લક્ષ્મીનારાયણસંહિતા ખણ્ડઃ ૧ (કૃતયુગસન્તાનઃ) અધ્યાયઃ - ૩

લક્ષ્મીનારાયણસંહિતા
ખણ્ડઃ ૧
(કૃતયુગસન્તાનઃ)
અધ્યાયઃ - ૩
શ્રીનારાયણ ઉવાચ-.
અથાઽક્ષરસ્વરૂપસ્ય હરેર્વામાઽઙ્ગસંસ્થિતેઃ .
વામારૂપેણ સેવેચ્છા સફલાં કર્તુમિચ્છતા .. ૧ ..

નારાયણેવ વામાંગાત્સ્વાત્મશક્તિમયં શુભમ્ .
સર્વમાંગલ્યસૌભાગ્યપ્રેમસ્નેહદ્રવાશ્રયમ્ .. ૨ ..

રૂપાનુરૂપં સ્વાધાનં સ્વક્ષેત્રં સ્વાશ્રયં સ્વકમ્ .
સ્વગુણૈશ્વર્યસામર્થ્યરજોબલગુહાશ્રયમ્ . . ૩ ..

મૂર્તં લક્ષ્મ્યાત્મકં રૂપં ધૃતં રતિગુણાશ્રયમ્ .
અમોઘરતિસાફલ્યં લક્ષ્મ્યા ઇચ્છન્ કૃપાનિધિઃ . . ૪ ..

અમોઘવીર્યવદ્રૂપં વાસુદેવાખ્યમાદધત્ .
સોઽયં નારાયણો વાસુદેવઃ શ્રીહરિરીરિતઃ .. '૯ ..

દ્વેધાઽભવત્ સ લક્ષ્મીનારાયણેતિસમાહ્વયઃ .
લક્ષ્મીર્દૃષ્ટ્વા બ્રહ્મલોકે સર્વાન્મુક્તાઁસ્તુ પૂરુષાન્ .. ૬ ..

સ્વાં ત્વેકાં સ્વસમાકારાં નાઽન્યાં તત્ર વ્યલોકયત્ .
તદા ત્વપ્રાર્થયદ્ દેવં સ્વપતિં શ્રીહરિં મુદા . . ૭ . .
પતિપત્નીકૃતે સ્થાનં યોગ્યં પ્રકલ્પય પ્રભો .
તસ્યા ભાવં સમાજ્ઞાય પ્રિયાયાઃ શુભવાંચ્છયા .. ૮ ..

વૈકુણ્ઠાખ્યં ધામ દિવ્યં બ્રહ્મલોકં હ્યકલ્પયત્ .
સેવાર્થં દાસદાસીશ્ચ તત્રાઽપ્યવાસયત્પ્રભુઃ .. ૯ ..

તદર્થં દિવ્યભોગાઁશ્ચ દિવ્યોપકરણાન્યપિ .
દિવ્યાં તદીશ્વરીં સૃષ્ટિં પૂર્ણાં પૂર્ણમનોરથામ્ .. 1.3.૧૦ ..

સર્વસાધનસમ્પન્નાં સ્મૃદ્ધિસૌખ્યસમન્વિતામ્ .
ચકાર શ્રીહરિઃ સાક્ષાન્મેને તદીયપૂર્ણતામ્ .. ૧૧ ..

સોઽહં સા ત્વમયં લોકૌ વૈકુણ્ઠશ્ચાવયોરિતિ .
દૃષ્ટ્વા ચૈનં મહાયોગં પતિપત્નીમયં નવમ્ ..

ત્રિગુણાઽજા હરેઃ શક્તિર્નિત્યા યા તત્ત્વસૂતિકા . . ૧૨ ..

અનાદિનિધના માયા ચકમે શ્રીહરિં પતિમ્ .
યથા તત્ત્વાત્મિકા સૃષ્ટિર્જાયતે યત્ર લીયતે .. ૧૩ ..

સા વૈ લક્ષ્મીસમં રૂપં ધર્તુમિષ્ટં તદાઽઽર્થયત્ .
પ્રભું સર્વેશ્વરં નાથં શ્રીહરિં તુ તદા પુનઃ .. ૧૪..

