శ్రీవినాయకస్తోత్రమ్

శ్రీవినాయకస్తోత్రమ్
గణ్డస్థలద్ధరాగలన్మదవారిధారా
సౌరభ్యలుభ్యదలిడిమ్భకగుమ్భనాదైః .
వాచాలితాఖిలదిశం వరదం నతానాం
వన్దామహే గజముఖం వయమాదిదేవమ్ .. 1..

గర్విష్ఠఖేచరపురత్రయనాథదైత్య-
భఙ్గోద్యతః స్వయమయం పరమేశ్వరోఽపి .
ఆదౌ యమేవ పరిపూజ్య విధూతసర్వ-
విఘ్నో జిగాయ తమిమం వయమాశ్రయామః .. 2..

ప్రణష్టవర్ణతతిపఞ్చమషష్ఠవర్ణ-
యుగ్మావిధేయవిరహాదతిమాత్రదీనమ్ .
ప్రాయేత మామనుదినం నిజపుష్కరాత్త-
కుమ్భస్థరత్ననికరానభివృధ్య దేవః .. 3..

పద్మాసహాయగిరిజాపతిరత్యవాగధీశ-
దేవాదినాకనిలయైర్వనితాసహాయైః .
అన్వాస్యమానమఖిలాస్వపి దిక్షు సిద్ధ -
లక్ష్మీసహాయమనిశం శరణం భజామః .. 4..

తన్వీత నః శుభమతిం తరుణారుణశ్రీ
దాయాదకాయరుచిరిన్దుక్తంససూనుః .
ప్రత్యూహభఙ్గపటుభిః సహితో వధూభి
రామోదముఖ్యనిజపారిషదైః సమేతః .. 5..

యే చిన్తయన్తి నిమిషార్ధమపి ప్రభో త్వాం-
శ్రీమానిభానన విధూతభిదాన్ధకారాః .
బాభాసమానమనిశం హృదయే సముద్య-
దానన్దబోధఘనమేకమమీ నమస్యాః .. 6..

న శ్రౌతకర్మసు రతిర్న చ బోధనిష్ఠా
స్వామిన్నుమాసుత న జాతు కృతాపి పూజా .
నిస్సారవైషయికసౌఖ్యదురాశయైవ
నీతాన్యహాన్యహహ కిం కథయే దయస్వ .. 7..

వస్త్రాజ్యదుగ్ధమధుభిః సితశర్కరాద్యైః
పుణ్డ్రేక్షుఖణ్డకదలీఫలనారికేలైః .
లాజైశ్చ మోదకయుతైః పరిపూజితుం త్వాం (లాభైశ్చ)
ధన్యాః క్షమాః పరమహం శరణం ప్రపద్యే .. 8..

సమీరైః ప్రోచ్చణ్డైః శ్రవణయుగలీచాలనభవై-
ర్నతానాం ప్రత్యూహచ్ఛలజలదరాశిం విదలయన్ .
కటాయోగోదశ్చన్మదసురభిలాదోషభువనః
శివాచన్ద్రోత్సప్రణయపరిణామోఽవతు గజః .. 9..