શ્રીસુદર્શનાષ્ટકમ્

.. શ્રીસુદર્શનાષ્ટકમ્ ..

પ્રતિભટશ્રેણિભીષણ વરગુણસ્તોમ ભૂષણ
જનિભય સ્થાનતારણ જગદવસ્થાનકારણ .
નિખિલદુષ્કર્મકર્શન નિગમસદ્ધર્મદર્શન
જય જય શ્રીસુદર્શન જય જય શ્રીસુદર્શન ..૧..

શુભજગદ્રૂપમણ્ડન સુરગણત્રાસખણ્ડન
શતમખ બ્રહ્મવન્દિત શતપથબ્રહ્મનન્દિત .
પ્રથિત વિદ્વત્-સપક્ષિત ભવદહિર્બુધ્ન્યલક્ષિત
જય જય શ્રીસુદર્શન જય જય શ્રીસુદર્શન ..૨..

સ્ફુટતટિજ્જાલપિઞ્જર પૃથુતરજ્વાલપઞ્જર
પરિગતપ્રત્નવિગ્રહ પરિમિતપ્રજ્ઞદુર્ગ્રહ .
પ્રહરણ ગ્રામમણ્ડિત પરિજનત્રાણ પણ્ડિત
જય જય શ્રીસુદર્શન જય જય શ્રીસુદર્શન ..૩..

નિજપદપ્રોત સદ્ગણ નિરુપધિ સ્ફીત ષડ્ગુણ
નિગમનિર્વ્યૂઢવૈભવ નિજપરવ્યૂહવૈભવ .
હરિહયદ્વેષિ દારણ હરપુરપ્લોષકારણ
જય જય શ્રીસુદર્શન જય જય શ્રીસુદર્શન ..૪..

દનુજવિસ્તાર કર્તન જનિતમિસ્રાવિકર્તન
દનુજવિદ્યા નિકર્તન ભજદવિદ્યા નિવર્તન .
અમરહૃષ્ટસ્વવિક્રમ સમરજુષ્ટભ્રમિક્રમ
જય જય શ્રીસુદર્શન જય જય શ્રીસુદર્શન ..૫..

પ્રતિમુખાલીઢબન્ધુર પૃથુમહાહેતિદન્તુર
વિકટમાયાબહિષ્કૃત વિવિધમાલા પરિષ્કૃત .
પૃથુમહાયન્ત્ર તન્ત્રિત દૃઢદયાતન્ત્રયન્ત્રિત
જય જય શ્રીસુદર્શન જય જય શ્રીસુદર્શન ..૬..

મહિત સંપત્-સદક્ષર વિહિત સંપત્-ષડક્ષર
ષડારચક્રપ્રતિષ્ઠિત સકલતત્વપ્રતિષ્ઠિત .
વિવિધસઙ્કલ્પકલ્પક વિબુધસઙ્કલ્પકલ્પક
જય જય શ્રીસુદર્શન જય જય શ્રીસુદર્શન ..૭..

ભુવનનેતસ્ત્રયીમય સવન તેજસ્ત્રયીમય
નિરવધિસ્વાદુચિન્મય નિખિલશક્તે જગન્મય .
અમિત વિશ્વક્રિયામય શમિત વિષ્વગ્-ભયામય
જય જય શ્રીસુદર્શન જય જય શ્રીસુદર્શન ..૮..

દ્વિચતુષ્કમિદં પ્રભૂતસારં પઠતાં વેઙ્કટનાયકપ્રણીતમ્ .
વિષમેઽપિ મનો˘રથઃ પ્રધાવન્ ન વિહન્યેત રથાઙ્ગધુર્યગુપ્તઃ ..૯..