ವೇಙ್ಕಟೇಶಸುಪ್ರಭಾತಮ್

Venkatesha Suprabhatam
ವೇಙ್ಕಟೇಶಸುಪ್ರಭಾತಮ್
ಕೌಸಲ್ಯಾ ಸುಪ್ರಜಾ ರಾಮ ಪೂರ್ವಾ ಸನ್ಧ್ಯಾ ಪ್ರವರ್ತತೇ
ಉತ್ತಿಷ್ಠ ನರಶಾರ್ದೂಲ ಕರ್ತವ್ಯಂ ದೈವಮಾಹ್ನಿಕಮ್ .. ೧..

ಉತ್ತಿಷ್ಠೋತ್ತಿಷ್ಠ ಗೋವಿನ್ದ ಉತ್ತಿಷ್ಠ ಗರುಡಧ್ವಜ
ಉತ್ತಿಷ್ಠ ಕಮಲಾಕಾನ್ತ ತ್ರೈಲೋಕ್ಯಂ ಮಙ್ಗಲಂ ಕುರು .. ೨..

ಮಾತಸ್ಸಮಸ್ತಜಗತಾಂ ಮಧುಕೈಟಭಾರೇಃ
ವಕ್ಷೋವಿಹಾರಿಣಿ ಮನೋಹರದಿವ್ಯಮೂರ್ತೇ .
ಶ್ರೀಸ್ವಾಮಿನಿ ಶ್ರಿತಜನಪ್ರಿಯದಾನಶೀಲೇ
ಶ್ರೀವೇಙ್ಕಟೇಶದಯಿತೇ ತವ ಸುಪ್ರಭಾತಮ್ .. ೩..

ತವ ಸುಪ್ರಭಾತಮರವಿನ್ದಲೋಚನೇ
ಭವತು ಪ್ರಸನ್ನಮುಖಚನ್ದ್ರಮಣ್ಡಲೇ .
ವಿಧಿಶಙ್ಕರೇನ್ದ್ರವನಿತಾಭಿರರ್ಚಿತೇ
ವೃಷಶೈಲನಾಥದಯಿತೇ ದಯಾನಿಧೇ .. ೪..

ಅತ್ರ್ಯಾದಿಸಪ್ತಋಷಯಸ್ಸಮುಪಾಸ್ಯ ಸನ್ಧ್ಯಾಂ
ಆಕಾಶಸಿನ್ಧುಕಮಲಾನಿ ಮನೋಹರಾಣಿ .
ಆದಾಯ ಪಾದಯುಗಮರ್ಚಯಿತುಂ ಪ್ರಪನ್ನಾಃ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಮ್ .. ೫..

ಪಞ್ಚಾನನಾಬ್ಜಭವಷಣ್ಮುಖವಾಸವಾದ್ಯಾಃ
ತ್ರೈವಿಕ್ರಮಾದಿಚರಿತಂ ವಿಬುಧಾಃ ಸ್ತುವನ್ತಿ .
ಭಾಷಾಪತಿಃ ಪಠತಿ ವಾಸರಶುದ್ಧಿಮಾರಾತ್
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಮ್ .. ೬..

ಈಷತ್ಪ್ರಫುಲ್ಲಸರಸೀರುಹನಾರಿಕೇಲ-
ಪೂಗದ್ರುಮಾದಿಸುಮನೋಹರಪಾಲಿಕಾನಾಮ್ .
ಆವಾತಿ ಮನ್ದಮನಿಲಸ್ಸಹ ದಿವ್ಯಗನ್ಧೈಃ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಮ್ .. ೭..

ಉನ್ಮೀಲ್ಯ ನೇತ್ರಯುಗಮುತ್ತಮಪಞ್ಜರಸ್ಥಾಃ
ಪಾತ್ರಾವಶಿಷ್ಟಕದಲೀಫಲಪಾಯಸಾನಿ .
ಭುಕ್ತ್ವಾ ಸಲೀಲಮಥ ಕೇಲಿಶುಕಾಃ ಪಠನ್ತಿ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಮ್ .. ೮..

ತನ್ತ್ರೀಪ್ರಕರ್ಷಮಧುರಸ್ವನಯಾ ವಿಪಞ್ಚ್ಯಾ
ಗಾಯತ್ಯನನ್ತಚರಿತಂ ತವ ನಾರದೋಽಪಿ .
ಭಾಷಾಸಮಗ್ರಮಸಕೃತ್ಕರಚಾರರಮ್ಯಂ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಮ್ .. ೯..

ಭೃಙ್ಗಾವಲೀ ಚ ಮಕರನ್ದರಸಾನುವಿದ್ಧ
ಝಙ್ಕಾರಗೀತ ನಿನದೈಃಸಹ ಸೇವನಾಯ .
ನಿರ್ಯಾತ್ಯುಪಾನ್ತಸರಸೀಕಮಲೋದರೇಭ್ಯಃ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಮ್ .. ೧೦..

