శ్రీగణేశస్తోత్రమ్
శ్రీగణేశస్తోత్రమ్
ఓం నమో విఘ్నహర్త్రే .
ఓం అప్రమేయగుణం నిత్యం గణేశమమరోత్తమమ్ .
వేదాన్తవేద్యం సర్వజ్ఞం పూజితమమరేశ్వరైః .. 1..
ఓఙ్కారం పరమంబ్రహ్మ అక్షరం శివమవ్యయమ్ .
పార్వతీప్రియపుత్రం తం ప్రణమామి గణేశ్వరమ్ .. 2..
బ్రహ్మద్వయానవచ్ఛేద్యం శివాద్వయవిబోధితమ్ .
స్వప్రకాశం పరాత్మానం తం ప్రపద్యే వినాయకమ్ .. 3..
వైరివిఘ్నప్రదం నిత్యం భక్తానాం సిద్ధిదాయకమ్ .
శివసూనుం పరానన్దం నమస్యామి వినాయకమ్ .. 4..
మోదకాహారపరమమక్షమాలాకరం పరమ్ .
త్రినేత్రం గజవక్త్రం చ తం ప్రపద్యే గణేశ్వరమ్ .. 5..
స్వదన్తం పరుశుం చైవ ధారయన్తం భుజద్వయే .
రక్తవస్త్రామ్బరధరం రక్తమాలాధరం విభుమ్ .. 6..
విఘ్నరాశీన్వికిరన్తం కరక్షేపైర్ముహుర్ముహుః .
అనన్తం పరమం తత్త్వం సారాత్సారతరం పరమ్ .. 7..
అప్రమేయగుణాయాపి త్ర్యక్షాయ వరవర్ణినే .
వినాయకాయ దేవాయ భూయో భూయో నమో నమః .. 8..
శ్రీగణేశం నుమో యస్య ప్రసాదాత్ప్రాప్తబుద్ధయః .
ప్రౌఢబుద్ధిషు హృష్యన్తి మాదృశా అపి వాలిశాః .. 9..
శ్రీగణేశ్వరం భక్తకామదం శ్రీకృపానిధిం సర్వసిద్ధిదమ్ .
బ్రహ్మవిష్ణుదేవేన్ద్రగోనుతం భక్తవత్సలం నౌమ్యుమాసుతమ్ .. 10..
వారణాననం వారణాధిపదారుణం బలాత్సిద్ధికారణమ్ .
తారణం భవాద్విఘ్నవారణం భక్తవత్సలం నౌమ్యుమాసుతమ్ .. 11..
శఙ్కరాఙ్కతోఽవాతరన్ముదా శైలజాగ్రతో హర్షయన్నుభౌ .
షణ్ముఖేన యో నృత్యతే గిరౌ భక్తవత్సలం తం నమామ్యహమ్ .. 12..
శైలజాసుతం విశ్వమోహనం భక్తవత్సలం కల్మషాపహమ్ .
సిద్ధిదాయకం విఘ్ననాశకం నౌమ్యహం సురైర్వన్ద్యపాదుకమ్ .. 13..
శ్రీతపస్వినోఽచిన్త్యపౌరుషం యం విచిన్త్య ప్రాక్సర్వసిద్ధిదమ్ .
సిద్ధవాఞ్ఛితాస్తే భవన్తి తం భక్తవత్సలం నౌమ్యుమాసుతమ్ .. 14..
యత్పదాబ్జపీఠాసనఙ్గణైర్మౌలికోటిభిర్వన్దితం ముహుః .
ప్రాప్తసిద్ధయస్తే భవన్తి తం భక్తవత్సలం నౌమ్యుమాసుతమ్ .. 15..
దైవతైర్దితేరాత్మజైర్నరైర్నాగచారణైర్భూతకిన్నరైః .
గుహ్యకాదిభిర్వన్దితం సదా భక్తవత్సలం నౌమ్యుమాసుతమ్ .. 16..
చిన్తితం నరైః సిద్ధనాయకైర్ముక్తయేబ్జజేనాపి సృష్టయే .
త్రైపురం చ హన్తుం శివేన వై భక్తవత్సలం నౌమ్యుమాసుతమ్ .. 17..
పాహి పాహి మాం విఘ్ననాయక రక్ష రక్ష మాం విఘ్ననాశక .
దేవ దేవ త్వాం విశ్వపూజిత భక్తవత్సలం నౌమ్యుమాసుతమ్ .. 18..
పాహి మాం విభో దీనపాలక రక్ష మాం ప్రభో దీనవత్సల .
దేహి సమ్పదం హ్యాపదం హర భక్తవత్సలం నౌమ్యుమాసుతమ్ .. 19..
యోఽభ్యర్చితః సురగణైర్వరసిద్ధిహేతో-
శ్ఛేత్తుం భయాని చ కరే పరుశుం దధానః .
దేవః స శమ్భుదయితాపరివర్ద్ధితశ్రీ-
విఘ్నాన్నివారయతు వారణరాజవక్త్రః .. 20..
నమతాశేషవిఘ్నౌఘవారణం వారణాననమ్ .
కారణం సర్వసిద్ధీనాం దురితార్ణవతారణమ్ .. 21..
ఇతి గణేశస్తోత్రం సమ్పూర్ణమ్ ..