ಗೋವಿನ್ದರಾಜಪ್ರಪತ್ತಿಃ

ಗೋವಿನ್ದರಾಜಪ್ರಪತ್ತಿಃ

ಯಶ್ಚೈಕಶೈಲನಿಕಟೇ ಕಮಲಾಪುರೀಶ-
ಗೋವಿನ್ದರಾಜಪದಯೋರಕರೋತ್ ಪ್ರಪತ್ತಿಮ್ .
ತಂ ವಾದಿಭೀಕರಗುರೋಶ್ಚರಣಂ ಪ್ರಪದ್ಯೇ
ಪಾತ್ರಂ ಗುರುಂ ವರವರಂ ಪರಮಂ ಗುರೂಣಾಮ್ .. ೧..

ಶ್ರೀಮನ್ ನಿದಾನ ಜಗತಾಂ ನಿಖಿಲಾಣ್ಡಜಾತ-
ನಿರ್ವಾಹಶಕ್ತಿಮುಖದಿವ್ಯಗುಣೈಕತಾನ .
ಅತ್ಯನ್ತಭೋಗ್ಯನತದೋಷ ನಿರಸ್ತದೋಷ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೨..

ರೇಖಾರಥಾಙ್ಗಸರಸೀರುಹವಜ್ರಶಙ್ಕ-
ಚ್ಛತ್ರಾಙ್ಕುಶಪ್ರಭೃತಿಮಙ್ಗಲಚಿಹ್ನಗರ್ಭೌ .
ಸಂಸಾರತಾಪಹರಣೇ ನಿಪುಣೌ ನತಾನಾಂ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೩..

ಪಶ್ಯತ್ಸು ಸಾನ್ದ್ರಭಯಕೌತುಕಮರ್ಭಕೇಷು
ಪ್ರೌಢೇಷು ಸತ್ಸು ಕೃತಕೃತ್ಯಪರಾಯಣೇಷು .
ವಿಧ್ವಂಸಿತೋರ್ಧ್ವಶಕಟಾವಪಿ ಬಾಲಭಾವೇ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೪..

ಆಲಮ್ಬ್ಯ ಬಾಹುಯುಗಲೇನ ಕುಮಾರಭಾವೇ
ಗಾಢಂ ಕರಾಙ್ಗುಲಿಯುಗಂ ಕಿಲ ನನ್ದಪತ್ನ್ಯಾಃ .
ಅಭ್ಯಸ್ಯಮಾನದಶಚಙ್ಕ್ರಮಣಾಭಿರಾಮೌ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೫..

ಘೋಷಾಙ್ಗನಾಕರಸರೋರುಹತಾಲನಾದ-
ಸಙ್ಗೀತಸಮ್ಪದನುರೂಪಮನೋಜ್ಞನೃತ್ತೌ .
ಮಾಣಿಕ್ಯನೂಪುರಮರೀಚಿಕೃತಾಙ್ಗಲೇಪೌ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೬..

ಕುಟ್ಟಾಕತಾಮುಪಗತೌ ಸರಸಃ ಪ್ರಸಹ್ಯ
ಮಧ್ಯೇಸರಿತ್ಸಲಿಲಮುದ್ಧತಕಾಲಿಯಸ್ಯ .
ತತ್ಸುನ್ದರೀನಯನನನ್ದನಸಂನಿವೇಶೌ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೭..

ವಾಸಾಂಸಿ ದೇಹಿ ತವ ಕೃಷ್ಣ ವಶಂವದಾನಾ-
ಮಸ್ಮಾಕಮಾಕುಲಧಿಯಾಮಿತಿ ಗೋಪಕನ್ಯಾಃ .
ಉದ್ದಿಶ್ಯ ಯೌ ವಿದಧುರಞ್ಜಲಿಮಾ ಪ್ರಸಾದಾದ್
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೮..

