శ్రీలలితాసహస్రనామస్తోత్రమ్

.. న్యాసః ..
అస్య శ్రీలలితాసహస్రనామస్తోత్రమాలామన్త్రస్య .

వశిన్యాదివాగ్దేవతా ఋషయః . అనుష్టుప్ఛన్దః . శ్రీలలితాపరమేశ్వరీ దేవతా . శ్రీమద్వాగ్భవకూటేతి బీజమ్ మధ్యకూటేతి శక్తిః . శక్తికూటేతి కీలకమ్ . శ్రీలలితామహాత్రిపురసున్దరీ-ప్రసాదసిద్ధిద్వారా చిన్తితఫలావాప్త్యర్థే జపే వినియోగః .
.. ధ్యానమ్ ..

సిన్దూరారుణవిగ్రహాం త్రినయనాం మాణిక్యమౌలిస్ఫురత్
తారానాయకశేఖరాం స్మితముఖీమాపీనవక్షోరుహామ్ .

పాణిభ్యామలిపూర్ణరత్నచషకం రక్తోత్పలం విభ్రతీం
సౌమ్యాం రత్నఘటస్థరక్తచరణాం ధ్యాయేత్పరామమ్బికామ్ ..

అరుణాం కరుణాతరఙ్గితాక్షీం
ధృతపాశాఙ్కుశపుష్పబాణచాపామ్ .

అణిమాదిభిరావృతాం మయుఖైః
అహమిత్యేవ విభావయే భవానీమ్ ..

ధ్యాయేత్పద్మాసనస్థాం వికసితవదనాం పద్మపత్రాయతాక్షీం
హేమాభాం పీతవస్త్రాం కరకలితలసద్ధేమపద్మాం వరాఙ్గీమ్ .

సర్వాలఙ్కారయుక్తాం సతతమభయదాం భక్తనమ్రాం భవానీం
శ్రీవిద్యాం శాన్తమూర్తిం సకలసురనుతాం సర్వసమ్పత్ప్రదాత్రీమ్ ..

సకుఙ్కుమవిలేపనామలికచుమ్బికస్తూరికాం
సమన్దహసితేక్షణాం సశరచాపపాశాఙ్కుశామ్ .

అశేషజనమోహినీమరుణమాల్యభూషామ్బరాం
జపాకుసుమభాసురాం జపవిధౌ స్మరేదమ్బికామ్ ..

.. అథ శ్రీలలితాసహస్రనామస్తోత్రమ్ ..
ఓం శ్రీమాతా శ్రీమహారాజ్ఞీ శ్రీమత్-సింహాసనేశ్వరీ .

చిదగ్ని-కుణ్డ-సమ్భూతా దేవకార్య-సముద్యతా .. 1..
ఉద్యద్భాను-సహస్రాభా చతుర్బాహు-సమన్వితా .

రాగస్వరూప-పాశాఢ్యా క్రోధాకారాఙ్కుశోజ్జ్వలా .. 2..
మనోరూపేక్షు-కోదణ్డా పఞ్చతన్మాత్ర-సాయకా .

నిజారుణ-ప్రభాపూర-మజ్జద్బ్రహ్మాణ్డ-మణ్డలా .. 3..
చమ్పకాశోక-పున్నాగ-సౌగన్ధిక-లసత్కచా .

కురువిన్దమణి-శ్రేణీ-కనత్కోటీర-మణ్డితా .. 4..
అష్టమీచన్ద్ర-విభ్రాజ-దలికస్థల-శోభితా .

ముఖచన్ద్ర-కలఙ్కాభ-మృగనాభి-విశేషకా .. 5..
వదనస్మర-మాఙ్గల్య-గృహతోరణ-చిల్లికా .

వక్త్రలక్ష్మీ-పరీవాహ-చలన్మీనాభ-లోచనా .. 6..
నవచమ్పక-పుష్పాభ-నాసాదణ్డ-విరాజితా .

తారాకాన్తి-తిరస్కారి-నాసాభరణ-భాసురా .. 7..
కదమ్బమఞ్జరీ-కౢప్త-కర్ణపూర-మనోహరా .

తాటఙ్క-యుగలీ-భూత-తపనోడుప-మణ్డలా .. 8..
పద్మరాగ-శిలాదర్శ-పరిభావి-కపోలభూః .

నవవిద్రుమ-బిమ్బశ్రీ-న్యక్కారి-రదనచ్ఛదా .. 9.. (దశనచ్ఛదా)
శుద్ధ-విద్యాఙ్కురాకార-ద్విజపఙ్క్తి-ద్వయోజ్జ్వలా .

కర్పూర-వీటికామోద-సమాకర్షి-దిగన్తరా .. 10..
నిజ-సల్లాప-మాధుర్య-వినిర్భర్త్సిత-కచ్ఛపీ . (నిజ-సంలాప)

మన్దస్మిత-ప్రభాపూర-మజ్జత్కామేశ-మానసా .. 11..
అనాకలిత-సాదృశ్య-చిబుకశ్రీ-విరాజితా .

కామేశ-బద్ధ-మాఙ్గల్య-సూత్ర-శోభిత-కన్ధరా .. 12..
కనకాఙ్గద-కేయూర-కమనీయ-భుజాన్వితా .

