ಶ್ರೀಸ್ತವಃ

.. ಶ್ರೀಸ್ತವಃ ..

ಶ್ರೀವತ್ಸಚಿಹ್ನಮಿಶ್ರೇಭ್ಯೋ ನಮ ಉಕ್ತಿಮಧೀಮಹೇ .
ಯದುಕ್ತಯಸ್ತ್ರಯೀಕಣ್ಠೇ ಯಾನ್ತಿ ಮಙ್ಗಳಸೂತ್ರತಾಮ್ ..೧ ..

ಸ್ವಸ್ತಿ ಶ್ರೀರ್ದಿಶತಾದಶೇಷಜಗತಾಂ ಸರ್ಗೋಪಸರ್ಗಸ್ಥಿತೀ:
ಸ್ವರ್ಗ ದುರ್ಗತಿಮಾಪವರ್ಗಿಕಪದಂ ಸರ್ವಂ ಚ ಕುರ್ವನ್ಹರಿಃ .
ಯಸ್ಯಾ ವೀಕ್ಷ್ಯ ಮುಖಂ ತದಿಙ್ಗಿತಪರಾಧೀನೋ ವಿಧತ್ತೇಽಖಿಲಂ
ಕ್ರೀಡೇಯಂ ಖಲು ನಾನ್ಯಥಾಽಸ್ಯ ರಸದಾ ಸ್ಯಾದೈಕರಸ್ಯಾತ್ತಯಾ ..೨ ..

ಹೇ ಶ್ರೀರ್ದೇವಿ! ಸಮಸ್ತಲೋಕಜನನೀಂ ತ್ವಾಂ ಸ್ತೋತುಮೀಹಾಮಹೇ
ಯುಕ್ತಾಂ ಭಾವಯ ಭಾರತೀ ಪ್ರಗುಣಯ ಪ್ರೇಮಪ್ರಧಾನಾಂ ಧಿಯಮ್ .
ಭಕ್ತಿಂ ಬನ್ಧಯ ನನ್ದಯಾಶ್ರಿತಮಿಮಂ ದಾಸಂ ಜನಂ ತಾವಕಂ
ಲಕ್ಷ್ಯಂ ಲಕ್ಷ್ಮಿ! ಕಟಾಕ್ಷವೀಚಿವಿಸೃತೇ ಸ್ತೇ ಸ್ಯಾಮ ಚಾಮೀ ವಯಮ್ .. ೩ ..

ಸ್ತೋತ್ರಂ ನಾಮ ಕಿಮಾಮನನ್ತಿ ಕವಯೋ ಯದ್ಯನ್ಯದೀಯಾನ್ಗುಣಾನ್
ಅನ್ಯತ್ರ ತ್ವಸತೋಽಧಿರೋಪ್ಯ ಫಣಿತಿಸ್ಸಾ ತರ್ಹಿ ವನ್ಧ್ಯಾ ತ್ವಯಿ .
ಸಮ್ಯಕ್ಸತ್ಯಗುಣಾಭಿವರ್ಣನಮಥೋ ಬ್ರೂಯುಃ ಕಥಂ ತಾದೃಶೀ
ವಾಗ್ವಾಚಸ್ಪತಿನಾಪಿ ಶಕ್ಯರಚನಾ ತ್ವತ್ಸದ್ಗುಣಾರ್ಣೋನಿಧೌ .. ೪ ..

ಯೇ ವಾಚಾಂ ಮನಸಾಂ ಚ ದುರ್ಗ್ರಹತಯಾ ಖ್ಯಾತಾ ಗುಣಾಸ್ತಾವಕಾಃ
ತಾನೇವ ಪ್ರತಿ ಸಾಮ್ಬೂ ಜಿಹ್ವಮುದಿತಾ ಹೈ ಮಾಮಿಕಾ ಭಾರತೀ.
ಹಾಸ್ಯಂ ತತ್ತು ನ ಮನ್ಮಹೇ ನ ಹಿ ಚಕೋರ್ಯೇಕಾಽಖಿಲಾಂ ಚನ್ದ್ರಿಕಾಂ
ನಾಲಂ ಪಾತುಮಿತಿ ಪ್ರಗೃಹ್ಯ ರಸನಾಮಾಸೀತ ಸತ್ಯಾಂ ತೃಷಿ ... ೫ ..

ಕ್ಷೋದೀಯಾನಪಿ ದುಷ್ಟಬುದ್ಧಿರಪಿ ನಿರಸ್ನೇಹೋಽಪ್ಯನೀಹೋಽಪಿ ತೇ
ಕೀರ್ತಿ ದೇವಿ! ಲಿಹನಹಂ ನ ಚ ವಿಭೇಮ್ಯಜ್ಞೋ ನ ಜಿಹೇಮಿ ಚ .
ದುಷ್ಯೇತ್ಸಾ ತು ನ ತಾವತಾ ನಹಿ ಶುನಾ ಲೀಢಾಪಿ ಭಾಗೀರಥೀ
ದುಷ್ಯೇಚ್ಛ್ವಾಪಿ ನ ಲಜ್ಜತೇ ನ ಚ ಬಿಭೇತ್ಯಾರ್ತಿಸ್ತು ಶಾಮ್ಯೇಚ್ಛುನಃ.. ೬ ..