ಯೋಷಾಗಣೇನ ವರದಧ್ನಿವಿಮಥ್ಯಮಾನೇ
ಘೋಷಾಲಯೇಷು ದಧಿಮನ್ಥನತೀವ್ರಘೋಷಾಃ .
ರೋಷಾತ್ಕಲಿಂ ವಿದಧತೇ ಕಕುಭಶ್ಚ ಕುಮ್ಭಾಃ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಮ್ .. ೧೧..

ಪದ್ಮೇಶಮಿತ್ರಶತಪತ್ರಗತಾಲಿವರ್ಗಾಃ
ಹರ್ತುಂ ಶ್ರಿಯಂ ಕುವಲಯಸ್ಯ ನಿಜಾಙ್ಗಲಕ್ಷ್ಮ್ಯಾ .
ಭೇರೀನಿನಾದಮಿವ ಬಿಭ್ರತಿ ತೀವ್ರನಾದಂ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಮ್ .. ೧೨..

ಶ್ರೀಮನ್ನಭೀಷ್ಟವರದಾಖಿಲಲೋಕಬನ್ಧೋ
ಶ್ರೀಶ್ರೀನಿವಾಸ ಜಗದೇಕದಯೈಕಸಿನ್ಧೋ .
ಶ್ರೀದೇವತಾಗೃಹಭುಜಾನ್ತರ ದಿವ್ಯಮೂರ್ತೇ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೧೩..

ಶ್ರೀಸ್ವಾಮಿಪುಷ್ಕರಿಣಿಕಾಽಽಪ್ಲವನಿರ್ಮಲಾಙ್ಗಾಃ
ಶ್ರೇಯೋಽರ್ಥಿನೋ ಹರವಿರಿಞ್ಚಸನನ್ದನಾದ್ಯಾಃ .
ದ್ವಾರೇ ವಸನ್ತಿ ವರವೇತ್ರಹತೋತ್ತಮಾಙ್ಗಾಃ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೧೪..

ಶ್ರೀಶೇಷಶೈಲಗರುಡಾಚಲವೇಙ್ಕಟಾದ್ರಿ
ನಾರಾಯಣಾದ್ರಿವೃಷಭಾದ್ರಿವೃಷಾದ್ರಿಮುಖ್ಯಾಮ್ .
ಆಖ್ಯಾಂ ತ್ವದೀಯವಸತೇರನಿಶಂ ವದನ್ತಿ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೧೫..

ಸೇವಾಪರಾಃ ಶಿವಸುರೇಶಕೃಶಾನುಧರ್ಮ-
ರಕ್ಷೋಽಮ್ಬುನಾಥಪವಮಾನಧನಾಧಿನಾಥಾಃ .
ಬದ್ಧಾಞ್ಜಲಿಪ್ರವಿಲಸನ್ನಿಜಶೀರ್ಷದೇಶಾಃ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೧೬..

ಘಾಟೀಷು ತೇ ವಿಹಗರಾಜಮೃಗಾಧಿರಾಜ-
ನಾಗಾಧಿರಾಜಗಜರಾಜಹಯಾಧಿರಾಜಾಃ .
ಸ್ವಸ್ವಾಧಿಕಾರಮಹಿಮಾಧಿಕಮರ್ಥಯನ್ತೇ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೧೭..

ಸೂರ್ಯೇನ್ದುಭೌಮಬುಧವಾಕ್ಪತಿಕಾವ್ಯಸೌರಿ
ಸ್ವರ್ಭಾನುಕೇತುದಿವಿಷತ್ಪರಿಷತ್ಪ್ರಧಾನಾಃ .
ತ್ವದ್ದಾಸದಾಸಚರಮಾವಧಿದಾಸದಾಸಾಃ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೧೮..

ತ್ವತ್ಪಾದಧೂಲಿಭರಿತಸ್ಫುರಿತೋತ್ತಮಾಙ್ಗಾಃ
ಸ್ವರ್ಗಾಪವರ್ಗನಿರಪೇಕ್ಷನಿಜಾನ್ತರಙ್ಗಾಃ .
ಕಲ್ಪಾಗಮಾಽಽಕಲನಯಾಽಽಕುಲತಾಂ ಲಭನ್ತೇ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೧೯..

ತ್ವದ್ಗೋಪುರಾಗ್ರಶಿಖರಾಣಿ ನಿರೀಕ್ಷಮಾಣಾಃ
ಸ್ವರ್ಗಾಪವರ್ಗಪದವೀಂ ಪರಮಾಂ ಶ್ರಯನ್ತಃ .
ಮರ್ತ್ಯಾ ಮನುಷ್ಯಭುವನೇ ಮತಿಮಾಶ್ರಯನ್ತೇ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೨೦..

