ಋಷಭದೇವ
.. ಶ್ರೀ ಭಕ್ತಾಮರ ಸ್ತೋತ್ರಮ್..
॥ श्री भक्तामर स्तोत्रम्॥
ಭಕ್ತಾಮರ-ಪ್ರಣತ-ಮೌಲಿ-ಮಣಿ-ಪ್ರಭಾಣಾ-
ಮುದ್ಯೋತಕಂ ದಲಿತ-ಪಾಪ-ತಮೋ-ವಿತಾನಮ್.
ಸಮ್ಯಕ್-ಪ್ರಣಮ್ಯ ಜಿನ-ಪಾದ-ಯುಗಂ ಯುಗಾದಾ-
ವಾಲಮ್ಬನಂ ಭವ-ಜಲೇ ಪತತಾಂ ಜನಾನಾಮ್.. ೧ ..
ಯಃ ಸಂಸ್ತುತಃ ಸಕಲ-ವಾಙ್ ಮಯ-ತತ್ತ್ವ-ಬೋಧಾ-
ದುದ್ಭೂತ-ಬುದ್ಧಿ-ಪಟುಭಿಃ ಸುರ-ಲೋಕ-ನಾಥೈಃ.
ಸ್ತೋತ್ರೈರ್ಜಗತ್-ತ್ರಿತಯ-ಚಿತ್ತ-ಹರೈರುದಾರೈಃ,
ಸ್ತೋಷ್ಯೇ ಕಿಲಾಹಮಪಿ ತಂ ಪ್ರಥಮಂ ಜಿನೇನ್ದ್ರಮ್.. ೨ ..
ಬುದ್ಧ್ಯಾ ವಿನಾಪಿ ವಿಬುಧಾರ್ಚಿತ-ಪಾದ-ಪೀಠ!
ಸ್ತೋತುಂ ಸಮುದ್ಯತ-ಮತಿರ್ವಿಗತ-ತ್ರಪೋಽಹಮ್.
ಬಾಲಂ ವಿಹಾಯ ಜಲ-ಸಂಸ್ಥಿತ-ಮಿನ್ದು-ಬಿಮ್ಬ-
ಮನ್ಯಃ ಕ ಇಚ್ಛತಿ ಜನಃ ಸಹಸಾ ಗ್ರಹೀತುಮ್.. ೩ ..
ವಕ್ತುಂ ಗುಣಾನ್ಗುಣ-ಸಮುದ್ರ! ಶಶಾಙ್ಕ-ಕಾನ್ತಾನ್,
ಕಸ್ತೇ ಕ್ಷಮಃ ಸುರ-ಗುರು-ಪ್ರತಿಮೋಽಪಿ ಬುದ್ಧ್ಯಾ.
ಕಲ್ಪಾನ್ತ-ಕಾಲ-ಪವನೋದ್ಧತ-ನಕ್ರ-ಚಕ್ರಂ,
ಕೋ ವಾ ತರೀತುಮಲಮಮ್ಬುನಿಧಿಂ ಭುಜಾಭ್ಯಾಮ್.. ೪ ..
ಸೋಽಹಂ ತಥಾಪಿ ತವ ಭಕ್ತಿ-ವಶಾನ್ಮುನೀಶ!
ಕರ್ತುಂ ಸ್ತವಂ ವಿಗತ-ಶಕ್ತಿ-ರಪಿ ಪ್ರವೃತ್ತಃ.
ಪ್ರೀತ್ಯಾತ್ಮ-ವೀರ್ಯ-ಮವಿಚಾರ್ಯ ಮೃಗೀ ಮೃಗೇನ್ದ್ರಮ್,
ನಾಭ್ಯೇತಿ ಕಿಂ ನಿಜ-ಶಿಶೋಃ ಪರಿಪಾಲನಾರ್ಥಮ್.. ೫ ..
ಅಲ್ಪ-ಶ್ರುತಂ ಶ್ರುತವತಾಂ ಪರಿಹಾಸ-ಧಾಮ,
ತ್ವದ್-ಭಕ್ತಿರೇವ ಮುಖರೀ-ಕುರುತೇ ಬಲಾನ್ಮಾಮ್.
