శనిమృత్యుఞ్జయస్తోత్రమ్

శనిమృత్యుఞ్జయస్తోత్రమ్

శ్రీ గణేశాయ నమః.
ఓం మహాకాల శని మృత్యుంజయాయ నమః.

నీలాద్రీశోభాఞ్చితదివ్యమూర్తిః
ఖడ్గో త్రిదణ్డీ శరచాపహస్తః.
శమ్భుర్మహాకాలశనిః పురారి-
ర్జయత్యశేషాసురనాశకారీ ..1

మేరుపృష్ఠే సమాసీనం సామరస్యే స్థితం శివమ్ .
ప్రణమ్య శిరసా గౌరీ పృచ్ఛతిస్మ జగద్ధితమ్ ..2

.. పార్వత్యువాచ..

భగవన్ ! దేవదేవేశ ! భక్తానుగ్రహకారక ! .
అల్పమృత్యువినాశాయ యత్త్వయా పూర్వ సూచితమ్ ..3..

తదేవత్వం మహాబాహో ! లోకానాం హితకారకమ్ .
తవ మూర్తి ప్రభేదస్య మహాకాలస్య సామ్ప్రతమ్ .. 4 ..

శనేర్మృత్యుఞ్జయస్తోత్రం బ్రూహి మే నేత్రజన్మనః .
అకాల మృత్యుహరణమపమృత్యు నివారణమ్ ..5..

శనిమన్త్రప్రభేదా యే తైర్యుక్తం యత్స్తవం శుభమ్ .
ప్రతినామ చథుర్యన్తం నమోన్తం మనునాయుతమ్ ..6..

.. శ్రీశంకర ఉవాచ..

నిత్యే ప్రియతమే గౌరి సర్వలోక-హితేరతే .
గుహ్యాద్గుహ్యతమం దివ్యం సర్వలోకోపకారకమ్ ..7 ..

శనిమృత్యుఞ్జయస్తోత్రం ప్రవక్ష్యామి తవఽధునా .
సర్వమంగలమాంగల్యం సర్వశత్రు విమర్దనమ్ ..8..

సర్వరోగప్రశమనం సర్వాపద్వినివారణమ్ .
శరీరారోగ్యకరణమాయువృద్ధికరం నృణామ్ ..9..

యది భక్తాసి మే గౌరీ గోపనీయం ప్రయత్నతః .
గోపితం సర్వతన్త్రేషు తచ్ఛ్రణుష్వ మహేశ్వరీ ! ..10..

ఋషిన్యాసం కరన్యాసం దేహన్యాసం సమాచరేత్ .
మహోగ్రం మూర్ఘ్ని విన్యస్య ముఖే వైవస్వతం న్యసేత్ ..11..

గలే తు విన్యసేన్మన్దం బాహ్వోర్మహాగ్రహం న్యసేత్ .
హృది న్యసేన్మహాకాలం గుహ్యే కృశతనుం న్యసేత్ ..12

జాన్వోమ్తూడుచరం న్యస్య పాదయోస్తు శనైశ్చరమ్.
ఏవం న్యాసవిధి కృత్వా పశ్చాత్ కాలాత్మనః శనేః ..13..

న్యాసం ధ్యానం ప్రవక్ష్యామి తనౌ శ్యార్వా పఠేన్నరః .
కల్పాదియుగభేదాంశ్చ కరాంగన్యాసరుపిణః ..14..

కాలాత్మనో న్యసేద్ గాత్రే మృత్యుఞ్జయ ! నమోఽస్తు తే .
మన్వన్తరాణి సర్వాణి మహాకాలస్వరుపిణః ..15..

భావయేత్ప్రతి ప్రత్యంగే మహాకాలాయ తే నమః .
భావయేత్ప్రభవాద్యబ్దాన్ శీర్షే కాలజితే నమః ..16..

నమస్తే నిత్యసేవ్యాయ విన్యసేదయనే భ్రువోః .
సౌరయే చ నమస్తేఽతు గణ్డయోర్విన్యసేదృతూన్ ..17..

శ్రావణం భావయేదక్ష్ణోర్నమః కృష్ణనిభాయ చ .
మహోగ్రాయ నమో భార్దం తథా శ్రవణయోర్న్యసేత్ ..18..

