સદાશિવાષ્ટકમ્

.. સદાશિવાષ્ટકમ્ ..

પતઞ્જલિરુવાચ
સુવર્ણપદ્મિનીતટાન્તદિવ્યહર્મ્યવાસિને
સુપર્ણવાહનપ્રિયાય સૂર્યકોટિતેજસે.
અપર્ણયા વિહારિણે ફણાધરેન્દ્રધારિણે
સદા નમઃ શિવાય તે સદાશિવાય શમ્ભવે.. ૧..

સતુઙ્ગભઙ્ગજહ્નુજાસુધાંશુખણ્ડમૌલયે
પતઙ્ગપઙ્કજાસુહૃત્કૃપીટયોનિચક્ષુષે.
ભુજઙ્ગરાજમણ્ડલાય પુણ્યશાલિબન્ધવે
સદા નમઃ શિવાય તે સદાશિવાય શમ્ભવે..૨..

ચતુર્મુખાનનારવિન્દવેદગીતભૂતયે
ચતુર્ભુજાનુજાશરીરશોભમાનમૂર્તયે.
ચતુર્વિધાર્થદાનશૌણ્ડતાણ્ડવસ્વરૂપિણે
સદા નમઃ શિવાય તે સદાશિવાય શમ્ભવે..૩..

શરન્નિશાકરપ્રકાશમન્દહાસમઞ્જુલા
ધરપ્રવાલભાસમાનવક્ત્રમણ્ડલશ્રિયે.
કરસ્ફુરત્કપાલમુક્તરક્તવિષ્ણુપાલિને
સદા નમઃ શિવાય તે સદાશિવાય શમ્ભવે..૪..

સહસ્રપુણ્ડરીકપૂજનૈકશૂન્યદર્શનાત્
સહસ્રનેત્રકલ્પિતાર્ચનાઽચ્યુતાય ભક્તિતઃ.
સહસ્રભાનુમણ્ડલપ્રકાશચક્રદાયિને
સદા નમઃ શિવાય તે સદાશિવાય શમ્ભવે..૫..

રસારથાય રમ્યપત્રભૃદ્રથાઙ્ગપાણયે
રસાધરેન્દ્રચાપશિઞ્જિનીકૃતાનિલાશિને.
સ્વસારથીકૃતાજનુન્નવેદરૂપવાજિને
સદા નમઃ શિવાય તે સદાશિવાય શમ્ભવે..૬..

અતિપ્રગલ્ભવીરભદ્રસિંહનાદગર્જિત
શ્રુતિપ્રભીતદક્ષયાગભોગિનાકસદ્મનામ્.
ગતિપ્રદાય ગર્જિતાખિલપ્રપઞ્ચસાક્ષિણે
સદા નમઃ શિવાય તે સદાશિવાય શમ્ભવે..૭..

મૃકણ્ડુસૂનુરક્ષણાવધૂતદણ્ડપાણયે
સુગન્ધમણ્ડલસ્ફુરત્પ્રભાજિતામૃતાંશવે.
અખણ્ડભોગસમ્પદર્થલોકભાવિતાત્મને
સદા નમઃ શિવાય તે સદાશિવાય શમ્ભવે..૮..

મધુરિપુવિધિશક્રમુખ્યદેવૈરપિ નિયમાર્ચિતપાદપઙ્કજાય.
કનકગિરિશરાસનાય તુભ્યં રજતસભાપતયે નમઃ શિવાય..૯..

હાલાસ્યનાથાય મહેશ્વરાય હાલાહલાલઙ્કૃતકન્ધરાય.
મીનેક્ષણાયાઃ પતયે શિવાય નમોનમઃ સુન્દરતાણ્ડવાય..૧૦..