ಐಶ್ವರ್ಯಂ ಮಹದೇವ ವಾಲ್ಪಮಥವಾ ದೃಶ್ಯೇತ ಪುಸಾಂ ಹಿ ಯತ್
ತಲ್ಲಕ್ಷ್ಮ್ಯಾಃ ಸಮುದೀಕ್ಷಣಾತ್ತವ ಯತಃ ಸಾರ್ವತ್ರಿಕಂ ವರ್ತತೇ.
ತೇನೈತೇನ ನ ವಿಸ್ಮಯೇಮಹಿ ಜಗನ್ನಾಥೋಽಪಿ ನಾರಾಯಣೋ
ಧನ್ಯಂ ಮನ್ಯತ ಈಕ್ಷಣಾತ್ತವ ಯತಃ ಸ್ವಾತ್ಮಾನಮಾತ್ಮೇಶ್ವರಃ .. ೭ ..

ಐಶ್ವರ್ಯಂ ಯದಶೇಷಪುಂಸಿ ಯದಿದಂ ಸೌನ್ದರ್ಯಲಾವಣ್ಯಯೋಃ
ರೂಪಂ ಯಚ್ಚ ಹಿ ಮಙ್ಗಲಂ ಕಿಮಪಿ ಯಲ್ಲೋಕೇ ಸದಿತ್ಯುಚ್ಯತೇ .
ತತ್ಸರ್ವಂ ತ್ವದಧೀನಮೇವ ಯದತಶ್ಶ್ರೀರಿತ್ಯಭೇದೇನ ವಾ
ಯದ್ವಾ ಶ್ರೀಮದಿತೀದೃಶೇನ ವಚಸಾ ದೇವಿ! ಪ್ರಥಾಮಶ್ನುತೇ .. ೮ ..

ದೇವಿ! ತ್ವನ್ಮಹಿಮಾವಧಿರ್ನ ಹರಿಣಾ ನಾಪಿ ತ್ವಯಾ ಜ್ಞಾಯತೇ
ಯದ್ಯಪ್ಯೇವ ಮಥಾಪಿ ನೈವ ಯುವಯೋಸ್ಸರ್ವಜ್ಞತಾ ಹೀಯತೇ .
ಯನ್ನಾಸ್ತ್ಯೇವ ತದಜ್ಞತಾಮನುಗುಣಾಂ ಸರ್ವಜ್ಞತಾಯಾ ವಿದುಃ
ವ್ಯೋಮಾಮ್ಭೋಜಮಿದನ್ತಯಾ ಕಿಲ ವಿದನ್ಭ್ರಾನ್ತೋಽಯಮಿತ್ಯುಚ್ಯತೇ.. ೯ ..

ಲೋಕೇ ವನಸ್ಪತಿಬೃಹಸ್ಪತಿತಾರತಮ್ಯಂ
ಯಸ್ಯಾಃ ಪ್ರಸಾದಪರಿಣಾಮಮುದಾಹರನ್ತಿ .
ಸಾ ಭಾರತೀ ಭಗವತೀ ತು ಯದೀಯದಾಸೀ
ತಾಂ ದೇವದೇವಮಹಿಷೀಂ ಶ್ರಿಯಮಾಶ್ರಯಾಮಃ .. ೧೦ ..

ಯಸ್ಯಾಃ ಕಟಾಕ್ಷಮೃದುವೀಕ್ಷಣದೀಕ್ಷಣೇನ
ಸದ್ಯಸ್ಸಮುಲ್ಲಸಿತಪಲ್ಲವಮುಲ್ಲಲಾಸ.
ವಿಶ್ವಂ ವಿಪರ್ಯಯಸಮುತ್ಥವಿಪರ್ಯಯಂ ಪ್ರಾಕ್
ತಾಂ ದೇವದೇವಮಹಿಷೀಂ ಶ್ರಿಯಮಾಶ್ರಯಾಮಃ .. ೧೧..

ಯಸ್ಯಾಃ ಕಟಾಕ್ಷವೀಕ್ಷಾಕ್ಷಣಲಕ್ಷ್ಯಂ ಲಕ್ಷಿತಾ ಮಹೇಶಾಸ್ಸ್ಯುಃ .
ಶ್ರೀರಙ್ಗರಾಜಮಹಿಷೀ ಸಾ ಮಾಮಪಿ ವೀಕ್ಷತಾಂ ಲಕ್ಷ್ಮೀಃ ..೧೨ ..