రత్నగ్రైవేయ-చిన్తాక-లోల-ముక్తా-ఫలాన్వితా .. 13..
కామేశ్వర-ప్రేమరత్న-మణి-ప్రతిపణ-స్తనీ .

నాభ్యాలవాల-రోమాలి-లతా-ఫల-కుచద్వయీ .. 14..
లక్ష్యరోమ-లతాధారతా-సమున్నేయ-మధ్యమా .

స్తనభార-దలన్మధ్య-పట్టబన్ధ-వలిత్రయా .. 15..
అరుణారుణ-కౌసుమ్భ-వస్త్ర-భాస్వత్-కటీతటీ .

రత్న-కిఙ్కిణికా-రమ్య-రశనా-దామ-భూషితా .. 16..
కామేశ-జ్ఞాత-సౌభాగ్య-మార్దవోరు-ద్వయాన్వితా .

మాణిక్య-ముకుటాకార-జానుద్వయ-విరాజితా .. 17..
ఇన్ద్రగోప-పరిక్షిప్త-స్మరతూణాభ-జఙ్ఘికా .

గూఢగుల్ఫా కూర్మపృష్ఠ-జయిష్ణు-ప్రపదాన్వితా .. 18..
నఖ-దీధితి-సంఛన్న-నమజ్జన-తమోగుణా .

పదద్వయ-ప్రభాజాల-పరాకృత-సరోరుహా .. 19..
సిఞ్జాన-మణిమఞ్జీర-మణ్డిత-శ్రీ-పదామ్బుజా . (శిఞ్జాన)

మరాలీ-మన్దగమనా మహాలావణ్య-శేవధిః .. 20..
సర్వారుణాఽనవద్యాఙ్గీ సర్వాభరణ-భూషితా .

శివ-కామేశ్వరాఙ్కస్థా శివా స్వాధీన-వల్లభా .. 21..
సుమేరు-మధ్య-శృఙ్గస్థా శ్రీమన్నగర-నాయికా .

చిన్తామణి-గృహాన్తస్థా పఞ్చ-బ్రహ్మాసన-స్థితా .. 22..
మహాపద్మాటవీ-సంస్థా కదమ్బవన-వాసినీ .

సుధాసాగర-మధ్యస్థా కామాక్షీ కామదాయినీ .. 23..
దేవర్షి-గణ-సంఘాత-స్తూయమానాత్మ-వైభవా .

భణ్డాసుర-వధోద్యుక్త-శక్తిసేనా-సమన్వితా .. 24..
సమ్పత్కరీ-సమారూఢ-సిన్ధుర-వ్రజ-సేవితా .

అశ్వారూఢాధిష్ఠితాశ్వ-కోటి-కోటిభిరావృతా .. 25..
చక్రరాజ-రథారూఢ-సర్వాయుధ-పరిష్కృతా .

గేయచక్ర-రథారూఢ-మన్త్రిణీ-పరిసేవితా .. 26..
కిరిచక్ర-రథారూఢ-దణ్డనాథా-పురస్కృతా .

జ్వాలా-మాలినికాక్షిప్త-వహ్నిప్రాకార-మధ్యగా .. 27..
భణ్డసైన్య-వధోద్యుక్త-శక్తి-విక్రమ-హర్షితా .

నిత్యా-పరాక్రమాటోప-నిరీక్షణ-సముత్సుకా .. 28..
భణ్డపుత్ర-వధోద్యుక్త-బాలా-విక్రమ-నన్దితా .

మన్త్రిణ్యమ్బా-విరచిత-విషఙ్గ-వధ-తోషితా .. 29..
విశుక్ర-ప్రాణహరణ-వారాహీ-వీర్య-నన్దితా .

కామేశ్వర-ముఖాలోక-కల్పిత-శ్రీగణేశ్వరా .. 30..
మహాగణేశ-నిర్భిన్న-విఘ్నయన్త్ర-ప్రహర్షితా .

భణ్డాసురేన్ద్ర-నిర్ముక్త-శస్త్ర-ప్రత్యస్త్ర-వర్షిణీ .. 31..
కరాఙ్గులి-నఖోత్పన్న-నారాయణ-దశాకృతిః .

మహా-పాశుపతాస్త్రాగ్ని-నిర్దగ్ధాసుర-సైనికా .. 32..
కామేశ్వరాస్త్ర-నిర్దగ్ధ-సభణ్డాసుర-శూన్యకా .

బ్రహ్మోపేన్ద్ర-మహేన్ద్రాది-దేవ-సంస్తుత-వైభవా .. 33..
హర-నేత్రాగ్ని-సందగ్ధ-కామ-సఞ్జీవనౌషధిః .

శ్రీమద్వాగ్భవ-కూటైక-స్వరూప-ముఖ-పఙ్కజా .. 34..
కణ్ఠాధః-కటి-పర్యన్త-మధ్యకూట-స్వరూపిణీ .

శక్తి-కూటైకతాపన్న-కట్యధోభాగ-ధారిణీ .. 35..
మూల-మన్త్రాత్మికా మూలకూటత్రయ-కలేవరా .

కులామృతైక-రసికా కులసంకేత-పాలినీ .. 36..
కులాఙ్గనా కులాన్తస్థా కౌలినీ కులయోగినీ .

