಾಮನಿ .. ೩೯..

ನಿವಾಸಶಯ್ಯಾಸನಪಾದುಕಾಂಶುಕೋ-
ಪಧಾನವರ್ಷಾತಪವಾರಣಾದಿಭಿಃ .
ಶರೀರಭೇದೈಸ್ತವ ಶೇಷತಾಂ ಗತೈ-
ರ್ಯಥೋಚಿತಂ ಶೇಷ ಇತೀರ್ಯತೇ ಜನೈಃ .. ೪೦..

ದಾಸಸ್ಸಖಾ ವಾಹನಮಾಸನಂ ಧ್ವಜೋ-
ಯಸ್ತೇ ವಿತಾನಂ ವ್ಯಜನಂ ತ್ರಯೀಮಯಃ .
ಉಪಸ್ಥಿತಂ ತೇನ ಪುರೋ ಗರುತ್ಮತಾ
ತ್ವದಙ್ಘ್ರಿಸಮ್ಮರ್ದಕಿಣಾಙ್ಕಶೋಭಿನಾ .. ೪೧..

ತ್ವದೀಯಭುಕ್ತೋಜ್ಝಿತಶೇಷಭೋಜಿನಾ
ತ್ವಯಾ ನಿವೃಷ್ಟಾತ್ಮಭರೇಣ ಯದ್ಯಥಾ .
ಪ್ರಿಯೇಣ ಸೇನಾಪತಿನಾ ನ್ಯವೇದಿ ತತ್ತ-
ಥಾಽನುಜಾನನ್ತಮುದಾರವೀಕ್ಷಣೈಃ .. ೪೨..

ಹತಾಖಿಲಕ್ಲೇಶಮಲೈಸ್ಸ್ವಭಾವತ-
ಸ್ಸದಾನುಕೂಲ್ಯೈಕರಸೈಸ್ತವೋಚಿತೈಃ .
ಗೃಹೀತತತ್ತತ್ಪರಿಚಾರಸಾಧನೈ
ರ್ನಿಷೇವ್ಯಮಾಣಂ ಸಚಿವೈರ್ಯಥೋಚಿತಮ್ .. ೪೩..

ಅಪೂರ್ವನಾನಾರಸಭಾವನಿರ್ಭರ-
ಪ್ರಬದ್ಧಯಾ ಮುಗ್ಧವಿದಗ್ಧಲೀಲಯಾ .
ಕ್ಷಣಾಣುವತ್ಕ್ಷಿಪ್ತಪರಾದಿಕಾಲಯಾ
ಪ್ರಹರ್ಷಯನ್ತಂ ಮಹಿಷೀಂ ಮಹಾಭುಜಮ್ .. ೪೪..

ಅಚಿನ್ತ್ಯದಿವ್ಯಾದ್ಭುತನಿತ್ಯಯೌವನ-
ಸ್ವಭಾವಲಾವಣ್ಯಮಯಾಮೃತೋದಧಿಮ್ .
ಶ್ರಿಯಶ್ಶ್ರಿಯಂ ಭಕ್ತಜನೈಕಜೀವಿತಂ
ಸಮರ್ಥಮಾಪತ್ಸಸ್ಖಮರ್ಥಿಕಲ್ಪಕಮ್ .. ೪೫..

ಭವನ್ತಮೇವಾನುಚರನ್ನಿರನ್ತರ-
ಪ್ರಶಾನ್ತನಿಶ್ಶೇಷಮನೋರಥಾನ್ತರಃ .
ಕದಾಹಮೈಕಾನ್ತಿಕನಿತ್ಯಕಿಙ್ಕರಃ
ಪ್ರಹರ್ಷಯಿಷ್ಯಾಮಿ ಸನಾಥಜೀವಿತಃ .. ೪೬..

ಧಿಗಶುಚಿಮವಿನೀತಂ ನಿರ್ದಯಂ ಮಾಮಲಜ್ಜಂ
ಪರಮಪುರುಷ ಯೋಽಹಂ ಯೋಗಿವರ್ಯಾಗ್ರಗಣ್ಯೈಃ .
ವಿಧಿಶಿವಸನಕಾದ್ಯೈರ್ಧ್ಯಾತುಮತ್ಯನ್ತದೂರಂ
ತವ ಪರಿಜನಭಾವಂ ಕಾಮಯೇ ಕಾಮವೃತ್ತಃ .. ೪೭..

ಅಪರಾಧಸಹಸ್ರಭಾಜನಂ ಪತಿತಂ ಭೀಮಭವಾರ್ಣವೋದರೇ .
ಅಗತಿಂ ಶರಣಾಗತಂ ಹರೇ ಕೃಪಯಾ ಕೇವಲಮಾತ್ಮಸಾತ್ಕುರು .. ೪೮..

