ಶ್ರೀಲಲಿತಾಸಹಸ್ರನಾಮಸ್ತೋತ್ರಮ್
.. ನ್ಯಾಸಃ ..
ಅಸ್ಯ ಶ್ರೀಲಲಿತಾಸಹಸ್ರನಾಮಸ್ತೋತ್ರಮಾಲಾಮನ್ತ್ರಸ್ಯ .
ವಶಿನ್ಯಾದಿವಾಗ್ದೇವತಾ ಋಷಯಃ . ಅನುಷ್ಟುಪ್ಛನ್ದಃ . ಶ್ರೀಲಲಿತಾಪರಮೇಶ್ವರೀ ದೇವತಾ . ಶ್ರೀಮದ್ವಾಗ್ಭವಕೂಟೇತಿ ಬೀಜಮ್ ಮಧ್ಯಕೂಟೇತಿ ಶಕ್ತಿಃ . ಶಕ್ತಿಕೂಟೇತಿ ಕೀಲಕಮ್ . ಶ್ರೀಲಲಿತಾಮಹಾತ್ರಿಪುರಸುನ್ದರೀ-ಪ್ರಸಾದಸಿದ್ಧಿದ್ವಾರಾ ಚಿನ್ತಿತಫಲಾವಾಪ್ತ್ಯರ್ಥೇ ಜಪೇ ವಿನಿಯೋಗಃ .
.. ಧ್ಯಾನಮ್ ..
ಸಿನ್ದೂರಾರುಣವಿಗ್ರಹಾಂ ತ್ರಿನಯನಾಂ ಮಾಣಿಕ್ಯಮೌಲಿಸ್ಫುರತ್
ತಾರಾನಾಯಕಶೇಖರಾಂ ಸ್ಮಿತಮುಖೀಮಾಪೀನವಕ್ಷೋರುಹಾಮ್ .
ಪಾಣಿಭ್ಯಾಮಲಿಪೂರ್ಣರತ್ನಚಷಕಂ ರಕ್ತೋತ್ಪಲಂ ವಿಭ್ರತೀಂ
ಸೌಮ್ಯಾಂ ರತ್ನಘಟಸ್ಥರಕ್ತಚರಣಾಂ ಧ್ಯಾಯೇತ್ಪರಾಮಮ್ಬಿಕಾಮ್ ..
ಅರುಣಾಂ ಕರುಣಾತರಙ್ಗಿತಾಕ್ಷೀಂ
ಧೃತಪಾಶಾಙ್ಕುಶಪುಷ್ಪಬಾಣಚಾಪಾಮ್ .
ಅಣಿಮಾದಿಭಿರಾವೃತಾಂ ಮಯುಖೈಃ
ಅಹಮಿತ್ಯೇವ ವಿಭಾವಯೇ ಭವಾನೀಮ್ ..
ಧ್ಯಾಯೇತ್ಪದ್ಮಾಸನಸ್ಥಾಂ ವಿಕಸಿತವದನಾಂ ಪದ್ಮಪತ್ರಾಯತಾಕ್ಷೀಂ
ಹೇಮಾಭಾಂ ಪೀತವಸ್ತ್ರಾಂ ಕರಕಲಿತಲಸದ್ಧೇಮಪದ್ಮಾಂ ವರಾಙ್ಗೀಮ್ .
ಸರ್ವಾಲಙ್ಕಾರಯುಕ್ತಾಂ ಸತತಮಭಯದಾಂ ಭಕ್ತನಮ್ರಾಂ ಭವಾನೀಂ
ಶ್ರೀವಿದ್ಯಾಂ ಶಾನ್ತಮೂರ್ತಿಂ ಸಕಲಸುರನುತಾಂ ಸರ್ವಸಮ್ಪತ್ಪ್ರದಾತ್ರೀಮ್ ..
ಸಕುಙ್ಕುಮವಿಲೇಪನಾಮಲಿಕಚುಮ್ಬಿಕಸ್ತೂರಿಕಾಂ
ಸಮನ್ದಹಸಿತೇಕ್ಷಣಾಂ ಸಶರಚಾಪಪಾಶಾಙ್ಕುಶಾಮ್ .
ಅಶೇಷಜನಮೋಹಿನೀಮರುಣಮಾಲ್ಯಭೂಷಾಮ್ಬರಾಂ
ಜಪಾಕುಸುಮಭಾಸುರಾಂ ಜಪವಿಧೌ ಸ್ಮರೇದಮ್ಬಿಕಾಮ್ ..
.. ಅಥ ಶ್ರೀಲಲಿತಾಸಹಸ್ರನಾಮಸ್ತೋತ್ರಮ್ ..
ಓಂ ಶ್ರೀಮಾತಾ ಶ್ರೀಮಹಾರಾಜ್ಞೀ ಶ್ರೀಮತ್-ಸಿಂಹಾಸನೇಶ್ವರೀ .
ಚಿದಗ್ನಿ-ಕುಣ್ಡ-ಸಮ್ಭೂತಾ ದೇವಕಾರ್ಯ-ಸಮುದ್ಯತಾ .. ೧..
ಉದ್ಯದ್ಭಾನು-ಸಹಸ್ರಾಭಾ ಚತುರ್ಬಾಹು-ಸಮನ್ವಿತಾ .
ರಾಗಸ್ವರೂಪ-ಪಾಶಾಢ್ಯಾ ಕ್ರೋಧಾಕಾರಾಙ್ಕುಶೋಜ್ಜ್ವಲಾ .. ೨..
ಮನೋರೂಪೇಕ್ಷು-ಕೋದಣ್ಡಾ ಪಞ್ಚತನ್ಮಾತ್ರ-ಸಾಯಕಾ .
ನಿಜಾರುಣ-ಪ್ರಭಾಪೂರ-ಮಜ್ಜದ್ಬ್ರಹ್ಮಾಣ್ಡ-ಮಣ್ಡಲಾ .. ೩..
ಚಮ್ಪಕಾಶೋಕ-ಪುನ್ನಾಗ-ಸೌಗನ್ಧಿಕ-ಲಸತ್ಕಚಾ .
ಕುರುವಿನ್ದಮಣಿ-ಶ್ರೇಣೀ-ಕನತ್ಕೋಟೀರ-ಮಣ್ಡಿತಾ .. ೪..
ಅಷ್ಟಮೀಚನ್ದ್ರ-ವಿಭ್ರಾಜ-ದಲಿಕಸ್ಥಲ-ಶೋಭಿತಾ .
ಮುಖಚನ್ದ್ರ-ಕಲಙ್ಕಾಭ-ಮೃಗನಾಭಿ-ವಿಶೇಷಕಾ .. ೫..
ವದನಸ್ಮರ-ಮಾಙ್ಗಲ್ಯ-ಗೃಹತೋರಣ-ಚಿಲ್ಲಿಕಾ .
ವಕ್ತ್ರಲಕ್ಷ್ಮೀ-ಪರೀವಾಹ-ಚಲನ್ಮೀನಾಭ-ಲೋಚನಾ .. ೬..
ನವಚಮ್ಪಕ-ಪುಷ್ಪಾಭ-ನಾಸಾದಣ್ಡ-ವಿರಾಜಿತಾ .
ತಾರಾಕಾನ್ತಿ-ತಿರಸ್ಕಾರಿ-ನಾಸಾಭರಣ-ಭಾಸುರಾ .. ೭..
ಕದಮ್ಬಮಞ್ಜರೀ-ಕೢಪ್ತ-ಕರ್ಣಪೂರ-ಮನೋಹರಾ .
ತಾಟಙ್ಕ-ಯುಗಲೀ-ಭೂತ-ತಪನೋಡುಪ-ಮಣ್ಡಲಾ .. ೮..
ಪದ್ಮರಾಗ-ಶಿಲಾದರ್ಶ-ಪರಿಭಾವಿ-ಕಪೋಲಭೂಃ .
ನವವಿದ್ರುಮ-ಬಿಮ್ಬಶ್ರೀ-ನ್ಯಕ್ಕಾರಿ-ರದನಚ್ಛದಾ .. ೯.. (ದಶನಚ್ಛದಾ)
ಶುದ್ಧ-ವಿದ್ಯಾಙ್ಕುರಾಕಾರ-ದ್ವಿಜಪಙ್ಕ್ತಿ-ದ್ವಯೋಜ್ಜ್ವಲಾ .
ಕರ್ಪೂರ-ವೀಟಿಕಾಮೋದ-ಸಮಾಕರ್ಷಿ-ದಿಗನ್ತರಾ .. ೧೦..
ನಿಜ-ಸಲ್ಲಾಪ-ಮಾಧುರ್ಯ-ವಿನಿರ್ಭರ್ತ್ಸಿತ-ಕಚ್ಛಪೀ . (ನಿಜ-ಸಂಲಾಪ)
ಮನ್ದಸ್ಮಿತ-ಪ್ರಭಾಪೂರ-ಮಜ್ಜತ್ಕಾಮೇಶ-ಮಾನಸಾ .. ೧೧..
ಅನಾಕಲಿತ-ಸಾದೃಶ್ಯ-ಚಿಬುಕಶ್ರೀ-ವಿರಾಜಿತಾ .
ಕಾಮೇಶ-ಬದ್ಧ-ಮಾಙ್ಗಲ್ಯ-ಸೂತ್ರ-ಶೋಭಿತ-ಕನ್ಧರಾ .. ೧೨..
ಕನಕಾಙ್ಗದ-ಕೇಯೂರ-ಕಮನೀಯ-ಭುಜಾನ್ವಿತಾ .
ರತ್ನಗ್ರೈವೇಯ-ಚಿನ್ತಾಕ-ಲೋಲ-ಮುಕ್ತಾ-ಫಲಾನ್ವಿತಾ .. ೧೩..
