దేవర్షిభిర్ప్రోక్తా వక్రతుణ్డస్తుతిః
వక్రతుణ్డస్తుతిః
దేవర్షయ ఊచుః
సదా బ్రహ్మభూతం వికారాదిహీనం వికారాదిభూతం మహేశాదివన్ద్యమ్ .
అపారస్వరూపం స్వసంవేద్యమేకం నమామః సదా వక్రతుణ్డం భజామః .. 2..
అజం నిర్వికల్పం కలాకాలహీనం హృదిస్థం సదా సాక్షిరూపం పరేశమ్ .
జనజ్ఞానకారం ప్రకాశైర్విహీనం నమామః సదా వక్రతుణ్డం భజామః .. 3..
అనన్తస్వరూపం సదానన్దకన్దం ప్రకాశస్వరూపం సదా సర్వగం తమ్ .
అనాదిం గుణాదిం గుణాధారభూతం నమామః సదా వక్రతుణ్డం భజామః .. 4..
ధరావాయుతేజోమయం తోయభావం సదాకాశరూపం మహాభూతసంస్థమ్ .
అహఙ్కారధారం తమోమాత్రసంస్థం నమామః సదా వక్రతుణ్డం భజామః .. 5..
రవిప్రాణవిష్ణుప్రచేతోయమేశవిధాత్రశ్వివైశ్వానరేన్ద్రప్రకాశమ్ .
దిశాం బోధకం సర్వదేవాధిరూపం నమామః సదా వక్రతుణ్డం భజామః .. 6..
ఉపస్థత్వగుక్తీక్షణస్థప్రకాశం కరాఙ్ఘ్రిస్వరూపం కృతఘ్రాణజిహ్వమ్ .
గుదస్థం శ్రుతిస్థం మహాఖప్రకాశం నమామః సదా వక్రతుణ్డం భజామః .. 7..
రజోరూపసృష్టిప్రకాశం విధిం తం సదా పాలనే కేశవం సత్త్వసంస్థమ్ .
తమోరూపధారం హరం సంహరం తం నమామః సదా వక్రతుణ్డం భజామః .. 8..
దిశాధీశరూపం సదాశాస్వరూపం గ్రహాదిప్రకాశం ధ్రువాదిం ఖగస్థమ్ .
అనన్తోడురూపం తదాకారహీనం నమామః సదా వక్రతుణ్డం భజామః .. 9..
మహత్తత్త్వరూపం ప్రధానస్వరూపం అహఙ్కారధారం త్రయీబోధకారమ్ .
అనాద్యన్తమాయం తదాధారపుచ్ఛం నమామః సదా వక్రతుణ్డం భజామః .. 10..
సదా కర్మధారం ఫలైః స్వర్గదం తం అకర్మప్రకాశేన ముక్తిప్రదం తమ్ .
వికర్మాదినా యాతనాఽఽధారభూతం నమామః సదా వక్రతుణ్డం భజామః .. 11..
అలోభస్వరూపం సదా లోభధారం జనజ్ఞానకారం జనాధీశపాలమ్ .
నృణాం సిద్ధిదం మానవం మానవస్థం నమామః సదా వక్రతుణ్డం భజామః . 12
లతావృక్షరూపం సదా పక్షిరూపం ధనాదిప్రకాశం సదా ధాన్యరూపమ్ .
ప్రసూపుత్రపౌత్రాదినానాస్వరూపం నమామః సదా వక్రతుణ్డం భజామః .. 13..
ఖగేశస్వరూపం వృషాదిప్రసంస్థం మృగేన్ద్రాదిబోధం మృగేన్ద్రస్వరూపమ్ .
ధరాధారహేమాద్రిమేరుస్వరూపం నమామః సదా వక్రతుణ్డం భజామః .. 14..
సువర్ణాదిధాతుస్థసద్రఙ్గసంస్థం సముద్రాదిమేఘస్వరూపం జలస్థమ్ .
జలే జన్తుమత్స్యాదినానావిభేదం నమామః సదా వక్రతుణ్డం భజామః .. 15..
సదా శేషనాగాదినాగస్వరూపం సదా నాగభూషం చ లీలాకరం తైః .
సురారిస్వరూపం చ దైత్యాదిభూతం నమామః సదా వక్రతుణ్డం భజామః .. 16..
వరం పాశధారం సదా భక్తపోషం మహాపౌరుషం మాయినం సింహసంస్థమ్ .