ಯತ್ಕೋಕಿಲಃ ಕಿಲ ಮಧೌ ಮಧುರಂ ವಿರೌತಿ,
ತಚ್ಚಾಮ್ರ-ಚಾರು-ಕಲಿಕಾ-ನಿಕರೈಕ-ಹೇತುಃ.. ೬ ..
ತ್ವತ್ಸಂಸ್ತವೇನ ಭವ-ಸನ್ತತಿ-ಸನ್ನಿಬದ್ಧಂ,
ಪಾಪಂ ಕ್ಷಣಾತ್ಕ್ಷಯಮುಪೈತಿ ಶರೀರಭಾಜಾಮ್.
ಆಕ್ರಾನ್ತ-ಲೋಕ-ಮಲಿ-ನೀಲ-ಮಶೇಷ-ಮಾಶು,
ಸೂರ್ಯಾಂಶು-ಭಿನ್ನ-ಮಿವ ಶಾರ್ವರ-ಮನ್ಧಕಾರಮ್.. ೭ ..
ಮತ್ವೇತಿ ನಾಥ! ತವ ಸಂಸ್ತವನಂ ಮಯೇದ-
ಮಾರಭ್ಯತೇ ತನು-ಧಿಯಾಪಿ ತವ ಪ್ರಭಾವಾತ್.
ಚೇತೋ ಹರಿಷ್ಯತಿ ಸತಾಂ ನಲಿನೀ-ದಲೇಷು,
ಮುಕ್ತಾ-ಫಲ-ದ್ಯುತಿ-ಮುಪೈತಿ ನನೂದ-ಬಿನ್ದುಃ.. ೮ ..
ಆಸ್ತಾಂ ತವ ಸ್ತವನ-ಮಸ್ತ-ಸಮಸ್ತ-ದೋಷಂ,
ತ್ವತ್ಸಙ್ಕಥಾಽಪಿ ಜಗತಾಂ ದುರಿತಾನಿ ಹನ್ತಿ.
ದೂರೇ ಸಹಸ್ರಕಿರಣಃ ಕುರುತೇ ಪ್ರಭೈವ,
ಪದ್ಮಾಕರೇಷು ಜಲಜಾನಿ ವಿಕಾಸಭಾಞ್ಜಿ.. ೯ ..
ನಾತ್ಯದ್-ಭುತಂ ಭುವನ-ಭೂಷಣ! ಭೂತ-ನಾಥ!
ಭೂತೈರ್ಗುಣೈರ್ಭುವಿ ಭವನ್ತ-ಮಭಿಷ್ಟುವನ್ತಃ.
ತುಲ್ಯಾ ಭವನ್ತಿ ಭವತೋ ನನು ತೇನ ಕಿಂ ವಾ,
ಭೂತ್ಯಾಶ್ರಿತಂ ಯ ಇಹ ನಾತ್ಮಸಮಂ ಕರೋತಿ.. ೧೦ ..
ದೃಷ್ಟ್ವಾ ಭವನ್ತ-ಮನಿಮೇಷ-ವಿಲೋಕನೀಯಂ,
ನಾನ್ಯತ್ರ-ತೋಷ-ಮುಪಯಾತಿ ಜನಸ್ಯ ಚಕ್ಷುಃ.
ಪೀತ್ವಾ ಪಯಃ ಶಶಿಕರ-ದ್ಯುತಿ-ದುಗ್ಧ-ಸಿನ್ಧೋಃ,
ಕ್ಷಾರಂ ಜಲಂ ಜಲನಿಧೇರಸಿತುಂ ಕ ಇಚ್ಛೇತ್.. ೧೧ ..
ಯೈಃ ಶಾನ್ತ-ರಾಗ-ರುಚಿಭಿಃ ಪರಮಾಣುಭಿಸ್-ತ್ವಂ,
ನಿರ್ಮಾಪಿತಸ್-ತ್ರಿ-ಭುವನೈಕ-ಲಲಾಮ-ಭೂತ!
ತಾವನ್ತ ಏವ ಖಲು ತೇಽಪ್ಯಣವಃ ಪೃಥಿವ್ಯಾಂ,
ಯತ್ತೇ ಸಮಾನ-ಮಪರಂ ನ ಹಿ ರೂಪ-ಮಸ್ತಿ.. ೧೨ ..