ಕಾಮೇಶ್ವರ-ಪ್ರೇಮರತ್ನ-ಮಣಿ-ಪ್ರತಿಪಣ-ಸ್ತನೀ .
ನಾಭ್ಯಾಲವಾಲ-ರೋಮಾಲಿ-ಲತಾ-ಫಲ-ಕುಚದ್ವಯೀ .. ೧೪..
ಲಕ್ಷ್ಯರೋಮ-ಲತಾಧಾರತಾ-ಸಮುನ್ನೇಯ-ಮಧ್ಯಮಾ .
ಸ್ತನಭಾರ-ದಲನ್ಮಧ್ಯ-ಪಟ್ಟಬನ್ಧ-ವಲಿತ್ರಯಾ .. ೧೫..
ಅರುಣಾರುಣ-ಕೌಸುಮ್ಭ-ವಸ್ತ್ರ-ಭಾಸ್ವತ್-ಕಟೀತಟೀ .
ರತ್ನ-ಕಿಙ್ಕಿಣಿಕಾ-ರಮ್ಯ-ರಶನಾ-ದಾಮ-ಭೂಷಿತಾ .. ೧೬..
ಕಾಮೇಶ-ಜ್ಞಾತ-ಸೌಭಾಗ್ಯ-ಮಾರ್ದವೋರು-ದ್ವಯಾನ್ವಿತಾ .
ಮಾಣಿಕ್ಯ-ಮುಕುಟಾಕಾರ-ಜಾನುದ್ವಯ-ವಿರಾಜಿತಾ .. ೧೭..
ಇನ್ದ್ರಗೋಪ-ಪರಿಕ್ಷಿಪ್ತ-ಸ್ಮರತೂಣಾಭ-ಜಙ್ಘಿಕಾ .
ಗೂಢಗುಲ್ಫಾ ಕೂರ್ಮಪೃಷ್ಠ-ಜಯಿಷ್ಣು-ಪ್ರಪದಾನ್ವಿತಾ .. ೧೮..
ನಖ-ದೀಧಿತಿ-ಸಂಛನ್ನ-ನಮಜ್ಜನ-ತಮೋಗುಣಾ .
ಪದದ್ವಯ-ಪ್ರಭಾಜಾಲ-ಪರಾಕೃತ-ಸರೋರುಹಾ .. ೧೯..
ಸಿಞ್ಜಾನ-ಮಣಿಮಞ್ಜೀರ-ಮಣ್ಡಿತ-ಶ್ರೀ-ಪದಾಮ್ಬುಜಾ . (ಶಿಞ್ಜಾನ)
ಮರಾಲೀ-ಮನ್ದಗಮನಾ ಮಹಾಲಾವಣ್ಯ-ಶೇವಧಿಃ .. ೨೦..
ಸರ್ವಾರುಣಾಽನವದ್ಯಾಙ್ಗೀ ಸರ್ವಾಭರಣ-ಭೂಷಿತಾ .
ಶಿವ-ಕಾಮೇಶ್ವರಾಙ್ಕಸ್ಥಾ ಶಿವಾ ಸ್ವಾಧೀನ-ವಲ್ಲಭಾ .. ೨೧..
ಸುಮೇರು-ಮಧ್ಯ-ಶೃಙ್ಗಸ್ಥಾ ಶ್ರೀಮನ್ನಗರ-ನಾಯಿಕಾ .
ಚಿನ್ತಾಮಣಿ-ಗೃಹಾನ್ತಸ್ಥಾ ಪಞ್ಚ-ಬ್ರಹ್ಮಾಸನ-ಸ್ಥಿತಾ .. ೨೨..
ಮಹಾಪದ್ಮಾಟವೀ-ಸಂಸ್ಥಾ ಕದಮ್ಬವನ-ವಾಸಿನೀ .
ಸುಧಾಸಾಗರ-ಮಧ್ಯಸ್ಥಾ ಕಾಮಾಕ್ಷೀ ಕಾಮದಾಯಿನೀ .. ೨೩..
ದೇವರ್ಷಿ-ಗಣ-ಸಂಘಾತ-ಸ್ತೂಯಮಾನಾತ್ಮ-ವೈಭವಾ .
ಭಣ್ಡಾಸುರ-ವಧೋದ್ಯುಕ್ತ-ಶಕ್ತಿಸೇನಾ-ಸಮನ್ವಿತಾ .. ೨೪..
ಸಮ್ಪತ್ಕರೀ-ಸಮಾರೂಢ-ಸಿನ್ಧುರ-ವ್ರಜ-ಸೇವಿತಾ .
ಅಶ್ವಾರೂಢಾಧಿಷ್ಠಿತಾಶ್ವ-ಕೋಟಿ-ಕೋಟಿಭಿರಾವೃತಾ .. ೨೫..
ಚಕ್ರರಾಜ-ರಥಾರೂಢ-ಸರ್ವಾಯುಧ-ಪರಿಷ್ಕೃತಾ .
ಗೇಯಚಕ್ರ-ರಥಾರೂಢ-ಮನ್ತ್ರಿಣೀ-ಪರಿಸೇವಿತಾ .. ೨೬..
ಕಿರಿಚಕ್ರ-ರಥಾರೂಢ-ದಣ್ಡನಾಥಾ-ಪುರಸ್ಕೃತಾ .
ಜ್ವಾಲಾ-ಮಾಲಿನಿಕಾಕ್ಷಿಪ್ತ-ವಹ್ನಿಪ್ರಾಕಾರ-ಮಧ್ಯಗಾ .. ೨೭..
ಭಣ್ಡಸೈನ್ಯ-ವಧೋದ್ಯುಕ್ತ-ಶಕ್ತಿ-ವಿಕ್ರಮ-ಹರ್ಷಿತಾ .
ನಿತ್ಯಾ-ಪರಾಕ್ರಮಾಟೋಪ-ನಿರೀಕ್ಷಣ-ಸಮುತ್ಸುಕಾ .. ೨೮..
ಭಣ್ಡಪುತ್ರ-ವಧೋದ್ಯುಕ್ತ-ಬಾಲಾ-ವಿಕ್ರಮ-ನನ್ದಿತಾ .
ಮನ್ತ್ರಿಣ್ಯಮ್ಬಾ-ವಿರಚಿತ-ವಿಷಙ್ಗ-ವಧ-ತೋಷಿತಾ .. ೨೯..
ವಿಶುಕ್ರ-ಪ್ರಾಣಹರಣ-ವಾರಾಹೀ-ವೀರ್ಯ-ನನ್ದಿತಾ .
ಕಾಮೇಶ್ವರ-ಮುಖಾಲೋಕ-ಕಲ್ಪಿತ-ಶ್ರೀಗಣೇಶ್ವರಾ .. ೩೦..
ಮಹಾಗಣೇಶ-ನಿರ್ಭಿನ್ನ-ವಿಘ್ನಯನ್ತ್ರ-ಪ್ರಹರ್ಷಿತಾ .
ಭಣ್ಡಾಸುರೇನ್ದ್ರ-ನಿರ್ಮುಕ್ತ-ಶಸ್ತ್ರ-ಪ್ರತ್ಯಸ್ತ್ರ-ವರ್ಷಿಣೀ .. ೩೧..
ಕರಾಙ್ಗುಲಿ-ನಖೋತ್ಪನ್ನ-ನಾರಾಯಣ-ದಶಾಕೃತಿಃ .
ಮಹಾ-ಪಾಶುಪತಾಸ್ತ್ರಾಗ್ನಿ-ನಿರ್ದಗ್ಧಾಸುರ-ಸೈನಿಕಾ .. ೩೨..
ಕಾಮೇಶ್ವರಾಸ್ತ್ರ-ನಿರ್ದಗ್ಧ-ಸಭಣ್ಡಾಸುರ-ಶೂನ್ಯಕಾ .
ಬ್ರಹ್ಮೋಪೇನ್ದ್ರ-ಮಹೇನ್ದ್ರಾದಿ-ದೇವ-ಸಂಸ್ತುತ-ವೈಭವಾ .. ೩೩..
ಹರ-ನೇತ್ರಾಗ್ನಿ-ಸಂದಗ್ಧ-ಕಾಮ-ಸಞ್ಜೀವನೌಷಧಿಃ .
ಶ್ರೀಮದ್ವಾಗ್ಭವ-ಕೂಟೈಕ-ಸ್ವರೂಪ-ಮುಖ-ಪಙ್ಕಜಾ .. ೩೪..
ಕಣ್ಠಾಧಃ-ಕಟಿ-ಪರ್ಯನ್ತ-ಮಧ್ಯಕೂಟ-ಸ್ವರೂಪಿಣೀ .
ಶಕ್ತಿ-ಕೂಟೈಕತಾಪನ್ನ-ಕಟ್ಯಧೋಭಾಗ-ಧಾರಿಣೀ .. ೩೫..
ಮೂಲ-ಮನ್ತ್ರಾತ್ಮಿಕಾ ಮೂಲಕೂಟತ್ರಯ-ಕಲೇವರಾ .
ಕುಲಾಮೃತೈಕ-ರಸಿಕಾ ಕುಲಸಂಕೇತ-ಪಾಲಿನೀ .. ೩೬..
ಕುಲಾಙ್ಗನಾ ಕುಲಾನ್ತಸ್ಥಾ ಕೌಲಿನೀ ಕುಲಯೋಗಿನೀ .
ಅಕುಲಾ ಸಮಯಾನ್ತಸ್ಥಾ ಸಮಯಾಚಾರ-ತತ್ಪರಾ .. ೩೭..
ಮೂಲಾಧಾರೈಕ-ನಿಲಯಾ ಬ್ರಹ್ಮಗ್ರನ್ಥಿ-ವಿಭೇದಿನೀ .
ಮಣಿ-ಪೂರಾನ್ತರುದಿತಾ ವಿಷ್ಣುಗ್ರನ್ಥಿ-ವಿಭೇದಿನೀ .. ೩೮..
