ಸದಾಶಿವಾಷ್ಟಕಮ್

.. ಸದಾಶಿವಾಷ್ಟಕಮ್ ..

ಪತಞ್ಜಲಿರುವಾಚ
ಸುವರ್ಣಪದ್ಮಿನೀತಟಾನ್ತದಿವ್ಯಹರ್ಮ್ಯವಾಸಿನೇ
ಸುಪರ್ಣವಾಹನಪ್ರಿಯಾಯ ಸೂರ್ಯಕೋಟಿತೇಜಸೇ.
ಅಪರ್ಣಯಾ ವಿಹಾರಿಣೇ ಫಣಾಧರೇನ್ದ್ರಧಾರಿಣೇ
ಸದಾ ನಮಃ ಶಿವಾಯ ತೇ ಸದಾಶಿವಾಯ ಶಮ್ಭವೇ.. ೧..

ಸತುಙ್ಗಭಙ್ಗಜಹ್ನುಜಾಸುಧಾಂಶುಖಣ್ಡಮೌಲಯೇ
ಪತಙ್ಗಪಙ್ಕಜಾಸುಹೃತ್ಕೃಪೀಟಯೋನಿಚಕ್ಷುಷೇ.
ಭುಜಙ್ಗರಾಜಮಣ್ಡಲಾಯ ಪುಣ್ಯಶಾಲಿಬನ್ಧವೇ
ಸದಾ ನಮಃ ಶಿವಾಯ ತೇ ಸದಾಶಿವಾಯ ಶಮ್ಭವೇ..೨..

ಚತುರ್ಮುಖಾನನಾರವಿನ್ದವೇದಗೀತಭೂತಯೇ
ಚತುರ್ಭುಜಾನುಜಾಶರೀರಶೋಭಮಾನಮೂರ್ತಯೇ.
ಚತುರ್ವಿಧಾರ್ಥದಾನಶೌಣ್ಡತಾಣ್ಡವಸ್ವರೂಪಿಣೇ
ಸದಾ ನಮಃ ಶಿವಾಯ ತೇ ಸದಾಶಿವಾಯ ಶಮ್ಭವೇ..೩..

ಶರನ್ನಿಶಾಕರಪ್ರಕಾಶಮನ್ದಹಾಸಮಞ್ಜುಲಾ
ಧರಪ್ರವಾಲಭಾಸಮಾನವಕ್ತ್ರಮಣ್ಡಲಶ್ರಿಯೇ.
ಕರಸ್ಫುರತ್ಕಪಾಲಮುಕ್ತರಕ್ತವಿಷ್ಣುಪಾಲಿನೇ
ಸದಾ ನಮಃ ಶಿವಾಯ ತೇ ಸದಾಶಿವಾಯ ಶಮ್ಭವೇ..೪..

ಸಹಸ್ರಪುಣ್ಡರೀಕಪೂಜನೈಕಶೂನ್ಯದರ್ಶನಾತ್
ಸಹಸ್ರನೇತ್ರಕಲ್ಪಿತಾರ್ಚನಾಽಚ್ಯುತಾಯ ಭಕ್ತಿತಃ.
ಸಹಸ್ರಭಾನುಮಣ್ಡಲಪ್ರಕಾಶಚಕ್ರದಾಯಿನೇ
ಸದಾ ನಮಃ ಶಿವಾಯ ತೇ ಸದಾಶಿವಾಯ ಶಮ್ಭವೇ..೫..

ರಸಾರಥಾಯ ರಮ್ಯಪತ್ರಭೃದ್ರಥಾಙ್ಗಪಾಣಯೇ
ರಸಾಧರೇನ್ದ್ರಚಾಪಶಿಞ್ಜಿನೀಕೃತಾನಿಲಾಶಿನೇ.
ಸ್ವಸಾರಥೀಕೃತಾಜನುನ್ನವೇದರೂಪವಾಜಿನೇ
ಸದಾ ನಮಃ ಶಿವಾಯ ತೇ ಸದಾಶಿವಾಯ ಶಮ್ಭವೇ..೬..

ಅತಿಪ್ರಗಲ್ಭವೀರಭದ್ರಸಿಂಹನಾದಗರ್ಜಿತ
ಶ್ರುತಿಪ್ರಭೀತದಕ್ಷಯಾಗಭೋಗಿನಾಕಸದ್ಮನಾಮ್.
ಗತಿಪ್ರದಾಯ ಗರ್ಜಿತಾಖಿಲಪ್ರಪಞ್ಚಸಾಕ್ಷಿಣೇ
ಸದಾ ನಮಃ ಶಿವಾಯ ತೇ ಸದಾಶಿವಾಯ ಶಮ್ಭವೇ..೭..

ಮೃಕಣ್ಡುಸೂನುರಕ್ಷಣಾವಧೂತದಣ್ಡಪಾಣಯೇ
ಸುಗನ್ಧಮಣ್ಡಲಸ್ಫುರತ್ಪ್ರಭಾಜಿತಾಮೃತಾಂಶವೇ.
ಅಖಣ್ಡಭೋಗಸಮ್ಪದರ್ಥಲೋಕಭಾವಿತಾತ್ಮನೇ
ಸದಾ ನಮಃ ಶಿವಾಯ ತೇ ಸದಾಶಿವಾಯ ಶಮ್ಭವೇ..೮..

ಮಧುರಿಪುವಿಧಿಶಕ್ರಮುಖ್ಯದೇವೈರಪಿ ನಿಯಮಾರ್ಚಿತಪಾದಪಙ್ಕಜಾಯ.
ಕನಕಗಿರಿಶರಾಸನಾಯ ತುಭ್ಯಂ ರಜತಸಭಾಪತಯೇ ನಮಃ ಶಿವಾಯ..೯..

ಹಾಲಾಸ್ಯನಾಥಾಯ ಮಹೇಶ್ವರಾಯ ಹಾಲಾಹಲಾಲಙ್ಕೃತಕನ್ಧರಾಯ.
ಮೀನೇಕ್ಷಣಾಯಾಃ ಪತಯೇ ಶಿವಾಯ ನಮೋನಮಃ ಸುನ್ದರತಾಣ್ಡವಾಯ..೧೦..