ವಕ್ತ್ರಂ ಕ್ವ ತೇ ಸುರ-ನರೋರಗ-ನೇತ್ರ-ಹಾರಿ,
ನಿಃಶೇಷ-ನಿರ್ಜಿತ-ಜಗತ್ತ್ರಿತಯೋಪಮಾನಮ್.
ಬಿಮ್ಬಂ ಕಲಙ್ಕ-ಮಲಿನಂ ಕ್ವ ನಿಶಾಕರಸ್ಯ,
ಯದ್ವಾಸರೇ ಭವತಿ ಪಾಣ್ಡುಪಲಾಶ-ಕಲ್ಪಮ್.. ೧೩ ..
ಸಮ್ಪೂರ್ಣ-ಮಣ್ಡಲ-ಶಶಾಙ್ಕ-ಕಲಾ-ಕಲಾಪ-
ಶುಭ್ರಾ ಗುಣಾಸ್-ತ್ರಿ-ಭುವನಂ ತವ ಲಙ್ಘಯನ್ತಿ.
ಯೇ ಸಂಶ್ರಿತಾಸ್-ತ್ರಿ-ಜಗದೀಶ್ವರನಾಥ-ಮೇಕಂ,
ಕಸ್ತಾನ್ ನಿವಾರಯತಿ ಸಞ್ಚರತೋ ಯಥೇಷ್ಟಮ್.. ೧೪ ..
ಚಿತ್ರಂ-ಕಿಮತ್ರ ಯದಿ ತೇ ತ್ರಿದಶಾಙ್ಗನಾಭಿರ್-
ನೀತಂ ಮನಾಗಪಿ ಮನೋ ನ ವಿಕಾರ-ಮಾರ್ಗಮ್.
ಕಲ್ಪಾನ್ತ-ಕಾಲ-ಮರುತಾ ಚಲಿತಾಚಲೇನ,
ಕಿಂ ಮನ್ದರಾದ್ರಿಶಿಖರಂ ಚಲಿತಂ ಕದಾಚಿತ್.. ೧೫ ..
ನಿರ್ಧೂಮ-ವರ್ತಿ-ರಪವರ್ಜಿತ-ತೈಲ-ಪೂರಃ,
ಕೃತ್ಸ್ನಂ ಜಗತ್ತ್ರಯ-ಮಿದಂ ಪ್ರಕಟೀಕರೋಷಿ.
ಗಮ್ಯೋ ನ ಜಾತು ಮರುತಾಂ ಚಲಿತಾಚಲಾನಾಂ,
ದೀಪೋಽಪರಸ್ತ್ವಮಸಿ ನಾಥ! ಜಗತ್ಪ್ರಕಾಶಃ.. ೧೬ ..
ನಾಸ್ತಂ ಕದಾಚಿದುಪಯಾಸಿ ನ ರಾಹುಗಮ್ಯಃ,
ಸ್ಪಷ್ಟೀಕರೋಷಿ ಸಹಸಾ ಯುಗಪಜ್-ಜಗನ್ತಿ.
ನಾಮ್ಭೋಧರೋದರ-ನಿರುದ್ಧ-ಮಹಾ-ಪ್ರಭಾವಃ,
ಸೂರ್ಯಾತಿಶಾಯಿ-ಮಹಿಮಾಸಿ ಮುನೀನ್ದ್ರ! ಲೋಕೇ.. ೧೭ ..
ನಿತ್ಯೋದಯಂ ದಲಿತ-ಮೋಹ-ಮಹಾನ್ಧಕಾರಂ,
ಗಮ್ಯಂ ನ ರಾಹು-ವದನಸ್ಯ ನ ವಾರಿದಾನಾಮ್.
ವಿಭ್ರಾಜತೇ ತವ ಮುಖಾಬ್ಜ-ಮನಲ್ಪಕಾನ್ತಿ,
ವಿದ್ಯೋತಯಜ್-ಜಗದಪೂರ್ವ-ಶಶಾಙ್ಕ-ಬಿಮ್ಬಮ್.. ೧೮ ..
