.. శ్రీసరస్వత్యష్టకమ్ ( రవిరుద్రపితామహ.. )..

సరస్వతీ వన్దనా
రవిరుద్రపితామహవిష్ణునుతం హరిచన్దనకుఙ్కుమపఙ్కయుతమ్.
మునివృన్దగజేన్ద్రసమానయుతం తవ నౌమి సరస్వతి పాదయుగమ్ ..1..

శశిశుద్ధసుధాహిమధామయుతం శరదమ్బరబిమ్బసమానకరమ్.
బహురత్నమనోహరకాన్తియుతం తవ నౌమి సరస్వతి పాదయుగమ్ ..2..

కనకాబ్జవిభూషితభూతిభవం భవభావవిభాషితభిన్నపదమ్.
ప్రభుచిత్తసమాహితసాధుపదం తవ నౌమి సరస్వతి పాదయుగమ్ ..3..

భవసాగరమజ్జనభీతినుతం ప్రతిపాదితసన్తతికారమిదమ్.
విమలాదికశుద్ధవిశుద్ధపదం తవ నౌమి సరస్వతి పాదయుగమ్ ..4..

మతిహీనజనాశ్రయపాదమిదం సకలాగమభాషితభిన్నపదమ్.
పరిపూరితవిశ్వమనేకభవం తవ నౌమి సరస్వతి పాదయుగమ్ ..5..

పరిపూర్ణమనోరథధామనిధిం పరమార్థవిచారవివేకనిధిమ్.
సురయోషితసేవితపాదతలం తవ నౌమి సరస్వతి పాదయుగమ్ .. 6..

సురమౌలిమణిద్యుతిశుభ్రకరం విషయాదిమహాభయవర్ణహరమ్.
నిజకాన్తివిలేపితచన్ద్రశివం తవ నౌమి సరస్వతి పాదయుగమ్ .. 7..

గుణనైకకులస్థితిభీతపదం గుణగౌరవగర్వితసత్యపదమ్.
కమలోదరకోమలపాదతలం తవ నౌమి సరస్వతి పాదయుగమ్ .. 8..

త్రిసన్ధ్యం యో జపేన్నిత్యం జలే వాపి స్థలేస్థితః
పాఠమాత్రద్భవేత్ప్రాజ్ఞో బ్రహ్మనిష్ఠః పునః పునః .. 9 ..

ఇదం స్తవం మహాపుణ్యం బ్రహ్మణా చ ప్రకిర్తితమ్ .
య: పఠేత్ ప్రాతరుత్థ్యాయ తస్య కణ్ఠే సరస్వతీ .. 10 ..