શ્રીલક્ષ્મ્યષ્ટોત્તરશતનામસ્તોત્રમ્

.. શ્રીલક્ષ્મી અષ્ટોત્તરશતનામસ્તોત્રમ્ ..

દેવ્યુવાચ
દેવદેવ મહાદેવ ત્રિકાલજ્ઞ મહેશ્વર .
કરુણાકર દેવેશ ભક્તાનુગ્રહકારક .
અષ્ટોત્તરશતં લક્ષ્મ્યાઃ શ્રોતુમિચ્છામિ તત્ત્વતઃ .. ૧..

ઈશ્વર ઉવાચ
દેવિ સાધુ મહાભાગે મહાભાગ્યપ્રદાયકમ્ .
સર્વૈશ્વર્યકરં પુણ્યં સર્વપાપપ્રણાશનમ્ .. ૨..

સર્વદારિદ્ર્યશમનં શ્રવણાદ્ભુક્તિમુક્તિદમ્ .
રાજવશ્યકરં દિવ્યં ગુહ્યાદ્ગુહ્યતમં પરમ્ .. ૩..

દુર્લભં સર્વદેવાનાં ચતુઃષષ્ટિકલાસ્પદમ્ .
પદ્માદીનાં વરાન્તાનાં વિધીનાં નિત્યદાયકમ્ .. ૪..

સમસ્તદેવસંસેવ્યમણિમાદ્યષ્ટસિદ્ધિદમ્ .
કિમત્ર બહુનોક્તેન દેવી પ્રત્યક્ષદાયકમ્ .. ૫..

તવ પ્રીત્યાદ્ય વક્ષ્યામિ સમાહિતમનાઃ શૃણુ .
અષ્ટોત્તરશતસ્યાસ્ય મહાલક્ષ્મીસ્તુ દેવતા .. ૬..

ક્લીંબીજપદમિત્યુક્તં શક્તિસ્તુ ભુવનેશ્વરી .
અઙ્ગન્યાસઃ કરન્યાસઃ સ ઇત્યાદિઃ પ્રકીર્તિતઃ .. ૭..

વન્દે પદ્મકરાં પ્રસન્નવદનાં સૌભાગ્યદાં ભાગ્યદાં
હસ્તાભ્યામભયપ્રદાં મણિગણૈર્નાનાવિધૈર્ભૂષિતામ્ .
ભક્તાભીષ્ટફલપ્રદાં હરિહરબ્રહ્માદિભિઃ સેવિતાં-
પાર્શ્વે પઙ્કજશઙ્ખપદ્મનિધિભિર્યુક્તાં સદા શક્તિભિઃ .. ૮..

સરસિજનયને સરોજહસ્તે ધવલતમાંશુકગન્ધમાલ્યશોભે .
ભગવતિ હરિવલ્લભે મનોજ્ઞે ત્રિભુવનભૂતિકરિ પ્રસીદ મહ્યમ્ .. ૯..

પ્રકૃતિં વિકૃતિં વિદ્યાં સર્વભૂતહિતપ્રદામ્ .
શ્રદ્ધાં વિભૂતિં સુરભિં નમામિ પરમાત્મિકામ્ .. ૧૦..

વાચં પદ્માલયાં પદ્માં શુચિં સ્વાહાં સ્વધાં સુધામ્ .
ધન્યાં હિરણ્મયીં લક્ષ્મીં નિત્યપુષ્ટાં વિભાવરીમ્ .. ૧૧..

અદિતિં ચ દિતિં દીપ્તાં વસુધાં વસુધારિણીમ્ .
નમામિ કમલાં કાન્તાં કામાક્ષીં ક્રોધસમ્ભવામ્ .. ૧૨..

અનુગ્રહપદાં બુદ્ધિમનઘાં હરિવલ્લભામ્ .
અશોકામમૃતાં દીપ્તાં લોકશોકવિનાશિનીમ્ .. ૧૩..

નમામિ ધર્મનિલયાં કરુણાં લોકમાતરમ્ .
પદ્મપ્રિયાં પદ્મહસ્તાં પદ્માક્ષીં પદ્મસુન્દરીમ્ .. ૧૪..

પદ્મોદ્ભવાં પદ્મમુખીં પદ્મનાભપ્રિયાં રમામ્ .
પદ્મમાલાધરાં દેવીં પદ્મિનીં પદ્મગન્ધિનીમ્ .. ૧૫..