ಆಜ್ಞಾ-ಚಕ್ರಾನ್ತರಾಲಸ್ಥಾ ರುದ್ರಗ್ರನ್ಥಿ-ವಿಭೇದಿನೀ .
ಸಹಸ್ರಾರಾಮ್ಬುಜಾರೂಢಾ ಸುಧಾ-ಸಾರಾಭಿವರ್ಷಿಣೀ .. ೩೯..
ತಡಿಲ್ಲತಾ-ಸಮರುಚಿಃ ಷಟ್ಚಕ್ರೋಪರಿ-ಸಂಸ್ಥಿತಾ .
ಮಹಾಸಕ್ತಿಃ ಕುಣ್ಡಲಿನೀ ಬಿಸತನ್ತು-ತನೀಯಸೀ .. ೪೦..
ಭವಾನೀ ಭಾವನಾಗಮ್ಯಾ ಭವಾರಣ್ಯ-ಕುಠಾರಿಕಾ .
ಭದ್ರಪ್ರಿಯಾ ಭದ್ರಮೂರ್ತಿರ್ಭಕ್ತ-ಸೌಭಾಗ್ಯದಾಯಿನೀ .. ೪೧..
ಭಕ್ತಿಪ್ರಿಯಾ ಭಕ್ತಿಗಮ್ಯಾ ಭಕ್ತಿವಶ್ಯಾ ಭಯಾಪಹಾ .
ಶಾಮ್ಭವೀ ಶಾರದಾರಾಧ್ಯಾ ಶರ್ವಾಣೀ ಶರ್ಮದಾಯಿನೀ .. ೪೨..
ಶಾಙ್ಕರೀ ಶ್ರೀಕರೀ ಸಾಧ್ವೀ ಶರಚ್ಚನ್ದ್ರ-ನಿಭಾನನಾ .
ಶಾತೋದರೀ ಶಾನ್ತಿಮತೀ ನಿರಾಧಾರಾ ನಿರಞ್ಜನಾ .. ೪೩..
ನಿರ್ಲೇಪಾ ನಿರ್ಮಲಾ ನಿತ್ಯಾ ನಿರಾಕಾರಾ ನಿರಾಕುಲಾ .
ನಿರ್ಗುಣಾ ನಿಷ್ಕಲಾ ಶಾನ್ತಾ ನಿಷ್ಕಾಮಾ ನಿರುಪಪ್ಲವಾ .. ೪೪..
ನಿತ್ಯಮುಕ್ತಾ ನಿರ್ವಿಕಾರಾ ನಿಷ್ಪ್ರಪಞ್ಚಾ ನಿರಾಶ್ರಯಾ .
ನಿತ್ಯಶುದ್ಧಾ ನಿತ್ಯಬುದ್ಧಾ ನಿರವದ್ಯಾ ನಿರನ್ತರಾ .. ೪೫..
ನಿಷ್ಕಾರಣಾ ನಿಷ್ಕಲಙ್ಕಾ ನಿರುಪಾಧಿರ್ನಿರೀಶ್ವರಾ .
ನೀರಾಗಾ ರಾಗಮಥನೀ ನಿರ್ಮದಾ ಮದನಾಶಿನೀ .. ೪೬..
ನಿಶ್ಚಿನ್ತಾ ನಿರಹಂಕಾರಾ ನಿರ್ಮೋಹಾ ಮೋಹನಾಶಿನೀ .
ನಿರ್ಮಮಾ ಮಮತಾಹನ್ತ್ರೀ ನಿಷ್ಪಾಪಾ ಪಾಪನಾಶಿನೀ .. ೪೭..
ನಿಷ್ಕ್ರೋಧಾ ಕ್ರೋಧಶಮನೀ ನಿರ್ಲೋಭಾ ಲೋಭನಾಶಿನೀ .
ನಿಃಸಂಶಯಾ ಸಂಶಯಘ್ನೀ ನಿರ್ಭವಾ ಭವನಾಶಿನೀ .. ೪೮.. (ನಿಸ್ಸಂಶಯಾ)
ನಿರ್ವಿಕಲ್ಪಾ ನಿರಾಬಾಧಾ ನಿರ್ಭೇದಾ ಭೇದನಾಶಿನೀ .
ನಿರ್ನಾಶಾ ಮೃತ್ಯುಮಥನೀ ನಿಷ್ಕ್ರಿಯಾ ನಿಷ್ಪರಿಗ್ರಹಾ .. ೪೯..
ನಿಸ್ತುಲಾ ನೀಲಚಿಕುರಾ ನಿರಪಾಯಾ ನಿರತ್ಯಯಾ .
ದುರ್ಲಭಾ ದುರ್ಗಮಾ ದುರ್ಗಾ ದುಃಖಹನ್ತ್ರೀ ಸುಖಪ್ರದಾ .. ೫೦..
ದುಷ್ಟದೂರಾ ದುರಾಚಾರ-ಶಮನೀ ದೋಷವರ್ಜಿತಾ .
ಸರ್ವಜ್ಞಾ ಸಾನ್ದ್ರಕರುಣಾ ಸಮಾನಾಧಿಕ-ವರ್ಜಿತಾ .. ೫೧..
ಸರ್ವಶಕ್ತಿಮಯೀ ಸರ್ವ-ಮಙ್ಗಲಾ ಸದ್ಗತಿಪ್ರದಾ .
ಸರ್ವೇಶ್ವರೀ ಸರ್ವಮಯೀ ಸರ್ವಮನ್ತ್ರ-ಸ್ವರೂಪಿಣೀ .. ೫೨..
ಸರ್ವ-ಯನ್ತ್ರಾತ್ಮಿಕಾ ಸರ್ವ-ತನ್ತ್ರರೂಪಾ ಮನೋನ್ಮನೀ .
ಮಾಹೇಶ್ವರೀ ಮಹಾದೇವೀ ಮಹಾಲಕ್ಷ್ಮೀರ್ಮೃಡಪ್ರಿಯಾ .. ೫೩..
ಮಹಾರೂಪಾ ಮಹಾಪೂಜ್ಯಾ ಮಹಾಪಾತಕ-ನಾಶಿನೀ .
ಮಹಾಮಾಯಾ ಮಹಾಸತ್ತ್ವಾ ಮಹಾಶಕ್ತಿರ್ಮಹಾರತಿಃ .. ೫೪..
ಮಹಾಭೋಗಾ ಮಹೈಶ್ವರ್ಯಾ ಮಹಾವೀರ್ಯಾ ಮಹಾಬಲಾ .
ಮಹಾಬುದ್ಧಿರ್ಮಹಾಸಿದ್ಧಿರ್ಮಹಾಯೋಗೇಶ್ವರೇಶ್ವರೀ .. ೫೫..
ಮಹಾತನ್ತ್ರಾ ಮಹಾಮನ್ತ್ರಾ ಮಹಾಯನ್ತ್ರಾ ಮಹಾಸನಾ .
ಮಹಾಯಾಗ-ಕ್ರಮಾರಾಧ್ಯಾ ಮಹಾಭೈರವ-ಪೂಜಿತಾ .. ೫೬..
ಮಹೇಶ್ವರ-ಮಹಾಕಲ್ಪ-ಮಹಾತಾಣ್ಡವ-ಸಾಕ್ಷಿಣೀ .
ಮಹಾಕಾಮೇಶ-ಮಹಿಷೀ ಮಹಾತ್ರಿಪುರ-ಸುನ್ದರೀ .. ೫೭..
ಚತುಃಷಷ್ಟ್ಯುಪಚಾರಾಢ್ಯಾ ಚತುಃಷಷ್ಟಿಕಲಾಮಯೀ .
ಮಹಾಚತುಃ-ಷಷ್ಟಿಕೋಟಿ-ಯೋಗಿನೀ-ಗಣಸೇವಿತಾ .. ೫೮..
ಮನುವಿದ್ಯಾ ಚನ್ದ್ರವಿದ್ಯಾ ಚನ್ದ್ರಮಣ್ಡಲ-ಮಧ್ಯಗಾ .
ಚಾರುರೂಪಾ ಚಾರುಹಾಸಾ ಚಾರುಚನ್ದ್ರ-ಕಲಾಧರಾ .. ೫೯..
ಚರಾಚರ-ಜಗನ್ನಾಥಾ ಚಕ್ರರಾಜ-ನಿಕೇತನಾ .
ಪಾರ್ವತೀ ಪದ್ಮನಯನಾ ಪದ್ಮರಾಗ-ಸಮಪ್ರಭಾ .. ೬೦..
ಪಞ್ಚ-ಪ್ರೇತಾಸನಾಸೀನಾ ಪಞ್ಚಬ್ರಹ್ಮ-ಸ್ವರೂಪಿಣೀ .
ಚಿನ್ಮಯೀ ಪರಮಾನನ್ದಾ ವಿಜ್ಞಾನ-ಘನರೂಪಿಣೀ .. ೬೧..
ಧ್ಯಾನ-ಧ್ಯಾತೃ-ಧ್ಯೇಯರೂಪಾ ಧರ್ಮಾಧರ್ಮ-ವಿವರ್ಜಿತಾ .
ವಿಶ್ವರೂಪಾ ಜಾಗರಿಣೀ ಸ್ವಪನ್ತೀ ತೈಜಸಾತ್ಮಿಕಾ .. ೬೨..
ಸುಪ್ತಾ ಪ್ರಾಜ್ಞಾತ್ಮಿಕಾ ತುರ್ಯಾ ಸರ್ವಾವಸ್ಥಾ-ವಿವರ್ಜಿತಾ .
ಸೃಷ್ಟಿಕರ್ತ್ರೀ ಬ್ರಹ್ಮರೂಪಾ ಗೋಪ್ತ್ರೀ ಗೋವಿನ್ದರೂಪಿಣೀ .. ೬೩..
