ಲಕ್ಷ್ಮೀನಾರಾಯಣಸಂಹಿತಾ

ಲಕ್ಷ್ಮೀನಾರಾಯಣಸಂಹಿತಾ
ಖಣ಼್ಡಃ ೧
( ಕೃತಯುಗಸನ್ತಾನಃ ) -
ಅಧ್ಯಾಯಃ ೨
ಶ್ರೀನಾರಾಯಣ ಉವಾಚ
ಶೃಣು ಲಕ್ಷ್ಮಿ ಪ್ರವಕ್ಷ್ಯಾಮಿ ಭಕ್ತಸ್ಯ ದ್ರವಲಬ್ಧಯೇ .
ಯಥಾ ಮೇಽನುಗ್ರಹಃ ಪ್ರಾಪ್ಯಸ್ತದ್ವಿಧಾರಯ ತತ್ತ್ವತಃ .. ೧ ..

ಮುಕ್ತ ಸೃಷ್ಟಾವೀಶಸೃಷ್ಟೌ ಜೀವಸೃಷ್ಟಾವಪಿ ಪ್ರಭುಃ .
ಅಸೃಜತ್ಸಾಕೃತೀನ್ಸರ್ವಾನ್ ಶರೀರಿಣ ಇತಿ .ಸ್ಥಿತಿಃ .. ೨ ..

ಆತ್ಮಾ ತ್ವಿನ್ದ್ರ ಇತಿಪ್ರೋಕ್ತಃ ಸರ್ವಶಕ್ತಿಗುಣಾಶ್ರಯಃ .
ಮನಶ್ಚಿತ್ತಮಹಂಬುದ್ಧಿಸ್ತಸ್ಯ ಕರಣಮಾನ್ತರಮ್ .. ೩ ..

ಇನ್ದ್ರಸ್ಯ ಶಕ್ತಯಶ್ಚೈತಾಶ್ಚತಸ್ರಃ ಸಮುದಾಹೃತಾಃ .
ಶ್ರೋತ್ರತ್ವಙ್ನೇತ್ರರಸನಾಘ್ರಾಣವಾಕ್ಪಾದಪಾಣಯಃ .. ೪ ..

ಪಾಯೂಪಸ್ಥೇ ಚೇನ್ದ್ರಿಯಾಣಿ ಬಹಿಃಕರಣಕಾನಿ ಹಿ .
ದಶಾಪಿ ಶಕ್ತಯಶ್ಚೈತಾ ಇನ್ದ್ರಸ್ಯೈವ ಭವನ್ತಿ ವೈ .. ೫ ..

ಗ್ರಾಹ್ಯೇಷು ತಾಸ್ತು ಗಚ್ಛನ್ತಿ ಪದಾರ್ಥೇಷು ಬಹಿರ್ಬಹಿಃ .
ಗ್ರಾಹ್ಯಾಕಾರೇಣ ತಾ ಭೂತ್ವಾ ಗ್ರಾಹ್ಯಾಕಾರಂ ಭಜನ್ತಿ ಚ .. ೬ ..

ಪರಾವೃತ್ಯ ತು ತಾಃ ಸರ್ವಾ ಧಾರ್ಯಾಕಾರಂ ಭಜನ್ತಿ ಚ .
ವಿಧ್ವಾಽನ್ತಃಕರಣಾನ್ಯೇತಾ ಆತ್ಮಾನಂ ಯಾನ್ತಿ ವೈ ಯದಾ .. ೭ ..

ಭೋಗ್ಯಾಕಾರಂ ಗತಾಸ್ತಾಶ್ಚ ತಾ ಇನ್ದ್ರಾನುಭವಂ ಗತಾಃ .
ಅಪರೋಕ್ಷಾನುಭಾವೋಽಯಂ ಸ್ವಾತ್ಮನ್ಯೇವ ಭವತ್ಯಥ .. ೮ ..

ಅಹಮಿನ್ದ್ರೇ ಸ್ಥಿತಃ ಸಾಕ್ಷಾತ್ಸರ್ವಶಕ್ತಿಪ್ರಪೂರಕಃ .
ಇನ್ದ್ರೋ ಮದ್ಯೋಗತಃ ಪೂರ್ಣಶಕ್ತ್ಯಾಶ್ರಯ ಇತಿಸ್ಥಿತಿಃ .. ೯ ..

