నవగ్రహ స్తోత్రమ్

.. నవగ్రహ స్తోత్రమ్ ..

.. అథ నవగ్రహస్తోత్రమ్ ..

.. శ్రీ గణేశాయ నమః ..

జపాకుసుమసంకాశం కాశ్యపేయం మహాద్యుతిమ్ .
తమోఽరిం సర్వపాపఘ్నం ప్రణతోఽస్మి దివాకరమ్ .. 1 ..

దధిశఙ్ఖతుషారాభం క్షీరోదార్ణవసమ్భవమ్ .
నమామి శశినం సోమం శమ్భోర్ముకుటభూషణమ్ .. 2 ..

ధరణీగర్భసమ్భూతం విద్యుత్కాన్తిసమప్రభమ్ .
కుమారం శక్తిహస్తం తం మఙ్గలం ప్రణమామ్యహమ్ .. 3 ..

ప్రియఙ్గుకలికాశ్యామం రూపేణాప్రతిమం బుధమ్ .
సౌమ్యం సౌమ్యగుణోపేతం తం బుధం ప్రణమామ్యహమ్ .. 4 ..

దేవానాం చ ఋషీణాం చ గురుం కాఞ్చనసన్నిభమ్ .
బుద్ధిభూతం త్రిలోకేశం తం నమామి బృహస్పతిమ్ .. 5 ..

హిమకున్దమృణాలాభం దైత్యానాం పరమం గురుమ్ .
సర్వశాస్త్రప్రవక్తారం భార్గవం ప్రణమామ్యహమ్ .. 6 ..

నీలాఞ్జనసమాభాసం రవిపుత్రం యమాగ్రజమ్ .
ఛాయామార్తణ్డసమ్భూతం తం నమామి శనైశ్చరమ్ .. 7 ..

అర్ధకాయం మహావీర్యం చన్ద్రాదిత్యవిమర్దనమ్ .
సింహికాగర్భసమ్భూతం తం రాహుం ప్రణమామ్యహమ్ .. 8 ..

పలాశపుష్పసంకాశం తారకాగ్రహమస్తకమ్ .
రౌద్రం రౌద్రాత్మకం ఘోరం తం కేతుం ప్రణమామ్యహమ్ .. 9 ..

ఇతి శ్రీవ్యాసముఖోద్గీతం యః పఠేత్ సుసమాహితః .
దివా వా యది వా రాత్రౌ విఘ్నశాన్తిర్భవిష్యతి .. 10 ..

నరనారీనృపాణాం చ భవేద్ దుఃస్వప్ననాశనమ్ .
ఐశ్వర్యమతులం తేషామారోగ్యం పుష్టివర్ధనమ్ .. 11 ..

గ్రహనక్షత్రజాః పీడాస్తస్కరాగ్నిసముద్భవాః .
తాః సర్వాః ప్రశమం యాన్తి వ్యాసో బ్రూతే న సంశయః .. 12 ..

.. ఇతి శ్రీవ్యాసవిరచితం నవగ్రహస్తోత్రం సమ్పూర్ణమ్ ..