నమో వై దుర్నిరీక్ష్యాయ చాశ్వినం విన్యసేన్ముఖే .
నమో నీలమయూఖాయ గ్రీవాయాం కార్తికం న్యసేత్ ..19..

మార్గశీర్ష న్యసేద్-బాహ్వోర్మహారౌద్రాయ తే నమః .
ఊర్ద్వలోక-నివాసాయ పౌషం తు హృదయే న్యసేత్ ..20..

నమః కాలప్రబోధాయ మాఘం వై చోదరేన్యసేత్ .
మన్దగాయ నమో మేఢ్రే న్యసేర్ద్వఫాల్గునం తథా ..21..

ఊర్వోర్న్యసేచ్చైత్రమాసం నమః శివోస్భవాయ చ .
వైశాఖం విన్యసేజ్జాన్వోర్నమః సంవర్త్తకాయ చ ..22..

జంఘయోర్భావయేజ్జ్యేష్ఠం భైరవాయ నమస్తథా .
ఆషాఢ఼ం పాద్యోశ్చైవ శనయే చ నమస్తథా ..23..

కృష్ణపక్షం చ క్రూరాయ నమః ఆపాదమస్తకే .
న్యసేదాశీర్షపాదాన్తే శుక్లపక్షం గ్రహాయ చ ..24..

నయసేన్మూలం పాదయోశ్చ గ్రహాయ శనయే నమః .
నమః సర్వజితే చైవ తోయం సర్వాంగులౌ న్యసేత్ ..25..

న్యసేద్-గుల్ఫ-ద్వయే విశ్వం నమః శుష్కతరాయ చ .
విష్ణుభం భావయేజ్జంఘోభయే శిష్టతమాయ తే ..26..

జానుద్వయే ధనిష్ఠాం చ న్యసేత్ కృష్ణరుచే నమః .
ఊరుద్వయే వారుర్ణాంన్యసేత్కాలభృతే నమః ..27..

పూర్వభాద్రం న్యసేన్మేఢ్రే జటాజూటధరాయ చ .
పృష్ఠఉత్తరభాద్రం చ కరాలాయ నమస్తథా ..28..

రేవతీం చ న్యసేన్నాభో నమో మన్దచరాయ చ .
గర్భదేశే న్యసేద్దస్త్రం నమః శ్యామతరాయ చ ..29..

నమో భోగిస్త్రజే నిత్యం యమం స్తనయుగే న్యసేత్ .
న్యేసత్కృత్తికాం హృదయే నమస్తైలప్రియాయ చ ..30..

రోహిణీం భావయేద్ధస్తే నమస్తే ఖడ్గధారీణే .
మృగం న్యేసతద్వామ హస్తే త్రిదణ్డోల్లసితాయ చ ..31..

దక్షోర్ద్ధ్వ భావయేద్రౌద్రం నమో వై బాణధారిణే .
పునర్వసుమూర్ద్ధ్వ నమో వై చాపధారిణే ..32..

తిష్యం న్యసేద్దక్షబాహౌ నమస్తే హర మన్యవే .
సార్పం న్యసేద్వామబాహౌ చోగ్రచాపాయ తే నమః ..33..

మఘాం విభావయేత్కణ్ఠే నమస్తే భస్మధారిణే .
ముఖే న్యసేద్-భగర్క్ష చ నమః క్రూరగ్రహాయ చ ..34..

భావయేద్దక్షనాసాయామర్యమాణశ్వ యోగినే .
భావయేద్వామనాసాయాం హస్తర్క్షం ధారిణే నమః ..35..

త్వాష్ట్రం న్యసేద్దక్షకర్ణే కృసరాన్న ప్రియాయ తే .
స్వాతీం న్యేసద్వామకర్ణే నమో బృహ్మమయాయ తే ..36..

విశాఖాం చ దక్షనేత్రే నమస్తే జ్ఞానదృష్టయే .
విష్కుమ్భం భావయేచ్ఛీర్షేసన్ధౌ కాలాయ తే నమః ..37..

ప్రీతియోగం భ్రువోః సన్ధౌ మహామన్దం ! నమోఽస్తు తే .
నేత్రయోః సన్ధావాయుష్మద్యోగం భీష్మాయ తే నమః ..38..