પ્રભુણા તુ સમાજ્ઞપ્તા રૂપં મોહકરં નવમ્ .
રાધારૂપં હિ સુભગં હ્યસંખ્યરતિભાજનમ્ . . ૧૫ . .
દધારાઽભિન્નપત્નીત્વે સ્થિતા ચાપિ તદિચ્છયા .
શ્રીહરિસ્તુ તદર્થં શ્રીકૃષ્ણરૂપો બભૂવ હ .. ૧ ૬..

સર્વકામાશ્રયઃ સર્વરસવર્ષી પુમાન્પરઃ .
અમોઘાઽમેયવીર્યશ્રીસૌન્દર્યબલકાન્તિમાન્ .. ૧૭..

રાધારમણયોગ્યાર્થયુવમૂર્તિધરઃ પ્રભુઃ .
રાધા વિલોક્ય સુભગં સ્વાનુયોગ્યં વરં પતિમ્ .. ૧૮ ..

સ્વાઽઽવાસમાર્થયદ્ દિવ્યં સ્વતન્ત્રં તત્ર ધામનિ .
મદ્વિહારકૃતોદ્યાનં મદ્રત્યર્થમહાશ્રયમ્ .. ૧૯ . .
મદ્વિભૂતિપરાકાષ્ઠં મત્સામગ્રીસમાહિતમ્ .
સચ્ચિદાનન્દરૂપાણિ સર્વોપસ્કરણાનિ ચ .. 1.3.૨૦ ..

શ્રીકૃષ્ણસ્ય કૃતે તત્ર સર્વાણિ સંભવન્ત્વિતિ .
રાધાઽભિલાષયા સર્વં જાતં દાસ્યશ્ચ કોટિશઃ .. ૨૧ ..

સુસ્મૃદ્ધં તત્પરં દિવ્યં ધામ ગોલોકમક્ષરમ્ .
પ્રસીમ્ના લોક્યતે યત્તદ્ બ્રહ્મલોકે સમાયતમ્ ..૨૨ . .
ચારુ ગોલોકસદ્ધામ રાધાકૃષ્ણો હ્યકલ્પયત્ .
શ્રીહરિણા સમાજ્ઞપ્તં રાધાકૃષ્ણસભાજિતમ્ .. ૨૩ ..

શાશ્વતં બ્રહ્મલોકે તદ્ધામ ગોલોકમાહિતમ્ .
તત્ર રાધાકૃતાં સેવાં ગૃહ્ણાતિ કૃષ્ણરૂપધૃક્ .. ૨૪ . .
બ્રહ્મલોકે ચ ગોલોકે વૈકુણ્ઠે ભોગ્યસઞ્ચયાઃ .
સમાનાઃ શ્રીહરેઃ સન્તિ ભક્તાનન્દકરાઃ સદા .. ૨૫. .
યથાલિંગં યથારૂપં યથાયોગં યથાર્હણમ્ .
યથાજોષં યથાપેક્ષં હરેઃ કામાદ્ભવન્તિ તૈ .. ૨૬ ..

દિવ્યં રતિસુખં નિત્ય દિવ્યાઽઽનન્દસ્તદાત્મનામ્ .
દિવ્ય પ્રેમ હરેર્યોગાન્નિત્યં તત્રાઽઽભિજાયતે .. ૨૭. .
સ્વપ્રિયાસુ સદા નાથો વૈકુણ્ઠે રમતે યથા .
ગોલોકેઽપિ તથા ભર્તા પ્રેયસીષુ પ્રમોદતે .. ૨૮ . .
અક્ષરે તુ પરે ધામ્નિ મુક્તેષુ રમતે હરિઃ .
મુક્તાન્ ભક્તાન્ સખીન્ દાસીઃ સ્વયં ક્રીડયતિ પ્રભુઃ .. ૨૯ . .
એકં વા યુગલં રૂપં યથા માં સમુપાસતે .
તથા તે માં પ્રપદ્યન્તે સ્વામિનં સુખદં પતિમ્ . . 1.3.૩૦ ..

ઇતિ શ્રીલક્ષ્મીનારાયણીયસંહિતાયાં પ્રથમે કૃતયુગ-સન્તાને લક્ષ્મીરાધાકૃતે વૈકુણ્ઠગોલોક-ધામદ્વયક્લૃપ્તિનિરૂપણનામા તૃતીયોઽધ્યાયઃ . . ૩ . .