ગાયત્રીરામાયણમ્

.. ગાયત્રીરામાયણમ્ ..

તપસ્સ્વાધ્યાયનિરતં તપસ્વી વાગ્વિદાં વરમ્ .
નારદં પરિપપ્રચ્છ વાલ્મીકિર્મુનિપુઙ્ગવમ્ .. ૧..

સ હત્વા રાક્ષસાન્સર્વાન્ યજ્ઞઘ્નાન્ રઘુનન્દનઃ .
ઋષિભિઃ પૂજિતસ્તત્ર યથેન્દ્રો વિજયી પુરા .. ૨..

વિશ્વામિત્રઃ સરામસ્તુ શ્રુત્વા જનકભાષિતમ્ .
વત્સ રામ ધનુઃ પશ્ય ઇતિ રાઘવમબ્રવીત્ .. ૩..

તુષ્ટાવાસ્ય તદા વંશં પ્રવિશ્ય ચ વિશામ્પતેઃ .
શયનીયં નરેન્દ્રસ્ય તદાસાદ્ય વ્યતિષ્ઠત .. ૪..

વનવાસં હિ સઙ્ખ્યાય વાસાંસ્યાભરણાનિ ચ .
ભર્તારમનુગચ્છન્ત્યૈ સીતાયૈ શ્વશુરો દદૌ .. ૫..

રાજા સત્યં ચ ધર્મશ્ચ રાજા કુલવતાં કુલમ્ .
રાજા માતા પિતા ચૈવ રાજા હિતકરો નૃણામ્ .. ૬..

નિરીક્ષ્ય સ મુહૂર્તં તુ દદર્શ ભરતો ગુરુમ્ .
ઉટજે રામમાસીનં જટામણ્ડલધારિણમ્ .. ૭..

યદિ બુદ્ધિઃ કૃતા દ્રષ્ટુમગસ્ત્યં તં મહામુનિમ્ .
અદ્યૈવ ગમને બુદ્ધિં રોચયસ્વ મહામતે .. ૮..

ભરતસ્યાર્યપુત્રસ્ય શ્વશ્રૂણાં મમ ચ પ્રભો .
મૃગરૂપમિદં વ્યક્તં વિસ્મયં જનયિષ્યતિ .. ૯..

ગચ્છ શીઘ્રમિતો રામ સુગ્રીવં તં મહાબલમ્ .
વયસ્યં તં કુરુ ક્ષિપ્રમિતો ગત્વાઽદ્ય રાઘવ .. ૧૦..

દેશકાલૌ ભજસ્વાદ્ય ક્ષમમાણઃ પ્રિયાપ્રિયે .
સુખદુઃખસહઃ કાલે સુગ્રીવવશગો ભવ .. ૧૧..

વન્દિતવ્યાસ્તતઃ સિદ્ધાસ્તપસા વીતકલ્મષાઃ .
પ્રષ્ટવ્યા ચાપિ સીતાયાઃ પ્રવૃત્તિર્વિનયાન્વિતૈઃ .. ૧૨..

સ નિર્જિત્ય પુરીં લઙ્કાં શ્રેષ્ઠાં તાં કામરૂપિણીમ્ .
વિક્રમેણ મહાતેજા હનૂમાન્ કપિસત્તમઃ .. ૧૩..

ધન્યા દેવાઃ સગન્ધર્વાઃ સિદ્ધાશ્ચ પરમર્ષયઃ .
મમ પશ્યન્તિ યે વીરં રામં રાજીવલોચનમ્ .. ૧૪..

મઙ્ગલાભિમુખી તસ્ય સા તદાસીન્મહાકપેઃ .
ઉપતસ્થે વિશાલાક્ષી પ્રયતા હવ્યવાહનમ્ .. ૧૫..

હિતં મહાર્થં મૃદુ હેતુસંહિતં વ્યતીતકાલાયતિસમ્પ્રતિક્ષમમ્ .
નિશમ્ય તદ્વાક્યમુપસ્થિતજ્વરઃ પ્રસઙ્ગવાનુત્તરમેતદબ્રવીત્ .. ૧૬..

ધર્માત્મા રક્ષસશ્રેષ્ઠઃ સમ્પ્રાપ્તોઽયં વિભીષણઃ .
લઙ્કૈશ્વર્યમિદં શ્રીમાન્શ્રુવં પ્રાપ્નોત્યકણ્ટકમ્ .. ૧૭..

યો વજ્રપાતાશનિસન્નિપાતાન્ન ચુક્ષુભે નાપિ ચચાલ રાજા .
સ રામબાણાભિહતો ભૃશાર્તશ્ચચાલ ચાપં ચ મુમોચ વીરઃ .. ૧૮..

યસ્ય વિક્રમમાસાદ્ય રાક્ષસા નિધનં ગતાઃ .
તં મન્યે રાઘવં વીરં નારાયણમનામયમ્ .. ૧૯..

ન તે દદૃશિરે રામં દહન્તમપિવાહિનીમ્ .
મોહિતાઃ પરમાસ્ત્રેણ ગાન્ધર્વેણ મહાત્મના .. ૨૦..

પ્રણમ્ય દેવતાભ્યશ્ચ બ્રાહ્મણેભ્યશ્ચ મૈથિલી .
બદ્ધાઞ્જલિપુટા ચેદમુવાચાગ્નિસમીપતઃ .. ૨૧..

ચલનાત્પર્વતસ્યૈવ ગણા દેવાશ્ચ કમ્પિતાઃ .
ચચાલ પાર્વતી ચાપિ તદાશ્લિષ્ટા મહેશ્વરમ્ .. ૨૨..

દારાઃ પુત્રાઃ પુરં રાષ્ટ્રં ભોગાચ્છાદનભોજનમ્ .
સર્વમેવાવિભક્તં નૌ ભવિષ્યતિ હરીશ્વર .. ૨૩..

યામેવ રાત્રિં શત્રુઘ્નઃ પર્ણશાલાં સમાવિશત્ .
તામેવ રાત્રિં સીતાપિ પ્રસૂતા દારકદ્વયમ્ .. ૨૪..

ઇદં રામાયણં કૃત્સ્નં ગયત્રીબીજસંયુતમ્ .
ત્રિસન્ધ્યં યઃ પઠેન્નિત્યં સર્વપાપૈઃ પ્રમુચ્યતે .. ૨૫ ..