દેવર્ષિભિર્પ્રોક્તા વક્રતુણ્ડસ્તુતિઃ

વક્રતુણ્ડસ્તુતિઃ

દેવર્ષય ઊચુઃ
સદા બ્રહ્મભૂતં વિકારાદિહીનં વિકારાદિભૂતં મહેશાદિવન્દ્યમ્ .
અપારસ્વરૂપં સ્વસંવેદ્યમેકં નમામઃ સદા વક્રતુણ્ડં ભજામઃ .. ૨..

અજં નિર્વિકલ્પં કલાકાલહીનં હૃદિસ્થં સદા સાક્ષિરૂપં પરેશમ્ .
જનજ્ઞાનકારં પ્રકાશૈર્વિહીનં નમામઃ સદા વક્રતુણ્ડં ભજામઃ .. ૩..

અનન્તસ્વરૂપં સદાનન્દકન્દં પ્રકાશસ્વરૂપં સદા સર્વગં તમ્ .
અનાદિં ગુણાદિં ગુણાધારભૂતં નમામઃ સદા વક્રતુણ્ડં ભજામઃ .. ૪..

ધરાવાયુતેજોમયં તોયભાવં સદાકાશરૂપં મહાભૂતસંસ્થમ્ .
અહઙ્કારધારં તમોમાત્રસંસ્થં નમામઃ સદા વક્રતુણ્ડં ભજામઃ .. ૫..

રવિપ્રાણવિષ્ણુપ્રચેતોયમેશવિધાત્રશ્વિવૈશ્વાનરેન્દ્રપ્રકાશમ્ .
દિશાં બોધકં સર્વદેવાધિરૂપં નમામઃ સદા વક્રતુણ્ડં ભજામઃ .. ૬..

ઉપસ્થત્વગુક્તીક્ષણસ્થપ્રકાશં કરાઙ્ઘ્રિસ્વરૂપં કૃતઘ્રાણજિહ્વમ્ .
ગુદસ્થં શ્રુતિસ્થં મહાખપ્રકાશં નમામઃ સદા વક્રતુણ્ડં ભજામઃ .. ૭..

રજોરૂપસૃષ્ટિપ્રકાશં વિધિં તં સદા પાલને કેશવં સત્ત્વસંસ્થમ્ .
તમોરૂપધારં હરં સંહરં તં નમામઃ સદા વક્રતુણ્ડં ભજામઃ .. ૮..

દિશાધીશરૂપં સદાશાસ્વરૂપં ગ્રહાદિપ્રકાશં ધ્રુવાદિં ખગસ્થમ્ .
અનન્તોડુરૂપં તદાકારહીનં નમામઃ સદા વક્રતુણ્ડં ભજામઃ .. ૯..

મહત્તત્ત્વરૂપં પ્રધાનસ્વરૂપં અહઙ્કારધારં ત્રયીબોધકારમ્ .
અનાદ્યન્તમાયં તદાધારપુચ્છં નમામઃ સદા વક્રતુણ્ડં ભજામઃ .. ૧૦..

સદા કર્મધારં ફલૈઃ સ્વર્ગદં તં અકર્મપ્રકાશેન મુક્તિપ્રદં તમ્ .
વિકર્માદિના યાતનાઽઽધારભૂતં નમામઃ સદા વક્રતુણ્ડં ભજામઃ .. ૧૧..

અલોભસ્વરૂપં સદા લોભધારં જનજ્ઞાનકારં જનાધીશપાલમ્ .
નૃણાં સિદ્ધિદં માનવં માનવસ્થં નમામઃ સદા વક્રતુણ્ડં ભજામઃ . ૧૨
લતાવૃક્ષરૂપં સદા પક્ષિરૂપં ધનાદિપ્રકાશં સદા ધાન્યરૂપમ્ .
પ્રસૂપુત્રપૌત્રાદિનાનાસ્વરૂપં નમામઃ સદા વક્રતુણ્ડં ભજામઃ .. ૧૩..

ખગેશસ્વરૂપં વૃષાદિપ્રસંસ્થં મૃગેન્દ્રાદિબોધં મૃગેન્દ્રસ્વરૂપમ્ .
ધરાધારહેમાદ્રિમેરુસ્વરૂપં નમામઃ સદા વક્રતુણ્ડં ભજામઃ .. ૧૪..

સુવર્ણાદિધાતુસ્થસદ્રઙ્ગસંસ્થં સમુદ્રાદિમેઘસ્વરૂપં જલસ્થમ્ .
જલે જન્તુમત્સ્યાદિનાનાવિભેદં નમામઃ સદા વક્રતુણ્ડં ભજામઃ .. ૧૫..

સદા શેષનાગાદિનાગસ્વરૂપં સદા નાગભૂષં ચ લીલાકરં તૈઃ .
સુરારિસ્વરૂપં ચ દૈત્યાદિભૂતં નમામઃ સદા વક્રતુણ્ડં ભજામઃ .. ૧૬..