ಸಂಹಾರಿಣೀ ರುದ್ರರೂಪಾ ತಿರೋಧಾನ-ಕರೀಶ್ವರೀ .
ಸದಾಶಿವಾಽನುಗ್ರಹದಾ ಪಞ್ಚಕೃತ್ಯ-ಪರಾಯಣಾ .. ೬೪..
ಭಾನುಮಣ್ಡಲ-ಮಧ್ಯಸ್ಥಾ ಭೈರವೀ ಭಗಮಾಲಿನೀ .
ಪದ್ಮಾಸನಾ ಭಗವತೀ ಪದ್ಮನಾಭ-ಸಹೋದರೀ .. ೬೫..
ಉನ್ಮೇಷ-ನಿಮಿಷೋತ್ಪನ್ನ-ವಿಪನ್ನ-ಭುವನಾವಲೀ .
ಸಹಸ್ರ-ಶೀರ್ಷವದನಾ ಸಹಸ್ರಾಕ್ಷೀ ಸಹಸ್ರಪಾತ್ .. ೬೬..
ಆಬ್ರಹ್ಮ-ಕೀಟ-ಜನನೀ ವರ್ಣಾಶ್ರಮ-ವಿಧಾಯಿನೀ .
ನಿಜಾಜ್ಞಾರೂಪ-ನಿಗಮಾ ಪುಣ್ಯಾಪುಣ್ಯ-ಫಲಪ್ರದಾ .. ೬೭..
ಶ್ರುತಿ-ಸೀಮನ್ತ-ಸಿನ್ದೂರೀ-ಕೃತ-ಪಾದಾಬ್ಜ-ಧೂಲಿಕಾ .
ಸಕಲಾಗಮ-ಸನ್ದೋಹ-ಶುಕ್ತಿ-ಸಮ್ಪುಟ-ಮೌಕ್ತಿಕಾ .. ೬೮..
ಪುರುಷಾರ್ಥಪ್ರದಾ ಪೂರ್ಣಾ ಭೋಗಿನೀ ಭುವನೇಶ್ವರೀ .
ಅಮ್ಬಿಕಾಽನಾದಿ-ನಿಧನಾ ಹರಿಬ್ರಹ್ಮೇನ್ದ್ರ-ಸೇವಿತಾ .. ೬೯..
ನಾರಾಯಣೀ ನಾದರೂಪಾ ನಾಮರೂಪ-ವಿವರ್ಜಿತಾ .
ಹ್ರೀಂಕಾರೀ ಹ್ರೀಮತೀ ಹೃದ್ಯಾ ಹೇಯೋಪಾದೇಯ-ವರ್ಜಿತಾ .. ೭೦..
ರಾಜರಾಜಾರ್ಚಿತಾ ರಾಜ್ಞೀ ರಮ್ಯಾ ರಾಜೀವಲೋಚನಾ .
ರಞ್ಜನೀ ರಮಣೀ ರಸ್ಯಾ ರಣತ್ಕಿಙ್ಕಿಣಿ-ಮೇಖಲಾ .. ೭೧..
ರಮಾ ರಾಕೇನ್ದುವದನಾ ರತಿರೂಪಾ ರತಿಪ್ರಿಯಾ .
ರಕ್ಷಾಕರೀ ರಾಕ್ಷಸಘ್ನೀ ರಾಮಾ ರಮಣಲಮ್ಪಟಾ .. ೭೨..
ಕಾಮ್ಯಾ ಕಾಮಕಲಾರೂಪಾ ಕದಮ್ಬ-ಕುಸುಮ-ಪ್ರಿಯಾ .
ಕಲ್ಯಾಣೀ ಜಗತೀಕನ್ದಾ ಕರುಣಾ-ರಸ-ಸಾಗರಾ .. ೭೩..
ಕಲಾವತೀ ಕಲಾಲಾಪಾ ಕಾನ್ತಾ ಕಾದಮ್ಬರೀಪ್ರಿಯಾ .
ವರದಾ ವಾಮನಯನಾ ವಾರುಣೀ-ಮದ-ವಿಹ್ವಲಾ .. ೭೪..
ವಿಶ್ವಾಧಿಕಾ ವೇದವೇದ್ಯಾ ವಿನ್ಧ್ಯಾಚಲ-ನಿವಾಸಿನೀ .
ವಿಧಾತ್ರೀ ವೇದಜನನೀ ವಿಷ್ಣುಮಾಯಾ ವಿಲಾಸಿನೀ .. ೭೫..
ಕ್ಷೇತ್ರಸ್ವರೂಪಾ ಕ್ಷೇತ್ರೇಶೀ ಕ್ಷೇತ್ರ-ಕ್ಷೇತ್ರಜ್ಞ-ಪಾಲಿನೀ .
ಕ್ಷಯವೃದ್ಧಿ-ವಿನಿರ್ಮುಕ್ತಾ ಕ್ಷೇತ್ರಪಾಲ-ಸಮರ್ಚಿತಾ .. ೭೬..
ವಿಜಯಾ ವಿಮಲಾ ವನ್ದ್ಯಾ ವನ್ದಾರು-ಜನ-ವತ್ಸಲಾ .
ವಾಗ್ವಾದಿನೀ ವಾಮಕೇಶೀ ವಹ್ನಿಮಣ್ಡಲ-ವಾಸಿನೀ .. ೭೭..
ಭಕ್ತಿಮತ್-ಕಲ್ಪಲತಿಕಾ ಪಶುಪಾಶ-ವಿಮೋಚಿನೀ .
ಸಂಹೃತಾಶೇಷ-ಪಾಷಣ್ಡಾ ಸದಾಚಾರ-ಪ್ರವರ್ತಿಕಾ .. ೭೮.. (ಪಾಖಣ್ಡಾ)
ತಾಪತ್ರಯಾಗ್ನಿ-ಸನ್ತಪ್ತ-ಸಮಾಹ್ಲಾದನ-ಚನ್ದ್ರಿಕಾ .
ತರುಣೀ ತಾಪಸಾರಾಧ್ಯಾ ತನುಮಧ್ಯಾ ತಮೋಽಪಹಾ .. ೭೯..
ಚಿತಿಸ್ತತ್ಪದ-ಲಕ್ಷ್ಯಾರ್ಥಾ ಚಿದೇಕರಸ-ರೂಪಿಣೀ .
ಸ್ವಾತ್ಮಾನನ್ದ-ಲವೀಭೂತ-ಬ್ರಹ್ಮಾದ್ಯಾನನ್ದ-ಸನ್ತತಿಃ .. ೮೦..
ಪರಾ ಪ್ರತ್ಯಕ್ಚಿತೀರೂಪಾ ಪಶ್ಯನ್ತೀ ಪರದೇವತಾ .
ಮಧ್ಯಮಾ ವೈಖರೀರೂಪಾ ಭಕ್ತ-ಮಾನಸ-ಹಂಸಿಕಾ .. ೮೧..
ಕಾಮೇಶ್ವರ-ಪ್ರಾಣನಾಡೀ ಕೃತಜ್ಞಾ ಕಾಮಪೂಜಿತಾ .
ಶೃಙ್ಗಾರ-ರಸ-ಸಮ್ಪೂರ್ಣಾ ಜಯಾ ಜಾಲನ್ಧರ-ಸ್ಥಿತಾ .. ೮೨..
ಓಡ್ಯಾಣಪೀಠ-ನಿಲಯಾ ಬಿನ್ದು-ಮಣ್ಡಲವಾಸಿನೀ .
ರಹೋಯಾಗ-ಕ್ರಮಾರಾಧ್ಯಾ ರಹಸ್ತರ್ಪಣ-ತರ್ಪಿತಾ .. ೮೩..
ಸದ್ಯಃಪ್ರಸಾದಿನೀ ವಿಶ್ವ-ಸಾಕ್ಷಿಣೀ ಸಾಕ್ಷಿವರ್ಜಿತಾ .
ಷಡಙ್ಗದೇವತಾ-ಯುಕ್ತಾ ಷಾಡ್ಗುಣ್ಯ-ಪರಿಪೂರಿತಾ .. ೮೪..
ನಿತ್ಯಕ್ಲಿನ್ನಾ ನಿರುಪಮಾ ನಿರ್ವಾಣ-ಸುಖ-ದಾಯಿನೀ .
ನಿತ್ಯಾ-ಷೋಡಶಿಕಾ-ರೂಪಾ ಶ್ರೀಕಣ್ಠಾರ್ಧ-ಶರೀರಿಣೀ .. ೮೫..
ಪ್ರಭಾವತೀ ಪ್ರಭಾರೂಪಾ ಪ್ರಸಿದ್ಧಾ ಪರಮೇಶ್ವರೀ .
ಮೂಲಪ್ರಕೃತಿರವ್ಯಕ್ತಾ ವ್ಯಕ್ತಾವ್ಯಕ್ತ-ಸ್ವರೂಪಿಣೀ .. ೮೬..
ವ್ಯಾಪಿನೀ ವಿವಿಧಾಕಾರಾ ವಿದ್ಯಾವಿದ್ಯಾ-ಸ್ವರೂಪಿಣೀ .
ಮಹಾಕಾಮೇಶ-ನಯನ-ಕುಮುದಾಹ್ಲಾದ-ಕೌಮುದೀ .. ೮೭..
ಭಕ್ತ-ಹಾರ್ದ-ತಮೋಭೇದ-ಭಾನುಮದ್ಭಾನು-ಸನ್ತತಿಃ .
ಶಿವದೂತೀ ಶಿವಾರಾಧ್ಯಾ ಶಿವಮೂರ್ತಿಃ ಶಿವಙ್ಕರೀ .. ೮೮..
ಶಿವಪ್ರಿಯಾ ಶಿವಪರಾ ಶಿಷ್ಟೇಷ್ಟಾ ಶಿಷ್ಟಪೂಜಿತಾ .