ಕಿಂ ಶರ್ವರೀಷು ಶಶಿನಾಹ್ನಿ ವಿವಸ್ವತಾ ವಾ,
ಯುಷ್ಮನ್ಮುಖೇನ್ದು-ದಲಿತೇಷು ತಮಃಸು ನಾಥ!
ನಿಷ್ಪನ್ನ-ಶಾಲಿ-ವನ-ಶಾಲಿನೀ ಜೀವ-ಲೋಕೇ,
ಕಾರ್ಯಂ ಕಿಯಜ್ಜಲ-ಧರೈ-ರ್ಜಲ-ಭಾರ-ನಮ್ರೈಃ.. ೧೯ ..
ಜ್ಞಾನಂ ಯಥಾ ತ್ವಯಿ ವಿಭಾತಿ ಕೃತಾವಕಾಶಂ,
ನೈವಂ ತಥಾ ಹರಿ-ಹರಾದಿಷು ನಾಯಕೇಷು.
ತೇಜಃ ಸ್ಫುರನ್ಮಣಿಷು ಯಾತಿ ಯಥಾ ಮಹತ್ತ್ವಂ,
ನೈವಂ ತು ಕಾಚ-ಶಕಲೇ ಕಿರಣಾಕುಲೇಽಪಿ.. ೨೦ ..
ಮನ್ಯೇ ವರಂ ಹರಿ-ಹರಾದಯ ಏವ ದೃಷ್ಟಾ,
ದೃಷ್ಟೇಷು ಯೇಷು ಹೃದಯಂ ತ್ವಯಿ ತೋಷಮೇತಿ.
ಕಿಂ ವೀಕ್ಷಿತೇನ ಭವತಾ ಭುವಿ ಯೇನ ನಾನ್ಯಃ,
ಕಶ್ಚಿನ್ಮನೋ ಹರತಿ ನಾಥ! ಭವಾನ್ತರೇಽಪಿ.. ೨೧ ..
ಸ್ತ್ರೀಣಾಂ ಶತಾನಿ ಶತಶೋ ಜನಯನ್ತಿ ಪುತ್ರಾನ್,
ನಾನ್ಯಾ ಸುತಂ ತ್ವದುಪಮಂ ಜನನೀ ಪ್ರಸೂತಾ.
ಸರ್ವಾ ದಿಶೋ ದಧತಿ ಭಾನಿ ಸಹಸ್ರ-ರಶ್ಮಿಂ,
ಪ್ರಾಚ್ಯೇವ ದಿಗ್ಜನಯತಿ ಸ್ಫುರದಂಶು-ಜಾಲಮ್.. ೨೨ ..
ತ್ವಾಮಾಮನನ್ತಿ ಮುನಯಃ ಪರಮಂ ಪುಮಾಂಸ-
ಮಾದಿತ್ಯ-ವರ್ಣ-ಮಮಲಂ ತಮಸಃ ಪುರಸ್ತಾತ್.
ತ್ವಾಮೇವ ಸಮ್ಯ-ಗುಪಲಭ್ಯ ಜಯನ್ತಿ ಮೃತ್ಯುಂ,
ನಾನ್ಯಃ ಶಿವಃ ಶಿವಪದಸ್ಯ ಮುನೀನ್ದ್ರ! ಪನ್ಥಾಃ.. ೨೩ ..
ತ್ವಾ-ಮವ್ಯಯಂ ವಿಭು-ಮಚಿನ್ತ್ಯ-ಮಸಂಖ್ಯ-ಮಾದ್ಯಂ,
ಬ್ರಹ್ಮಾಣಮೀಶ್ವರ-ಮನನ್ತ-ಮನಙ್ಗ-ಕೇತುಮ್.
ಯೋಗೀಶ್ವರಂ ವಿದಿತ-ಯೋಗ-ಮನೇಕ-ಮೇಕಂ,
ಜ್ಞಾನ-ಸ್ವರೂಪ-ಮಮಲಂ ಪ್ರವದನ್ತಿ ಸನ್ತಃ.. ೨೪ ..