అకులా సమయాన్తస్థా సమయాచార-తత్పరా .. 37..
మూలాధారైక-నిలయా బ్రహ్మగ్రన్థి-విభేదినీ .

మణి-పూరాన్తరుదితా విష్ణుగ్రన్థి-విభేదినీ .. 38..
ఆజ్ఞా-చక్రాన్తరాలస్థా రుద్రగ్రన్థి-విభేదినీ .

సహస్రారామ్బుజారూఢా సుధా-సారాభివర్షిణీ .. 39..
తడిల్లతా-సమరుచిః షట్చక్రోపరి-సంస్థితా .

మహాసక్తిః కుణ్డలినీ బిసతన్తు-తనీయసీ .. 40..
భవానీ భావనాగమ్యా భవారణ్య-కుఠారికా .

భద్రప్రియా భద్రమూర్తిర్భక్త-సౌభాగ్యదాయినీ .. 41..
భక్తిప్రియా భక్తిగమ్యా భక్తివశ్యా భయాపహా .

శామ్భవీ శారదారాధ్యా శర్వాణీ శర్మదాయినీ .. 42..
శాఙ్కరీ శ్రీకరీ సాధ్వీ శరచ్చన్ద్ర-నిభాననా .

శాతోదరీ శాన్తిమతీ నిరాధారా నిరఞ్జనా .. 43..
నిర్లేపా నిర్మలా నిత్యా నిరాకారా నిరాకులా .

నిర్గుణా నిష్కలా శాన్తా నిష్కామా నిరుపప్లవా .. 44..
నిత్యముక్తా నిర్వికారా నిష్ప్రపఞ్చా నిరాశ్రయా .

నిత్యశుద్ధా నిత్యబుద్ధా నిరవద్యా నిరన్తరా .. 45..
నిష్కారణా నిష్కలఙ్కా నిరుపాధిర్నిరీశ్వరా .

నీరాగా రాగమథనీ నిర్మదా మదనాశినీ .. 46..
నిశ్చిన్తా నిరహంకారా నిర్మోహా మోహనాశినీ .

నిర్మమా మమతాహన్త్రీ నిష్పాపా పాపనాశినీ .. 47..
నిష్క్రోధా క్రోధశమనీ నిర్లోభా లోభనాశినీ .

నిఃసంశయా సంశయఘ్నీ నిర్భవా భవనాశినీ .. 48.. (నిస్సంశయా)
నిర్వికల్పా నిరాబాధా నిర్భేదా భేదనాశినీ .

నిర్నాశా మృత్యుమథనీ నిష్క్రియా నిష్పరిగ్రహా .. 49..
నిస్తులా నీలచికురా నిరపాయా నిరత్యయా .

దుర్లభా దుర్గమా దుర్గా దుఃఖహన్త్రీ సుఖప్రదా .. 50..
దుష్టదూరా దురాచార-శమనీ దోషవర్జితా .

సర్వజ్ఞా సాన్ద్రకరుణా సమానాధిక-వర్జితా .. 51..
సర్వశక్తిమయీ సర్వ-మఙ్గలా సద్గతిప్రదా .

సర్వేశ్వరీ సర్వమయీ సర్వమన్త్ర-స్వరూపిణీ .. 52..
సర్వ-యన్త్రాత్మికా సర్వ-తన్త్రరూపా మనోన్మనీ .

మాహేశ్వరీ మహాదేవీ మహాలక్ష్మీర్మృడప్రియా .. 53..
మహారూపా మహాపూజ్యా మహాపాతక-నాశినీ .

మహామాయా మహాసత్త్వా మహాశక్తిర్మహారతిః .. 54..
మహాభోగా మహైశ్వర్యా మహావీర్యా మహాబలా .

మహాబుద్ధిర్మహాసిద్ధిర్మహాయోగేశ్వరేశ్వరీ .. 55..
మహాతన్త్రా మహామన్త్రా మహాయన్త్రా మహాసనా .

మహాయాగ-క్రమారాధ్యా మహాభైరవ-పూజితా .. 56..
మహేశ్వర-మహాకల్ప-మహాతాణ్డవ-సాక్షిణీ .

మహాకామేశ-మహిషీ మహాత్రిపుర-సున్దరీ .. 57..
చతుఃషష్ట్యుపచారాఢ్యా చతుఃషష్టికలామయీ .

మహాచతుః-షష్టికోటి-యోగినీ-గణసేవితా .. 58..
మనువిద్యా చన్ద్రవిద్యా చన్ద్రమణ్డల-మధ్యగా .

చారురూపా చారుహాసా చారుచన్ద్ర-కలాధరా .. 59..
చరాచర-జగన్నాథా చక్రరాజ-నికేతనా .

పార్వతీ పద్మనయనా పద్మరాగ-సమప్రభా .. 60..
పఞ్చ-ప్రేతాసనాసీనా పఞ్చబ్రహ్మ-స్వరూపిణీ .

చిన్మయీ పరమానన్దా విజ్ఞాన-ఘనరూపిణీ .. 61..
ధ్యాన-ధ్యాతృ-ధ్యేయరూపా ధర్మాధర్మ-వివర్జితా .

విశ్వరూపా జాగరిణీ స్వపన్తీ తైజసాత్మికా .. 62..
సుప్తా ప్రాజ్ఞాత్మికా తుర్యా సర్వావస్థా-వివర్జితా .