ಅವಿವೇಕಘನಾನ್ಧದಿಙ್ಮುಖೇ ಬಹುಧಾ ಸನ್ತತದುಃಖವರ್ಷಿಣಿ .
ಭಗವನ್ಭವದುರ್ದಿನೇ ಪಥಸ್ಖಲಿತಂ ಮಾಮವಲೋಕಯಾಚ್ಯುತ .. ೪೯..

ನ ಮೃಷಾ ಪರಮಾರ್ಥಮೇವ ಮೇ ಶೃಣು ವಿಜ್ಞಾಪನಮೇಕಮಗ್ರತಃ .
ಯದಿ ಮೇ ನ ದಯಿಷ್ಯಸೇ ತತೋ ದಯನೀಯಸ್ತವ ನಾಥ ದುರ್ಲಭಃ .. ೫೦..

ತದಹಂ ತ್ವದೃತೇ ನ ನಾಥವಾನ್ಮದೃತೇ ತ್ವಂ ದಯನೀಯವಾನ್ನ ಚ .
ವಿಧಿನಿರ್ಮಿತಮೇತದನ್ಯಂ ಭಗವನ್ಪಾಲಯ ಮಾ ಸ್ಮ ಜೈಹ್ಮ್ಯಯಾ .. ೫೧..

ವಪುರಾದಿಷು ಯೋಽಪಿ ಕೋಽಪಿ ವಾ ಗುಣತೋಽಸಾನಿ ಯಥಾತಥಾವಿಧಃ .
ತದಯಂ ತವ ಪಾದಪದ್ಮಯೋರಹಮದ್ಯೈವ ಮಯಾ ಸಮರ್ಪಿತಃ .. ೫೨..

ಮಮ ನಾಥ ಯದಸ್ತಿ ಯೋಽಸ್ಮ್ಯಹಂ ಸಕಲಂ ತದ್ಧಿ ತವೈವ ಮಾಧವ .
ನಿಯತಸ್ವಮಿತಿ ಪ್ರಬುದ್ಧಧೀರಥವಾ ಕಿನ್ನು ಸಮರ್ಪಯಾಮಿ ತೇ .. ೫೩..

ಅವಬೋಧಿತವಾನಿಮಾಂ ಯಥಾ ಮಯಿ ನಿತ್ಯಾಂ ಭವದೀಯತಾಂ ಸ್ವಯಮ್ .
ಕೃಪಯೈವಮನನ್ಯಭೋಗ್ಯತಾಂ ಭಗವನ್ಭಕ್ತಿಮಪಿ ಪ್ರಯಚ್ಛ ಮೇ .. ೫೪..

ತವದಾಸ್ಯಸುಖೈಕಸಙ್ಗಿನಾಂ ಭವನೇಷ್ವಸ್ತ್ವಪಿ ಕೀಟಜನ್ಮ ಮೇ .
ಇತರಾವಸಥೇಷು ಮಾಸ್ಮ ಭೂದಪಿ ಮೇ ಜನ್ಮ ಚತುರ್ಮುಖಾತ್ಮನಾ .. ೫೫..

ಸಕೃತ್ತ್ವದಾಕಾರವಿಲೋಕನಾಶಯಾ
ತೃಣೀಕೃತಾನುತ್ತಮಭುಕ್ತಿಮುಕ್ತಿಭಿಃ .
ಮಹಾತ್ಮಭಿರ್ಮಾಮವಲೋಕ್ಯತಾಂ ನಯ
ಕ್ಷಣೇಽಪಿ ತೇ ಯದ್ವಿರಹೋಽತಿದುಸ್ಸಹಃ .. ೫೬..

ನ ದೇಹಂ ನ ಪ್ರಾಣಾನ್ನ ಚ ಸುಖಮಶೇಷಾಭಿಲಷಿತಂ
ನ ಚಾತ್ಮಾನಂ ನಾನ್ಯತ್ಕಿಮಪಿ ತವ ಶೇಷತ್ವವಿಭವಾತ್ .
ಬಹಿರ್ಭೂತಂ ನಾಥ ಕ್ಷಣಮಪಿ ಸಹೇ ಯಾತು ಶತಥಾ
ವಿನಾಶಂ ತತ್ಸತ್ಯಂ ಮಧುಮಥನ ವಿಜ್ಞಾಪನಮಿದಮ್ .. ೫೭..

ದುರನ್ತಸ್ಯಾನಾದೇರಪರಿಹರಣೀಯಸ್ಯ ಮಹತೋ
ವಿಹೀನಾಚಾರೋಽಹಂ ನೃಪಶುರಶುಭಸ್ಯಾಸ್ಪದಮಪಿ .
ದಯಾಸಿನ್ಧೋ ಬನ್ಧೋ ನಿರವಧಿಕವಾತ್ಸಲ್ಯಜಲಧೇ .
ತವ ಸ್ಮಾರಂ ಸ್ಮಾರಂ ಗುಣಗಣಮಿತೀಚ್ಛಾಮಿ ಗತಭೀಃ .. ೫೮..

