શ્રીગણપતિમઙ્ગલમાલિકાસ્તોત્રમ્

શ્રીગણપતિમઙ્ગલમાલિકાસ્તોત્રમ્

શ્રીકણ્ઠપ્રેમપુત્રાય ગૌરીવામાઙ્ગવાસિને .
દ્વાત્રિંશદ્રૂપયુક્તાય શ્રીગણેશાય મઙ્ગલમ્ .. ૧..

આદિપૂજ્યાય દેવાય દન્તમોદકધારિણે .
વલ્લભાપ્રાણકાન્તાય શ્રીગણેશાય મઙ્ગલમ્ .. ૨..

લમ્બોદરાય શાન્તાય ચન્દ્રગર્વાપહારિણે .
ગજાનનાય પ્રભવે શ્રીગણેશાય મઙ્ગલમ્ .. ૩..

પઞ્ચહસ્તાય વન્દ્યાય પાશાઙ્કુશધરાય ચ .
શ્રીમતે ગજકર્ણાય શ્રીગણેશાય મઙ્ગલમ્ .. ૪..

દ્વૈમાતુરાય બાલાય હેરમ્બાય મહાત્મને .
વિકટાયાખુવાહાય શ્રીગણેશાય મઙ્ગલમ્ .. ૫..

પૃષ્ણિશૃઙ્ગાયાજિતાય ક્ષિપ્રાભીષ્ટાર્થદાયિને .
સિદ્ધિબુદ્ધિપ્રમોદાય શ્રીગણેશાય મઙ્ગલમ્ .. ૬..

વિલમ્બિયજ્ઞસૂત્રાય સર્વવિઘ્નનિવારિણે .
દૂર્વાદલસુપૂજ્યાય શ્રીગણેશાય મઙ્ગલમ્ .. ૭..

મહાકાયાય ભીમાય મહાસેનાગ્રજન્મને .
ત્રિપુરારી વરો ધાત્રે શ્રીગણેશાય મઙ્ગલમ્ .. ૮..

સિન્દૂરરમ્યવર્ણાય નાગબદ્ધોદરાય ચ .
આમોદાય પ્રમોદાય શ્રીગણેશાય મઙ્ગલમ્ .. ૯..

વિઘ્નકર્ત્રે દુર્મુખાય વિઘ્નહર્ત્રે શિવાત્મને . var કષ્ટકર્ત્રે કષ્ટહર્ત્રે
સુમુખાયૈકદન્તાય શ્રીગણેશાય મઙ્ગલમ્ .. ૧૦..

સમસ્તગણનાથાય વિષ્ણવે ધૂમકેતવે .
ત્ર્યક્ષાય ભાલચન્દ્રાય શ્રીગણેશાય મઙ્ગલમ્ .. ૧૧..

ચતુર્થીશાય માન્યાય સર્વવિદ્યાપ્રદાયિને .
વક્રતુણ્ડાય કુબ્જાય શ્રીગણેશાય મઙ્ગલમ્ .. ૧૨..

તુણ્ડિને કપિલાક્ષાય શ્રેષ્ઠાય ઋણહારિણે .
ઉદ્દણ્ડોદ્દણ્ડરૂપાય શ્રીગણેશાય મઙ્ગલમ્ .. ૧૩..

કષ્ટહર્ત્રે દ્વિદેહાય ભક્તેષ્ટજયદાયિને .
વિનાયકાય વિભવે શ્રીગણેશાય મઙ્ગલમ્ .. ૧૪..

સચ્ચિદાનન્દરૂપાય નિર્ગુણાય ગુણાત્મને .
વટવે લોકગુરવે શ્રીગણેશાય મઙ્ગલમ્ .. ૧૫..

શ્રીચામુણ્ડાસુપુત્રાય પ્રસન્નવદનાય ચ .
શ્રીરાજરાજસેવ્યાય શ્રીગણેશાય મઙ્ગલમ્ .. ૧૬..

શ્રીચામુણ્ડાકૃપાપાત્ર શ્રીકૃષ્ણેન્દ્રવિનિર્મિતામ્ .
વિભૂતિમાતૃકારમ્યાં કલ્યાણૈશ્વર્યદાયિનીમ્ .. ૧૭..

શ્રીમહાગણનાથસ્ય શુભાં મઙ્ગલમાલિકામ્ .
યઃ પઠેત્ સતતં વાણીં લક્ષ્મીં સિદ્ધિમવાપ્નુયાત્ .. ૧૮..