సౌభాగ్యం భావయేన్నాసాసన్ధౌ ఫలాశనాయ చ .
శోభనం భావయేత్కర్ణే సన్ధౌ పిణ్యాత్మనే నమః ..39..

నమః కృష్ణయాతిగణ్డం హనుసన్ధౌ విభావయేత్ .
నమో నిర్మాంసదేహాయ సుకర్మాణం శిరోధరే ..40..

ధృతిం న్యసేద్దక్షవాహౌ పృష్ఠే ఛాయాసుతాయ చ .
తన్మూలసన్ధౌ శూలం చ న్యసేదుగ్రాయ తే నమః ..41..

తత్కూర్పరే న్యసేదగణ్డే నిత్యానన్దాయ తే నమః .
వృద్ధిం తన్మణిబన్ధే చ కాలజ్ఞాయ నమో న్యసేత్ ..42..

ధ్రువం తద్ఙ్గులీ-మూలసన్ధౌ కృష్ణాయ తే నమః .
వ్యాఘాతం భావయేద్వామబాహుపృష్ఠే కృశాయ చ ..43..

హర్షణం తన్మూలసన్ధౌ భుతసన్తాపినే నమః .
తత్కూర్పరే న్యసేద్వజ్రం సానన్దాయ నమోఽస్తు తే ..44..

సిద్ధిం తన్మణిబన్ధే చ న్యసేత్ కాలాగ్నయే నమః .
వ్యతీపాతం కరాగ్రేషు న్యసేత్కాలకృతే నమః ..45..

వరీయాంసం దక్షపార్శ్వసన్ధౌ కాలాత్మనే నమః .
పరిఘం భావయేద్వామపార్శ్వసన్ధౌ నమోఽస్తు తే ..46..

న్యసేద్దక్షోరుసన్ధౌ చ శివం వై కాలసాక్షిణే .
తజ్జానౌ భావయేత్సిద్ధిం మహాదేహాయ తే నమః ..47..

సాధ్యం న్యసేచ్చ తద్-గుల్ఫసన్ధౌ ఘోరాయ తే నమః .
న్యసేత్తదంగులీసన్ధౌ శుభం రౌద్రాయ తే నమః ..48..

న్యసేద్వామారుసన్ధౌ చ శుక్లకాలవిదే నమః .
బ్రహ్మయోగం చ తజ్జానో న్యసేత్సద్యోగినే నమః ..49..

ఐన్ద్రం తద్-గుల్ఫసన్ధౌ చ యోగాఽధీశాయ తే నమః .
న్యసేత్తదంగులీసన్ధౌ నమో భవ్యాయ వైధృతిమ్ ..50..

చర్మణి బవకరణం భావయేద్యజ్వనే నమః .
బాలవం భావయేద్రక్తే సంహారక ! నమోఽస్తు తే ..51..

కౌలవం భావయేదస్థ్ని నమస్తే సర్వభక్షిణే .
తైత్తిలం భావయేన్మసి ఆమమాంసప్రియాయ తే ..52..

గరం న్యసేద్వపాయాం చ సర్వగ్రాసాయ తే నమః .
న్యసేద్వణిజం మజ్జాయాం సర్వాన్తక ! నమోఽస్తు తే ..53..

విర్యేవిభావయేద్విష్టిం నమో మన్యూగ్రతేజసే .
రుద్రమిత్ర ! పితృవసువారీణ్యేతాంశ్చ పఞ్చ చ ..54..

ముహూర్తాంశ్చ దక్షపాదనఖేషు భావయేన్నమః .
ఖగేశాయ చ ఖస్థాయ ఖేచరాయ స్వరుపిణే ..55..

పురుహూతశతమఖే విశ్వవేధో-విధూంస్తథా .
ముహూర్తాంశ్చ వామపాదనఖేషు భావయేన్నమః ..56..

సత్యవ్రతాయ సత్యాయ నిత్యసత్యాయ తే నమః .
సిద్ధేశ్వర ! నమస్తుభ్యం యోగేశ్వర ! నమోఽస్తు తే ..57..

వహ్నినక్తంచరాంశ్చైవ వరుణార్యమయోనకాన్ .
ముహూర్తాంశ్చ దక్షహస్తనఖేషు భావయేన్నమః ..58..

లగ్నోదయాయ దీర్ఘాయ మార్గిణే దక్షదృష్టయే .
వక్రాయ చాతిక్రూరాయ నమస్తే వామదృష్టయే ..59..