ಅನಿಚ್ಛನ್ನಪ್ಯೇವಂ ಯದಿ ಪುನರಿತೀಚ್ಛನ್ನಿವ ರಜ-
ಸ್ತಮಶ್ಛನ್ನಚ್ಛದ್ಮಸ್ತುತಿವಚನಭಙ್ಗೀಮರಚಯಮ್ .
ತಥಾಪೀತ್ಥಂ ರೂಪಂ ವಚನಮವಲಮ್ಬ್ಯಾಪಿ ಕೃಪಯಾ
ತ್ವಮೇವೈವಂ ಭೂತಂ ಧರಣಿಧರ ಮೇ ಶಿಕ್ಷಯ ಮನಃ .. ೫೯..

ಪಿತಾ ತ್ವಂ ಮಾತಾ ತ್ವಂ ದಯಿತ ತನಯಸ್ತ್ವಂ ಪ್ರಿಯಸುಹೃ-
ತ್ತ್ವಮೇವ ತ್ವಂ ಮಿತ್ರಂ ಗುರುರಸಿ ಗತಿಶ್ಚಾಸಿ ಜಗತಾಮ್ .
ತ್ವದೀಯಸ್ತ್ವದ್ಭೃತ್ಯಸ್ತವ ಪರಿಜನಸ್ತ್ವದ್ಗತಿರಹಂ
ಪ್ರಪನ್ನಶ್ಚೈವಂ ಸತ್ಯಹಮಪಿ ತವೈವಾಸ್ಮಿ ಹಿ ಭರಃ .. ೬೦..

ಜನಿತ್ವಾಽಹಂ ವಂಶೇ ಮಹತಿ ಜಗತಿ ಖ್ಯಾತಯಶಸಾಂ
ಶುಚೀನಾಂ ಯುಕ್ತಾನಾಂ ಗುಣಪುರುಷತತ್ತ್ವಸ್ಥಿತಿವಿದಾಮ್ .
ನಿಸರ್ಗಾದೇವ ತ್ವಚ್ಚರಣಕಮಲೈಕಾನ್ತಮನಸಾ-
ಮಧೋಧಃ ಪಾಪಾತ್ಮಾ ಶರಣದ ನಿಮಜ್ಜಾಮಿ ತಮಸಿ .. ೬೧..

ಅಮರ್ಯಾದಃ ಕ್ಷುದ್ರಶ್ಚಲಮತಿರಸೂಯಾಪ್ರಸವಭೂಃ
ಕೃತಘ್ನೋ ದುರ್ಮಾನೀ ಸ್ಮರಪರವಶೋ ವಞ್ಚನಪರಃ .
ನೃಶಂಸಃ ಪಾಪಿಷ್ಟಃ ಕಥಮಹಮಿತೋ ದುಃಖಜಲಧೇ-
ರಪಾರಾದುತ್ತೀರ್ಣಸ್ತವ ಪರಿಚರೇಯಂ ಚರಣಯೋಃ .. ೬೨..

ರಘುವರ ಯದಭೂಸ್ತ್ವಂ ತಾದೃಶೋ ವಾಯಸಸ್ಯ
ಪ್ರಣತ ಇತಿ ದಯಾಲುರ್ಯಚ್ಚ ಚೈದ್ಯಸ್ಯ ಕೃಷ್ಣಃ .
ಪ್ರತಿಭವಮಪರಾದ್ಧುರ್ಮುಗ್ಧಸಾಯುಜ್ಯದೋಽಭೂ-
ರ್ವದ ಕಿಮಪದಮಾಗಸ್ತಸ್ಯ ತೇಽಸ್ತಿ ಕ್ಷಮಾಯಾಃ .. ೬೩..

ನನು ಪ್ರಪನ್ನಸ್ಸಕೃದೇವ ನಾಥ
ತವಾಹಮಸ್ಮೀತಿ ಚ ಯಾಚಮಾನಃ .
ತವಾನುಕಮ್ಪ್ಯಸ್ಸ್ಮರತಃ ಪ್ರತಿಜ್ಞಾಂ
ಮದೇಕವರ್ಜಂ ಕಿಮಿದಂ ವ್ರತಂ ತೇ .. ೬೪..

ಅಕೃತ್ರಿಮತ್ವಚ್ಚರಣಾರವಿನ್ದ-
ಪ್ರೇಮಪ್ರಕರ್ಷಾವಧಿಮಾತ್ಮವನ್ತಮ್ .
ಪಿತಾಮಹಂ ನಾಥಮುನಿಂ ವಿಲೋಕ್ಯ
ಪ್ರಸೀದ ಮದ್ವೃತ್ತಮಚಿನ್ತಯಿತ್ವಾ .. ೬೫..

ಯತ್ಪಾದಾಮ್ಭೋರುಹಧ್ಯಾನವಿಧ್ವಸ್ತಾಶೇಷಕಲ್ಮಷಃ .
ವಸ್ತುತಾಮುಪಯಾತೋಽಹಂ ಯಾಮುನೇಯಾಂ ನಮಾಮಿತಮ್ .. ೬೬..