శ్రీస్తవః
.. శ్రీస్తవః ..
శ్రీవత్సచిహ్నమిశ్రేభ్యో నమ ఉక్తిమధీమహే .
యదుక్తయస్త్రయీకణ్ఠే యాన్తి మఙ్గళసూత్రతామ్ ..1 ..
స్వస్తి శ్రీర్దిశతాదశేషజగతాం సర్గోపసర్గస్థితీ:
స్వర్గ దుర్గతిమాపవర్గికపదం సర్వం చ కుర్వన్హరిః .
యస్యా వీక్ష్య ముఖం తదిఙ్గితపరాధీనో విధత్తేఽఖిలం
క్రీడేయం ఖలు నాన్యథాఽస్య రసదా స్యాదైకరస్యాత్తయా ..2 ..
హే శ్రీర్దేవి! సమస్తలోకజననీం త్వాం స్తోతుమీహామహే
యుక్తాం భావయ భారతీ ప్రగుణయ ప్రేమప్రధానాం ధియమ్ .
భక్తిం బన్ధయ నన్దయాశ్రితమిమం దాసం జనం తావకం
లక్ష్యం లక్ష్మి! కటాక్షవీచివిసృతే స్తే స్యామ చామీ వయమ్ .. 3 ..
స్తోత్రం నామ కిమామనన్తి కవయో యద్యన్యదీయాన్గుణాన్
అన్యత్ర త్వసతోఽధిరోప్య ఫణితిస్సా తర్హి వన్ధ్యా త్వయి .
సమ్యక్సత్యగుణాభివర్ణనమథో బ్రూయుః కథం తాదృశీ
వాగ్వాచస్పతినాపి శక్యరచనా త్వత్సద్గుణార్ణోనిధౌ .. 4 ..
యే వాచాం మనసాం చ దుర్గ్రహతయా ఖ్యాతా గుణాస్తావకాః
తానేవ ప్రతి సామ్బూ జిహ్వముదితా హై మామికా భారతీ.
హాస్యం తత్తు న మన్మహే న హి చకోర్యేకాఽఖిలాం చన్ద్రికాం
నాలం పాతుమితి ప్రగృహ్య రసనామాసీత సత్యాం తృషి ... 5 ..
క్షోదీయానపి దుష్టబుద్ధిరపి నిరస్నేహోఽప్యనీహోఽపి తే
కీర్తి దేవి! లిహనహం న చ విభేమ్యజ్ఞో న జిహేమి చ .
దుష్యేత్సా తు న తావతా నహి శునా లీఢాపి భాగీరథీ
దుష్యేచ్ఛ్వాపి న లజ్జతే న చ బిభేత్యార్తిస్తు శామ్యేచ్ఛునః.. 6 ..
ఐశ్వర్యం మహదేవ వాల్పమథవా దృశ్యేత పుసాం హి యత్
తల్లక్ష్మ్యాః సముదీక్షణాత్తవ యతః సార్వత్రికం వర్తతే.
తేనైతేన న విస్మయేమహి జగన్నాథోఽపి నారాయణో
ధన్యం మన్యత ఈక్షణాత్తవ యతః స్వాత్మానమాత్మేశ్వరః .. 7 ..
ఐశ్వర్యం యదశేషపుంసి యదిదం సౌన్దర్యలావణ్యయోః
రూపం యచ్చ హి మఙ్గలం కిమపి యల్లోకే సదిత్యుచ్యతే .
తత్సర్వం త్వదధీనమేవ యదతశ్శ్రీరిత్యభేదేన వా
యద్వా శ్రీమదితీదృశేన వచసా దేవి! ప్రథామశ్నుతే .. 8 ..
దేవి! త్వన్మహిమావధిర్న హరిణా నాపి త్వయా జ్ఞాయతే
యద్యప్యేవ మథాపి నైవ యువయోస్సర్వజ్ఞతా హీయతే .
యన్నాస్త్యేవ తదజ్ఞతామనుగుణాం సర్వజ్ఞతాయా విదుః
వ్యోమామ్భోజమిదన్తయా కిల విదన్భ్రాన్తోఽయమిత్యుచ్యతే.. 9 ..
లోకే వనస్పతిబృహస్పతితారతమ్యం
యస్యాః ప్రసాదపరిణామముదాహరన్తి .
సా భారతీ భగవతీ తు యదీయదాసీ
తాం దేవదేవమహిషీం శ్రియమాశ్రయామః .. 10 ..
యస్యాః కటాక్షమృదువీక్షణదీక్షణేన
సద్యస్సముల్లసితపల్లవముల్లలాస.
విశ్వం విపర్యయసముత్థవిపర్యయం ప్రాక్
తాం దేవదేవమహిషీం శ్రియమాశ్రయామః .. 11..
యస్యాః కటాక్షవీక్షాక్షణలక్ష్యం లక్షితా మహేశాస్స్యుః .
శ్రీరఙ్గరాజమహిషీ సా మామపి వీక్షతాం లక్ష్మీః ..12 ..