వామహస్తనఖేష్వన్త్యవర్ణేశాయ నమోఽస్తు తే .
గిరిశాహిర్బుధ్న్యపూషాజపష్ద్దస్త్రాంశ్చ భావయేత్ ..60..

రాశిభోక్త్రే రాశిగాయ రాశిభ్రమణకారిణే .
రాశినాథాయ రాశీనాం ఫలదాత్రే నమోఽస్తు తే ..61..

యమాగ్ని-చన్ద్రాదితిజవిధాతృంశ్చ విభావయేత్ .
ఊర్ద్ధ్వ-హస్త-దక్షనఖేష్వత్యకాలాయ తే నమః ..62..

తులోచ్చస్థాయ సౌమ్యాయ నక్రకుమ్భగృహాయ చ .
సమీరత్వష్టజీవాంశ్చ విష్ణు తిగ్మ ద్యుతీన్నయసేత్ ..63..

ఊర్ధ్వ-వామహస్త-నఖేష్వన్యగ్రహ నివారిణే .
తుష్టాయ చ వరిష్ఠాయ నమో రాహుసఖాయ చ ..64..

రవివారం లలాటే చ న్యసేద్-భీమదృశే నమః .
సోమవారం న్యసేదాస్యే నమో మృతప్రియాయ చ ..65..

భౌమవారం న్యసేత్స్వాన్తే నమో బ్రహ్మ-స్వరుపిణే .
మేఢ్రం న్యసేత్సౌమ్యవారం నమో జీవ-స్వరుపిణే ..66..

వృషణే గురువారం చ నమో మన్త్ర-స్వరుపిణే .
భృగువారం మలద్వారే నమః ప్రలయకారిణే ..67..

పాదయోః శనివారం చ నిర్మాంసాయ నమోఽస్తు తే .
ఘటికా న్యసేత్కేశేషు నమస్తే సూక్ష్మరుపిణే ..68..

కాలరుపిన్నమస్తేఽస్తు సర్వపాపప్రణాశకః !.
త్రిపురస్య వధార్థాంయ శమ్భుజాతాయ తే నమః ..69..

నమః కాలశరీరాయ కాలనున్నాయ తే నమః .
కాలహేతో ! నమస్తుభ్యం కాలనన్దాయ వై నమః ..70..

అఖణ్డదణ్డమానాయ త్వనాద్యన్తాయ వై నమః .
కాలదేవాయ కాలాయ కాలకాలాయ తే నమః ..71..

నిమేషాదిమహాకల్పకాలరుపం చ భైరవమ్ .
మృత్యుఞ్జయం మహాకాలం నమస్యామి శనైశ్చరమ్ ..72..

దాతారం సర్వభవ్యానాం భక్తానామభయంకరమ్ .
మృత్యుఞ్జయం మహాకాలం నమస్యామి శనైశ్చరమ్ ..73..

కర్త్తారం సర్వదుఃఖానాం దుష్టానాం భయవర్ధనమ్ .
మృత్యుఞ్జయం మహాకాలం నమస్యామి శనైశ్చరమ్ ..74..

హర్త్తారం గ్రహజాతానాం ఫలానామఘకారిణామ్ .
మృత్యుఞ్జయం మహాకాలం నమస్యామి శనైశ్చరమ్ ..75..

సర్వేషామేవ భూతానాం సుఖదం శాన్తమవ్యయమ్ .
మృత్యుఞ్జయం మహాకాలం నమస్యామి శనైశ్చరమ్ ..76..

కారణం సుఖదుఃఖానాం భావాఽభావ-స్వరుపిణమ్ .
మృత్యుఞ్జయం మహాకాలం నమస్యామి శనైశ్చరమ్ ..77..

అకాల-మృత్యు-హరణఽమపమృత్యు నివారణమ్ .
మృత్యుఞ్జయం మహాకాలం నమస్యామి శనైశ్చరమ్ ..78..

కాలరుపేణ సంసార భక్షయన్తం మహాగ్రహమ్ .
మృత్యుఞ్జయం మహాకాలం నమస్యామి శనైశ్చరమ్ ..79..

దుర్నిరీక్ష్యం స్థూలరోమం భీషణం దీర్ఘ-లోచనమ్ .
మృత్యుఞ్జయం మహాకాలం నమస్యామి శనైశ్చరమ్ ..80..