ಅಪ್ರಮೇಯಾ ಸ್ವಪ್ರಕಾಶಾ ಮನೋವಾಚಾಮಗೋಚರಾ .. ೮೯..
ಚಿಚ್ಛಕ್ತಿಶ್ ಚೇತನಾರೂಪಾ ಜಡಶಕ್ತಿರ್ಜಡಾತ್ಮಿಕಾ .
ಗಾಯತ್ರೀ ವ್ಯಾಹೃತಿಃ ಸನ್ಧ್ಯಾ ದ್ವಿಜವೃನ್ದ-ನಿಷೇವಿತಾ .. ೯೦..
ತತ್ತ್ವಾಸನಾ ತತ್ತ್ವಮಯೀ ಪಞ್ಚ-ಕೋಶಾನ್ತರ-ಸ್ಥಿತಾ .
ನಿಃಸೀಮ-ಮಹಿಮಾ ನಿತ್ಯ-ಯೌವನಾ ಮದಶಾಲಿನೀ .. ೯೧.. (ನಿಸ್ಸೀಮ)
ಮದಘೂರ್ಣಿತ-ರಕ್ತಾಕ್ಷೀ ಮದಪಾಟಲ-ಗಣ್ಡಭೂಃ .
ಚನ್ದನ-ದ್ರವ-ದಿಗ್ಧಾಙ್ಗೀ ಚಾಮ್ಪೇಯ-ಕುಸುಮ-ಪ್ರಿಯಾ .. ೯೨..
ಕುಶಲಾ ಕೋಮಲಾಕಾರಾ ಕುರುಕುಲ್ಲಾ ಕುಲೇಶ್ವರೀ .
ಕುಲಕುಣ್ಡಾಲಯಾ ಕೌಲ-ಮಾರ್ಗ-ತತ್ಪರ-ಸೇವಿತಾ .. ೯೩..
ಕುಮಾರ-ಗಣನಾಥಾಮ್ಬಾ ತುಷ್ಟಿಃ ಪುಷ್ಟಿರ್ಮತಿರ್ಧೃತಿಃ .
ಶಾನ್ತಿಃ ಸ್ವಸ್ತಿಮತೀ ಕಾನ್ತಿರ್ನನ್ದಿನೀ ವಿಘ್ನನಾಶಿನೀ .. ೯೪..
ತೇಜೋವತೀ ತ್ರಿನಯನಾ ಲೋಲಾಕ್ಷೀ-ಕಾಮರೂಪಿಣೀ .
ಮಾಲಿನೀ ಹಂಸಿನೀ ಮಾತಾ ಮಲಯಾಚಲ-ವಾಸಿನೀ .. ೯೫..
ಸುಮುಖೀ ನಲಿನೀ ಸುಭ್ರೂಃ ಶೋಭನಾ ಸುರನಾಯಿಕಾ .
ಕಾಲಕಣ್ಠೀ ಕಾನ್ತಿಮತೀ ಕ್ಷೋಭಿಣೀ ಸೂಕ್ಷ್ಮರೂಪಿಣೀ .. ೯೬..
ವಜ್ರೇಶ್ವರೀ ವಾಮದೇವೀ ವಯೋಽವಸ್ಥಾ-ವಿವರ್ಜಿತಾ .
ಸಿದ್ಧೇಶ್ವರೀ ಸಿದ್ಧವಿದ್ಯಾ ಸಿದ್ಧಮಾತಾ ಯಶಸ್ವಿನೀ .. ೯೭..
ವಿಶುದ್ಧಿಚಕ್ರ-ನಿಲಯಾಽಽರಕ್ತವರ್ಣಾ ತ್ರಿಲೋಚನಾ .
ಖಟ್ವಾಙ್ಗಾದಿ-ಪ್ರಹರಣಾ ವದನೈಕ-ಸಮನ್ವಿತಾ .. ೯೮..
ಪಾಯಸಾನ್ನಪ್ರಿಯಾ ತ್ವಕ್ಸ್ಥಾ ಪಶುಲೋಕ-ಭಯಙ್ಕರೀ .
ಅಮೃತಾದಿ-ಮಹಾಶಕ್ತಿ-ಸಂವೃತಾ ಡಾಕಿನೀಶ್ವರೀ .. ೯೯..
ಅನಾಹತಾಬ್ಜ-ನಿಲಯಾ ಶ್ಯಾಮಾಭಾ ವದನದ್ವಯಾ .
ದಂಷ್ಟ್ರೋಜ್ಜ್ವಲಾಽಕ್ಷ-ಮಾಲಾದಿ-ಧರಾ ರುಧಿರಸಂಸ್ಥಿತಾ .. ೧೦೦..
ಕಾಲರಾತ್ರ್ಯಾದಿ-ಶಕ್ತ್ಯೌಘ-ವೃತಾ ಸ್ನಿಗ್ಧೌದನಪ್ರಿಯಾ .
ಮಹಾವೀರೇನ್ದ್ರ-ವರದಾ ರಾಕಿಣ್ಯಮ್ಬಾ-ಸ್ವರೂಪಿಣೀ .. ೧೦೧..
ಮಣಿಪೂರಾಬ್ಜ-ನಿಲಯಾ ವದನತ್ರಯ-ಸಂಯುತಾ .
ವಜ್ರಾದಿಕಾಯುಧೋಪೇತಾ ಡಾಮರ್ಯಾದಿಭಿರಾವೃತಾ .. ೧೦೨..
ರಕ್ತವರ್ಣಾ ಮಾಂಸನಿಷ್ಠಾ ಗುಡಾನ್ನ-ಪ್ರೀತ-ಮಾನಸಾ .
ಸಮಸ್ತಭಕ್ತ-ಸುಖದಾ ಲಾಕಿನ್ಯಮ್ಬಾ-ಸ್ವರೂಪಿಣೀ .. ೧೦೩..
ಸ್ವಾಧಿಷ್ಠಾನಾಮ್ಬುಜ-ಗತಾ ಚತುರ್ವಕ್ತ್ರ-ಮನೋಹರಾ .
ಶೂಲಾದ್ಯಾಯುಧ-ಸಮ್ಪನ್ನಾ ಪೀತವರ್ಣಾಽತಿಗರ್ವಿತಾ .. ೧೦೪..
ಮೇದೋನಿಷ್ಠಾ ಮಧುಪ್ರೀತಾ ಬನ್ಧಿನ್ಯಾದಿ-ಸಮನ್ವಿತಾ .
ದಧ್ಯನ್ನಾಸಕ್ತ-ಹೃದಯಾ ಕಾಕಿನೀ-ರೂಪ-ಧಾರಿಣೀ .. ೧೦೫..
ಮೂಲಾಧಾರಾಮ್ಬುಜಾರೂಢಾ ಪಞ್ಚ-ವಕ್ತ್ರಾಽಸ್ಥಿ-ಸಂಸ್ಥಿತಾ .
ಅಙ್ಕುಶಾದಿ-ಪ್ರಹರಣಾ ವರದಾದಿ-ನಿಷೇವಿತಾ .. ೧೦೬..
ಮುದ್ಗೌದನಾಸಕ್ತ-ಚಿತ್ತಾ ಸಾಕಿನ್ಯಮ್ಬಾ-ಸ್ವರೂಪಿಣೀ .
ಆಜ್ಞಾ-ಚಕ್ರಾಬ್ಜ-ನಿಲಯಾ ಶುಕ್ಲವರ್ಣಾ ಷಡಾನನಾ .. ೧೦೭..
ಮಜ್ಜಾಸಂಸ್ಥಾ ಹಂಸವತೀ-ಮುಖ್ಯ-ಶಕ್ತಿ-ಸಮನ್ವಿತಾ .
ಹರಿದ್ರಾನ್ನೈಕ-ರಸಿಕಾ ಹಾಕಿನೀ-ರೂಪ-ಧಾರಿಣೀ .. ೧೦೮..
ಸಹಸ್ರದಲ-ಪದ್ಮಸ್ಥಾ ಸರ್ವ-ವರ್ಣೋಪ-ಶೋಭಿತಾ .
ಸರ್ವಾಯುಧಧರಾ ಶುಕ್ಲ-ಸಂಸ್ಥಿತಾ ಸರ್ವತೋಮುಖೀ .. ೧೦೯..
ಸರ್ವೌದನ-ಪ್ರೀತಚಿತ್ತಾ ಯಾಕಿನ್ಯಮ್ಬಾ-ಸ್ವರೂಪಿಣೀ .
ಸ್ವಾಹಾ ಸ್ವಧಾಽಮತಿರ್ಮೇಧಾ ಶ್ರುತಿಃ ಸ್ಮೃತಿರನುತ್ತಮಾ .. ೧೧೦..
ಪುಣ್ಯಕೀರ್ತಿಃ ಪುಣ್ಯಲಭ್ಯಾ ಪುಣ್ಯಶ್ರವಣ-ಕೀರ್ತನಾ .
ಪುಲೋಮಜಾರ್ಚಿತಾ ಬನ್ಧ-ಮೋಚನೀ ಬನ್ಧುರಾಲಕಾ .. ೧೧೧.. (ಮೋಚನೀ ಬರ್ಬರಾಲಕಾ)
ವಿಮರ್ಶರೂಪಿಣೀ ವಿದ್ಯಾ ವಿಯದಾದಿ-ಜಗತ್ಪ್ರಸೂಃ .
ಸರ್ವವ್ಯಾಧಿ-ಪ್ರಶಮನೀ ಸರ್ವಮೃತ್ಯು-ನಿವಾರಿಣೀ .. ೧೧೨..
ಅಗ್ರಗಣ್ಯಾಽಚಿನ್ತ್ಯರೂಪಾ ಕಲಿಕಲ್ಮಷ-ನಾಶಿನೀ .
