શ્રીભીષ્મસ્તુતિઃ

.. શ્રીભીષ્મસ્તુતિઃ ..

શ્રીભીષ્મ ઉવાચ
ઇતિ મતિરુપકલ્પિતા વિતૃષ્ણા
ભગવતિ સાત્વતપુઙ્ગવે વિભૂમ્નિ.
સ્વસુખમુપગતે ક્વચિદ્વિહર્તું
પ્રકૃતિમુપેયુષિ યદ્ભવપ્રવાહઃ..૩૨..

ત્રિભુવનકમનં તમાલવર્ણં
રવિકરગૌરવરામ્બરં દધાને.
વપુરલકકુલાવૃતાનનાબ્જં
વિજયસખે રતિરસ્તુ મેઽનવદ્યા..૩૩..

યુધિ તુરગરજોવિધૂમ્રવિષ્વક્
કચલુલિતશ્રમવાર્યલઙ્કૃતાસ્યે.
મમ નિશિતશરૈર્વિભિદ્યમાન
ત્વચિ વિલસત્કવચેઽસ્તુ કૃષ્ણ આત્મા..૩૪..

સપદિ સખિવચો નિશમ્ય મધ્યે
નિજપરયોર્બલયો રથં નિવેશ્ય.
સ્થિતવતિ પરસૈનિકાયુરક્ષ્ણા
હૃતવતિ પાર્થસખે રતિર્મમાસ્તુ..૩૫..

વ્યવહિતપૃતનામુખં નિરીક્ષ્ય
સ્વજનવધાદ્વિમુખસ્ય દોષબુદ્ધ્યા.
કુમતિમહરદાત્મવિદ્યયા ય-
શ્ચરણરતિઃ પરમસ્ય તસ્ય મેઽસ્તુ..૩૬..

સ્વનિગમમપહાય મત્પ્રતિજ્ઞા-
મૃતમધિકર્તુમવપ્લુતો રથસ્થઃ.
ધૃતરથચરણોઽભ્યયાચ્ચલદ્ગુ-
ર્હરિરિવ હન્તુમિભં ગતોત્તરીયઃ..૩૭..

શિતવિશિખહતો વિશીર્ણદંશઃ
ક્ષતજપરિપ્લુત આતતાયિનો મે.
પ્રસભમભિસસાર મદ્વધાર્થં સ
ભવતુ મે ભગવાન્ગતિર્મુકુન્દઃ..૩૮..

વિજયરથકુટુમ્બ આત્તતોત્રે
ધૃતહયરશ્મિનિ તચ્છ્રિયેક્ષણીયે.
ભગવતિ રતિરસ્તુ મે મુમૂર્ષોર્ય-
મિહ નિરીક્ષ્ય હતા ગતાઃ સ્વરૂપમ્..૩૯..

લલિતગતિવિલાસવલ્ગુહાસ -
પ્રણયનિરીક્ષણકલ્પિતોરુમાનાઃ.
કૃતમનુકૃતવત્ય ઉન્મદાન્ધાઃ
પ્રકૃતિમગન્કિલ યસ્ય ગોપવધ્વઃ..૪૦..

મુનિગણનૃપવર્યસઙ્કુલેઽન્તઃ
સદસિ યુધિષ્ઠિરરાજસૂય એષામ્.
અર્હણમુપપેદ ઈક્ષણીયો
મમ દૃશિગોચર એષ આવિરાત્મા..૪૧..

તમિમમહમજં શરીરભાજાં હૃદિ હૃદિ
ધિષ્ઠિતમાત્મકલ્પિતાનામ્.
પ્રતિદૃશમિવ નૈકધાર્કમેકં
સમધિગતોઽસ્મિ વિધૂતભેદમોહઃ..૪૨..

સૂત ઉવાચ
કૃષ્ણ એવં ભગવતિ મનોવાગ્દૃષ્ટિવૃત્તિભિઃ.
આત્મન્યાત્માનમાવેશ્ય સોઽન્તઃશ્વાસ ઉપારમત્..૪૩..