વરં પાશધારં સદા ભક્તપોષં મહાપૌરુષં માયિનં સિંહસંસ્થમ્ .
ચતુર્બાહુધારં સદા વિઘ્નનાશં નમામઃ સદા વક્રતુણ્ડં ભજામઃ .. ૧૭..

ગણેશં ગણેશાદિવન્દ્યં સુરેશં પરં સર્વપૂજ્યં સુબોધાદિગમ્યમ્ .
મહાવાક્યવેદાન્તવેદ્યં પરેશં નમામઃ સદા વક્રતુણ્ડં ભજામઃ .. ૧૮..

અનન્તાવતારૈઃ સદા પાલયન્તં સ્વધર્માદિસંસ્થં જનં કારયન્તમ્ .
સુરૈર્દૈત્યપૈર્વન્દ્યમેકં સમં ત્વાં નમામઃ સદા વક્રતુણ્ડં ભજામઃ .. ૧૯..

ત્વયા નાશિતોઽયં મહાદૈત્યભૂપઃ સુશાન્તેર્ધરોઽયં કૃતસ્તેન વિશ્વમ્ .
અખણ્ડપ્રહર્ષેણ યુક્તં ચ તં વૈ નમામઃ સદા વક્રતુણ્ડં ભજામઃ .. ૨૦..

ન વિન્દન્તિ યં વેદવેદજ્ઞમર્ત્યા ન વિન્દન્તિ યં શાસ્ત્રશાસ્ત્રજ્ઞભૂપાઃ .
ન વિન્દન્તિ યં યોગયોગીશકાદ્યા નમામઃ સદા વક્રતુણ્ડં ભજામઃ .. ૨૧..

ન વેદા વિદુર્યં ચ દેવેન્દ્રમુખ્યા ન યોગૈર્મુનીન્દ્રા વયં કિં સ્તુમશ્ચ .
તથાઽપિ સ્વબુધ્યા સ્તુતં વક્રતુણ્ડં નમામઃ સદા વક્રતુણ્ડં ભજામઃ .. ૨૨..

મુદ્ગલ ઉવાચ .
એવં સ્તુત્વા વક્રતુણ્ડં સ્થિતા દેવર્ષયઃ પ્રભો .
બદ્ધાઞ્જલિપુટાઃ સર્વે તૂષ્ણીંભાવેન માનદ .. ૨૩..

દેવાનાં ચ મુનીનાં સ સ્તુતિં શ્રુત્વા ગજાનનઃ .
ઉવાચ તાન્ પ્રસન્નાત્મા હર્ષયન્ વચનં મહત્ .. ૨૪..

વક્રતુણ્ડ ઉવાચ .
શૃણુધ્વં મુનયઃ સર્વે દેવા મે વચનં મહત્ .
ભવત્કૃતમિદં સ્તોત્રં મત્પ્રીતેર્વર્ધનં ભવેત્ .. ૨૫..

અનેન સ્તૌતિ યો નિત્યં માં તસ્ય પરિપૂરયે .
ભોગાન્નાનાવિધાંશ્ચૈવ પુત્રપૌત્રાદિસમ્પદઃ .. ૨૬..

યં યમિચ્છતિ તં તં ચ દાસ્યેઽહં નાત્ર સંશયઃ .
ભુક્તિમુક્તિપ્રદં ચૈતદ્બ્રહ્મભૂયકરં ભવેત્ .. ૨૭..

નાનાસિદ્ધિપ્રદં ચૈવ હૃદિ બુદ્ધિપ્રકાશકમ્ .
સુરેન્દ્રૈવદ્યતાં યાતિ યો માં સ્તૌતિ ત્વનેન સઃ .. ૨૮..

સહસ્રાવર્તનાન્ મર્ત્યઃ કારાગૃહગતં નરમ્ .
મોચયેન્નાત્ર સન્દેહો મત્પ્રિયઃ સર્વદા ભવેત્ .. ૨૯..

અપરાધશતયુક્તો યો વૈભવતિ માનવઃ .
તસ્યાપરાધસહનં કરોમિ સ્તોત્રપાઠતઃ .. ૩૦..

એકવિંશતિવારં ય એકવિંશદ્દિનાનિ વૈ .
પઠિષ્યતિ સદા તસ્મૈ ચિન્તિતં પ્રદદામ્યહમ્ .. ૩૧..

એકવિંશતિકાઃ શ્લોકા ભવદ્ભિર્મત્પ્રિયાત્મકૈઃ .
કૃતાસ્તૈર્માં સ દેવાસ્તુ સ્તુતા વૈ મુનયોઽખિલાઃ .. ૩૨..

તેન વિઘ્નવિહીનાશ્ચ સ્વધર્મરુચયસ્તથા .
ભવિષ્યથ મહાભાગા ભુક્તિમુક્તિપદાસ્તથા .. ૩૩..

વરં બ્રૂત મહાભાગા યેષાં યન્મનસિ સ્થિતમ્ .
તદ્દાસ્યામિ ન સન્દેહઃ સ્તોત્રસન્તોષિતો હ્યહમ્ .. ૩૪..

ઇતિ દેવર્ષિભિર્પ્રોક્તા વક્રતુણ્ડસ્તુતિઃ