సృష్టికర్త్రీ బ్రహ్మరూపా గోప్త్రీ గోవిన్దరూపిణీ .. 63..
సంహారిణీ రుద్రరూపా తిరోధాన-కరీశ్వరీ .

సదాశివాఽనుగ్రహదా పఞ్చకృత్య-పరాయణా .. 64..
భానుమణ్డల-మధ్యస్థా భైరవీ భగమాలినీ .

పద్మాసనా భగవతీ పద్మనాభ-సహోదరీ .. 65..
ఉన్మేష-నిమిషోత్పన్న-విపన్న-భువనావలీ .

సహస్ర-శీర్షవదనా సహస్రాక్షీ సహస్రపాత్ .. 66..
ఆబ్రహ్మ-కీట-జననీ వర్ణాశ్రమ-విధాయినీ .

నిజాజ్ఞారూప-నిగమా పుణ్యాపుణ్య-ఫలప్రదా .. 67..
శ్రుతి-సీమన్త-సిన్దూరీ-కృత-పాదాబ్జ-ధూలికా .

సకలాగమ-సన్దోహ-శుక్తి-సమ్పుట-మౌక్తికా .. 68..
పురుషార్థప్రదా పూర్ణా భోగినీ భువనేశ్వరీ .

అమ్బికాఽనాది-నిధనా హరిబ్రహ్మేన్ద్ర-సేవితా .. 69..
నారాయణీ నాదరూపా నామరూప-వివర్జితా .

హ్రీంకారీ హ్రీమతీ హృద్యా హేయోపాదేయ-వర్జితా .. 70..
రాజరాజార్చితా రాజ్ఞీ రమ్యా రాజీవలోచనా .

రఞ్జనీ రమణీ రస్యా రణత్కిఙ్కిణి-మేఖలా .. 71..
రమా రాకేన్దువదనా రతిరూపా రతిప్రియా .

రక్షాకరీ రాక్షసఘ్నీ రామా రమణలమ్పటా .. 72..
కామ్యా కామకలారూపా కదమ్బ-కుసుమ-ప్రియా .

కల్యాణీ జగతీకన్దా కరుణా-రస-సాగరా .. 73..
కలావతీ కలాలాపా కాన్తా కాదమ్బరీప్రియా .

వరదా వామనయనా వారుణీ-మద-విహ్వలా .. 74..
విశ్వాధికా వేదవేద్యా విన్ధ్యాచల-నివాసినీ .

విధాత్రీ వేదజననీ విష్ణుమాయా విలాసినీ .. 75..
క్షేత్రస్వరూపా క్షేత్రేశీ క్షేత్ర-క్షేత్రజ్ఞ-పాలినీ .

క్షయవృద్ధి-వినిర్ముక్తా క్షేత్రపాల-సమర్చితా .. 76..
విజయా విమలా వన్ద్యా వన్దారు-జన-వత్సలా .

వాగ్వాదినీ వామకేశీ వహ్నిమణ్డల-వాసినీ .. 77..
భక్తిమత్-కల్పలతికా పశుపాశ-విమోచినీ .

సంహృతాశేష-పాషణ్డా సదాచార-ప్రవర్తికా .. 78.. (పాఖణ్డా)
తాపత్రయాగ్ని-సన్తప్త-సమాహ్లాదన-చన్ద్రికా .

తరుణీ తాపసారాధ్యా తనుమధ్యా తమోఽపహా .. 79..
చితిస్తత్పద-లక్ష్యార్థా చిదేకరస-రూపిణీ .

స్వాత్మానన్ద-లవీభూత-బ్రహ్మాద్యానన్ద-సన్తతిః .. 80..
పరా ప్రత్యక్చితీరూపా పశ్యన్తీ పరదేవతా .

మధ్యమా వైఖరీరూపా భక్త-మానస-హంసికా .. 81..
కామేశ్వర-ప్రాణనాడీ కృతజ్ఞా కామపూజితా .

శృఙ్గార-రస-సమ్పూర్ణా జయా జాలన్ధర-స్థితా .. 82..
ఓడ్యాణపీఠ-నిలయా బిన్దు-మణ్డలవాసినీ .

రహోయాగ-క్రమారాధ్యా రహస్తర్పణ-తర్పితా .. 83..
సద్యఃప్రసాదినీ విశ్వ-సాక్షిణీ సాక్షివర్జితా .

షడఙ్గదేవతా-యుక్తా షాడ్గుణ్య-పరిపూరితా .. 84..
నిత్యక్లిన్నా నిరుపమా నిర్వాణ-సుఖ-దాయినీ .

నిత్యా-షోడశికా-రూపా శ్రీకణ్ఠార్ధ-శరీరిణీ .. 85..
ప్రభావతీ ప్రభారూపా ప్రసిద్ధా పరమేశ్వరీ .

మూలప్రకృతిరవ్యక్తా వ్యక్తావ్యక్త-స్వరూపిణీ .. 86..
వ్యాపినీ వివిధాకారా విద్యావిద్యా-స్వరూపిణీ .

మహాకామేశ-నయన-కుముదాహ్లాద-కౌముదీ .. 87..
భక్త-హార్ద-తమోభేద-భానుమద్భాను-సన్తతిః .