ಬುದ್ಧಸ್ತ್ವಮೇವ ವಿಬುಧಾರ್ಚಿತ-ಬುದ್ಧಿ-ಬೋಧಾತ್,
ತ್ವಂ ಶಙ್ಕರೋಽಸಿ ಭುವನ-ತ್ರಯ-ಶಙ್ಕರತ್ವಾತ್.
ಧಾತಾಸಿ ಧೀರ! ಶಿವ-ಮಾರ್ಗ ವಿಧೇರ್ವಿಧಾನಾದ್,
ವ್ಯಕ್ತಂ ತ್ವಮೇವ ಭಗವನ್ ಪುರುಷೋತ್ತಮೋಽಸಿ.. ೨೫ ..
ತುಭ್ಯಂ ನಮಸ್-ತ್ರಿಭುವನಾರ್ತಿ-ಹರಾಯ ನಾಥ!
ತುಭ್ಯಂ ನಮಃ ಕ್ಷಿತಿ-ತಲಾಮಲ-ಭೂಷಣಾಯ.
ತುಭ್ಯಂ ನಮಸ್-ತ್ರಿಜಗತಃ ಪರಮೇಶ್ವರಾಯ,
ತುಭ್ಯಂ ನಮೋ ಜಿನ! ಭವೋದಧಿ-ಶೋಷಣಾಯ.. ೨೬ ..
ಕೋ ವಿಸ್ಮಯೋಽತ್ರ ಯದಿ ನಾಮ ಗುಣೈ-ರಶೇಷೈಸ್-
ತ್ವಂ ಸಂಶ್ರಿತೋ ನಿರವಕಾಶತಯಾ ಮುನೀಶ!
ದೋಷೈ-ರುಪಾತ್ತ-ವಿವಿಧಾಶ್ರಯ-ಜಾತ-ಗರ್ವೈಃ,
ಸ್ವಪ್ನಾನ್ತರೇಽಪಿ ನ ಕದಾಚಿದಪೀಕ್ಷಿತೋಽಸಿ.. ೨೭ ..
ಉಚ್ಚೈ-ರಶೋಕ-ತರು-ಸಂಶ್ರಿತಮುನ್ಮಯೂಖ-
ಮಾಭಾತಿ ರೂಪಮಮಲಂ ಭವತೋ ನಿತಾನ್ತಮ್.
ಸ್ಪಷ್ಟೋಲ್ಲಸತ್-ಕಿರಣ-ಮಸ್ತ-ತಮೋ-ವಿತಾನಂ,
ಬಿಮ್ಬಂ ರವೇರಿವ ಪಯೋಧರ-ಪಾಶ್ರ್ವವರ್ತಿ.. ೨೮ ..
ಸಿಂಹಾಸನೇ ಮಣಿ-ಮಯೂಖ-ಶಿಖಾ-ವಿಚಿತ್ರೇ,
ವಿಭ್ರಾಜತೇ ತವ ವಪುಃ ಕನಕಾವದಾತಮ್.
ಬಿಮ್ಬಂ ವಿಯದ್-ವಿಲಸ-ದಂಶುಲತಾ-ವಿತಾನಂ,
ತುಙ್ಗೋದಯಾದ್ರಿ-ಶಿರಸೀವ ಸಹಸ್ರ-ರಶ್ಮೇಃ.. ೨೯ ..
ಕುನ್ದಾವದಾತ-ಚಲ-ಚಾಮರ-ಚಾರು-ಶೋಭಂ,
ವಿಭ್ರಾಜತೇ ತವ ವಪುಃ ಕಲಧೌತ-ಕಾನ್ತಮ್.
ಉದ್ಯಚ್ಛಶಾಙ್ಕ-ಶುಚಿನಿರ್ಝರ-ವಾರಿ-ಧಾರ-
ಮುಚ್ಚೈಸ್ತಟಂ ಸುರಗಿರೇರಿವ ಶಾತಕೌಮ್ಭಮ್.. ೩೦ ..
ಛತ್ರ-ತ್ರಯಂ ತವ ವಿಭಾತಿ ಶಶಾಙ್ಕ-ಕಾನ್ತ-
ಮುಚ್ಚೈಃ ಸ್ಥಿತಂ ಸ್ಥಗಿತ-ಭಾನು-ಕರ-ಪ್ರತಾಪಮ್.
