શ્રીદુર્ગાધ્યાનમ્

શ્રીદુર્ગાધ્યાનમ્

જટાજૂટસમાયુક્તામર્દ્ધેન્દુકૃતશેખરામ્ .
લોચનત્રયસંયુક્તાં પૂર્ણેન્દુસદૃશાનનામ્ .. ૧..

અતસીપુષ્પવર્ણાભાં સુપ્રતિષ્ઠાં સુલોચનામ્ .
નવયૌવનસમ્પન્નાં સર્વાભરણભૂષિતામ્ .. ૨..

સુચારુદશનાં તદ્વત્ પીનોન્નતપયોધરામ્ .
ત્રિભઙ્ગસ્થાનસંસ્થાનાં મહિષાસુરમર્દિનીમ્ .. ૩..

મૃણાલાયતસંસ્પર્શદશબાહુસમન્વિતામ્ .
ત્રિશૂલં દક્ષિણે પાણૌ ખડ્ગં ચક્રં ક્રમાદધઃ .. ૪..

તીક્ષ્ણબાણં તથા શક્તિં દક્ષિણે સન્નિવેશયેત્ .
ખેટકં પૂર્ણચાપઞ્ચ પાશમઙ્કુશમેવ ચ .. ૫..

ઘણ્ટાં વા પરશું વાપિ વામતઃ સન્નિવેશયેત્ .
અધસ્તાન્મહિષં તદ્વદ્વિશિરસ્કં પ્રદર્શયેત્ .. ૬..

શિરશ્છેદોદ્ભવં તદ્વદ્દાનવં ખડ્ગપાણિનમ્ .
હૃદિ શૂલેન નિર્ભિન્નં નિર્યદન્ત્રવિભૂષિતમ્ .. ૭..

રક્તરક્તીકૃતાઙ્ગઞ્ચ રક્તવિસ્ફુરિતેક્ષણમ્ .
વેષ્ટિતં નાગપાશેન ભ્રુકુટીભીષણાનનમ્ .. ૮..

સપાશવામહસ્તેન ધૃતકેશઞ્ચ દુર્ગયા .
વમદ્રુધિરવક્ત્રઞ્ચ દેવ્યાઃ સિંહં પ્રદર્શયેત્ .. ૯..

દેવ્યાસ્તુ દક્ષિણં પાદં સમં સિંહોપરિસ્થિતમ્ .
કિઞ્ચિદૂર્દ્ધ્વં તથા વામમઙ્ગુષ્ઠં મહિષોપરિ .. ૧૦..

શત્રુક્ષયકરીં દેવીં દૈત્યદાનવદર્પહામ્ .
પ્રસન્નવદનાં દેવીં સર્વ્વકામફલપ્રદામ્ .
સ્તૂયમાનઞ્ચ તદ્રૂપમમરૈઃ સન્નિવેશયેત્ .. ૧૧..

ઉગ્રચણ્ડા પ્રચણ્ડા ચ ચણ્ડોગ્રા ચણ્ડનાયિકા .
ચણ્ડા ચણ્ડવતી ચૈવ ચણ્ડરૂપાતિચણ્ડિકા .. ૧૨..

આભિઃ શક્તિભિરષ્ટાભિઃ સતતં પરિવેષ્ટિતામ્ .
ચિન્તયેત્ સતતં દુર્ગાં ધર્મકામાર્થમોક્ષદામ્ .. ૧૩..