శివదూతీ శివారాధ్యా శివమూర్తిః శివఙ్కరీ .. 88..
శివప్రియా శివపరా శిష్టేష్టా శిష్టపూజితా .

అప్రమేయా స్వప్రకాశా మనోవాచామగోచరా .. 89..
చిచ్ఛక్తిశ్ చేతనారూపా జడశక్తిర్జడాత్మికా .

గాయత్రీ వ్యాహృతిః సన్ధ్యా ద్విజవృన్ద-నిషేవితా .. 90..
తత్త్వాసనా తత్త్వమయీ పఞ్చ-కోశాన్తర-స్థితా .

నిఃసీమ-మహిమా నిత్య-యౌవనా మదశాలినీ .. 91.. (నిస్సీమ)
మదఘూర్ణిత-రక్తాక్షీ మదపాటల-గణ్డభూః .

చన్దన-ద్రవ-దిగ్ధాఙ్గీ చామ్పేయ-కుసుమ-ప్రియా .. 92..
కుశలా కోమలాకారా కురుకుల్లా కులేశ్వరీ .

కులకుణ్డాలయా కౌల-మార్గ-తత్పర-సేవితా .. 93..
కుమార-గణనాథామ్బా తుష్టిః పుష్టిర్మతిర్ధృతిః .

శాన్తిః స్వస్తిమతీ కాన్తిర్నన్దినీ విఘ్ననాశినీ .. 94..
తేజోవతీ త్రినయనా లోలాక్షీ-కామరూపిణీ .

మాలినీ హంసినీ మాతా మలయాచల-వాసినీ .. 95..
సుముఖీ నలినీ సుభ్రూః శోభనా సురనాయికా .

కాలకణ్ఠీ కాన్తిమతీ క్షోభిణీ సూక్ష్మరూపిణీ .. 96..
వజ్రేశ్వరీ వామదేవీ వయోఽవస్థా-వివర్జితా .

సిద్ధేశ్వరీ సిద్ధవిద్యా సిద్ధమాతా యశస్వినీ .. 97..
విశుద్ధిచక్ర-నిలయాఽఽరక్తవర్ణా త్రిలోచనా .

ఖట్వాఙ్గాది-ప్రహరణా వదనైక-సమన్వితా .. 98..
పాయసాన్నప్రియా త్వక్స్థా పశులోక-భయఙ్కరీ .

అమృతాది-మహాశక్తి-సంవృతా డాకినీశ్వరీ .. 99..
అనాహతాబ్జ-నిలయా శ్యామాభా వదనద్వయా .

దంష్ట్రోజ్జ్వలాఽక్ష-మాలాది-ధరా రుధిరసంస్థితా .. 100..
కాలరాత్ర్యాది-శక్త్యౌఘ-వృతా స్నిగ్ధౌదనప్రియా .

మహావీరేన్ద్ర-వరదా రాకిణ్యమ్బా-స్వరూపిణీ .. 101..
మణిపూరాబ్జ-నిలయా వదనత్రయ-సంయుతా .

వజ్రాదికాయుధోపేతా డామర్యాదిభిరావృతా .. 102..
రక్తవర్ణా మాంసనిష్ఠా గుడాన్న-ప్రీత-మానసా .

సమస్తభక్త-సుఖదా లాకిన్యమ్బా-స్వరూపిణీ .. 103..
స్వాధిష్ఠానామ్బుజ-గతా చతుర్వక్త్ర-మనోహరా .

శూలాద్యాయుధ-సమ్పన్నా పీతవర్ణాఽతిగర్వితా .. 104..
మేదోనిష్ఠా మధుప్రీతా బన్ధిన్యాది-సమన్వితా .

దధ్యన్నాసక్త-హృదయా కాకినీ-రూప-ధారిణీ .. 105..
మూలాధారామ్బుజారూఢా పఞ్చ-వక్త్రాఽస్థి-సంస్థితా .

అఙ్కుశాది-ప్రహరణా వరదాది-నిషేవితా .. 106..
ముద్గౌదనాసక్త-చిత్తా సాకిన్యమ్బా-స్వరూపిణీ .

ఆజ్ఞా-చక్రాబ్జ-నిలయా శుక్లవర్ణా షడాననా .. 107..
మజ్జాసంస్థా హంసవతీ-ముఖ్య-శక్తి-సమన్వితా .

హరిద్రాన్నైక-రసికా హాకినీ-రూప-ధారిణీ .. 108..
సహస్రదల-పద్మస్థా సర్వ-వర్ణోప-శోభితా .

సర్వాయుధధరా శుక్ల-సంస్థితా సర్వతోముఖీ .. 109..
సర్వౌదన-ప్రీతచిత్తా యాకిన్యమ్బా-స్వరూపిణీ .

స్వాహా స్వధాఽమతిర్మేధా శ్రుతిః స్మృతిరనుత్తమా .. 110..
పుణ్యకీర్తిః పుణ్యలభ్యా పుణ్యశ్రవణ-కీర్తనా .

పులోమజార్చితా బన్ధ-మోచనీ బన్ధురాలకా .. 111.. (మోచనీ బర్బరాలకా)
విమర్శరూపిణీ విద్యా వియదాది-జగత్ప్రసూః .

సర్వవ్యాధి-ప్రశమనీ సర్వమృత్యు-నివారిణీ .. 112..
అగ్రగణ్యాఽచిన్త్యరూపా కలికల్మష-నాశినీ .

