లక్ష్మీనారాయణసంహితా ఖణ్డః 1 (కృతయుగసన్తానః) అధ్యాయః - 3

లక్ష్మీనారాయణసంహితా
ఖణ్డః 1
(కృతయుగసన్తానః)
అధ్యాయః - 3
శ్రీనారాయణ ఉవాచ-.
అథాఽక్షరస్వరూపస్య హరేర్వామాఽఙ్గసంస్థితేః .
వామారూపేణ సేవేచ్ఛా సఫలాం కర్తుమిచ్ఛతా .. 1 ..

నారాయణేవ వామాంగాత్స్వాత్మశక్తిమయం శుభమ్ .
సర్వమాంగల్యసౌభాగ్యప్రేమస్నేహద్రవాశ్రయమ్ .. 2 ..

రూపానురూపం స్వాధానం స్వక్షేత్రం స్వాశ్రయం స్వకమ్ .
స్వగుణైశ్వర్యసామర్థ్యరజోబలగుహాశ్రయమ్ . . 3 ..

మూర్తం లక్ష్మ్యాత్మకం రూపం ధృతం రతిగుణాశ్రయమ్ .
అమోఘరతిసాఫల్యం లక్ష్మ్యా ఇచ్ఛన్ కృపానిధిః . . 4 ..

అమోఘవీర్యవద్రూపం వాసుదేవాఖ్యమాదధత్ .
సోఽయం నారాయణో వాసుదేవః శ్రీహరిరీరితః .. '9 ..

ద్వేధాఽభవత్ స లక్ష్మీనారాయణేతిసమాహ్వయః .
లక్ష్మీర్దృష్ట్వా బ్రహ్మలోకే సర్వాన్ముక్తాఀస్తు పూరుషాన్ .. 6 ..

స్వాం త్వేకాం స్వసమాకారాం నాఽన్యాం తత్ర వ్యలోకయత్ .
తదా త్వప్రార్థయద్ దేవం స్వపతిం శ్రీహరిం ముదా . . 7 . .
పతిపత్నీకృతే స్థానం యోగ్యం ప్రకల్పయ ప్రభో .
తస్యా భావం సమాజ్ఞాయ ప్రియాయాః శుభవాంచ్ఛయా .. 8 ..

వైకుణ్ఠాఖ్యం ధామ దివ్యం బ్రహ్మలోకం హ్యకల్పయత్ .
సేవార్థం దాసదాసీశ్చ తత్రాఽప్యవాసయత్ప్రభుః .. 9 ..

తదర్థం దివ్యభోగాఀశ్చ దివ్యోపకరణాన్యపి .
దివ్యాం తదీశ్వరీం సృష్టిం పూర్ణాం పూర్ణమనోరథామ్ .. 1.3.10 ..

సర్వసాధనసమ్పన్నాం స్మృద్ధిసౌఖ్యసమన్వితామ్ .
చకార శ్రీహరిః సాక్షాన్మేనే తదీయపూర్ణతామ్ .. 11 ..

సోఽహం సా త్వమయం లోకౌ వైకుణ్ఠశ్చావయోరితి .
దృష్ట్వా చైనం మహాయోగం పతిపత్నీమయం నవమ్ ..

త్రిగుణాఽజా హరేః శక్తిర్నిత్యా యా తత్త్వసూతికా . . 12 ..

అనాదినిధనా మాయా చకమే శ్రీహరిం పతిమ్ .
యథా తత్త్వాత్మికా సృష్టిర్జాయతే యత్ర లీయతే .. 13 ..

సా వై లక్ష్మీసమం రూపం ధర్తుమిష్టం తదాఽఽర్థయత్ .
ప్రభుం సర్వేశ్వరం నాథం శ్రీహరిం తు తదా పునః .. 14..

ప్రభుణా తు సమాజ్ఞప్తా రూపం మోహకరం నవమ్ .
రాధారూపం హి సుభగం హ్యసంఖ్యరతిభాజనమ్ . . 15 . .
దధారాఽభిన్నపత్నీత్వే స్థితా చాపి తదిచ్ఛయా .
శ్రీహరిస్తు తదర్థం శ్రీకృష్ణరూపో బభూవ హ .. 1 6..

సర్వకామాశ్రయః సర్వరసవర్షీ పుమాన్పరః .
అమోఘాఽమేయవీర్యశ్రీసౌన్దర్యబలకాన్తిమాన్ .. 17..

రాధారమణయోగ్యార్థయువమూర్తిధరః ప్రభుః .
రాధా విలోక్య సుభగం స్వానుయోగ్యం వరం పతిమ్ .. 18 ..

స్వాఽఽవాసమార్థయద్ దివ్యం స్వతన్త్రం తత్ర ధామని .
మద్విహారకృతోద్యానం మద్రత్యర్థమహాశ్రయమ్ .. 19 . .
మద్విభూతిపరాకాష్ఠం మత్సామగ్రీసమాహితమ్ .
సచ్చిదానన్దరూపాణి సర్వోపస్కరణాని చ .. 1.3.20 ..

శ్రీకృష్ణస్య కృతే తత్ర సర్వాణి సంభవన్త్వితి .
రాధాఽభిలాషయా సర్వం జాతం దాస్యశ్చ కోటిశః .. 21 ..

సుస్మృద్ధం తత్పరం దివ్యం ధామ గోలోకమక్షరమ్ .
ప్రసీమ్నా లోక్యతే యత్తద్ బ్రహ్మలోకే సమాయతమ్ ..22 . .
చారు గోలోకసద్ధామ రాధాకృష్ణో హ్యకల్పయత్ .
శ్రీహరిణా సమాజ్ఞప్తం రాధాకృష్ణసభాజితమ్ .. 23 ..

శాశ్వతం బ్రహ్మలోకే తద్ధామ గోలోకమాహితమ్ .
తత్ర రాధాకృతాం సేవాం గృహ్ణాతి కృష్ణరూపధృక్ .. 24 . .
బ్రహ్మలోకే చ గోలోకే వైకుణ్ఠే భోగ్యసఞ్చయాః .
సమానాః శ్రీహరేః సన్తి భక్తానన్దకరాః సదా .. 25. .
యథాలింగం యథారూపం యథాయోగం యథార్హణమ్ .
యథాజోషం యథాపేక్షం హరేః కామాద్భవన్తి తై .. 26 ..

దివ్యం రతిసుఖం నిత్య దివ్యాఽఽనన్దస్తదాత్మనామ్ .
దివ్య ప్రేమ హరేర్యోగాన్నిత్యం తత్రాఽఽభిజాయతే .. 27. .
స్వప్రియాసు సదా నాథో వైకుణ్ఠే రమతే యథా .
గోలోకేఽపి తథా భర్తా ప్రేయసీషు ప్రమోదతే .. 28 . .
అక్షరే తు పరే ధామ్ని ముక్తేషు రమతే హరిః .
ముక్తాన్ భక్తాన్ సఖీన్ దాసీః స్వయం క్రీడయతి ప్రభుః .. 29 . .
ఏకం వా యుగలం రూపం యథా మాం సముపాసతే .
తథా తే మాం ప్రపద్యన్తే స్వామినం సుఖదం పతిమ్ . . 1.3.30 ..

ఇతి శ్రీలక్ష్మీనారాయణీయసంహితాయాం ప్రథమే కృతయుగ-సన్తానే లక్ష్మీరాధాకృతే వైకుణ్ఠగోలోక-ధామద్వయక్లృప్తినిరూపణనామా తృతీయోఽధ్యాయః . . 3 . .