શ્રીગણેશસ્તોત્રમ્

શ્રીગણેશસ્તોત્રમ્
ૐ નમો વિઘ્નહર્ત્રે .
ૐ અપ્રમેયગુણં નિત્યં ગણેશમમરોત્તમમ્ .
વેદાન્તવેદ્યં સર્વજ્ઞં પૂજિતમમરેશ્વરૈઃ .. ૧..

ઓઙ્કારં પરમંબ્રહ્મ અક્ષરં શિવમવ્યયમ્ .
પાર્વતીપ્રિયપુત્રં તં પ્રણમામિ ગણેશ્વરમ્ .. ૨..

બ્રહ્મદ્વયાનવચ્છેદ્યં શિવાદ્વયવિબોધિતમ્ .
સ્વપ્રકાશં પરાત્માનં તં પ્રપદ્યે વિનાયકમ્ .. ૩..

વૈરિવિઘ્નપ્રદં નિત્યં ભક્તાનાં સિદ્ધિદાયકમ્ .
શિવસૂનું પરાનન્દં નમસ્યામિ વિનાયકમ્ .. ૪..

મોદકાહારપરમમક્ષમાલાકરં પરમ્ .
ત્રિનેત્રં ગજવક્ત્રં ચ તં પ્રપદ્યે ગણેશ્વરમ્ .. ૫..

સ્વદન્તં પરુશું ચૈવ ધારયન્તં ભુજદ્વયે .
રક્તવસ્ત્રામ્બરધરં રક્તમાલાધરં વિભુમ્ .. ૬..

વિઘ્નરાશીન્વિકિરન્તં કરક્ષેપૈર્મુહુર્મુહુઃ .
અનન્તં પરમં તત્ત્વં સારાત્સારતરં પરમ્ .. ૭..

અપ્રમેયગુણાયાપિ ત્ર્યક્ષાય વરવર્ણિને .
વિનાયકાય દેવાય ભૂયો ભૂયો નમો નમઃ .. ૮..

શ્રીગણેશં નુમો યસ્ય પ્રસાદાત્પ્રાપ્તબુદ્ધયઃ .
પ્રૌઢબુદ્ધિષુ હૃષ્યન્તિ માદૃશા અપિ વાલિશાઃ .. ૯..

શ્રીગણેશ્વરં ભક્તકામદં શ્રીકૃપાનિધિં સર્વસિદ્ધિદમ્ .
બ્રહ્મવિષ્ણુદેવેન્દ્રગોનુતં ભક્તવત્સલં નૌમ્યુમાસુતમ્ .. ૧૦..

વારણાનનં વારણાધિપદારુણં બલાત્સિદ્ધિકારણમ્ .
તારણં ભવાદ્વિઘ્નવારણં ભક્તવત્સલં નૌમ્યુમાસુતમ્ .. ૧૧..

શઙ્કરાઙ્કતોઽવાતરન્મુદા શૈલજાગ્રતો હર્ષયન્નુભૌ .
ષણ્મુખેન યો નૃત્યતે ગિરૌ ભક્તવત્સલં તં નમામ્યહમ્ .. ૧૨..

શૈલજાસુતં વિશ્વમોહનં ભક્તવત્સલં કલ્મષાપહમ્ .
સિદ્ધિદાયકં વિઘ્નનાશકં નૌમ્યહં સુરૈર્વન્દ્યપાદુકમ્ .. ૧૩..

શ્રીતપસ્વિનોઽચિન્ત્યપૌરુષં યં વિચિન્ત્ય પ્રાક્સર્વસિદ્ધિદમ્ .
સિદ્ધવાઞ્છિતાસ્તે ભવન્તિ તં ભક્તવત્સલં નૌમ્યુમાસુતમ્ .. ૧૪..

યત્પદાબ્જપીઠાસનઙ્ગણૈર્મૌલિકોટિભિર્વન્દિતં મુહુઃ .
પ્રાપ્તસિદ્ધયસ્તે ભવન્તિ તં ભક્તવત્સલં નૌમ્યુમાસુતમ્ .. ૧૫..

દૈવતૈર્દિતેરાત્મજૈર્નરૈર્નાગચારણૈર્ભૂતકિન્નરૈઃ .
ગુહ્યકાદિભિર્વન્દિતં સદા ભક્તવત્સલં નૌમ્યુમાસુતમ્ .. ૧૬..

ચિન્તિતં નરૈઃ સિદ્ધનાયકૈર્મુક્તયેબ્જજેનાપિ સૃષ્ટયે .
ત્રૈપુરં ચ હન્તું શિવેન વૈ ભક્તવત્સલં નૌમ્યુમાસુતમ્ .. ૧૭..

પાહિ પાહિ માં વિઘ્નનાયક રક્ષ રક્ષ માં વિઘ્નનાશક .
દેવ દેવ ત્વાં વિશ્વપૂજિત ભક્તવત્સલં નૌમ્યુમાસુતમ્ .. ૧૮..

પાહિ માં વિભો દીનપાલક રક્ષ માં પ્રભો દીનવત્સલ .
દેહિ સમ્પદં હ્યાપદં હર ભક્તવત્સલં નૌમ્યુમાસુતમ્ .. ૧૯..

યોઽભ્યર્ચિતઃ સુરગણૈર્વરસિદ્ધિહેતો-
શ્છેત્તું ભયાનિ ચ કરે પરુશું દધાનઃ .
દેવઃ સ શમ્ભુદયિતાપરિવર્દ્ધિતશ્રી-
વિઘ્નાન્નિવારયતુ વારણરાજવક્ત્રઃ .. ૨૦..

નમતાશેષવિઘ્નૌઘવારણં વારણાનનમ્ .
કારણં સર્વસિદ્ધીનાં દુરિતાર્ણવતારણમ્ .. ૨૧..

ઇતિ ગણેશસ્તોત્રં સમ્પૂર્ણમ્ ..