ಶ್ರೀಭೂಮಿನಾಯಕ ದಯಾದಿಗುಣಾಮೃತಾಬ್ಧೇ
ದೇವಾಧಿದೇವ ಜಗದೇಕಶರಣ್ಯಮೂರ್ತೇ .
ಶ್ರೀಮನ್ನನನ್ತ ಗರುಡಾದಿಭಿರರ್ಚಿತಾಙ್ಘ್ರೇ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೨೧..

ಶ್ರೀಪದ್ಮನಾಭ ಪುರುಷೋತ್ತಮ ವಾಸುದೇವ
ವೈಕುಣ್ಠ ಮಾಧವ ಜನಾರ್ದನ ಚಕ್ರಪಾಣೇ .
ಶ್ರೀವತ್ಸಚಿನ್ಹ ಶರಣಾಗತಪಾರಿಜಾತ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೨೨..

ಕನ್ದರ್ಪದರ್ಪಹರಸುನ್ದರ ದಿವ್ಯಮೂರ್ತೇ
ಕಾನ್ತಾಕುಚಾಮ್ಬುರುಹ ಕುಟ್ಮಲಲೋಲದೃಷ್ಟೇ .
ಕಲ್ಯಾಣನಿರ್ಮಲಗುಣಾಕರ ದಿವ್ಯಕೀರ್ತೇ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೨೩..

ಮೀನಾಕೃತೇ ಕಮಠ ಕೋಲ ನೃಸಿಂಹ ವರ್ಣಿನ್
ಸ್ವಾಮಿನ್ ಪರಶ್ವಥತಪೋಧನ ರಾಮಚನ್ದ್ರ .
ಶೇಷಾಂಶರಾಮ ಯದುನನ್ದನ ಕಲ್ಕಿರೂಪ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೨೪..

ಏಲಾಲವಙ್ಗಘನಸಾರಸುಗನ್ಧಿತೀರ್ಥಂ
ದಿವ್ಯಂ ವಿಯತ್ಸರಿತಿ ಹೇಮಘಟೇಷು ಪೂರ್ಣಮ್ .
ಧೃತ್ವಾಽಽದ್ಯ ವೈದಿಕಶಿಖಾಮಣಯಃ ಪ್ರಹೃಷ್ಟಾಃ
ತಿಷ್ಠನ್ತಿ ವೇಙ್ಕಟಪತೇ ತವ ಸುಪ್ರಭಾತಮ್ .. ೨೫..

ಭಾಸ್ವಾನುದೇತಿ ವಿಕಚಾನಿ ಸರೋರುಹಾಣಿ
ಸಮ್ಪೂರಯನ್ತಿ ನಿನದೈಃ ಕಕುಭೋ ವಿಹಙ್ಗಾಃ .
ಶ್ರೀವೈಷ್ಣವಾಸ್ಸತತಮರ್ಥಿತಮಙ್ಗಲಾಸ್ತೇ
ಧಾಮಾಽಽಶ್ರಯನ್ತಿ ತವ ವೇಙ್ಕಟ ಸುಪ್ರಭಾತಮ್ .. ೨೬..

ಬ್ರಹ್ಮಾದಯಃ ಸುರವರಾಸ್ಸಮಹರ್ಷಯಸ್ತೇ
ಸನ್ತಸ್ಸನನ್ದನ ಮುಖಾಸ್ತ್ವಥ ಯೋಗಿವರ್ಯಾಃ .
ಧಾಮಾನ್ತಿಕೇ ತವ ಹಿ ಮಙ್ಗಲವಸ್ತು ಹಸ್ತಾಃ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೨೭..

ಲಕ್ಷ್ಮೀನಿವಾಸ ನಿರವದ್ಯಗುಣೈಕಸಿನ್ಧೋ
ಸಂಸಾರಸಾಗರಸಮುತ್ತರಣೈಕಸೇತೋ .
ವೇದಾನ್ತವೇದ್ಯ ನಿಜವೈಭವ ಭಕ್ತಭೋಗ್ಯ
ಶ್ರೀವೇಙ್ಕಟಾಚಲಪತೇ ತವ ಸುಪ್ರಭಾತಮ್ .. ೨೮..

ಇತ್ಥಂ ವೃಷಾಚಲಪತೇರಿಹ ಸುಪ್ರಭಾತಮ್
ಯೇ ಮಾನವಾಃ ಪ್ರತಿದಿನಂ ಪಠಿತುಂ ಪ್ರವೃತ್ತಾಃ .
ತೇಷಾಂ ಪ್ರಭಾತಸಮಯೇ ಸ್ಮೃತಿರಙ್ಗಭಾಜಾಂ
ಪ್ರಜ್ಞಾಂ ಪರಾರ್ಥಸುಲಭಾಂ ಪರಮಾಂ ಪ್ರಸೂತೇ .. ೨೯..