.. ವಿಘ್ನೇಶ್ವರಪ್ರಾರ್ಥನಾ ..

.. ಗಣೇಶ ಪ್ರಾರ್ಥನಾ ..

ಶುಕ್ಲಾಮ್ಬರಧರಂ ವಿಷ್ಣುಂ ಶಶಿವರ್ಣಂ ಚತುರ್ಭುಜಮ್.
ಪ್ರಸನ್ನವದನಂ ಧ್ಯಾಯೇತ್ ಸರ್ವವಿಘ್ನೋಪಶಾನ್ತಯೇ .. ೧ ..

ಅಗಜಾನಾನಪದ್ಮಾರ್ಕಂ ಗಜಾನನಮಹರ್ನಿಶಮ್.
ಅನೇಕದಂ ತಂ ಭಕ್ತಾನಾಮ್ ಏಕದನ್ತಮುಪಾಸ್ಮಹೇ.. ೨ ..

ವಕ್ರತುಣ್ಡ ಮಹಾಕಾಯ ಸೂರ್ಯಕೋಟಿಸಮಪ್ರಭ.
ನಿರ್ವಿಘ್ನಂ ಕುರು ಮೇ ದೇವ ಸರ್ವಕಾರ್ಯೇಷು ಸರ್ವದಾ.. ೩ ..

ಯಂ ಬ್ರಹ್ಮ ವೇದಾನ್ತವಿದೋ ವದನ್ತಿ
ಪರೇ ಪ್ರಧಾನಂ ಪುರುಷಂ ತಥಾಽನ್ಯೇ.
ವಿಶ್ವೋದ್ಗತೇಃ ಕಾರಣಮೀಶ್ವರಂ ವಾ
ತಸ್ಮೈ ನಮೋ ವಿಘ್ನವಿನಾಯಕಾಯ .. ೪ ..

ಗಜಾನನಂ ಭೂತಗಣಾದಿಸೇವಿತಂ
ಕಪಿತ್ಥಜಮ್ಬೂಫಲಸಾರಭಕ್ಷಿತಮ್.
ಉಮಾಸುತಂ ಶೋಕವಿನಾಶಕಾರಣಂ
ನಮಾಮಿ ವಿಘ್ನೇಶ್ವರಪಾದಪಙ್ಕಜಮ್ .. ೫ ..

ಮೂಷಕವಾಹನ ಮೋದಕಹಸ್ತ
ಚಾಮರಕರ್ಣ ವಿಲಮ್ಬಿತಸೂತ್ರ.
ವಾಮನರೂಪ ಮಹೇಶ್ವರಪುತ್ರ
ವಿಘ್ನವಿನಾಯಕ ಪಾದ ನಮಸ್ತೇ .. ೬ ..

ಸುಮುಖಶ್ಚೈಕದನ್ತಶ್ಚ ಕಪಿಲೋ ಗಜಕರ್ಣಕಃ.
ಲಮ್ಬೋದರಶ್ಚ ವಿಕಟೋ ವಿಘ್ನರಾಜೋ ಗಣಾಧಿಪಃ .. ೭ ..

ಧೂಮಕೇತುರ್ಗಣಾಧ್ಯಕ್ಷೋ ಫಾಲಚನ್ದ್ರೋ ಗಜಾನನಃ.
ವಕ್ರತುಣ್ಡಃ ಶೂರ್ಪಕರ್ಣೋ ಹೇರಮ್ಭಃ ಸ್ಕನ್ದಪೂರ್ವಜಃ .. ೮ ..

ಷೋಡಶೈತಾನಿ ನಾಮಾನಿ ಯಃ ಪಠೇಚ್ಛೃಣುಯಾದಪಿ
ವಿದ್ಯಾರಮ್ಭೇ ವಿವಾಹೇ ಚ ಪ್ರವೇಶೇ ನಿರ್ಗಮೇ ತಥಾ
ಸಙ್ಗ್ರಾಮೇ ಸಙ್ಕಟೇ ಚೈವ ವಿಘ್ನಸ್ತಸ್ಯ ನ ಜಾಯತೇ .. ೯ ..