చతుర్బాహుధారం సదా విఘ్ననాశం నమామః సదా వక్రతుణ్డం భజామః .. 17..
గణేశం గణేశాదివన్ద్యం సురేశం పరం సర్వపూజ్యం సుబోధాదిగమ్యమ్ .
మహావాక్యవేదాన్తవేద్యం పరేశం నమామః సదా వక్రతుణ్డం భజామః .. 18..
అనన్తావతారైః సదా పాలయన్తం స్వధర్మాదిసంస్థం జనం కారయన్తమ్ .
సురైర్దైత్యపైర్వన్ద్యమేకం సమం త్వాం నమామః సదా వక్రతుణ్డం భజామః .. 19..
త్వయా నాశితోఽయం మహాదైత్యభూపః సుశాన్తేర్ధరోఽయం కృతస్తేన విశ్వమ్ .
అఖణ్డప్రహర్షేణ యుక్తం చ తం వై నమామః సదా వక్రతుణ్డం భజామః .. 20..
న విన్దన్తి యం వేదవేదజ్ఞమర్త్యా న విన్దన్తి యం శాస్త్రశాస్త్రజ్ఞభూపాః .
న విన్దన్తి యం యోగయోగీశకాద్యా నమామః సదా వక్రతుణ్డం భజామః .. 21..
న వేదా విదుర్యం చ దేవేన్ద్రముఖ్యా న యోగైర్మునీన్ద్రా వయం కిం స్తుమశ్చ .
తథాఽపి స్వబుధ్యా స్తుతం వక్రతుణ్డం నమామః సదా వక్రతుణ్డం భజామః .. 22..
ముద్గల ఉవాచ .
ఏవం స్తుత్వా వక్రతుణ్డం స్థితా దేవర్షయః ప్రభో .
బద్ధాఞ్జలిపుటాః సర్వే తూష్ణీంభావేన మానద .. 23..
దేవానాం చ మునీనాం స స్తుతిం శ్రుత్వా గజాననః .
ఉవాచ తాన్ ప్రసన్నాత్మా హర్షయన్ వచనం మహత్ .. 24..
వక్రతుణ్డ ఉవాచ .
శృణుధ్వం మునయః సర్వే దేవా మే వచనం మహత్ .
భవత్కృతమిదం స్తోత్రం మత్ప్రీతేర్వర్ధనం భవేత్ .. 25..
అనేన స్తౌతి యో నిత్యం మాం తస్య పరిపూరయే .
భోగాన్నానావిధాంశ్చైవ పుత్రపౌత్రాదిసమ్పదః .. 26..
యం యమిచ్ఛతి తం తం చ దాస్యేఽహం నాత్ర సంశయః .
భుక్తిముక్తిప్రదం చైతద్బ్రహ్మభూయకరం భవేత్ .. 27..
నానాసిద్ధిప్రదం చైవ హృది బుద్ధిప్రకాశకమ్ .
సురేన్ద్రైవద్యతాం యాతి యో మాం స్తౌతి త్వనేన సః .. 28..
సహస్రావర్తనాన్ మర్త్యః కారాగృహగతం నరమ్ .
మోచయేన్నాత్ర సన్దేహో మత్ప్రియః సర్వదా భవేత్ .. 29..
అపరాధశతయుక్తో యో వైభవతి మానవః .
తస్యాపరాధసహనం కరోమి స్తోత్రపాఠతః .. 30..
ఏకవింశతివారం య ఏకవింశద్దినాని వై .
పఠిష్యతి సదా తస్మై చిన్తితం ప్రదదామ్యహమ్ .. 31..
ఏకవింశతికాః శ్లోకా భవద్భిర్మత్ప్రియాత్మకైః .
కృతాస్తైర్మాం స దేవాస్తు స్తుతా వై మునయోఽఖిలాః .. 32..
తేన విఘ్నవిహీనాశ్చ స్వధర్మరుచయస్తథా .
భవిష్యథ మహాభాగా భుక్తిముక్తిపదాస్తథా .. 33..
వరం బ్రూత మహాభాగా యేషాం యన్మనసి స్థితమ్ .
తద్దాస్యామి న సన్దేహః స్తోత్రసన్తోషితో హ్యహమ్ .. 34..
ఇతి దేవర్షిభిర్ప్రోక్తా వక్రతుణ్డస్తుతిః