గాయత్రీరామాయణమ్

.. గాయత్రీరామాయణమ్ ..

తపస్స్వాధ్యాయనిరతం తపస్వీ వాగ్విదాం వరమ్ .
నారదం పరిపప్రచ్ఛ వాల్మీకిర్మునిపుఙ్గవమ్ .. 1..

స హత్వా రాక్షసాన్సర్వాన్ యజ్ఞఘ్నాన్ రఘునన్దనః .
ఋషిభిః పూజితస్తత్ర యథేన్ద్రో విజయీ పురా .. 2..

విశ్వామిత్రః సరామస్తు శ్రుత్వా జనకభాషితమ్ .
వత్స రామ ధనుః పశ్య ఇతి రాఘవమబ్రవీత్ .. 3..

తుష్టావాస్య తదా వంశం ప్రవిశ్య చ విశామ్పతేః .
శయనీయం నరేన్ద్రస్య తదాసాద్య వ్యతిష్ఠత .. 4..

వనవాసం హి సఙ్ఖ్యాయ వాసాంస్యాభరణాని చ .
భర్తారమనుగచ్ఛన్త్యై సీతాయై శ్వశురో దదౌ .. 5..

రాజా సత్యం చ ధర్మశ్చ రాజా కులవతాం కులమ్ .
రాజా మాతా పితా చైవ రాజా హితకరో నృణామ్ .. 6..

నిరీక్ష్య స ముహూర్తం తు దదర్శ భరతో గురుమ్ .
ఉటజే రామమాసీనం జటామణ్డలధారిణమ్ .. 7..

యది బుద్ధిః కృతా ద్రష్టుమగస్త్యం తం మహామునిమ్ .
అద్యైవ గమనే బుద్ధిం రోచయస్వ మహామతే .. 8..

భరతస్యార్యపుత్రస్య శ్వశ్రూణాం మమ చ ప్రభో .
మృగరూపమిదం వ్యక్తం విస్మయం జనయిష్యతి .. 9..

గచ్ఛ శీఘ్రమితో రామ సుగ్రీవం తం మహాబలమ్ .
వయస్యం తం కురు క్షిప్రమితో గత్వాఽద్య రాఘవ .. 10..

దేశకాలౌ భజస్వాద్య క్షమమాణః ప్రియాప్రియే .
సుఖదుఃఖసహః కాలే సుగ్రీవవశగో భవ .. 11..

వన్దితవ్యాస్తతః సిద్ధాస్తపసా వీతకల్మషాః .
ప్రష్టవ్యా చాపి సీతాయాః ప్రవృత్తిర్వినయాన్వితైః .. 12..

స నిర్జిత్య పురీం లఙ్కాం శ్రేష్ఠాం తాం కామరూపిణీమ్ .
విక్రమేణ మహాతేజా హనూమాన్ కపిసత్తమః .. 13..

ధన్యా దేవాః సగన్ధర్వాః సిద్ధాశ్చ పరమర్షయః .
మమ పశ్యన్తి యే వీరం రామం రాజీవలోచనమ్ .. 14..

మఙ్గలాభిముఖీ తస్య సా తదాసీన్మహాకపేః .
ఉపతస్థే విశాలాక్షీ ప్రయతా హవ్యవాహనమ్ .. 15..

హితం మహార్థం మృదు హేతుసంహితం వ్యతీతకాలాయతిసమ్ప్రతిక్షమమ్ .
నిశమ్య తద్వాక్యముపస్థితజ్వరః ప్రసఙ్గవానుత్తరమేతదబ్రవీత్ .. 16..

ధర్మాత్మా రక్షసశ్రేష్ఠః సమ్ప్రాప్తోఽయం విభీషణః .
లఙ్కైశ్వర్యమిదం శ్రీమాన్శ్రువం ప్రాప్నోత్యకణ్టకమ్ .. 17..

యో వజ్రపాతాశనిసన్నిపాతాన్న చుక్షుభే నాపి చచాల రాజా .
స రామబాణాభిహతో భృశార్తశ్చచాల చాపం చ ముమోచ వీరః .. 18..

యస్య విక్రమమాసాద్య రాక్షసా నిధనం గతాః .
తం మన్యే రాఘవం వీరం నారాయణమనామయమ్ .. 19..

న తే దదృశిరే రామం దహన్తమపివాహినీమ్ .
మోహితాః పరమాస్త్రేణ గాన్ధర్వేణ మహాత్మనా .. 20..

ప్రణమ్య దేవతాభ్యశ్చ బ్రాహ్మణేభ్యశ్చ మైథిలీ .
బద్ధాఞ్జలిపుటా చేదమువాచాగ్నిసమీపతః .. 21..

చలనాత్పర్వతస్యైవ గణా దేవాశ్చ కమ్పితాః .
చచాల పార్వతీ చాపి తదాశ్లిష్టా మహేశ్వరమ్ .. 22..

దారాః పుత్రాః పురం రాష్ట్రం భోగాచ్ఛాదనభోజనమ్ .
సర్వమేవావిభక్తం నౌ భవిష్యతి హరీశ్వర .. 23..

యామేవ రాత్రిం శత్రుఘ్నః పర్ణశాలాం సమావిశత్ .
తామేవ రాత్రిం సీతాపి ప్రసూతా దారకద్వయమ్ .. 24..

ఇదం రామాయణం కృత్స్నం గయత్రీబీజసంయుతమ్ .
త్రిసన్ధ్యం యః పఠేన్నిత్యం సర్వపాపైః ప్రముచ్యతే .. 25 ..