ಕಾತ್ಯಾಯನೀ ಕಾಲಹನ್ತ್ರೀ ಕಮಲಾಕ್ಷ-ನಿಷೇವಿತಾ .. ೧೧೩..
ತಾಮ್ಬೂಲ-ಪೂರಿತ-ಮುಖೀ ದಾಡಿಮೀ-ಕುಸುಮ-ಪ್ರಭಾ .
ಮೃಗಾಕ್ಷೀ ಮೋಹಿನೀ ಮುಖ್ಯಾ ಮೃಡಾನೀ ಮಿತ್ರರೂಪಿಣೀ .. ೧೧೪..
ನಿತ್ಯತೃಪ್ತಾ ಭಕ್ತನಿಧಿರ್ನಿಯನ್ತ್ರೀ ನಿಖಿಲೇಶ್ವರೀ .
ಮೈತ್ರ್ಯಾದಿ-ವಾಸನಾಲಭ್ಯಾ ಮಹಾಪ್ರಲಯ-ಸಾಕ್ಷಿಣೀ .. ೧೧೫..
ಪರಾ ಶಕ್ತಿಃ ಪರಾ ನಿಷ್ಠಾ ಪ್ರಜ್ಞಾನಘನ-ರೂಪಿಣೀ .
ಮಾಧ್ವೀಪಾನಾಲಸಾ ಮತ್ತಾ ಮಾತೃಕಾ-ವರ್ಣ-ರೂಪಿಣೀ .. ೧೧೬..
ಮಹಾಕೈಲಾಸ-ನಿಲಯಾ ಮೃಣಾಲ-ಮೃದು-ದೋರ್ಲತಾ .
ಮಹನೀಯಾ ದಯಾಮೂರ್ತಿರ್ಮಹಾಸಾಮ್ರಾಜ್ಯ-ಶಾಲಿನೀ .. ೧೧೭..
ಆತ್ಮವಿದ್ಯಾ ಮಹಾವಿದ್ಯಾ ಶ್ರೀವಿದ್ಯಾ ಕಾಮಸೇವಿತಾ .
ಶ್ರೀ-ಷೋಡಶಾಕ್ಷರೀ-ವಿದ್ಯಾ ತ್ರಿಕೂಟಾ ಕಾಮಕೋಟಿಕಾ .. ೧೧೮..
ಕಟಾಕ್ಷ-ಕಿಙ್ಕರೀ-ಭೂತ-ಕಮಲಾ-ಕೋಟಿ-ಸೇವಿತಾ .
ಶಿರಃಸ್ಥಿತಾ ಚನ್ದ್ರನಿಭಾ ಭಾಲಸ್ಥೇನ್ದ್ರ-ಧನುಃಪ್ರಭಾ .. ೧೧೯..
ಹೃದಯಸ್ಥಾ ರವಿಪ್ರಖ್ಯಾ ತ್ರಿಕೋಣಾನ್ತರ-ದೀಪಿಕಾ .
ದಾಕ್ಷಾಯಣೀ ದೈತ್ಯಹನ್ತ್ರೀ ದಕ್ಷಯಜ್ಞ-ವಿನಾಶಿನೀ .. ೧೨೦..
ದರಾನ್ದೋಲಿತ-ದೀರ್ಘಾಕ್ಷೀ ದರ-ಹಾಸೋಜ್ಜ್ವಲನ್-ಮುಖೀ .
ಗುರುಮೂರ್ತಿರ್ಗುಣನಿಧಿರ್ಗೋಮಾತಾ ಗುಹಜನ್ಮಭೂಃ .. ೧೨೧..
ದೇವೇಶೀ ದಣ್ಡನೀತಿಸ್ಥಾ ದಹರಾಕಾಶ-ರೂಪಿಣೀ .
ಪ್ರತಿಪನ್ಮುಖ್ಯ-ರಾಕಾನ್ತ-ತಿಥಿ-ಮಣ್ಡಲ-ಪೂಜಿತಾ .. ೧೨೨..
ಕಲಾತ್ಮಿಕಾ ಕಲಾನಾಥಾ ಕಾವ್ಯಾಲಾಪ-ವಿನೋದಿನೀ . (ವಿಮೋದಿನೀ)
ಸಚಾಮರ-ರಮಾ-ವಾಣೀ-ಸವ್ಯ-ದಕ್ಷಿಣ-ಸೇವಿತಾ .. ೧೨೩..
ಆದಿಶಕ್ತಿರಮೇಯಾಽಽತ್ಮಾ ಪರಮಾ ಪಾವನಾಕೃತಿಃ .
ಅನೇಕಕೋಟಿ-ಬ್ರಹ್ಮಾಣ್ಡ-ಜನನೀ ದಿವ್ಯವಿಗ್ರಹಾ .. ೧೨೪..
ಕ್ಲೀಂಕಾರೀ ಕೇವಲಾ ಗುಹ್ಯಾ ಕೈವಲ್ಯ-ಪದದಾಯಿನೀ .
ತ್ರಿಪುರಾ ತ್ರಿಜಗದ್ವನ್ದ್ಯಾ ತ್ರಿಮೂರ್ತಿಸ್ತ್ರಿದಶೇಶ್ವರೀ .. ೧೨೫..
ತ್ರ್ಯಕ್ಷರೀ ದಿವ್ಯ-ಗನ್ಧಾಢ್ಯಾ ಸಿನ್ದೂರ-ತಿಲಕಾಞ್ಚಿತಾ .
ಉಮಾ ಶೈಲೇನ್ದ್ರತನಯಾ ಗೌರೀ ಗನ್ಧರ್ವ-ಸೇವಿತಾ .. ೧೨೬..
ವಿಶ್ವಗರ್ಭಾ ಸ್ವರ್ಣಗರ್ಭಾಽವರದಾ ವಾಗಧೀಶ್ವರೀ .
ಧ್ಯಾನಗಮ್ಯಾಽಪರಿಚ್ಛೇದ್ಯಾ ಜ್ಞಾನದಾ ಜ್ಞಾನವಿಗ್ರಹಾ .. ೧೨೭..
ಸರ್ವವೇದಾನ್ತ-ಸಂವೇದ್ಯಾ ಸತ್ಯಾನನ್ದ-ಸ್ವರೂಪಿಣೀ .
ಲೋಪಾಮುದ್ರಾರ್ಚಿತಾ ಲೀಲಾ-ಕೢಪ್ತ-ಬ್ರಹ್ಮಾಣ್ಡ-ಮಣ್ಡಲಾ .. ೧೨೮..
ಅದೃಶ್ಯಾ ದೃಶ್ಯರಹಿತಾ ವಿಜ್ಞಾತ್ರೀ ವೇದ್ಯವರ್ಜಿತಾ .
ಯೋಗಿನೀ ಯೋಗದಾ ಯೋಗ್ಯಾ ಯೋಗಾನನ್ದಾ ಯುಗನ್ಧರಾ .. ೧೨೯..
ಇಚ್ಛಾಶಕ್ತಿ-ಜ್ಞಾನಶಕ್ತಿ-ಕ್ರಿಯಾಶಕ್ತಿ-ಸ್ವರೂಪಿಣೀ .
ಸರ್ವಾಧಾರಾ ಸುಪ್ರತಿಷ್ಠಾ ಸದಸದ್ರೂಪ-ಧಾರಿಣೀ .. ೧೩೦..
ಅಷ್ಟಮೂರ್ತಿರಜಾಜೈತ್ರೀ ಲೋಕಯಾತ್ರಾ-ವಿಧಾಯಿನೀ . (ಅಜಾಜೇತ್ರೀ)
ಏಕಾಕಿನೀ ಭೂಮರೂಪಾ ನಿರ್ದ್ವೈತಾ ದ್ವೈತವರ್ಜಿತಾ .. ೧೩೧..
ಅನ್ನದಾ ವಸುದಾ ವೃದ್ಧಾ ಬ್ರಹ್ಮಾತ್ಮೈಕ್ಯ-ಸ್ವರೂಪಿಣೀ .
ಬೃಹತೀ ಬ್ರಾಹ್ಮಣೀ ಬ್ರಾಹ್ಮೀ ಬ್ರಹ್ಮಾನನ್ದಾ ಬಲಿಪ್ರಿಯಾ .. ೧೩೨..
ಭಾಷಾರೂಪಾ ಬೃಹತ್ಸೇನಾ ಭಾವಾಭಾವ-ವಿವರ್ಜಿತಾ .
ಸುಖಾರಾಧ್ಯಾ ಶುಭಕರೀ ಶೋಭನಾ ಸುಲಭಾ ಗತಿಃ .. ೧೩೩..
ರಾಜ-ರಾಜೇಶ್ವರೀ ರಾಜ್ಯ-ದಾಯಿನೀ ರಾಜ್ಯ-ವಲ್ಲಭಾ .
ರಾಜತ್ಕೃಪಾ ರಾಜಪೀಠ-ನಿವೇಶಿತ-ನಿಜಾಶ್ರಿತಾ .. ೧೩೪..
ರಾಜ್ಯಲಕ್ಷ್ಮೀಃ ಕೋಶನಾಥಾ ಚತುರಙ್ಗ-ಬಲೇಶ್ವರೀ .
ಸಾಮ್ರಾಜ್ಯ-ದಾಯಿನೀ ಸತ್ಯಸನ್ಧಾ ಸಾಗರಮೇಖಲಾ .. ೧೩೫..
ದೀಕ್ಷಿತಾ ದೈತ್ಯಶಮನೀ ಸರ್ವಲೋಕ-ವಶಙ್ಕರೀ .
ಸರ್ವಾರ್ಥದಾತ್ರೀ ಸಾವಿತ್ರೀ ಸಚ್ಚಿದಾನನ್ದ-ರೂಪಿಣೀ .. ೧೩೬..
