નવગ્રહ સ્તોત્રમ્

.. નવગ્રહ સ્તોત્રમ્ ..

.. અથ નવગ્રહસ્તોત્રમ્ ..

.. શ્રી ગણેશાય નમઃ ..

જપાકુસુમસંકાશં કાશ્યપેયં મહાદ્યુતિમ્ .
તમોઽરિં સર્વપાપઘ્નં પ્રણતોઽસ્મિ દિવાકરમ્ .. ૧ ..

દધિશઙ્ખતુષારાભં ક્ષીરોદાર્ણવસમ્ભવમ્ .
નમામિ શશિનં સોમં શમ્ભોર્મુકુટભૂષણમ્ .. ૨ ..

ધરણીગર્ભસમ્ભૂતં વિદ્યુત્કાન્તિસમપ્રભમ્ .
કુમારં શક્તિહસ્તં તં મઙ્ગલં પ્રણમામ્યહમ્ .. ૩ ..

પ્રિયઙ્ગુકલિકાશ્યામં રૂપેણાપ્રતિમં બુધમ્ .
સૌમ્યં સૌમ્યગુણોપેતં તં બુધં પ્રણમામ્યહમ્ .. ૪ ..

દેવાનાં ચ ઋષીણાં ચ ગુરું કાઞ્ચનસન્નિભમ્ .
બુદ્ધિભૂતં ત્રિલોકેશં તં નમામિ બૃહસ્પતિમ્ .. ૫ ..

હિમકુન્દમૃણાલાભં દૈત્યાનાં પરમં ગુરુમ્ .
સર્વશાસ્ત્રપ્રવક્તારં ભાર્ગવં પ્રણમામ્યહમ્ .. ૬ ..

નીલાઞ્જનસમાભાસં રવિપુત્રં યમાગ્રજમ્ .
છાયામાર્તણ્ડસમ્ભૂતં તં નમામિ શનૈશ્ચરમ્ .. ૭ ..

અર્ધકાયં મહાવીર્યં ચન્દ્રાદિત્યવિમર્દનમ્ .
સિંહિકાગર્ભસમ્ભૂતં તં રાહું પ્રણમામ્યહમ્ .. ૮ ..

પલાશપુષ્પસંકાશં તારકાગ્રહમસ્તકમ્ .
રૌદ્રં રૌદ્રાત્મકં ઘોરં તં કેતું પ્રણમામ્યહમ્ .. ૯ ..

ઇતિ શ્રીવ્યાસમુખોદ્ગીતં યઃ પઠેત્ સુસમાહિતઃ .
દિવા વા યદિ વા રાત્રૌ વિઘ્નશાન્તિર્ભવિષ્યતિ .. ૧૦ ..

નરનારીનૃપાણાં ચ ભવેદ્ દુઃસ્વપ્નનાશનમ્ .
ઐશ્વર્યમતુલં તેષામારોગ્યં પુષ્ટિવર્ધનમ્ .. ૧૧ ..

ગ્રહનક્ષત્રજાઃ પીડાસ્તસ્કરાગ્નિસમુદ્ભવાઃ .
તાઃ સર્વાઃ પ્રશમં યાન્તિ વ્યાસો બ્રૂતે ન સંશયઃ .. ૧૨ ..

.. ઇતિ શ્રીવ્યાસવિરચિતં નવગ્રહસ્તોત્રં સમ્પૂર્ણમ્ ..