శ్రీలక్ష్మ్యష్టోత్తరశతనామస్తోత్రమ్

.. శ్రీలక్ష్మీ అష్టోత్తరశతనామస్తోత్రమ్ ..

దేవ్యువాచ
దేవదేవ మహాదేవ త్రికాలజ్ఞ మహేశ్వర .
కరుణాకర దేవేశ భక్తానుగ్రహకారక .
అష్టోత్తరశతం లక్ష్మ్యాః శ్రోతుమిచ్ఛామి తత్త్వతః .. 1..

ఈశ్వర ఉవాచ
దేవి సాధు మహాభాగే మహాభాగ్యప్రదాయకమ్ .
సర్వైశ్వర్యకరం పుణ్యం సర్వపాపప్రణాశనమ్ .. 2..

సర్వదారిద్ర్యశమనం శ్రవణాద్భుక్తిముక్తిదమ్ .
రాజవశ్యకరం దివ్యం గుహ్యాద్గుహ్యతమం పరమ్ .. 3..

దుర్లభం సర్వదేవానాం చతుఃషష్టికలాస్పదమ్ .
పద్మాదీనాం వరాన్తానాం విధీనాం నిత్యదాయకమ్ .. 4..

సమస్తదేవసంసేవ్యమణిమాద్యష్టసిద్ధిదమ్ .
కిమత్ర బహునోక్తేన దేవీ ప్రత్యక్షదాయకమ్ .. 5..

తవ ప్రీత్యాద్య వక్ష్యామి సమాహితమనాః శృణు .
అష్టోత్తరశతస్యాస్య మహాలక్ష్మీస్తు దేవతా .. 6..

క్లీంబీజపదమిత్యుక్తం శక్తిస్తు భువనేశ్వరీ .
అఙ్గన్యాసః కరన్యాసః స ఇత్యాదిః ప్రకీర్తితః .. 7..

వన్దే పద్మకరాం ప్రసన్నవదనాం సౌభాగ్యదాం భాగ్యదాం
హస్తాభ్యామభయప్రదాం మణిగణైర్నానావిధైర్భూషితామ్ .
భక్తాభీష్టఫలప్రదాం హరిహరబ్రహ్మాదిభిః సేవితాం-
పార్శ్వే పఙ్కజశఙ్ఖపద్మనిధిభిర్యుక్తాం సదా శక్తిభిః .. 8..

సరసిజనయనే సరోజహస్తే ధవలతమాంశుకగన్ధమాల్యశోభే .
భగవతి హరివల్లభే మనోజ్ఞే త్రిభువనభూతికరి ప్రసీద మహ్యమ్ .. 9..

ప్రకృతిం వికృతిం విద్యాం సర్వభూతహితప్రదామ్ .
శ్రద్ధాం విభూతిం సురభిం నమామి పరమాత్మికామ్ .. 10..

వాచం పద్మాలయాం పద్మాం శుచిం స్వాహాం స్వధాం సుధామ్ .
ధన్యాం హిరణ్మయీం లక్ష్మీం నిత్యపుష్టాం విభావరీమ్ .. 11..

అదితిం చ దితిం దీప్తాం వసుధాం వసుధారిణీమ్ .
నమామి కమలాం కాన్తాం కామాక్షీం క్రోధసమ్భవామ్ .. 12..

అనుగ్రహపదాం బుద్ధిమనఘాం హరివల్లభామ్ .
అశోకామమృతాం దీప్తాం లోకశోకవినాశినీమ్ .. 13..

నమామి ధర్మనిలయాం కరుణాం లోకమాతరమ్ .
పద్మప్రియాం పద్మహస్తాం పద్మాక్షీం పద్మసున్దరీమ్ .. 14..

పద్మోద్భవాం పద్మముఖీం పద్మనాభప్రియాం రమామ్ .
పద్మమాలాధరాం దేవీం పద్మినీం పద్మగన్ధినీమ్ .. 15..

