శ్రీదుర్గాధ్యానమ్

శ్రీదుర్గాధ్యానమ్

జటాజూటసమాయుక్తామర్ద్ధేన్దుకృతశేఖరామ్ .
లోచనత్రయసంయుక్తాం పూర్ణేన్దుసదృశాననామ్ .. 1..

అతసీపుష్పవర్ణాభాం సుప్రతిష్ఠాం సులోచనామ్ .
నవయౌవనసమ్పన్నాం సర్వాభరణభూషితామ్ .. 2..

సుచారుదశనాం తద్వత్ పీనోన్నతపయోధరామ్ .
త్రిభఙ్గస్థానసంస్థానాం మహిషాసురమర్దినీమ్ .. 3..

మృణాలాయతసంస్పర్శదశబాహుసమన్వితామ్ .
త్రిశూలం దక్షిణే పాణౌ ఖడ్గం చక్రం క్రమాదధః .. 4..

తీక్ష్ణబాణం తథా శక్తిం దక్షిణే సన్నివేశయేత్ .
ఖేటకం పూర్ణచాపఞ్చ పాశమఙ్కుశమేవ చ .. 5..

ఘణ్టాం వా పరశుం వాపి వామతః సన్నివేశయేత్ .
అధస్తాన్మహిషం తద్వద్విశిరస్కం ప్రదర్శయేత్ .. 6..

శిరశ్ఛేదోద్భవం తద్వద్దానవం ఖడ్గపాణినమ్ .
హృది శూలేన నిర్భిన్నం నిర్యదన్త్రవిభూషితమ్ .. 7..

రక్తరక్తీకృతాఙ్గఞ్చ రక్తవిస్ఫురితేక్షణమ్ .
వేష్టితం నాగపాశేన భ్రుకుటీభీషణాననమ్ .. 8..

సపాశవామహస్తేన ధృతకేశఞ్చ దుర్గయా .
వమద్రుధిరవక్త్రఞ్చ దేవ్యాః సింహం ప్రదర్శయేత్ .. 9..

దేవ్యాస్తు దక్షిణం పాదం సమం సింహోపరిస్థితమ్ .
కిఞ్చిదూర్ద్ధ్వం తథా వామమఙ్గుష్ఠం మహిషోపరి .. 10..

శత్రుక్షయకరీం దేవీం దైత్యదానవదర్పహామ్ .
ప్రసన్నవదనాం దేవీం సర్వ్వకామఫలప్రదామ్ .
స్తూయమానఞ్చ తద్రూపమమరైః సన్నివేశయేత్ .. 11..

ఉగ్రచణ్డా ప్రచణ్డా చ చణ్డోగ్రా చణ్డనాయికా .
చణ్డా చణ్డవతీ చైవ చణ్డరూపాతిచణ్డికా .. 12..

ఆభిః శక్తిభిరష్టాభిః సతతం పరివేష్టితామ్ .
చిన్తయేత్ సతతం దుర్గాం ధర్మకామార్థమోక్షదామ్ .. 13..