గ్రహాణాం గ్రహభూతం చ సర్వగ్రహ-నివారణమ్ .
మృత్యుఞ్జయం మహాకాలం నమస్యామి శనైశ్చరమ్ ..81..

కాలస్య వశగాః సర్వే న కాలః కస్యచిద్వశః .
తస్మాత్త్వాం కాలపురుషం ప్రణతోఽస్మి శనైశ్చరమ్ ..82..

కాలదేవ జగత్సర్వం కాల ఏవ విలీయతే .
కాలరుపం స్వయం శమ్భుః కాలాత్మా గ్రహదేవతా ..83..

చణ్డీశో రుద్రడాకిన్యాక్రాన్తశ్చణ్డీశ ఉచ్యతే .
విద్యుదాకలితో నద్యాం సమారుఢో రసాధిపః ..84..

చణ్డీశః శుకసంయుక్తో జిహ్వయా లలితః పునః .
క్షతజస్తామసీ శోభీ స్థిరాత్మా విద్యుతా యుతః ..85..

నమోఽన్తో మనురిత్యేష శనితుష్టికరః శివే .
ఆద్యన్తేఽష్టోత్తరశతం మనుమేనం జపేన్నరః ..86..

యః పఠేచ్ఛ్రణుయాద్వాపి ధ్యాత్త్వా సమ్పూజ్య భక్తితః .
త్రస్య మృత్యోర్భయం నైవ శతవర్షావధిప్రియే !..87..

జ్వరాః సర్వే వినశ్యన్తి దద్రు-విస్ఫోటకచ్ఛుకాః .
దివా సౌరిం స్మరేత్ రాత్రౌ మహాకాలం యజన్ పఠేత ..88..

జన్మర్క్షే చ యదా సౌరిర్జపేదేతత్సహస్త్రకమ్ .
వేధగే వామవేధే వా జపేదర్ద్ధసహస్త్రకమ్ ..89..

ద్వితీయే ద్వాదశే మన్దే తనౌ వా చాష్టమేఽపి వా .
తత్తద్రాశౌ భవేద్యావత్ పఠేత్తావద్దినావధి ..90..

చతుర్థే దశమే వాఽపి సప్తమే నవపఞ్చమే .
గోచరే జన్మలగ్నేశే దశాస్వన్తర్దశాసు చ ..91..

గురులాఘవజ్ఞానేన పఠేదావృత్తిసంఖ్యయా .
శతమేకం త్రయం వాథ శతయుగ్మం కదాచన ..92..

ఆపదస్తస్య నశ్యన్తి పాపాని చ జయం భవేత్ .
మహాకాలాలయే పీఠే హ్యథవా జలసన్నిధౌ ..93..

పుణ్యక్షేత్రేఽశ్వత్థమూలే తైలకుమ్భాగ్రతో గృహే .
నియమేనైకభక్తేన బ్రహ్మచర్యేణ మౌనినా ..94..

శ్రోతవ్యం పఠితవ్యం చ సాధకానాం సుఖావహమ్ .
పరం స్వస్త్యయనం పుణ్యం స్తోత్రం మృత్యుఞ్జయాభిధమ్ ..95..

కాలక్రమేణ కథితం న్యాసక్రమ సమన్వితమ్ .
ప్రాతఃకాలే శుచిర్భూత్వా పూజాయాం చ నిశాముఖే ..96..

పఠతాం నైవ దుష్టేభ్యో వ్యాఘ్రసర్పాదితో భయమ్ .
నాగ్నితో న జలాద్వాయోర్దేశే దేశాన్తరేఽథవా ..97..

నాఽకాలే మరణం తేషాం నాఽపమృత్యుభయం భవేత్ .
ఆయుర్వర్షశతం సాగ్రం భవన్తి చిరజీవినః ..98..

నాఽతః పరతరం స్తోత్రం శనితుష్టికరం మహత్ .
శాన్తికం శీఘ్రఫలదం స్తోత్రమేతన్మయోదితమ్ ..99..

తస్మాత్సర్వప్రయత్నేన యదీచ్ఛేదాత్మనో హితమ్ .
కథనీయం మహాదేవి ! నైవాభక్తస్య కస్యచిత్ ..100..