ಮುಕ್ತಾ-ಫಲ-ಪ್ರಕರ-ಜಾಲ-ವಿವೃದ್ಧ-ಶೋಭಂ,
ಪ್ರಖ್ಯಾಪಯತ್-ತ್ರಿಜಗತಃ ಪರಮೇಶ್ವರತ್ವಮ್.. ೩೧ ..
ಗಮ್ಭೀರ-ತಾರ-ರವ-ಪೂರಿತ-ದಿಗ್ವಿಭಾಗಸ್-
ತ್ರೈಲೋಕ್ಯ-ಲೋಕ-ಶುಭ-ಸಙ್ಗಮ-ಭೂತಿ-ದಕ್ಷಃ.
ಸದ್ಧರ್ಮ-ರಾಜ-ಜಯ-ಘೋಷಣ-ಘೋಷಕಃ ಸನ್,
ಖೇ ದುನ್ದುಭಿ-ರ್ಧ್ವನತಿ ತೇ ಯಶಸಃ ಪ್ರವಾದೀ.. ೩೨ ..
ಮನ್ದಾರ-ಸುನ್ದರ-ನಮೇರು-ಸುಪಾರಿಜಾತ-
ಸನ್ತಾನಕಾದಿ-ಕುಸುಮೋತ್ಕರ-ವೃಷ್ಟಿ-ರುದ್ಧಾ.
ಗನ್ಧೋದ-ಬಿನ್ದು-ಶುಭ-ಮನ್ದ-ಮರುತ್ಪ್ರಪಾತಾ,
ದಿವ್ಯಾ ದಿವಃ ಪತತಿ ತೇ ವಚಸಾಂ ತತಿರ್ವಾ.. ೩೩ ..
ಶುಮ್ಭತ್-ಪ್ರಭಾವಲಯ-ಭೂರಿ-ವಿಭಾ-ವಿಭೋಸ್ತೇ,
ಲೋಕ-ತ್ರಯೇ-ದ್ಯುತಿಮತಾಂ ದ್ಯುತಿ-ಮಾಕ್ಷಿಪನ್ತೀ.
ಪ್ರೋದ್ಯದ್-ದಿವಾಕರ-ನಿರನ್ತರ-ಭೂರಿ-ಸಂಖ್ಯಾ,
ದೀಪ್ತ್ಯಾ ಜಯತ್ಯಪಿ ನಿಶಾಮಪಿ ಸೋಮಸೌಮ್ಯಾಮ್.. ೩೪ ..
ಸ್ವರ್ಗಾಪವರ್ಗ-ಗಮ-ಮಾರ್ಗ-ವಿಮಾರ್ಗಣೇಷ್ಟಃ,
ಸದ್ಧರ್ಮ-ತತ್ತ್ವ-ಕಥನೈಕ-ಪಟುಸ್-ತ್ರಿಲೋಕ್ಯಾಃ.
ದಿವ್ಯ-ಧ್ವನಿ-ರ್ಭವತಿ ತೇ ವಿಶದಾರ್ಥ-ಸರ್ವ-
ಭಾಷಾಸ್ವಭಾವ-ಪರಿಣಾಮ-ಗುಣೈಃ ಪ್ರಯೋಜ್ಯಃ.. ೩೫ ..
ಉನ್ನಿದ್ರ-ಹೇಮ-ನವ-ಪಙ್ಕಜ-ಪುಞ್ಜ-ಕಾನ್ತೀ,
ಪರ್ಯುಲ್ಲಸನ್-ನಖ-ಮಯೂಖ-ಶಿಖಾಭಿರಾಮೌ.
ಪಾದೌ ಪದಾನಿ ತವ ಯತ್ರ ಜಿನೇನ್ದ್ರ! ಧತ್ತಃ,
ಪದ್ಮಾನಿ ತತ್ರ ವಿಬುಧಾಃ ಪರಿಕಲ್ಪಯನ್ತಿ.. ೩೬ ..
ಇತ್ಥಂ ಯಥಾ ತವ ವಿಭೂತಿ-ರಭೂಜ್-ಜಿನೇನ್ದ್ರ!
ಧರ್ಮೋಪದೇಶನ-ವಿಧೌ ನ ತಥಾ ಪರಸ್ಯ.