ಆಗ್ರಾಹ್ಯಾತ್ತು ಮದನ್ತಂ ವೈ ಪ್ರೇಮತತ್ತ್ವಂ ದ್ರವೋ ಮತಃ .
ಸರ್ವತ್ರ ನಿಹಿತಂ ತದ್ವೈ ತೇನ ಸ್ನಿಹ್ಯನ್ತಿ ಮೂರ್ತಯಃ .. 1.2.೧೦ ..

ಸ್ನೇಹಪೂರ್ಣಾಽಽನನ್ದಪೂರ್ಣಪ್ರೇಮಪೂರ್ಣಃ ಸುಖಾಶ್ರಯಃ .
ದ್ರವಪೂರ್ಣೋ ಹ್ಯಹಂ ವಿಷ್ಣುರ್ಮದ್ಯೋಗಾದ್ದ್ರವವಾನ್ ಹಿ ಸಃ .. ೧೧ ..

ಸರ್ವಂ ಸ್ಥೂಲಂ ತಥಾ ಸೂಕ್ಷ್ಮಂ ಚೇತನಂ ಚಾಽನ್ಯದೇವ ವಾ .
ಮದ್ದ್ರವಾದ್ದ್ರವಿತಂ ಸರ್ವಂ ಮೇಽನುಗ್ರಹೋಽತ್ರ ಕಾರಣಮ್ .. ೧ ೨..

'ಅಯಂ ತು ದ್ರವಿತೋ ಭೂಯಾದಿತಿಮೇಽನುಕೃಪಾ ಭವೇತ್ .
ತದಾ ದ್ರವತಿ ತತ್ಕಾಲಂ ನಾಽನ್ಯಥಾ ತು ಕದಾಚನ .. ೧೩ ..

ಮತ್ಕೃಪಾಯಾಃ ಸಾಧನಂ ತು ಸರ್ವಸ್ವಾತ್ಮಾರ್ಪಣಂ ಮತಮ್ .
ಸರ್ವದಾಽಹಂ ಕೃಪಾಪೂರ್ಣಃ ಕೃಪಾಲುಃ ಕರುಣೋದಧಿಃ .. ೧೪..

ಭಕ್ತೋಲ್ಲಾಸಾತ್ಕೃಪಾವೃಷ್ಟಿಂ ಕರೋಮಿ ಕೃಪಯಾಽನ್ವಿತಃ .
ಯಥಾ ಯಥಾ ಕೃಪಾಯಾ ಮೇ ಪ್ರವಾಹೋ ವಿಶತಿ ಧ್ರುವೇ .. ೧೫..

ಭಕ್ತೇ ತಥಾ ತಥಾ ತತ್ತ್ವಂ ದ್ರವತಾಂ ಯಾತ್ಯಭೀಕ್ಷ್ಣಶಃ .
ಏಕ ಏವಾಽದ್ವಿತೀಯೋಽಹಂ ಸ್ಥಿತೋಽಸ್ಮ್ಯಕ್ಷರಧಾಮನಿ .. ೧ ೬. .
ಮನ್ಮೂರ್ತೌ ತತ್ರ ಮೇ ಮುಕ್ತಾ ಬ್ರಹ್ಮ ಚಾಽಕ್ಷರಮಿತ್ಯಪಿ .
ದ್ರವನ್ತಿ ಪ್ರೇಮಬಾಹುಲ್ಯಾನ್ಮೇಽನುಗ್ರಹಬಲಾದಪಿ . . ೧೭..

ತದಾ ಸಮ್ರಾಡ್ವಿರಾಜೇಽಹಂ ನ ಕಿಞ್ಚಿದ್ವ್ಯತಿರಿಚ್ಯತೇ .
ಮುಕ್ತಿಂ ಸೇಯಂ ತದೈಕ್ಯಾತ್ಮಾಽಽಪ್ಯತೇ ತತ್ಸ್ಥಿತಿವೇದಿಭಿಃ .. ೧೮..

ಸ ಏಕಾಕೀ ನ ರಮತೇ ಚೇಚ್ಛದ್ದ್ವಿತೀಯಮಾತ್ಮನಃ .
ಬ್ರಹ್ಮ ತಚ್ಚಾಽಕ್ಷರಂ ತಸ್ಮಾತ್ಪ್ರಾದುರ್ಭೂತಂ ಮಹಾತ್ಮನಃ . . ೧ ೯..

