વેઙ્કટેશસુપ્રભાતમ્

Venkatesha Suprabhatam
વેઙ્કટેશસુપ્રભાતમ્
કૌસલ્યા સુપ્રજા રામ પૂર્વા સન્ધ્યા પ્રવર્તતે
ઉત્તિષ્ઠ નરશાર્દૂલ કર્તવ્યં દૈવમાહ્નિકમ્ .. ૧..

ઉત્તિષ્ઠોત્તિષ્ઠ ગોવિન્દ ઉત્તિષ્ઠ ગરુડધ્વજ
ઉત્તિષ્ઠ કમલાકાન્ત ત્રૈલોક્યં મઙ્ગલં કુરુ .. ૨..

માતસ્સમસ્તજગતાં મધુકૈટભારેઃ
વક્ષોવિહારિણિ મનોહરદિવ્યમૂર્તે .
શ્રીસ્વામિનિ શ્રિતજનપ્રિયદાનશીલે
શ્રીવેઙ્કટેશદયિતે તવ સુપ્રભાતમ્ .. ૩..

તવ સુપ્રભાતમરવિન્દલોચને
ભવતુ પ્રસન્નમુખચન્દ્રમણ્ડલે .
વિધિશઙ્કરેન્દ્રવનિતાભિરર્ચિતે
વૃષશૈલનાથદયિતે દયાનિધે .. ૪..

અત્ર્યાદિસપ્તઋષયસ્સમુપાસ્ય સન્ધ્યાં
આકાશસિન્ધુકમલાનિ મનોહરાણિ .
આદાય પાદયુગમર્ચયિતું પ્રપન્નાઃ
શેષાદ્રિશેખરવિભો તવ સુપ્રભાતમ્ .. ૫..

પઞ્ચાનનાબ્જભવષણ્મુખવાસવાદ્યાઃ
ત્રૈવિક્રમાદિચરિતં વિબુધાઃ સ્તુવન્તિ .
ભાષાપતિઃ પઠતિ વાસરશુદ્ધિમારાત્
શેષાદ્રિશેખરવિભો તવ સુપ્રભાતમ્ .. ૬..

ઈષત્પ્રફુલ્લસરસીરુહનારિકેલ-
પૂગદ્રુમાદિસુમનોહરપાલિકાનામ્ .
આવાતિ મન્દમનિલસ્સહ દિવ્યગન્ધૈઃ
શેષાદ્રિશેખરવિભો તવ સુપ્રભાતમ્ .. ૭..

ઉન્મીલ્ય નેત્રયુગમુત્તમપઞ્જરસ્થાઃ
પાત્રાવશિષ્ટકદલીફલપાયસાનિ .
ભુક્ત્વા સલીલમથ કેલિશુકાઃ પઠન્તિ
શેષાદ્રિશેખરવિભો તવ સુપ્રભાતમ્ .. ૮..

તન્ત્રીપ્રકર્ષમધુરસ્વનયા વિપઞ્ચ્યા
ગાયત્યનન્તચરિતં તવ નારદોઽપિ .
ભાષાસમગ્રમસકૃત્કરચારરમ્યં
શેષાદ્રિશેખરવિભો તવ સુપ્રભાતમ્ .. ૯..

ભૃઙ્ગાવલી ચ મકરન્દરસાનુવિદ્ધ
ઝઙ્કારગીત નિનદૈઃસહ સેવનાય .
નિર્યાત્યુપાન્તસરસીકમલોદરેભ્યઃ
શેષાદ્રિશેખરવિભો તવ સુપ્રભાતમ્ .. ૧૦..

યોષાગણેન વરદધ્નિવિમથ્યમાને
ઘોષાલયેષુ દધિમન્થનતીવ્રઘોષાઃ .
રોષાત્કલિં વિદધતે કકુભશ્ચ કુમ્ભાઃ
શેષાદ્રિશેખરવિભો તવ સુપ્રભાતમ્ .. ૧૧..

પદ્મેશમિત્રશતપત્રગતાલિવર્ગાઃ
હર્તું શ્રિયં કુવલયસ્ય નિજાઙ્ગલક્ષ્મ્યા .
ભેરીનિનાદમિવ બિભ્રતિ તીવ્રનાદં
શેષાદ્રિશેખરવિભો તવ સુપ્રભાતમ્ .. ૧૨..

શ્રીમન્નભીષ્ટવરદાખિલલોકબન્ધો
શ્રીશ્રીનિવાસ જગદેકદયૈકસિન્ધો .
શ્રીદેવતાગૃહભુજાન્તર દિવ્યમૂર્તે
શ્રીવેઙ્કટાચલપતે તવ સુપ્રભાતમ્ .. ૧૩..

શ્રીસ્વામિપુષ્કરિણિકાઽઽપ્લવનિર્મલાઙ્ગાઃ
શ્રેયોઽર્થિનો હરવિરિઞ્ચસનન્દનાદ્યાઃ .
દ્વારે વસન્તિ વરવેત્રહતોત્તમાઙ્ગાઃ
શ્રીવેઙ્કટાચલપતે તવ સુપ્રભાતમ્ .. ૧૪..

શ્રીશેષશૈલગરુડાચલવેઙ્કટાદ્રિ
નારાયણાદ્રિવૃષભાદ્રિવૃષાદ્રિમુખ્યામ્ .
આખ્યાં ત્વદીયવસતેરનિશં વદન્તિ
શ્રીવેઙ્કટાચલપતે તવ સુપ્રભાતમ્ .. ૧૫..