ಗೋರಕ್ಷಣೇ ಕಿಲ ಬಭೂವ ಯದೀಯರೇಣು-
ರಕ್ರೂರಮಸ್ತಕಮಣೇಃ ಸರಣಿಂ ಸಮೇತಃ .
ತಾವದ್ಭುತಾವನುಪಮಾವತಿಪಾವನೌ ತೇ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೯..

ಮಲ್ಲಾವಹೇ ಮಧುರಯಾ ಮಧುರಾಙ್ಗನಾನಾಂ
ಫುಲ್ಲಾರವಿನ್ದದಲತಲ್ಲಜಲೋಚನಾನಾಮ್ .
ವಾಣ್ಯಾ ಪ್ರಶಂಸಿತಪರಾರ್ಧ್ಯಗತಿಪ್ರಕಾರೌ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೧೦..

ಕಂಸಂ ನಿಪಾತ್ಯ ಕನಕಾಸನತಃ ಪೃಥಿವ್ಯಾ-
ಮುದ್ಧೃತ್ಯ ಸಾಗಸಮನಾಗಸಮುಗ್ರಸೇನಮ್ .
ರಾಜ್ಯೇಽಭಿಷಿಚ್ಯ ವಿನಿವಾರಿತಭೂಮಿಭಾರೌ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೧೧..

ದುರ್ಯೋಧನೇ ದುರಭಿಮಾನಿನಿ ದುರ್ಭಗಾಣಾ-
ಮಗ್ರೇಸರೇ ಭಜತಿ ತೇ ಶಿರಸಃ ಪ್ರದೇಶಮ್ .
ಧನ್ಯೇನ ಯನ್ನಿಕಟತಃ ಸ್ಥಿತಮರ್ಜುನೇನ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೧೨..

ಸಾರಥ್ಯವೇಷಸಮಲಙ್ಕೃತಪಾಣ್ಡುಸೂನೋ-
ರ್ಯುದ್ಧಾಙ್ಗಣೋಜ್ಜ್ವಲರಥಾಞ್ಚಲಸಂನಿವೇಶೌ .
ಸಾನ್ದ್ರೇನ್ದ್ರನೀಲಪರಿಭಾವುಕಭವ್ಯರೂಪೌ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೧೩..

ಭಕ್ತ್ಯಾ ಪ್ರಸನ್ನಹೃದಯೇನ ಧನಞ್ಜಯೇನ
ಯತ್ರಾರ್ಚಿತಾನಿ ಕುಸುಮಾನಿ ಶಿವೋತ್ತಮಾಙ್ಗೇ .
ಸಾಕ್ಷಾತ್ಕೃತಾನಿ ಸಹಸಾದ್ಭುತವೈಭವೌ ತೌ
ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೧೪..

ಅಸ್ಮದ್ಗುರುಪ್ರಭೃತಿಭಿಃ ಕಮಲಾವಸಾನೈ-
ರಾದರ್ಶಿತೌ ಕರುಣಯಾ ಮಮ ದೇಶಿಕೇನ್ದ್ರೈಃ .
ಸತ್ತ್ವೋತ್ತರೈಃ ಸಕಲಜೀವದಯಾಪರೈಸ್ತೈ-
ರ್ಗೋವಿನ್ದರಾಜ ಚರಣೌ ಶರಣಂ ಪ್ರಪದ್ಯೇ .. ೧೫..

ಅಸ್ಮಾತ್ಪಿತಾಮಹಮಶೇಷಗುಣಾಭಿರಾಮ-
ಮಾಚಾರ್ಯರತ್ನಮಯಿ ವಾದಿಭಯಙ್ಕರಾರ್ಯಮ್ .
ಗೋವರ್ಧನಾದ್ರಿಧೃತಿಧಾರಿತಗೋಪ ವೀಕ್ಷ್ಯ
ಗೋವಿನ್ದರಾಜ ಮಮ ದುರ್ಲಪಿತಂ ಕ್ಷಮಸ್ವ .. ೧೬..

. ಇತಿ ಶ್ರೀಗೋವಿನ್ದರಾಜಪ್ರಪತ್ತಿಃ ಸಮ್ಪೂರ್ಣಾ .