ಯಾದೃಕ್-ಪ್ರಭಾ ದಿನಕೃತಃ ಪ್ರಹತಾನ್ಧಕಾರಾ,
ತಾದೃಕ್-ಕುತೋ ಗ್ರಹಗಣಸ್ಯ ವಿಕಾಸಿನೋಽಪಿ.. ೩೭ ..
ಶ್ಚ್ಯೋತನ್-ಮದಾವಿಲ-ವಿಲೋಲ-ಕಪೋಲ-ಮೂಲ-
ಮತ್ತ-ಭ್ರಮದ್-ಭ್ರಮರ-ನಾದ-ವಿವೃದ್ಧ-ಕೋಪಮ್.
ಐರಾವತಾಭಮಿಭ-ಮುದ್ಧತ-ಮಾಪತನ್ತಂ,
ದೃಷ್ಟ್ವಾ ಭಯಂ ಭವತಿ ನೋ ಭವದಾಶ್ರಿತಾನಾಮ್.. ೩೮ ..
ಭಿನ್ನೇಭ-ಕುಮ್ಭ-ಗಲ-ದುಜ್ಜ್ವಲ-ಶೋಣಿತಾಕ್ತ-
ಮುಕ್ತಾ-ಫಲ-ಪ್ರಕರಭೂಷಿತ-ಭೂಮಿ-ಭಾಗಃ.
ಬದ್ಧ-ಕ್ರಮಃ ಕ್ರಮ-ಗತಂ ಹರಿಣಾಧಿಪೋಽಪಿ,
ನಾಕ್ರಾಮತಿ ಕ್ರಮ-ಯುಗಾಚಲ-ಸಂಶ್ರಿತಂ ತೇ.. ೩೯ ..
ಕಲ್ಪಾನ್ತ-ಕಾಲ-ಪವನೋದ್ಧತ-ವಹ್ನಿ-ಕಲ್ಪಂ,
ದಾವಾನಲಂ ಜ್ವಲಿತ-ಮುಜ್ಜ್ವಲ-ಮುತ್ಸ್ಫುಲಿಙ್ಗಮ್.
ವಿಶ್ವಂ ಜಿಘತ್ಸುಮಿವ ಸಮ್ಮುಖ-ಮಾಪತನ್ತಂ,
ತ್ವನ್ನಾಮ-ಕೀರ್ತನ-ಜಲಂ ಶಮಯತ್ಯಶೇಷಮ್.. ೪೦ ..
ರಕ್ತೇಕ್ಷಣಂ ಸಮದ-ಕೋಕಿಲ-ಕಣ್ಠ-ನೀಲಮ್,
ಕ್ರೋಧೋದ್ಧತಂ ಫಣಿನ-ಮುತ್ಫಣ-ಮಾಪತನ್ತಮ್.
ಆಕ್ರಾಮತಿ ಕ್ರಮ-ಯುಗೇಣ ನಿರಸ್ತ-ಶಙ್ಕಸ್-
ತ್ವನ್ನಾಮ-ನಾಗದಮನೀ ಹೃದಿ ಯಸ್ಯ ಪುಂಸಃ.. ೪೧ ..
ವಲ್ಗತ್-ತುರಙ್ಗ-ಗಜ-ಗರ್ಜಿತ-ಭೀಮನಾದ-
ಮಾಜೌ ಬಲಂ ಬಲವತಾ-ಮಪಿ-ಭೂಪತೀನಾಮ್.
ಉದ್ಯದ್-ದಿವಾಕರ-ಮಯೂಖ-ಶಿಖಾಪವಿದ್ಧಂ,
ತ್ವತ್ಕೀರ್ತನಾತ್ತಮ ಇವಾಶು ಭಿದಾಮುಪೈತಿ.. ೪೨ ..
ಕುನ್ತಾಗ್ರ-ಭಿನ್ನ-ಗಜ-ಶೋಣಿತ-ವಾರಿವಾಹ-
ವೇಗಾವತಾರ-ತರಣಾತುರ-ಯೋಧ-ಭೀಮೇ.
