ನವಗ್ರಹ ಸ್ತೋತ್ರಮ್

.. ನವಗ್ರಹ ಸ್ತೋತ್ರಮ್ ..

.. ಅಥ ನವಗ್ರಹಸ್ತೋತ್ರಮ್ ..

.. ಶ್ರೀ ಗಣೇಶಾಯ ನಮಃ ..

ಜಪಾಕುಸುಮಸಂಕಾಶಂ ಕಾಶ್ಯಪೇಯಂ ಮಹಾದ್ಯುತಿಮ್ .
ತಮೋಽರಿಂ ಸರ್ವಪಾಪಘ್ನಂ ಪ್ರಣತೋಽಸ್ಮಿ ದಿವಾಕರಮ್ .. ೧ ..

ದಧಿಶಙ್ಖತುಷಾರಾಭಂ ಕ್ಷೀರೋದಾರ್ಣವಸಮ್ಭವಮ್ .
ನಮಾಮಿ ಶಶಿನಂ ಸೋಮಂ ಶಮ್ಭೋರ್ಮುಕುಟಭೂಷಣಮ್ .. ೨ ..

ಧರಣೀಗರ್ಭಸಮ್ಭೂತಂ ವಿದ್ಯುತ್ಕಾನ್ತಿಸಮಪ್ರಭಮ್ .
ಕುಮಾರಂ ಶಕ್ತಿಹಸ್ತಂ ತಂ ಮಙ್ಗಲಂ ಪ್ರಣಮಾಮ್ಯಹಮ್ .. ೩ ..

ಪ್ರಿಯಙ್ಗುಕಲಿಕಾಶ್ಯಾಮಂ ರೂಪೇಣಾಪ್ರತಿಮಂ ಬುಧಮ್ .
ಸೌಮ್ಯಂ ಸೌಮ್ಯಗುಣೋಪೇತಂ ತಂ ಬುಧಂ ಪ್ರಣಮಾಮ್ಯಹಮ್ .. ೪ ..

ದೇವಾನಾಂ ಚ ಋಷೀಣಾಂ ಚ ಗುರುಂ ಕಾಞ್ಚನಸನ್ನಿಭಮ್ .
ಬುದ್ಧಿಭೂತಂ ತ್ರಿಲೋಕೇಶಂ ತಂ ನಮಾಮಿ ಬೃಹಸ್ಪತಿಮ್ .. ೫ ..

ಹಿಮಕುನ್ದಮೃಣಾಲಾಭಂ ದೈತ್ಯಾನಾಂ ಪರಮಂ ಗುರುಮ್ .
ಸರ್ವಶಾಸ್ತ್ರಪ್ರವಕ್ತಾರಂ ಭಾರ್ಗವಂ ಪ್ರಣಮಾಮ್ಯಹಮ್ .. ೬ ..

ನೀಲಾಞ್ಜನಸಮಾಭಾಸಂ ರವಿಪುತ್ರಂ ಯಮಾಗ್ರಜಮ್ .
ಛಾಯಾಮಾರ್ತಣ್ಡಸಮ್ಭೂತಂ ತಂ ನಮಾಮಿ ಶನೈಶ್ಚರಮ್ .. ೭ ..

ಅರ್ಧಕಾಯಂ ಮಹಾವೀರ್ಯಂ ಚನ್ದ್ರಾದಿತ್ಯವಿಮರ್ದನಮ್ .
ಸಿಂಹಿಕಾಗರ್ಭಸಮ್ಭೂತಂ ತಂ ರಾಹುಂ ಪ್ರಣಮಾಮ್ಯಹಮ್ .. ೮ ..

ಪಲಾಶಪುಷ್ಪಸಂಕಾಶಂ ತಾರಕಾಗ್ರಹಮಸ್ತಕಮ್ .
ರೌದ್ರಂ ರೌದ್ರಾತ್ಮಕಂ ಘೋರಂ ತಂ ಕೇತುಂ ಪ್ರಣಮಾಮ್ಯಹಮ್ .. ೯ ..

ಇತಿ ಶ್ರೀವ್ಯಾಸಮುಖೋದ್ಗೀತಂ ಯಃ ಪಠೇತ್ ಸುಸಮಾಹಿತಃ .
ದಿವಾ ವಾ ಯದಿ ವಾ ರಾತ್ರೌ ವಿಘ್ನಶಾನ್ತಿರ್ಭವಿಷ್ಯತಿ .. ೧೦ ..

ನರನಾರೀನೃಪಾಣಾಂ ಚ ಭವೇದ್ ದುಃಸ್ವಪ್ನನಾಶನಮ್ .
ಐಶ್ವರ್ಯಮತುಲಂ ತೇಷಾಮಾರೋಗ್ಯಂ ಪುಷ್ಟಿವರ್ಧನಮ್ .. ೧೧ ..

ಗ್ರಹನಕ್ಷತ್ರಜಾಃ ಪೀಡಾಸ್ತಸ್ಕರಾಗ್ನಿಸಮುದ್ಭವಾಃ .
ತಾಃ ಸರ್ವಾಃ ಪ್ರಶಮಂ ಯಾನ್ತಿ ವ್ಯಾಸೋ ಬ್ರೂತೇ ನ ಸಂಶಯಃ .. ೧೨ ..

.. ಇತಿ ಶ್ರೀವ್ಯಾಸವಿರಚಿತಂ ನವಗ್ರಹಸ್ತೋತ್ರಂ ಸಮ್ಪೂರ್ಣಮ್ ..