ஶ்ரீபீ₄ஷ்மஸ்துதி꞉

.. ஶ்ரீபீ₄ஷ்மஸ்துதி꞉ ..

ஶ்ரீபீ₄ஷ்ம உவாச
இதி மதிருபகல்பிதா வித்ருஷ்ணா
ப₄க₃வதி ஸாத்வதபுங்க₃வே விபூ₄ம்நி.
ஸ்வஸுக₂முபக₃தே க்வசித்₃விஹர்தும்
ப்ரக்ருதிமுபேயுஷி யத்₃ப₄வப்ரவாஹ꞉..32..

த்ரிபு₄வநகமநம் தமாலவர்ணம்
ரவிகரகௌ₃ரவராம்ப₃ரம் த₃தா₄நே.
வபுரலககுலாவ்ருதாநநாப்₃ஜம்
விஜயஸகே₂ ரதிரஸ்து மே(அ)நவத்₃யா..33..

யுதி₄ துரக₃ரஜோவிதூ₄ம்ரவிஷ்வக்
கசலுலிதஶ்ரமவார்யலங்க்ருதாஸ்யே.
மம நிஶிதஶரைர்விபி₄த்₃யமாந
த்வசி விலஸத்கவசே(அ)ஸ்து க்ருஷ்ண ஆத்மா..34..

ஸபதி₃ ஸகி₂வசோ நிஶம்ய மத்₄யே
நிஜபரயோர்ப₃லயோ ரத₂ம் நிவேஶ்ய.
ஸ்தி₂தவதி பரஸைநிகாயுரக்ஷ்ணா
ஹ்ருதவதி பார்த₂ஸகே₂ ரதிர்மமாஸ்து..35..

வ்யவஹிதப்ருதநாமுக₂ம் நிரீக்ஷ்ய
ஸ்வஜநவதா₄த்₃விமுக₂ஸ்ய தோ₃ஷபு₃த்₃த்₄யா.
குமதிமஹரதா₃த்மவித்₃யயா ய-
ஶ்சரணரதி꞉ பரமஸ்ய தஸ்ய மே(அ)ஸ்து..36..

ஸ்வநிக₃மமபஹாய மத்ப்ரதிஜ்ஞா-
ம்ருதமதி₄கர்துமவப்லுதோ ரத₂ஸ்த₂꞉.
த்₄ருதரத₂சரணோ(அ)ப்₄யயாச்சலத்₃கு₃-
ர்ஹரிரிவ ஹந்துமிப₄ம் க₃தோத்தரீய꞉..37..

ஶிதவிஶிக₂ஹதோ விஶீர்ணத₃ம்ஶ꞉
க்ஷதஜபரிப்லுத ஆததாயிநோ மே.
ப்ரஸப₄மபி₄ஸஸார மத்₃வதா₄ர்த₂ம் ஸ
ப₄வது மே ப₄க₃வாந்க₃திர்முகுந்த₃꞉..38..

விஜயரத₂குடும்ப₃ ஆத்ததோத்ரே
த்₄ருதஹயரஶ்மிநி தச்ச்₂ரியேக்ஷணீயே.
ப₄க₃வதி ரதிரஸ்து மே முமூர்ஷோர்ய-
மிஹ நிரீக்ஷ்ய ஹதா க₃தா꞉ ஸ்வரூபம்..39..

லலிதக₃திவிலாஸவல்கு₃ஹாஸ -
ப்ரணயநிரீக்ஷணகல்பிதோருமாநா꞉.
க்ருதமநுக்ருதவத்ய உந்மதா₃ந்தா₄꞉
ப்ரக்ருதிமக₃ந்கில யஸ்ய கோ₃பவத்₄வ꞉..40..

முநிக₃ணந்ருபவர்யஸங்குலே(அ)ந்த꞉
ஸத₃ஸி யுதி₄ஷ்டி₂ரராஜஸூய ஏஷாம்.
அர்ஹணமுபபேத₃ ஈக்ஷணீயோ
மம த்₃ருஶிகோ₃சர ஏஷ ஆவிராத்மா..41..

தமிமமஹமஜம் ஶரீரபா₄ஜாம் ஹ்ருதி₃ ஹ்ருதி₃
தி₄ஷ்டி₂தமாத்மகல்பிதாநாம்.
ப்ரதித்₃ருஶமிவ நைகதா₄ர்கமேகம்
ஸமதி₄க₃தோ(அ)ஸ்மி விதூ₄தபே₄த₃மோஹ꞉..42..

ஸூத உவாச
க்ருஷ்ண ஏவம் ப₄க₃வதி மநோவாக்₃த்₃ருஷ்டிவ்ருத்திபி₄꞉.
ஆத்மந்யாத்மாநமாவேஶ்ய ஸோ(அ)ந்த꞉ஶ்வாஸ உபாரமத்..43..