గోవిన్దరాజప్రపత్తిః
గోవిన్దరాజప్రపత్తిః
యశ్చైకశైలనికటే కమలాపురీశ-
గోవిన్దరాజపదయోరకరోత్ ప్రపత్తిమ్ .
తం వాదిభీకరగురోశ్చరణం ప్రపద్యే
పాత్రం గురుం వరవరం పరమం గురూణామ్ .. 1..
శ్రీమన్ నిదాన జగతాం నిఖిలాణ్డజాత-
నిర్వాహశక్తిముఖదివ్యగుణైకతాన .
అత్యన్తభోగ్యనతదోష నిరస్తదోష
గోవిన్దరాజ చరణౌ శరణం ప్రపద్యే .. 2..
రేఖారథాఙ్గసరసీరుహవజ్రశఙ్క-
చ్ఛత్రాఙ్కుశప్రభృతిమఙ్గలచిహ్నగర్భౌ .
సంసారతాపహరణే నిపుణౌ నతానాం
గోవిన్దరాజ చరణౌ శరణం ప్రపద్యే .. 3..
పశ్యత్సు సాన్ద్రభయకౌతుకమర్భకేషు
ప్రౌఢేషు సత్సు కృతకృత్యపరాయణేషు .
విధ్వంసితోర్ధ్వశకటావపి బాలభావే
గోవిన్దరాజ చరణౌ శరణం ప్రపద్యే .. 4..
ఆలమ్బ్య బాహుయుగలేన కుమారభావే
గాఢం కరాఙ్గులియుగం కిల నన్దపత్న్యాః .
అభ్యస్యమానదశచఙ్క్రమణాభిరామౌ
గోవిన్దరాజ చరణౌ శరణం ప్రపద్యే .. 5..
ఘోషాఙ్గనాకరసరోరుహతాలనాద-
సఙ్గీతసమ్పదనురూపమనోజ్ఞనృత్తౌ .
మాణిక్యనూపురమరీచికృతాఙ్గలేపౌ
గోవిన్దరాజ చరణౌ శరణం ప్రపద్యే .. 6..
కుట్టాకతాముపగతౌ సరసః ప్రసహ్య
మధ్యేసరిత్సలిలముద్ధతకాలియస్య .
తత్సున్దరీనయననన్దనసంనివేశౌ
గోవిన్దరాజ చరణౌ శరణం ప్రపద్యే .. 7..
వాసాంసి దేహి తవ కృష్ణ వశంవదానా-
మస్మాకమాకులధియామితి గోపకన్యాః .
ఉద్దిశ్య యౌ విదధురఞ్జలిమా ప్రసాదాద్
గోవిన్దరాజ చరణౌ శరణం ప్రపద్యే .. 8..
గోరక్షణే కిల బభూవ యదీయరేణు-
రక్రూరమస్తకమణేః సరణిం సమేతః .
తావద్భుతావనుపమావతిపావనౌ తే
గోవిన్దరాజ చరణౌ శరణం ప్రపద్యే .. 9..
మల్లావహే మధురయా మధురాఙ్గనానాం
ఫుల్లారవిన్దదలతల్లజలోచనానామ్ .
వాణ్యా ప్రశంసితపరార్ధ్యగతిప్రకారౌ
గోవిన్దరాజ చరణౌ శరణం ప్రపద్యే .. 10..
కంసం నిపాత్య కనకాసనతః పృథివ్యా-
ముద్ధృత్య సాగసమనాగసముగ్రసేనమ్ .
రాజ్యేఽభిషిచ్య వినివారితభూమిభారౌ
గోవిన్దరాజ చరణౌ శరణం ప్రపద్యే .. 11..
దుర్యోధనే దురభిమానిని దుర్భగాణా-
మగ్రేసరే భజతి తే శిరసః ప్రదేశమ్ .
ధన్యేన యన్నికటతః స్థితమర్జునేన
గోవిన్దరాజ చరణౌ శరణం ప్రపద్యే .. 12..
సారథ్యవేషసమలఙ్కృతపాణ్డుసూనో-
ర్యుద్ధాఙ్గణోజ్జ్వలరథాఞ్చలసంనివేశౌ .
సాన్ద్రేన్ద్రనీలపరిభావుకభవ్యరూపౌ
గోవిన్దరాజ చరణౌ శరణం ప్రపద్యే .. 13..
భక్త్యా ప్రసన్నహృదయేన ధనఞ్జయేన
యత్రార్చితాని కుసుమాని శివోత్తమాఙ్గే .
సాక్షాత్కృతాని సహసాద్భుతవైభవౌ తౌ
గోవిన్దరాజ చరణౌ శరణం ప్రపద్యే .. 14..
అస్మద్గురుప్రభృతిభిః కమలావసానై-
రాదర్శితౌ కరుణయా మమ దేశికేన్ద్రైః .
సత్త్వోత్తరైః సకలజీవదయాపరైస్తై-
ర్గోవిన్దరాజ చరణౌ శరణం ప్రపద్యే .. 15..
అస్మాత్పితామహమశేషగుణాభిరామ-
మాచార్యరత్నమయి వాదిభయఙ్కరార్యమ్ .
గోవర్ధనాద్రిధృతిధారితగోప వీక్ష్య
గోవిన్దరాజ మమ దుర్లపితం క్షమస్వ .. 16..
. ఇతి శ్రీగోవిన్దరాజప్రపత్తిః సమ్పూర్ణా .