కాత్యాయనీ కాలహన్త్రీ కమలాక్ష-నిషేవితా .. 113..
తామ్బూల-పూరిత-ముఖీ దాడిమీ-కుసుమ-ప్రభా .

మృగాక్షీ మోహినీ ముఖ్యా మృడానీ మిత్రరూపిణీ .. 114..
నిత్యతృప్తా భక్తనిధిర్నియన్త్రీ నిఖిలేశ్వరీ .

మైత్ర్యాది-వాసనాలభ్యా మహాప్రలయ-సాక్షిణీ .. 115..
పరా శక్తిః పరా నిష్ఠా ప్రజ్ఞానఘన-రూపిణీ .

మాధ్వీపానాలసా మత్తా మాతృకా-వర్ణ-రూపిణీ .. 116..
మహాకైలాస-నిలయా మృణాల-మృదు-దోర్లతా .

మహనీయా దయామూర్తిర్మహాసామ్రాజ్య-శాలినీ .. 117..
ఆత్మవిద్యా మహావిద్యా శ్రీవిద్యా కామసేవితా .

శ్రీ-షోడశాక్షరీ-విద్యా త్రికూటా కామకోటికా .. 118..
కటాక్ష-కిఙ్కరీ-భూత-కమలా-కోటి-సేవితా .

శిరఃస్థితా చన్ద్రనిభా భాలస్థేన్ద్ర-ధనుఃప్రభా .. 119..
హృదయస్థా రవిప్రఖ్యా త్రికోణాన్తర-దీపికా .

దాక్షాయణీ దైత్యహన్త్రీ దక్షయజ్ఞ-వినాశినీ .. 120..
దరాన్దోలిత-దీర్ఘాక్షీ దర-హాసోజ్జ్వలన్-ముఖీ .

గురుమూర్తిర్గుణనిధిర్గోమాతా గుహజన్మభూః .. 121..
దేవేశీ దణ్డనీతిస్థా దహరాకాశ-రూపిణీ .

ప్రతిపన్ముఖ్య-రాకాన్త-తిథి-మణ్డల-పూజితా .. 122..
కలాత్మికా కలానాథా కావ్యాలాప-వినోదినీ . (విమోదినీ)

సచామర-రమా-వాణీ-సవ్య-దక్షిణ-సేవితా .. 123..
ఆదిశక్తిరమేయాఽఽత్మా పరమా పావనాకృతిః .

అనేకకోటి-బ్రహ్మాణ్డ-జననీ దివ్యవిగ్రహా .. 124..
క్లీంకారీ కేవలా గుహ్యా కైవల్య-పదదాయినీ .

త్రిపురా త్రిజగద్వన్ద్యా త్రిమూర్తిస్త్రిదశేశ్వరీ .. 125..
త్ర్యక్షరీ దివ్య-గన్ధాఢ్యా సిన్దూర-తిలకాఞ్చితా .

ఉమా శైలేన్ద్రతనయా గౌరీ గన్ధర్వ-సేవితా .. 126..
విశ్వగర్భా స్వర్ణగర్భాఽవరదా వాగధీశ్వరీ .

ధ్యానగమ్యాఽపరిచ్ఛేద్యా జ్ఞానదా జ్ఞానవిగ్రహా .. 127..
సర్వవేదాన్త-సంవేద్యా సత్యానన్ద-స్వరూపిణీ .

లోపాముద్రార్చితా లీలా-కౢప్త-బ్రహ్మాణ్డ-మణ్డలా .. 128..
అదృశ్యా దృశ్యరహితా విజ్ఞాత్రీ వేద్యవర్జితా .

యోగినీ యోగదా యోగ్యా యోగానన్దా యుగన్ధరా .. 129..
ఇచ్ఛాశక్తి-జ్ఞానశక్తి-క్రియాశక్తి-స్వరూపిణీ .

సర్వాధారా సుప్రతిష్ఠా సదసద్రూప-ధారిణీ .. 130..
అష్టమూర్తిరజాజైత్రీ లోకయాత్రా-విధాయినీ . (అజాజేత్రీ)

ఏకాకినీ భూమరూపా నిర్ద్వైతా ద్వైతవర్జితా .. 131..
అన్నదా వసుదా వృద్ధా బ్రహ్మాత్మైక్య-స్వరూపిణీ .

బృహతీ బ్రాహ్మణీ బ్రాహ్మీ బ్రహ్మానన్దా బలిప్రియా .. 132..
భాషారూపా బృహత్సేనా భావాభావ-వివర్జితా .

సుఖారాధ్యా శుభకరీ శోభనా సులభా గతిః .. 133..
రాజ-రాజేశ్వరీ రాజ్య-దాయినీ రాజ్య-వల్లభా .

రాజత్కృపా రాజపీఠ-నివేశిత-నిజాశ్రితా .. 134..
రాజ్యలక్ష్మీః కోశనాథా చతురఙ్గ-బలేశ్వరీ .

సామ్రాజ్య-దాయినీ సత్యసన్ధా సాగరమేఖలా .. 135..
దీక్షితా దైత్యశమనీ సర్వలోక-వశఙ్కరీ .

