ગોવિન્દરાજપ્રપત્તિઃ

ગોવિન્દરાજપ્રપત્તિઃ

યશ્ચૈકશૈલનિકટે કમલાપુરીશ-
ગોવિન્દરાજપદયોરકરોત્ પ્રપત્તિમ્ .
તં વાદિભીકરગુરોશ્ચરણં પ્રપદ્યે
પાત્રં ગુરું વરવરં પરમં ગુરૂણામ્ .. ૧..

શ્રીમન્ નિદાન જગતાં નિખિલાણ્ડજાત-
નિર્વાહશક્તિમુખદિવ્યગુણૈકતાન .
અત્યન્તભોગ્યનતદોષ નિરસ્તદોષ
ગોવિન્દરાજ ચરણૌ શરણં પ્રપદ્યે .. ૨..

રેખારથાઙ્ગસરસીરુહવજ્રશઙ્ક-
ચ્છત્રાઙ્કુશપ્રભૃતિમઙ્ગલચિહ્નગર્ભૌ .
સંસારતાપહરણે નિપુણૌ નતાનાં
ગોવિન્દરાજ ચરણૌ શરણં પ્રપદ્યે .. ૩..

પશ્યત્સુ સાન્દ્રભયકૌતુકમર્ભકેષુ
પ્રૌઢેષુ સત્સુ કૃતકૃત્યપરાયણેષુ .
વિધ્વંસિતોર્ધ્વશકટાવપિ બાલભાવે
ગોવિન્દરાજ ચરણૌ શરણં પ્રપદ્યે .. ૪..

આલમ્બ્ય બાહુયુગલેન કુમારભાવે
ગાઢં કરાઙ્ગુલિયુગં કિલ નન્દપત્ન્યાઃ .
અભ્યસ્યમાનદશચઙ્ક્રમણાભિરામૌ
ગોવિન્દરાજ ચરણૌ શરણં પ્રપદ્યે .. ૫..

ઘોષાઙ્ગનાકરસરોરુહતાલનાદ-
સઙ્ગીતસમ્પદનુરૂપમનોજ્ઞનૃત્તૌ .
માણિક્યનૂપુરમરીચિકૃતાઙ્ગલેપૌ
ગોવિન્દરાજ ચરણૌ શરણં પ્રપદ્યે .. ૬..

કુટ્ટાકતામુપગતૌ સરસઃ પ્રસહ્ય
મધ્યેસરિત્સલિલમુદ્ધતકાલિયસ્ય .
તત્સુન્દરીનયનનન્દનસંનિવેશૌ
ગોવિન્દરાજ ચરણૌ શરણં પ્રપદ્યે .. ૭..

વાસાંસિ દેહિ તવ કૃષ્ણ વશંવદાના-
મસ્માકમાકુલધિયામિતિ ગોપકન્યાઃ .
ઉદ્દિશ્ય યૌ વિદધુરઞ્જલિમા પ્રસાદાદ્
ગોવિન્દરાજ ચરણૌ શરણં પ્રપદ્યે .. ૮..

ગોરક્ષણે કિલ બભૂવ યદીયરેણુ-
રક્રૂરમસ્તકમણેઃ સરણિં સમેતઃ .
તાવદ્ભુતાવનુપમાવતિપાવનૌ તે
ગોવિન્દરાજ ચરણૌ શરણં પ્રપદ્યે .. ૯..

મલ્લાવહે મધુરયા મધુરાઙ્ગનાનાં
ફુલ્લારવિન્દદલતલ્લજલોચનાનામ્ .
વાણ્યા પ્રશંસિતપરાર્ધ્યગતિપ્રકારૌ
ગોવિન્દરાજ ચરણૌ શરણં પ્રપદ્યે .. ૧૦..

કંસં નિપાત્ય કનકાસનતઃ પૃથિવ્યા-
મુદ્ધૃત્ય સાગસમનાગસમુગ્રસેનમ્ .
રાજ્યેઽભિષિચ્ય વિનિવારિતભૂમિભારૌ
ગોવિન્દરાજ ચરણૌ શરણં પ્રપદ્યે .. ૧૧..

દુર્યોધને દુરભિમાનિનિ દુર્ભગાણા-
મગ્રેસરે ભજતિ તે શિરસઃ પ્રદેશમ્ .
ધન્યેન યન્નિકટતઃ સ્થિતમર્જુનેન
ગોવિન્દરાજ ચરણૌ શરણં પ્રપદ્યે .. ૧૨..

સારથ્યવેષસમલઙ્કૃતપાણ્ડુસૂનો-
ર્યુદ્ધાઙ્ગણોજ્જ્વલરથાઞ્ચલસંનિવેશૌ .
સાન્દ્રેન્દ્રનીલપરિભાવુકભવ્યરૂપૌ
ગોવિન્દરાજ ચરણૌ શરણં પ્રપદ્યે .. ૧૩..

ભક્ત્યા પ્રસન્નહૃદયેન ધનઞ્જયેન
યત્રાર્ચિતાનિ કુસુમાનિ શિવોત્તમાઙ્ગે .
સાક્ષાત્કૃતાનિ સહસાદ્ભુતવૈભવૌ તૌ
ગોવિન્દરાજ ચરણૌ શરણં પ્રપદ્યે .. ૧૪..

અસ્મદ્ગુરુપ્રભૃતિભિઃ કમલાવસાનૈ-
રાદર્શિતૌ કરુણયા મમ દેશિકેન્દ્રૈઃ .
સત્ત્વોત્તરૈઃ સકલજીવદયાપરૈસ્તૈ-
ર્ગોવિન્દરાજ ચરણૌ શરણં પ્રપદ્યે .. ૧૫..

અસ્માત્પિતામહમશેષગુણાભિરામ-
માચાર્યરત્નમયિ વાદિભયઙ્કરાર્યમ્ .
ગોવર્ધનાદ્રિધૃતિધારિતગોપ વીક્ષ્ય
ગોવિન્દરાજ મમ દુર્લપિતં ક્ષમસ્વ .. ૧૬..

. ઇતિ શ્રીગોવિન્દરાજપ્રપત્તિઃ સમ્પૂર્ણા .