પુણ્યગન્ધાં સુપ્રસન્નાં પ્રસાદાભિમુખીં પ્રભામ્ .
નમામિ ચન્દ્રવદનાં ચન્દ્રાં ચન્દ્રસહોદરીમ્ .. ૧૬..

ચતુર્ભુજાં ચન્દ્રરૂપામિન્દિરામિન્દુશીતલામ્ .
આહ્લાદજનનીં પુષ્ટિં શિવાં શિવકરીં સતીમ્ .. ૧૭..

વિમલાં વિશ્વજનનીં તુષ્ટિં દારિદ્ર્યનાશિનીમ્ .
પ્રીતિપુષ્કરિણીં શાન્તાં શુક્લમાલ્યામ્બરાં શ્રિયમ્ .. ૧૮..

ભાસ્કરીં બિલ્વનિલયાં વરારોહાં યશસ્વિનીમ્ .
વસુન્ધરામુદારાઙ્ગીં હરિણીં હેમમાલિનીમ્ .. ૧૯..

ધનધાન્યકરીં સિદ્ધિં સદા સૌમ્યાં શુભપ્રદામ્ .
નૃપવેશ્મગતાનન્દાં વરલક્ષ્મીં વસુપ્રદામ્ .. ૨૦..

શુભાં હિરણ્યપ્રાકારાં સમુદ્રતનયાં જયામ્ .
નમામિ મઙ્ગલાં દેવીં વિષ્ણુવક્ષઃસ્થલસ્થિતામ્ .. ૨૧..

વિષ્ણુપત્નીં પ્રસન્નાક્ષીં નારાયણસમાશ્રિતામ્ .
દારિદ્ર્યધ્વંસિનીં દેવીં સર્વોપદ્રવહારિણીમ્ .. ૨૨..

નવદુર્ગાં મહાકાલીં બ્રહ્મવિષ્ણુશિવાત્મિકામ્ .
ત્રિકાલજ્ઞાનસમ્પન્નાં નમામિ ભુવનેશ્વરીમ્ .. ૨૩..

લક્ષ્મીં ક્ષીરસમુદ્રરાજતનયાં શ્રીરઙ્ગધામેશ્વરીમ્
દાસીભૂતસમસ્તદેવવનિતાં લોકૈકદીપાઙ્કુરામ્ .
શ્રીમન્મન્દકટાક્ષલબ્ધવિભવબ્રહ્મેન્દ્રગઙ્ગાધરામ્
ત્વાં ત્રૈલોક્યકુટુમ્બિનીં સરસિજાં વન્દે મુકુન્દપ્રિયામ્ .. ૨૪..

માતર્નમામિ કમલે કમલાયતાક્ષિ
શ્રીવિષ્ણુહૃત્કમલવાસિનિ વિશ્વમાતઃ .
ક્ષીરોદજે કમલકોમલગર્ભગૌરિ
લક્ષ્મિ પ્રસીદ સતતં નમતાં શરણ્યે .. ૨૫..

ત્રિકાલં યો જપેદ્વિદ્વાન્ ષણ્માસં વિજિતેન્દ્રિયઃ .
દારિદ્ર્યધ્વંસનં કૃત્વા સર્વમાપ્નોત્યયત્નતઃ .. ૨૬..

દેવીનામસહસ્રેષુ પુણ્યમષ્ટોત્તરં શતમ્ .
યેન શ્રિયમવાપ્નોતિ કોટિજન્મદરિદ્રતઃ .. ૨૭..

ભૃગુવારે શતં ધીમાન્ પઠેદ્વત્સરમાત્રકમ્
અષ્ટૈશ્વર્યમવાપ્નોતિ કુબેર ઇવ ભૂતલે .. ૨૮..

દારિદ્ર્યમોચનં નામ સ્તોત્રમમ્બાપરં શતમ્ .
યેન શ્રિયમવાપ્નોતિ કોટિજન્મદરિદ્રિતઃ .. ૨૯..

ભુક્ત્વા તુ વિપુલાન્ ભોગાન્ અન્તે સાયુજ્યમાપ્નુયાત્ .
પ્રાતઃકાલે પઠેન્નિત્યં સર્વદુઃખોપશાન્તયે .
પઠંસ્તુ ચિન્તયેદ્દેવીં સર્વાભરણભૂષિતામ્ .. ૩૦..