సర్వార్థదాత్రీ సావిత్రీ సచ్చిదానన్ద-రూపిణీ .. 136..
దేశ-కాలాపరిచ్ఛిన్నా సర్వగా సర్వమోహినీ .

సరస్వతీ శాస్త్రమయీ గుహామ్బా గుహ్యరూపిణీ .. 137..
సర్వోపాధి-వినిర్ముక్తా సదాశివ-పతివ్రతా .

సమ్ప్రదాయేశ్వరీ సాధ్వీ గురుమణ్డల-రూపిణీ .. 138..
కులోత్తీర్ణా భగారాధ్యా మాయా మధుమతీ మహీ .

గణామ్బా గుహ్యకారాధ్యా కోమలాఙ్గీ గురుప్రియా .. 139..
స్వతన్త్రా సర్వతన్త్రేశీ దక్షిణామూర్తి-రూపిణీ .

సనకాది-సమారాధ్యా శివజ్ఞాన-ప్రదాయినీ .. 140..
చిత్కలాఽఽనన్ద-కలికా ప్రేమరూపా ప్రియఙ్కరీ .

నామపారాయణ-ప్రీతా నన్దివిద్యా నటేశ్వరీ .. 141..
మిథ్యా-జగదధిష్ఠానా ముక్తిదా ముక్తిరూపిణీ .

లాస్యప్రియా లయకరీ లజ్జా రమ్భాదివన్దితా .. 142..
భవదావ-సుధావృష్టిః పాపారణ్య-దవానలా .

దౌర్భాగ్య-తూలవాతూలా జరాధ్వాన్త-రవిప్రభా .. 143..
భాగ్యాబ్ధి-చన్ద్రికా భక్త-చిత్తకేకి-ఘనాఘనా .

రోగపర్వత-దమ్భోలిర్మృత్యుదారు-కుఠారికా .. 144..
మహేశ్వరీ మహాకాలీ మహాగ్రాసా మహాశనా .

అపర్ణా చణ్డికా చణ్డముణ్డాసుర-నిషూదినీ .. 145..
క్షరాక్షరాత్మికా సర్వ-లోకేశీ విశ్వధారిణీ .

త్రివర్గదాత్రీ సుభగా త్ర్యమ్బకా త్రిగుణాత్మికా .. 146..
స్వర్గాపవర్గదా శుద్ధా జపాపుష్ప-నిభాకృతిః .

ఓజోవతీ ద్యుతిధరా యజ్ఞరూపా ప్రియవ్రతా .. 147..
దురారాధ్యా దురాధర్షా పాటలీ-కుసుమ-ప్రియా .

మహతీ మేరునిలయా మన్దార-కుసుమ-ప్రియా .. 148..
వీరారాధ్యా విరాడ్రూపా విరజా విశ్వతోముఖీ .

ప్రత్యగ్రూపా పరాకాశా ప్రాణదా ప్రాణరూపిణీ .. 149..
మార్తాణ్డ-భైరవారాధ్యా మన్త్రిణీన్యస్త-రాజ్యధూః . (మార్తణ్డ)

త్రిపురేశీ జయత్సేనా నిస్త్రైగుణ్యా పరాపరా .. 150..
సత్య-జ్ఞానానన్ద-రూపా సామరస్య-పరాయణా .

కపర్దినీ కలామాలా కామధుక్ కామరూపిణీ .. 151..
కలానిధిః కావ్యకలా రసజ్ఞా రసశేవధిః .

పుష్టా పురాతనా పూజ్యా పుష్కరా పుష్కరేక్షణా .. 152..
పరంజ్యోతిః పరంధామ పరమాణుః పరాత్పరా .

పాశహస్తా పాశహన్త్రీ పరమన్త్ర-విభేదినీ .. 153..
మూర్తాఽమూర్తాఽనిత్యతృప్తా మునిమానస-హంసికా .

సత్యవ్రతా సత్యరూపా సర్వాన్తర్యామినీ సతీ .. 154..
బ్రహ్మాణీ బ్రహ్మజననీ బహురూపా బుధార్చితా .

ప్రసవిత్రీ ప్రచణ్డాఽఽజ్ఞా ప్రతిష్ఠా ప్రకటాకృతిః .. 155..
ప్రాణేశ్వరీ ప్రాణదాత్రీ పఞ్చాశత్పీఠ-రూపిణీ .

విశృఙ్ఖలా వివిక్తస్థా వీరమాతా వియత్ప్రసూః .. 156..
ముకున్దా ముక్తినిలయా మూలవిగ్రహ-రూపిణీ .

భావజ్ఞా భవరోగఘ్నీ భవచక్ర-ప్రవర్తినీ .. 157..
ఛన్దఃసారా శాస్త్రసారా మన్త్రసారా తలోదరీ .

ఉదారకీర్తిరుద్దామవైభవా వర్ణరూపిణీ .. 158..
జన్మమృత్యు-జరాతప్త-జనవిశ్రాన్తి-దాయినీ .

సర్వోపనిష-దుద్-ఘుష్టా శాన్త్యతీత-కలాత్మికా .. 159..
గమ్భీరా గగనాన్తస్థా గర్వితా గానలోలుపా .

కల్పనా-రహితా కాష్ఠాఽకాన్తా కాన్తార్ధ-విగ్రహా .. 160..
కార్యకారణ-నిర్ముక్తా కామకేలి-తరఙ్గితా .

