సదాశివాష్టకమ్

.. సదాశివాష్టకమ్ ..

పతఞ్జలిరువాచ
సువర్ణపద్మినీతటాన్తదివ్యహర్మ్యవాసినే
సుపర్ణవాహనప్రియాయ సూర్యకోటితేజసే.
అపర్ణయా విహారిణే ఫణాధరేన్ద్రధారిణే
సదా నమః శివాయ తే సదాశివాయ శమ్భవే.. 1..

సతుఙ్గభఙ్గజహ్నుజాసుధాంశుఖణ్డమౌలయే
పతఙ్గపఙ్కజాసుహృత్కృపీటయోనిచక్షుషే.
భుజఙ్గరాజమణ్డలాయ పుణ్యశాలిబన్ధవే
సదా నమః శివాయ తే సదాశివాయ శమ్భవే..2..

చతుర్ముఖాననారవిన్దవేదగీతభూతయే
చతుర్భుజానుజాశరీరశోభమానమూర్తయే.
చతుర్విధార్థదానశౌణ్డతాణ్డవస్వరూపిణే
సదా నమః శివాయ తే సదాశివాయ శమ్భవే..3..

శరన్నిశాకరప్రకాశమన్దహాసమఞ్జులా
ధరప్రవాలభాసమానవక్త్రమణ్డలశ్రియే.
కరస్ఫురత్కపాలముక్తరక్తవిష్ణుపాలినే
సదా నమః శివాయ తే సదాశివాయ శమ్భవే..4..

సహస్రపుణ్డరీకపూజనైకశూన్యదర్శనాత్
సహస్రనేత్రకల్పితార్చనాఽచ్యుతాయ భక్తితః.
సహస్రభానుమణ్డలప్రకాశచక్రదాయినే
సదా నమః శివాయ తే సదాశివాయ శమ్భవే..5..

రసారథాయ రమ్యపత్రభృద్రథాఙ్గపాణయే
రసాధరేన్ద్రచాపశిఞ్జినీకృతానిలాశినే.
స్వసారథీకృతాజనున్నవేదరూపవాజినే
సదా నమః శివాయ తే సదాశివాయ శమ్భవే..6..

అతిప్రగల్భవీరభద్రసింహనాదగర్జిత
శ్రుతిప్రభీతదక్షయాగభోగినాకసద్మనామ్.
గతిప్రదాయ గర్జితాఖిలప్రపఞ్చసాక్షిణే
సదా నమః శివాయ తే సదాశివాయ శమ్భవే..7..

మృకణ్డుసూనురక్షణావధూతదణ్డపాణయే
సుగన్ధమణ్డలస్ఫురత్ప్రభాజితామృతాంశవే.
అఖణ్డభోగసమ్పదర్థలోకభావితాత్మనే
సదా నమః శివాయ తే సదాశివాయ శమ్భవే..8..

మధురిపువిధిశక్రముఖ్యదేవైరపి నియమార్చితపాదపఙ్కజాయ.
కనకగిరిశరాసనాయ తుభ్యం రజతసభాపతయే నమః శివాయ..9..

హాలాస్యనాథాయ మహేశ్వరాయ హాలాహలాలఙ్కృతకన్ధరాయ.
మీనేక్షణాయాః పతయే శివాయ నమోనమః సున్దరతాణ్డవాయ..10..