ಶ್ರೀಗಣಪತಿಮಙ್ಗಲಮಾಲಿಕಾಸ್ತೋತ್ರಮ್

ಶ್ರೀಗಣಪತಿಮಙ್ಗಲಮಾಲಿಕಾಸ್ತೋತ್ರಮ್

ಶ್ರೀಕಣ್ಠಪ್ರೇಮಪುತ್ರಾಯ ಗೌರೀವಾಮಾಙ್ಗವಾಸಿನೇ .
ದ್ವಾತ್ರಿಂಶದ್ರೂಪಯುಕ್ತಾಯ ಶ್ರೀಗಣೇಶಾಯ ಮಙ್ಗಲಮ್ .. ೧..

ಆದಿಪೂಜ್ಯಾಯ ದೇವಾಯ ದನ್ತಮೋದಕಧಾರಿಣೇ .
ವಲ್ಲಭಾಪ್ರಾಣಕಾನ್ತಾಯ ಶ್ರೀಗಣೇಶಾಯ ಮಙ್ಗಲಮ್ .. ೨..

ಲಮ್ಬೋದರಾಯ ಶಾನ್ತಾಯ ಚನ್ದ್ರಗರ್ವಾಪಹಾರಿಣೇ .
ಗಜಾನನಾಯ ಪ್ರಭವೇ ಶ್ರೀಗಣೇಶಾಯ ಮಙ್ಗಲಮ್ .. ೩..

ಪಞ್ಚಹಸ್ತಾಯ ವನ್ದ್ಯಾಯ ಪಾಶಾಙ್ಕುಶಧರಾಯ ಚ .
ಶ್ರೀಮತೇ ಗಜಕರ್ಣಾಯ ಶ್ರೀಗಣೇಶಾಯ ಮಙ್ಗಲಮ್ .. ೪..

ದ್ವೈಮಾತುರಾಯ ಬಾಲಾಯ ಹೇರಮ್ಬಾಯ ಮಹಾತ್ಮನೇ .
ವಿಕಟಾಯಾಖುವಾಹಾಯ ಶ್ರೀಗಣೇಶಾಯ ಮಙ್ಗಲಮ್ .. ೫..

ಪೃಷ್ಣಿಶೃಙ್ಗಾಯಾಜಿತಾಯ ಕ್ಷಿಪ್ರಾಭೀಷ್ಟಾರ್ಥದಾಯಿನೇ .
ಸಿದ್ಧಿಬುದ್ಧಿಪ್ರಮೋದಾಯ ಶ್ರೀಗಣೇಶಾಯ ಮಙ್ಗಲಮ್ .. ೬..

ವಿಲಮ್ಬಿಯಜ್ಞಸೂತ್ರಾಯ ಸರ್ವವಿಘ್ನನಿವಾರಿಣೇ .
ದೂರ್ವಾದಲಸುಪೂಜ್ಯಾಯ ಶ್ರೀಗಣೇಶಾಯ ಮಙ್ಗಲಮ್ .. ೭..

ಮಹಾಕಾಯಾಯ ಭೀಮಾಯ ಮಹಾಸೇನಾಗ್ರಜನ್ಮನೇ .
ತ್ರಿಪುರಾರೀ ವರೋ ಧಾತ್ರೇ ಶ್ರೀಗಣೇಶಾಯ ಮಙ್ಗಲಮ್ .. ೮..

ಸಿನ್ದೂರರಮ್ಯವರ್ಣಾಯ ನಾಗಬದ್ಧೋದರಾಯ ಚ .
ಆಮೋದಾಯ ಪ್ರಮೋದಾಯ ಶ್ರೀಗಣೇಶಾಯ ಮಙ್ಗಲಮ್ .. ೯..

ವಿಘ್ನಕರ್ತ್ರೇ ದುರ್ಮುಖಾಯ ವಿಘ್ನಹರ್ತ್ರೇ ಶಿವಾತ್ಮನೇ . var ಕಷ್ಟಕರ್ತ್ರೇ ಕಷ್ಟಹರ್ತ್ರೇ
ಸುಮುಖಾಯೈಕದನ್ತಾಯ ಶ್ರೀಗಣೇಶಾಯ ಮಙ್ಗಲಮ್ .. ೧೦..

ಸಮಸ್ತಗಣನಾಥಾಯ ವಿಷ್ಣವೇ ಧೂಮಕೇತವೇ .
ತ್ರ್ಯಕ್ಷಾಯ ಭಾಲಚನ್ದ್ರಾಯ ಶ್ರೀಗಣೇಶಾಯ ಮಙ್ಗಲಮ್ .. ೧೧..

ಚತುರ್ಥೀಶಾಯ ಮಾನ್ಯಾಯ ಸರ್ವವಿದ್ಯಾಪ್ರದಾಯಿನೇ .
ವಕ್ರತುಣ್ಡಾಯ ಕುಬ್ಜಾಯ ಶ್ರೀಗಣೇಶಾಯ ಮಙ್ಗಲಮ್ .. ೧೨..

ತುಣ್ಡಿನೇ ಕಪಿಲಾಕ್ಷಾಯ ಶ್ರೇಷ್ಠಾಯ ಋಣಹಾರಿಣೇ .
ಉದ್ದಣ್ಡೋದ್ದಣ್ಡರೂಪಾಯ ಶ್ರೀಗಣೇಶಾಯ ಮಙ್ಗಲಮ್ .. ೧೩..

ಕಷ್ಟಹರ್ತ್ರೇ ದ್ವಿದೇಹಾಯ ಭಕ್ತೇಷ್ಟಜಯದಾಯಿನೇ .
ವಿನಾಯಕಾಯ ವಿಭವೇ ಶ್ರೀಗಣೇಶಾಯ ಮಙ್ಗಲಮ್ .. ೧೪..

ಸಚ್ಚಿದಾನನ್ದರೂಪಾಯ ನಿರ್ಗುಣಾಯ ಗುಣಾತ್ಮನೇ .
ವಟವೇ ಲೋಕಗುರವೇ ಶ್ರೀಗಣೇಶಾಯ ಮಙ್ಗಲಮ್ .. ೧೫..

ಶ್ರೀಚಾಮುಣ್ಡಾಸುಪುತ್ರಾಯ ಪ್ರಸನ್ನವದನಾಯ ಚ .
ಶ್ರೀರಾಜರಾಜಸೇವ್ಯಾಯ ಶ್ರೀಗಣೇಶಾಯ ಮಙ್ಗಲಮ್ .. ೧೬..

ಶ್ರೀಚಾಮುಣ್ಡಾಕೃಪಾಪಾತ್ರ ಶ್ರೀಕೃಷ್ಣೇನ್ದ್ರವಿನಿರ್ಮಿತಾಮ್ .
ವಿಭೂತಿಮಾತೃಕಾರಮ್ಯಾಂ ಕಲ್ಯಾಣೈಶ್ವರ್ಯದಾಯಿನೀಮ್ .. ೧೭..

ಶ್ರೀಮಹಾಗಣನಾಥಸ್ಯ ಶುಭಾಂ ಮಙ್ಗಲಮಾಲಿಕಾಮ್ .
ಯಃ ಪಠೇತ್ ಸತತಂ ವಾಣೀಂ ಲಕ್ಷ್ಮೀಂ ಸಿದ್ಧಿಮವಾಪ್ನುಯಾತ್ .. ೧೮..