ದ್ವೇಧಾಽಭೂತ್ತನ್ನಿರಾಕಾರಂ ಸಾಕಾರಂ ಚೇಶವಾಞ್ಚ್ಛಯಾ .
ನಿರಾಕಾರಂ ಪರಂ ಧಾಮ ಯಸ್ಮಾದ್ ಧಾಮಾನಿ ಜಜ್ಞಿರೇ . . 1.2.೨೦ . .
ಸಾಕಾರಂ ಸ್ವಸಮಾಕಾರಂ ಮೂರ್ತಂ ಮೂರ್ತ್ಯನುರೂಪಕಮ್ .
ಸ ಹರಿಸ್ತು ಪುನರೈಚ್ಛನ್ನೈಕರೂಪತ್ವಮಾತ್ಮನಃ .. ೨೧ ..

ಮುಕ್ತಾ ಅನಾದಿನಸ್ತಸ್ಮಾತ್ಪ್ರಾದುರ್ಭೂತಾ ಅನನ್ತಶಃ .
ತತ್ರಾಽಽಸಁಸ್ತನ್ಮಣ್ಡಲಾನಿ ತ್ರಿಪಾದೇ ದಿವಿ ಚಾಮೃತೇ.. ೨೨..

ಮುಕ್ತಾ ಬ್ರಹ್ಮ ಪರಬ್ರಹ್ಮ ಬ್ರಹ್ಮಸೃಷ್ಟಿಸ್ತ್ರಿಕಂ ಮತಮ್ .
ರೂಪಾನುರೂಪಾವಯವಾ ದಿವ್ಯಾಃ ಸರ್ವೇ ಸರೂಪಿಣಃ .. ೨೩ ..

ಆತ್ಮರೂಪಾಣೀನ್ದ್ರಿಯಾಣಿ ತತ್ತ್ವಾಽಭಿನ್ನಾನಿ ಸನ್ತಿ ವೈ .
ಉಪಚಾರಾತ್ತು ನಾಮಾನಿ ರಸಶಕ್ತ್ಯಾತ್ಮಕಾನಿ ಹಿ .. ೨೪..

ಮನಃ ಶ್ರೋತ್ರಂ ಚ ವಾಕ್ ಚಕ್ಷುಸ್ತ್ವಗ್ ರಸಾದೀನಿ ತಾನಿ ವೈ .
ಪೂರ್ಣೇ ಚಿನ್ಹೇಽಪಿ ಗುಪ್ತಾ ನ ತದ್ರತಿರ್ವಾಸನಾ ನ ಚ .. ೨೫..

ಅಮಾತೃಜಂ ಯತಸ್ತತ್ರ ಕೋಶಷಟ್ಕಂ ನ ವಿದ್ಯತೇ .
ಪ್ರಾಣಸ್ತತ್ರಾಽಽತ್ಮನಃ ಶಕ್ತಿಃ ಕಾಶೋಽನಾವರಣಾತ್ಮತಾ .. ೨೬..

ಸುಹಿರಣ್ಯಕೇಶನಖದನ್ತಾ ನೈವ ವಿಯೋಗಿನಃ .
ಸಚ್ಚಿದ್ರೂಪೈಕಮಾನಾಸ್ತೇ ಸ್ವಾತ್ಮಕಾಃ ಪ್ರವಿಭಾನ್ತಿ ಹಿ .. ೨೭..

ದಿವ್ಯಾಃ ಸರ್ವೇ ಪ್ರಕಾಶಾಸ್ತೇ ರಾಜನ್ತೇ ದಿವ್ಯಧಾಮನಿ .
ಇತ್ಯಯಂ ಬ್ರಹ್ಮಲೋಕಸ್ತು ಔಪನಿಷದ್ ಉಚ್ಯತೇ .. ೨೮ ..

ಬ್ರಾಹ್ಮೀ ಮುಕ್ತಿಸ್ತನುರ್ಬ್ರಾಹ್ಮೀ ಬ್ರಹ್ಮಾನನ್ದಾನುಭೋಗ್ಯತಾ .
ಸೋಽಶ್ನುತೇ ಸರ್ವಕಾಮಾಁಸ್ತು ಸಹ ಶ್ರೀಹರಿಣಾ ಸದಾ .. ೨೯..

ಇತಿ ಶ್ರೀಲಕ್ಷ್ಮೀನಾರಾಯಣೀಯಸಂಹಿತಾಯಾಂ ಪ್ರಥಮೇ ಕೃತಯುಗಸನ್ತಾನೇ ಅಕ್ಷರಧಾಮ್ನಿ ಪರಬ್ರಹ್ಮಬ್ರಹ್ಮಮುಕ್ತಾದೀನಾಂ ದ್ರವಮುಕ್ತ್ಯಾಽಪಿ ಸಾಕಾರತಾದರ್ಶಕೋ ದ್ವಿತೀಯೋಽಧ್ಯಾಯಃ . . ೨ . .