ಯುದ್ಧೇ ಜಯಂ ವಿಜಿತ-ದುರ್ಜಯ-ಜೇಯ-ಪಕ್ಷಾಸ್-
ತ್ವತ್ಪಾದ-ಪಙ್ಕಜ-ವನಾಶ್ರಯಿಣೋ ಲಭನ್ತೇ.. ೪೩ ..
ಅಮ್ಭೋನಿಧೌ ಕ್ಷುಭಿತ-ಭೀಷಣ-ನಕ್ರ-ಚಕ್ರ-
ಪಾಠೀನ-ಪೀಠ-ಭಯ-ದೋಲ್ವಣ-ವಾಡವಾಗ್ನೌ.
ರಙ್ಗತ್ತರಙ್ಗ-ಶಿಖರ-ಸ್ಥಿತ-ಯಾನ-ಪಾತ್ರಾಸ್-
ತ್ರಾಸಂ ವಿಹಾಯ ಭವತಃ ಸ್ಮರಣಾದ್-ವ್ರಜನ್ತಿ.. ೪೪ ..
ಉದ್ಭೂತ-ಭೀಷಣ-ಜಲೋದರ-ಭಾರ-ಭುಗ್ನಾಃ,
ಶೋಚ್ಯಾಂ ದಶಾ-ಮುಪಗತಾಶ್-ಚ್ಯುತ-ಜೀವಿತಾಶಾಃ.
ತ್ವತ್ಪಾದ-ಪಙ್ಕಜ-ರಜೋ-ಮೃತ-ದಿಗ್ಧ-ದೇಹಾ,
ಮರ್ತ್ಯಾ ಭವನ್ತಿ ಮಕರ-ಧ್ವಜ-ತುಲ್ಯರೂಪಾಃ.. ೪೫ ..
ಆಪಾದ-ಕಣ್ಠಮುರು-ಶೃಙ್ಖಲ-ವೇಷ್ಟಿತಾಙ್ಗಾ,
ಗಾಢಂ-ಬೃಹನ್-ನಿಗಡ-ಕೋಟಿ-ನಿಘೃಷ್ಟ-ಜಙ್ಘಾಃ.
ತ್ವನ್-ನಾಮ-ಮನ್ತ್ರ-ಮನಿಶಂ ಮನುಜಾಃ ಸ್ಮರನ್ತಃ,
ಸದ್ಯಃ ಸ್ವಯಂ ವಿಗತ-ಬನ್ಧ-ಭಯಾ ಭವನ್ತಿ.. ೪೬ ..
ಮತ್ತ-ದ್ವಿಪೇನ್ದ್ರ-ಮೃಗ-ರಾಜ-ದವಾನಲಾಹಿ-
ಸಂಗ್ರಾಮ-ವಾರಿಧಿ-ಮಹೋದರ-ಬನ್ಧ-ನೋತ್ಥಮ್.
ತಸ್ಯಾಶು ನಾಶ-ಮುಪಯಾತಿ ಭಯಂ ಭಿಯೇವ,
ಯಸ್ತಾವಕಂ ಸ್ತವ-ಮಿಮಂ ಮತಿಮಾನಧೀತೇ.. ೪೭ ..
ಸ್ತೋತ್ರ-ಸ್ರಜಂ ತವ ಜಿನೇನ್ದ್ರ ಗುಣೈರ್ನಿಬದ್ಧಾಮ್,
ಭಕ್ತ್ಯಾ ಮಯಾ ರುಚಿರ-ವರ್ಣ-ವಿಚಿತ್ರ-ಪುಷ್ಪಾಮ್.
ಧತ್ತೇ ಜನೋ ಯ ಇಹ ಕಣ್ಠ-ಗತಾ-ಮಜಸ್ರಂ,
ತಂ ಮಾನತುಙ್ಗ-ಮವಶಾ-ಸಮುಪೈತಿ ಲಕ್ಷ್ಮೀಃ.. ೪೮ ..
.. ಇತಿ ಶ್ರೀ ಮಾನತುಙ್ಗಾಚಾರ್ಯ-ವಿರಚಿತಂ ಶ್ರೀ ಭಕ್ತಾಮರ ಸ್ತೋತ್ರಂ ಸಮ್ಪೂರ್ಣಮ್ ..