સેવાપરાઃ શિવસુરેશકૃશાનુધર્મ-
રક્ષોઽમ્બુનાથપવમાનધનાધિનાથાઃ .
બદ્ધાઞ્જલિપ્રવિલસન્નિજશીર્ષદેશાઃ
શ્રીવેઙ્કટાચલપતે તવ સુપ્રભાતમ્ .. ૧૬..

ઘાટીષુ તે વિહગરાજમૃગાધિરાજ-
નાગાધિરાજગજરાજહયાધિરાજાઃ .
સ્વસ્વાધિકારમહિમાધિકમર્થયન્તે
શ્રીવેઙ્કટાચલપતે તવ સુપ્રભાતમ્ .. ૧૭..

સૂર્યેન્દુભૌમબુધવાક્પતિકાવ્યસૌરિ
સ્વર્ભાનુકેતુદિવિષત્પરિષત્પ્રધાનાઃ .
ત્વદ્દાસદાસચરમાવધિદાસદાસાઃ
શ્રીવેઙ્કટાચલપતે તવ સુપ્રભાતમ્ .. ૧૮..

ત્વત્પાદધૂલિભરિતસ્ફુરિતોત્તમાઙ્ગાઃ
સ્વર્ગાપવર્ગનિરપેક્ષનિજાન્તરઙ્ગાઃ .
કલ્પાગમાઽઽકલનયાઽઽકુલતાં લભન્તે
શ્રીવેઙ્કટાચલપતે તવ સુપ્રભાતમ્ .. ૧૯..

ત્વદ્ગોપુરાગ્રશિખરાણિ નિરીક્ષમાણાઃ
સ્વર્ગાપવર્ગપદવીં પરમાં શ્રયન્તઃ .
મર્ત્યા મનુષ્યભુવને મતિમાશ્રયન્તે
શ્રીવેઙ્કટાચલપતે તવ સુપ્રભાતમ્ .. ૨૦..

શ્રીભૂમિનાયક દયાદિગુણામૃતાબ્ધે
દેવાધિદેવ જગદેકશરણ્યમૂર્તે .
શ્રીમન્નનન્ત ગરુડાદિભિરર્ચિતાઙ્ઘ્રે
શ્રીવેઙ્કટાચલપતે તવ સુપ્રભાતમ્ .. ૨૧..

શ્રીપદ્મનાભ પુરુષોત્તમ વાસુદેવ
વૈકુણ્ઠ માધવ જનાર્દન ચક્રપાણે .
શ્રીવત્સચિન્હ શરણાગતપારિજાત
શ્રીવેઙ્કટાચલપતે તવ સુપ્રભાતમ્ .. ૨૨..

કન્દર્પદર્પહરસુન્દર દિવ્યમૂર્તે
કાન્તાકુચામ્બુરુહ કુટ્મલલોલદૃષ્ટે .
કલ્યાણનિર્મલગુણાકર દિવ્યકીર્તે
શ્રીવેઙ્કટાચલપતે તવ સુપ્રભાતમ્ .. ૨૩..

મીનાકૃતે કમઠ કોલ નૃસિંહ વર્ણિન્
સ્વામિન્ પરશ્વથતપોધન રામચન્દ્ર .
શેષાંશરામ યદુનન્દન કલ્કિરૂપ
શ્રીવેઙ્કટાચલપતે તવ સુપ્રભાતમ્ .. ૨૪..

એલાલવઙ્ગઘનસારસુગન્ધિતીર્થં
દિવ્યં વિયત્સરિતિ હેમઘટેષુ પૂર્ણમ્ .
ધૃત્વાઽઽદ્ય વૈદિકશિખામણયઃ પ્રહૃષ્ટાઃ
તિષ્ઠન્તિ વેઙ્કટપતે તવ સુપ્રભાતમ્ .. ૨૫..

ભાસ્વાનુદેતિ વિકચાનિ સરોરુહાણિ
સમ્પૂરયન્તિ નિનદૈઃ કકુભો વિહઙ્ગાઃ .
શ્રીવૈષ્ણવાસ્સતતમર્થિતમઙ્ગલાસ્તે
ધામાઽઽશ્રયન્તિ તવ વેઙ્કટ સુપ્રભાતમ્ .. ૨૬..

બ્રહ્માદયઃ સુરવરાસ્સમહર્ષયસ્તે
સન્તસ્સનન્દન મુખાસ્ત્વથ યોગિવર્યાઃ .
ધામાન્તિકે તવ હિ મઙ્ગલવસ્તુ હસ્તાઃ
શ્રીવેઙ્કટાચલપતે તવ સુપ્રભાતમ્ .. ૨૭..

લક્ષ્મીનિવાસ નિરવદ્યગુણૈકસિન્ધો
સંસારસાગરસમુત્તરણૈકસેતો .
વેદાન્તવેદ્ય નિજવૈભવ ભક્તભોગ્ય
શ્રીવેઙ્કટાચલપતે તવ સુપ્રભાતમ્ .. ૨૮..

ઇત્થં વૃષાચલપતેરિહ સુપ્રભાતમ્
યે માનવાઃ પ્રતિદિનં પઠિતું પ્રવૃત્તાઃ .
તેષાં પ્રભાતસમયે સ્મૃતિરઙ્ગભાજાં
પ્રજ્ઞાં પરાર્થસુલભાં પરમાં પ્રસૂતે .. ૨૯..