పుణ్యగన్ధాం సుప్రసన్నాం ప్రసాదాభిముఖీం ప్రభామ్ .
నమామి చన్ద్రవదనాం చన్ద్రాం చన్ద్రసహోదరీమ్ .. 16..

చతుర్భుజాం చన్ద్రరూపామిన్దిరామిన్దుశీతలామ్ .
ఆహ్లాదజననీం పుష్టిం శివాం శివకరీం సతీమ్ .. 17..

విమలాం విశ్వజననీం తుష్టిం దారిద్ర్యనాశినీమ్ .
ప్రీతిపుష్కరిణీం శాన్తాం శుక్లమాల్యామ్బరాం శ్రియమ్ .. 18..

భాస్కరీం బిల్వనిలయాం వరారోహాం యశస్వినీమ్ .
వసున్ధరాముదారాఙ్గీం హరిణీం హేమమాలినీమ్ .. 19..

ధనధాన్యకరీం సిద్ధిం సదా సౌమ్యాం శుభప్రదామ్ .
నృపవేశ్మగతానన్దాం వరలక్ష్మీం వసుప్రదామ్ .. 20..

శుభాం హిరణ్యప్రాకారాం సముద్రతనయాం జయామ్ .
నమామి మఙ్గలాం దేవీం విష్ణువక్షఃస్థలస్థితామ్ .. 21..

విష్ణుపత్నీం ప్రసన్నాక్షీం నారాయణసమాశ్రితామ్ .
దారిద్ర్యధ్వంసినీం దేవీం సర్వోపద్రవహారిణీమ్ .. 22..

నవదుర్గాం మహాకాలీం బ్రహ్మవిష్ణుశివాత్మికామ్ .
త్రికాలజ్ఞానసమ్పన్నాం నమామి భువనేశ్వరీమ్ .. 23..

లక్ష్మీం క్షీరసముద్రరాజతనయాం శ్రీరఙ్గధామేశ్వరీమ్
దాసీభూతసమస్తదేవవనితాం లోకైకదీపాఙ్కురామ్ .
శ్రీమన్మన్దకటాక్షలబ్ధవిభవబ్రహ్మేన్ద్రగఙ్గాధరామ్
త్వాం త్రైలోక్యకుటుమ్బినీం సరసిజాం వన్దే ముకున్దప్రియామ్ .. 24..

మాతర్నమామి కమలే కమలాయతాక్షి
శ్రీవిష్ణుహృత్కమలవాసిని విశ్వమాతః .
క్షీరోదజే కమలకోమలగర్భగౌరి
లక్ష్మి ప్రసీద సతతం నమతాం శరణ్యే .. 25..

త్రికాలం యో జపేద్విద్వాన్ షణ్మాసం విజితేన్ద్రియః .
దారిద్ర్యధ్వంసనం కృత్వా సర్వమాప్నోత్యయత్నతః .. 26..

దేవీనామసహస్రేషు పుణ్యమష్టోత్తరం శతమ్ .
యేన శ్రియమవాప్నోతి కోటిజన్మదరిద్రతః .. 27..

భృగువారే శతం ధీమాన్ పఠేద్వత్సరమాత్రకమ్
అష్టైశ్వర్యమవాప్నోతి కుబేర ఇవ భూతలే .. 28..

దారిద్ర్యమోచనం నామ స్తోత్రమమ్బాపరం శతమ్ .
యేన శ్రియమవాప్నోతి కోటిజన్మదరిద్రితః .. 29..

భుక్త్వా తు విపులాన్ భోగాన్ అన్తే సాయుజ్యమాప్నుయాత్ .
ప్రాతఃకాలే పఠేన్నిత్యం సర్వదుఃఖోపశాన్తయే .
పఠంస్తు చిన్తయేద్దేవీం సర్వాభరణభూషితామ్ .. 30..