కనత్కనకతా-టఙ్కా లీలా-విగ్రహ-ధారిణీ .. 161..
అజా క్షయవినిర్ముక్తా ముగ్ధా క్షిప్ర-ప్రసాదినీ .

అన్తర్ముఖ-సమారాధ్యా బహిర్ముఖ-సుదుర్లభా .. 162..
త్రయీ త్రివర్గనిలయా త్రిస్థా త్రిపురమాలినీ .

నిరామయా నిరాలమ్బా స్వాత్మారామా సుధాసృతిః .. 163.. (సుధాస్రుతిః)
సంసారపఙ్క-నిర్మగ్న-సముద్ధరణ-పణ్డితా .

యజ్ఞప్రియా యజ్ఞకర్త్రీ యజమాన-స్వరూపిణీ .. 164..
ధర్మాధారా ధనాధ్యక్షా ధనధాన్య-వివర్ధినీ .

విప్రప్రియా విప్రరూపా విశ్వభ్రమణ-కారిణీ .. 165..
విశ్వగ్రాసా విద్రుమాభా వైష్ణవీ విష్ణురూపిణీ .

అయోనిర్యోనినిలయా కూటస్థా కులరూపిణీ .. 166..
వీరగోష్ఠీప్రియా వీరా నైష్కర్మ్యా నాదరూపిణీ .

విజ్ఞానకలనా కల్యా విదగ్ధా బైన్దవాసనా .. 167..
తత్త్వాధికా తత్త్వమయీ తత్త్వమర్థ-స్వరూపిణీ .

సామగానప్రియా సౌమ్యా సదాశివ-కుటుమ్బినీ .. 168.. (సోమ్యా)
సవ్యాపసవ్య-మార్గస్థా సర్వాపద్వినివారిణీ .

స్వస్థా స్వభావమధురా ధీరా ధీరసమర్చితా .. 169..
చైతన్యార్ఘ్య-సమారాధ్యా చైతన్య-కుసుమప్రియా .

సదోదితా సదాతుష్టా తరుణాదిత్య-పాటలా .. 170..
దక్షిణా-దక్షిణారాధ్యా దరస్మేర-ముఖామ్బుజా .

కౌలినీ-కేవలాఽనర్ఘ్య-కైవల్య-పదదాయినీ .. 171..
స్తోత్రప్రియా స్తుతిమతీ శ్రుతి-సంస్తుత-వైభవా .

మనస్వినీ మానవతీ మహేశీ మఙ్గలాకృతిః .. 172..
విశ్వమాతా జగద్ధాత్రీ విశాలాక్షీ విరాగిణీ .

ప్రగల్భా పరమోదారా పరామోదా మనోమయీ .. 173..
వ్యోమకేశీ విమానస్థా వజ్రిణీ వామకేశ్వరీ .

పఞ్చయజ్ఞ-ప్రియా పఞ్చ-ప్రేత-మఞ్చాధిశాయినీ .. 174..
పఞ్చమీ పఞ్చభూతేశీ పఞ్చ-సంఖ్యోపచారిణీ .

శాశ్వతీ శాశ్వతైశ్వర్యా శర్మదా శమ్భుమోహినీ .. 175..
ధరాధరసుతా ధన్యా ధర్మిణీ ధర్మవర్ధినీ .

లోకాతీతా గుణాతీతా సర్వాతీతా శమాత్మికా .. 176..
బన్ధూక-కుసుమప్రఖ్యా బాలా లీలావినోదినీ .

సుమఙ్గలీ సుఖకరీ సువేషాఢ్యా సువాసినీ .. 177..
సువాసిన్యర్చన-ప్రీతాఽఽశోభనా శుద్ధమానసా .

బిన్దు-తర్పణ-సన్తుష్టా పూర్వజా త్రిపురామ్బికా .. 178..
దశముద్రా-సమారాధ్యా త్రిపురాశ్రీ-వశఙ్కరీ .

జ్ఞానముద్రా జ్ఞానగమ్యా జ్ఞానజ్ఞేయ-స్వరూపిణీ .. 179..
యోనిముద్రా త్రిఖణ్డేశీ త్రిగుణామ్బా త్రికోణగా .

అనఘాఽద్భుత-చారిత్రా వాఞ్ఛితార్థ-ప్రదాయినీ .. 180..
అభ్యాసాతిశయ-జ్ఞాతా షడధ్వాతీత-రూపిణీ .

అవ్యాజ-కరుణా-మూర్తిరజ్ఞాన-ధ్వాన్త-దీపికా .. 181..
ఆబాల-గోప-విదితా సర్వానుల్లఙ్ఘ్య-శాసనా .

శ్రీచక్రరాజ-నిలయా శ్రీమత్-త్రిపురసున్దరీ .. 182..
శ్రీశివా శివ-శక్త్యైక్య-రూపిణీ లలితామ్బికా .

ఏవం శ్రీలలితా దేవ్యా నామ్నాం సాహస్రకం జగుః ..
.. ఇతి శ్రీబ్రహ్మాణ్డపురాణే ఉత్తరఖణ్డే శ్రీహయగ్రీవాగస్త్యసంవాదే శ్రీలలితా సహస్రనామ స్తోత్ర కథనం సమ్పూర్ణమ్ ..