.. లిఙ్గాష్టకమ్ ..

.. లిఙ్గాష్టకమ్ ..

బ్రహ్మమురారిసురార్చితలిఙ్గం నిర్మలభాసితశోభితలిఙ్గమ్.
జన్మజదుఃఖవినాశకలిఙ్గం తత్ ప్రణమామి సదాశివలిఙ్గమ్.. 1..

దేవమునిప్రవరార్చితలిఙ్గం కామదహం కరుణాకరలిఙ్గమ్.
రావణదర్పవినాశనలిఙ్గం తత్ ప్రణమామి సదాశివలిఙ్గమ్.. 2..

సర్వసుగన్ధిసులేపితలిఙ్గం బుద్ధివివర్ధనకారణలిఙ్గమ్.
సిద్ధసురాసురవన్దితలిఙ్గం తత్ ప్రణమామి సదాశివలిఙ్గమ్.. 3..

కనకమహామణిభూషితలిఙ్గం ఫణిపతివేష్టితశోభితలిఙ్గమ్.
దక్షసుయజ్ఞవినాశనలిఙ్గం తత్ ప్రణమామి సదాశివలిఙ్గమ్.. 4..

కుఙ్కుమచన్దనలేపితలిఙ్గం పఙ్కజహారసుశోభితలిఙ్గమ్.
సఞ్చితపాపవినాశనలిఙ్గం తత్ ప్రణమామి సదాశివలిఙ్గమ్.. 5..

దేవగణార్చితసేవితలిఙ్గం భావైర్భక్తిభిరేవ చ లిఙ్గమ్.
దినకరకోటిప్రభాకరలిఙ్గం తత్ ప్రణమామి సదాశివలిఙ్గమ్.. 6..

అష్టదలోపరివేష్టితలిఙ్గం సర్వసముద్భవకారణలిఙ్గమ్.
అష్టదరిద్రవినాశితలిఙ్గం తత్ ప్రణమామి సదాశివలిఙ్గమ్.. 7..

సురగురుసురవరపూజితలిఙ్గం సురవనపుష్పసదార్చితలిఙ్గమ్.
పరాత్పరం పరమాత్మకలిఙ్గం తత్ ప్రణమామి సదాశివలిఙ్గమ్.. 8..

లిఙ్గాష్టకమిదం పుణ్యం యః పఠేత్ శివసన్నిధౌ.
శివలోకమవాప్నోతి శివేన సహ మోదతే.. 9 ..