ದೇಶ-ಕಾಲಾಪರಿಚ್ಛಿನ್ನಾ ಸರ್ವಗಾ ಸರ್ವಮೋಹಿನೀ .
ಸರಸ್ವತೀ ಶಾಸ್ತ್ರಮಯೀ ಗುಹಾಮ್ಬಾ ಗುಹ್ಯರೂಪಿಣೀ .. ೧೩೭..
ಸರ್ವೋಪಾಧಿ-ವಿನಿರ್ಮುಕ್ತಾ ಸದಾಶಿವ-ಪತಿವ್ರತಾ .
ಸಮ್ಪ್ರದಾಯೇಶ್ವರೀ ಸಾಧ್ವೀ ಗುರುಮಣ್ಡಲ-ರೂಪಿಣೀ .. ೧೩೮..
ಕುಲೋತ್ತೀರ್ಣಾ ಭಗಾರಾಧ್ಯಾ ಮಾಯಾ ಮಧುಮತೀ ಮಹೀ .
ಗಣಾಮ್ಬಾ ಗುಹ್ಯಕಾರಾಧ್ಯಾ ಕೋಮಲಾಙ್ಗೀ ಗುರುಪ್ರಿಯಾ .. ೧೩೯..
ಸ್ವತನ್ತ್ರಾ ಸರ್ವತನ್ತ್ರೇಶೀ ದಕ್ಷಿಣಾಮೂರ್ತಿ-ರೂಪಿಣೀ .
ಸನಕಾದಿ-ಸಮಾರಾಧ್ಯಾ ಶಿವಜ್ಞಾನ-ಪ್ರದಾಯಿನೀ .. ೧೪೦..
ಚಿತ್ಕಲಾಽಽನನ್ದ-ಕಲಿಕಾ ಪ್ರೇಮರೂಪಾ ಪ್ರಿಯಙ್ಕರೀ .
ನಾಮಪಾರಾಯಣ-ಪ್ರೀತಾ ನನ್ದಿವಿದ್ಯಾ ನಟೇಶ್ವರೀ .. ೧೪೧..
ಮಿಥ್ಯಾ-ಜಗದಧಿಷ್ಠಾನಾ ಮುಕ್ತಿದಾ ಮುಕ್ತಿರೂಪಿಣೀ .
ಲಾಸ್ಯಪ್ರಿಯಾ ಲಯಕರೀ ಲಜ್ಜಾ ರಮ್ಭಾದಿವನ್ದಿತಾ .. ೧೪೨..
ಭವದಾವ-ಸುಧಾವೃಷ್ಟಿಃ ಪಾಪಾರಣ್ಯ-ದವಾನಲಾ .
ದೌರ್ಭಾಗ್ಯ-ತೂಲವಾತೂಲಾ ಜರಾಧ್ವಾನ್ತ-ರವಿಪ್ರಭಾ .. ೧೪೩..
ಭಾಗ್ಯಾಬ್ಧಿ-ಚನ್ದ್ರಿಕಾ ಭಕ್ತ-ಚಿತ್ತಕೇಕಿ-ಘನಾಘನಾ .
ರೋಗಪರ್ವತ-ದಮ್ಭೋಲಿರ್ಮೃತ್ಯುದಾರು-ಕುಠಾರಿಕಾ .. ೧೪೪..
ಮಹೇಶ್ವರೀ ಮಹಾಕಾಲೀ ಮಹಾಗ್ರಾಸಾ ಮಹಾಶನಾ .
ಅಪರ್ಣಾ ಚಣ್ಡಿಕಾ ಚಣ್ಡಮುಣ್ಡಾಸುರ-ನಿಷೂದಿನೀ .. ೧೪೫..
ಕ್ಷರಾಕ್ಷರಾತ್ಮಿಕಾ ಸರ್ವ-ಲೋಕೇಶೀ ವಿಶ್ವಧಾರಿಣೀ .
ತ್ರಿವರ್ಗದಾತ್ರೀ ಸುಭಗಾ ತ್ರ್ಯಮ್ಬಕಾ ತ್ರಿಗುಣಾತ್ಮಿಕಾ .. ೧೪೬..
ಸ್ವರ್ಗಾಪವರ್ಗದಾ ಶುದ್ಧಾ ಜಪಾಪುಷ್ಪ-ನಿಭಾಕೃತಿಃ .
ಓಜೋವತೀ ದ್ಯುತಿಧರಾ ಯಜ್ಞರೂಪಾ ಪ್ರಿಯವ್ರತಾ .. ೧೪೭..
ದುರಾರಾಧ್ಯಾ ದುರಾಧರ್ಷಾ ಪಾಟಲೀ-ಕುಸುಮ-ಪ್ರಿಯಾ .
ಮಹತೀ ಮೇರುನಿಲಯಾ ಮನ್ದಾರ-ಕುಸುಮ-ಪ್ರಿಯಾ .. ೧೪೮..
ವೀರಾರಾಧ್ಯಾ ವಿರಾಡ್ರೂಪಾ ವಿರಜಾ ವಿಶ್ವತೋಮುಖೀ .
ಪ್ರತ್ಯಗ್ರೂಪಾ ಪರಾಕಾಶಾ ಪ್ರಾಣದಾ ಪ್ರಾಣರೂಪಿಣೀ .. ೧೪೯..
ಮಾರ್ತಾಣ್ಡ-ಭೈರವಾರಾಧ್ಯಾ ಮನ್ತ್ರಿಣೀನ್ಯಸ್ತ-ರಾಜ್ಯಧೂಃ . (ಮಾರ್ತಣ್ಡ)
ತ್ರಿಪುರೇಶೀ ಜಯತ್ಸೇನಾ ನಿಸ್ತ್ರೈಗುಣ್ಯಾ ಪರಾಪರಾ .. ೧೫೦..
ಸತ್ಯ-ಜ್ಞಾನಾನನ್ದ-ರೂಪಾ ಸಾಮರಸ್ಯ-ಪರಾಯಣಾ .
ಕಪರ್ದಿನೀ ಕಲಾಮಾಲಾ ಕಾಮಧುಕ್ ಕಾಮರೂಪಿಣೀ .. ೧೫೧..
ಕಲಾನಿಧಿಃ ಕಾವ್ಯಕಲಾ ರಸಜ್ಞಾ ರಸಶೇವಧಿಃ .
ಪುಷ್ಟಾ ಪುರಾತನಾ ಪೂಜ್ಯಾ ಪುಷ್ಕರಾ ಪುಷ್ಕರೇಕ್ಷಣಾ .. ೧೫೨..
ಪರಂಜ್ಯೋತಿಃ ಪರಂಧಾಮ ಪರಮಾಣುಃ ಪರಾತ್ಪರಾ .
ಪಾಶಹಸ್ತಾ ಪಾಶಹನ್ತ್ರೀ ಪರಮನ್ತ್ರ-ವಿಭೇದಿನೀ .. ೧೫೩..
ಮೂರ್ತಾಽಮೂರ್ತಾಽನಿತ್ಯತೃಪ್ತಾ ಮುನಿಮಾನಸ-ಹಂಸಿಕಾ .
ಸತ್ಯವ್ರತಾ ಸತ್ಯರೂಪಾ ಸರ್ವಾನ್ತರ್ಯಾಮಿನೀ ಸತೀ .. ೧೫೪..
ಬ್ರಹ್ಮಾಣೀ ಬ್ರಹ್ಮಜನನೀ ಬಹುರೂಪಾ ಬುಧಾರ್ಚಿತಾ .
ಪ್ರಸವಿತ್ರೀ ಪ್ರಚಣ್ಡಾಽಽಜ್ಞಾ ಪ್ರತಿಷ್ಠಾ ಪ್ರಕಟಾಕೃತಿಃ .. ೧೫೫..
ಪ್ರಾಣೇಶ್ವರೀ ಪ್ರಾಣದಾತ್ರೀ ಪಞ್ಚಾಶತ್ಪೀಠ-ರೂಪಿಣೀ .
ವಿಶೃಙ್ಖಲಾ ವಿವಿಕ್ತಸ್ಥಾ ವೀರಮಾತಾ ವಿಯತ್ಪ್ರಸೂಃ .. ೧೫೬..
ಮುಕುನ್ದಾ ಮುಕ್ತಿನಿಲಯಾ ಮೂಲವಿಗ್ರಹ-ರೂಪಿಣೀ .
ಭಾವಜ್ಞಾ ಭವರೋಗಘ್ನೀ ಭವಚಕ್ರ-ಪ್ರವರ್ತಿನೀ .. ೧೫೭..
ಛನ್ದಃಸಾರಾ ಶಾಸ್ತ್ರಸಾರಾ ಮನ್ತ್ರಸಾರಾ ತಲೋದರೀ .
ಉದಾರಕೀರ್ತಿರುದ್ದಾಮವೈಭವಾ ವರ್ಣರೂಪಿಣೀ .. ೧೫೮..
ಜನ್ಮಮೃತ್ಯು-ಜರಾತಪ್ತ-ಜನವಿಶ್ರಾನ್ತಿ-ದಾಯಿನೀ .
ಸರ್ವೋಪನಿಷ-ದುದ್-ಘುಷ್ಟಾ ಶಾನ್ತ್ಯತೀತ-ಕಲಾತ್ಮಿಕಾ .. ೧೫೯..
ಗಮ್ಭೀರಾ ಗಗನಾನ್ತಸ್ಥಾ ಗರ್ವಿತಾ ಗಾನಲೋಲುಪಾ .
ಕಲ್ಪನಾ-ರಹಿತಾ ಕಾಷ್ಠಾಽಕಾನ್ತಾ ಕಾನ್ತಾರ್ಧ-ವಿಗ್ರಹಾ .. ೧೬೦..
ಕಾರ್ಯಕಾರಣ-ನಿರ್ಮುಕ್ತಾ ಕಾಮಕೇಲಿ-ತರಙ್ಗಿತಾ .
ಕನತ್ಕನಕತಾ-ಟಙ್ಕಾ ಲೀಲಾ-ವಿಗ್ರಹ-ಧಾರಿಣೀ .. ೧೬೧..
ಅಜಾ ಕ್ಷಯವಿನಿರ್ಮುಕ್ತಾ ಮುಗ್ಧಾ ಕ್ಷಿಪ್ರ-ಪ್ರಸಾದಿನೀ .
ಅನ್ತರ್ಮುಖ-ಸಮಾರಾಧ್ಯಾ ಬಹಿರ್ಮುಖ-ಸುದುರ್ಲಭಾ .. ೧೬೨..
ತ್ರಯೀ ತ್ರಿವರ್ಗನಿಲಯಾ ತ್ರಿಸ್ಥಾ ತ್ರಿಪುರಮಾಲಿನೀ .
ನಿರಾಮಯಾ ನಿರಾಲಮ್ಬಾ ಸ್ವಾತ್ಮಾರಾಮಾ ಸುಧಾಸೃತಿಃ .. ೧೬೩.. (ಸುಧಾಸ್ರುತಿಃ)
ಸಂಸಾರಪಙ್ಕ-ನಿರ್ಮಗ್ನ-ಸಮುದ್ಧರಣ-ಪಣ್ಡಿತಾ .
ಯಜ್ಞಪ್ರಿಯಾ ಯಜ್ಞಕರ್ತ್ರೀ ಯಜಮಾನ-ಸ್ವರೂಪಿಣೀ .. ೧೬೪..
ಧರ್ಮಾಧಾರಾ ಧನಾಧ್ಯಕ್ಷಾ ಧನಧಾನ್ಯ-ವಿವರ್ಧಿನೀ .
ವಿಪ್ರಪ್ರಿಯಾ ವಿಪ್ರರೂಪಾ ವಿಶ್ವಭ್ರಮಣ-ಕಾರಿಣೀ .. ೧೬೫..
ವಿಶ್ವಗ್ರಾಸಾ ವಿದ್ರುಮಾಭಾ ವೈಷ್ಣವೀ ವಿಷ್ಣುರೂಪಿಣೀ .
ಅಯೋನಿರ್ಯೋನಿನಿಲಯಾ ಕೂಟಸ್ಥಾ ಕುಲರೂಪಿಣೀ .. ೧೬೬..
ವೀರಗೋಷ್ಠೀಪ್ರಿಯಾ ವೀರಾ ನೈಷ್ಕರ್ಮ್ಯಾ ನಾದರೂಪಿಣೀ .
ವಿಜ್ಞಾನಕಲನಾ ಕಲ್ಯಾ ವಿದಗ್ಧಾ ಬೈನ್ದವಾಸನಾ .. ೧೬೭..
ತತ್ತ್ವಾಧಿಕಾ ತತ್ತ್ವಮಯೀ ತತ್ತ್ವಮರ್ಥ-ಸ್ವರೂಪಿಣೀ .
ಸಾಮಗಾನಪ್ರಿಯಾ ಸೌಮ್ಯಾ ಸದಾಶಿವ-ಕುಟುಮ್ಬಿನೀ .. ೧೬೮.. (ಸೋಮ್ಯಾ)
ಸವ್ಯಾಪಸವ್ಯ-ಮಾರ್ಗಸ್ಥಾ ಸರ್ವಾಪದ್ವಿನಿವಾರಿಣೀ .
ಸ್ವಸ್ಥಾ ಸ್ವಭಾವಮಧುರಾ ಧೀರಾ ಧೀರಸಮರ್ಚಿತಾ .. ೧೬೯..
ಚೈತನ್ಯಾರ್ಘ್ಯ-ಸಮಾರಾಧ್ಯಾ ಚೈತನ್ಯ-ಕುಸುಮಪ್ರಿಯಾ .
ಸದೋದಿತಾ ಸದಾತುಷ್ಟಾ ತರುಣಾದಿತ್ಯ-ಪಾಟಲಾ .. ೧೭೦..
ದಕ್ಷಿಣಾ-ದಕ್ಷಿಣಾರಾಧ್ಯಾ ದರಸ್ಮೇರ-ಮುಖಾಮ್ಬುಜಾ .
ಕೌಲಿನೀ-ಕೇವಲಾಽನರ್ಘ್ಯ-ಕೈವಲ್ಯ-ಪದದಾಯಿನೀ .. ೧೭೧..
ಸ್ತೋತ್ರಪ್ರಿಯಾ ಸ್ತುತಿಮತೀ ಶ್ರುತಿ-ಸಂಸ್ತುತ-ವೈಭವಾ .
ಮನಸ್ವಿನೀ ಮಾನವತೀ ಮಹೇಶೀ ಮಙ್ಗಲಾಕೃತಿಃ .. ೧೭೨..
ವಿಶ್ವಮಾತಾ ಜಗದ್ಧಾತ್ರೀ ವಿಶಾಲಾಕ್ಷೀ ವಿರಾಗಿಣೀ .
ಪ್ರಗಲ್ಭಾ ಪರಮೋದಾರಾ ಪರಾಮೋದಾ ಮನೋಮಯೀ .. ೧೭೩..
ವ್ಯೋಮಕೇಶೀ ವಿಮಾನಸ್ಥಾ ವಜ್ರಿಣೀ ವಾಮಕೇಶ್ವರೀ .
ಪಞ್ಚಯಜ್ಞ-ಪ್ರಿಯಾ ಪಞ್ಚ-ಪ್ರೇತ-ಮಞ್ಚಾಧಿಶಾಯಿನೀ .. ೧೭೪..
ಪಞ್ಚಮೀ ಪಞ್ಚಭೂತೇಶೀ ಪಞ್ಚ-ಸಂಖ್ಯೋಪಚಾರಿಣೀ .
ಶಾಶ್ವತೀ ಶಾಶ್ವತೈಶ್ವರ್ಯಾ ಶರ್ಮದಾ ಶಮ್ಭುಮೋಹಿನೀ .. ೧೭೫..
ಧರಾಧರಸುತಾ ಧನ್ಯಾ ಧರ್ಮಿಣೀ ಧರ್ಮವರ್ಧಿನೀ .
ಲೋಕಾತೀತಾ ಗುಣಾತೀತಾ ಸರ್ವಾತೀತಾ ಶಮಾತ್ಮಿಕಾ .. ೧೭೬..
ಬನ್ಧೂಕ-ಕುಸುಮಪ್ರಖ್ಯಾ ಬಾಲಾ ಲೀಲಾವಿನೋದಿನೀ .
ಸುಮಙ್ಗಲೀ ಸುಖಕರೀ ಸುವೇಷಾಢ್ಯಾ ಸುವಾಸಿನೀ .. ೧೭೭..
ಸುವಾಸಿನ್ಯರ್ಚನ-ಪ್ರೀತಾಽಽಶೋಭನಾ ಶುದ್ಧಮಾನಸಾ .
ಬಿನ್ದು-ತರ್ಪಣ-ಸನ್ತುಷ್ಟಾ ಪೂರ್ವಜಾ ತ್ರಿಪುರಾಮ್ಬಿಕಾ .. ೧೭೮..
ದಶಮುದ್ರಾ-ಸಮಾರಾಧ್ಯಾ ತ್ರಿಪುರಾಶ್ರೀ-ವಶಙ್ಕರೀ .
ಜ್ಞಾನಮುದ್ರಾ ಜ್ಞಾನಗಮ್ಯಾ ಜ್ಞಾನಜ್ಞೇಯ-ಸ್ವರೂಪಿಣೀ .. ೧೭೯..
ಯೋನಿಮುದ್ರಾ ತ್ರಿಖಣ್ಡೇಶೀ ತ್ರಿಗುಣಾಮ್ಬಾ ತ್ರಿಕೋಣಗಾ .
ಅನಘಾಽದ್ಭುತ-ಚಾರಿತ್ರಾ ವಾಞ್ಛಿತಾರ್ಥ-ಪ್ರದಾಯಿನೀ .. ೧೮೦..
ಅಭ್ಯಾಸಾತಿಶಯ-ಜ್ಞಾತಾ ಷಡಧ್ವಾತೀತ-ರೂಪಿಣೀ .
ಅವ್ಯಾಜ-ಕರುಣಾ-ಮೂರ್ತಿರಜ್ಞಾನ-ಧ್ವಾನ್ತ-ದೀಪಿಕಾ .. ೧೮೧..
ಆಬಾಲ-ಗೋಪ-ವಿದಿತಾ ಸರ್ವಾನುಲ್ಲಙ್ಘ್ಯ-ಶಾಸನಾ .
ಶ್ರೀಚಕ್ರರಾಜ-ನಿಲಯಾ ಶ್ರೀಮತ್-ತ್ರಿಪುರಸುನ್ದರೀ .. ೧೮೨..
ಶ್ರೀಶಿವಾ ಶಿವ-ಶಕ್ತ್ಯೈಕ್ಯ-ರೂಪಿಣೀ ಲಲಿತಾಮ್ಬಿಕಾ .
ಏವಂ ಶ್ರೀಲಲಿತಾ ದೇವ್ಯಾ ನಾಮ್ನಾಂ ಸಾಹಸ್ರಕಂ ಜಗುಃ ..
.. ಇತಿ ಶ್ರೀಬ್ರಹ್ಮಾಣ್ಡಪುರಾಣೇ ಉತ್ತರಖಣ್ಡೇ ಶ್ರೀಹಯಗ್ರೀವಾಗಸ್ತ್ಯಸಂವಾದೇ ಶ್ರೀಲಲಿತಾ ಸಹಸ್ರನಾಮ ಸ್ತೋತ್ರ ಕಥನಂ ಸಮ್ಪೂರ್ಣಮ್ ..