శ్రీమద్భగవద్గీతా
శ్రీమద్భగవద్గీతా
గీతాశాస్త్రమిదం పుణ్యం యః పఠేత్ ప్రయతః పుమాన్.
విష్ణోః పదమవాప్నోతి భయశోకాదివర్జితః..1..
గీతాధ్యయనశీలస్య ప్రాణాయామపరస్య చ.
నైవ సన్తి హి పాపాని పూర్వజన్మకృతాని చ..2..
మలనిర్మోచనం పుంసాం జలస్నానం దినే దినే.
సకృద్గీతామ్భసి స్నానం సంసారమలనాశనమ్..3..
గీతా సుగీతా కర్తవ్యా కిమన్యైః శాస్త్రవిస్తరైః.
యా స్వయం పద్మనాభస్య ముఖపద్మాద్వినిఃసృతా..4..
భారతామృతసర్వస్వం విష్ణోర్వక్త్రాద్వినిఃసృతమ్.
గీతాగఙ్గోదకం పీత్వా పునర్జన్మ న విద్యతే..5..
సర్వోపనిషదో గావో దోగ్ధా గోపాలనన్దనః.
పార్థో వత్సః సుధీర్భోక్తా దుగ్ధం గీతామృతం మహత్..6..
ఏకం శాస్త్రం దేవకీపుత్రగీతమ్
ఏకో దేవో దేవకీపుత్ర ఏవ.
ఏకో మన్త్రస్తస్య నామాని యాని
కర్మాప్యేకం తస్య దేవస్య సేవా..7..
ధృతరాష్ట్ర ఉవాచ
ధర్మక్షేత్రే కురుక్షేత్రే సమవేతా యుయుత్సవః.
మామకాః పాణ్డవాశ్చైవ కిమకుర్వత సఞ్జయ..1..
సఞ్జయ ఉవాచ
దృష్ట్వా తు పాణ్డవానీకం వ్యూఢం దుర్యోధనస్తదా.
ఆచార్యముపసఙ్గమ్య రాజా వచనమబ్రవీత్..2..
పశ్యైతాం పాణ్డుపుత్రాణామాచార్య మహతీం చమూమ్.
వ్యూఢాం ద్రుపదపుత్రేణ తవ శిష్యేణ ధీమతా..3..
అత్ర శూరా మహేష్వాసా భీమార్జునసమా యుధి.
యుయుధానో విరాటశ్చ ద్రుపదశ్చ మహారథః..4..
ధృష్టకేతుశ్చేకితానః కాశిరాజశ్చ వీర్యవాన్.
పురుజిత్ కున్తిభోజశ్చ శైబ్యశ్చ నరపుఙ్గవః..5..
యుధామన్యుశ్చ విక్రాన్త ఉత్తమౌజాశ్చ వీర్యవాన్.
సౌభద్రో ద్రౌపదేయాశ్చ సర్వ ఏవ మహారథాః..6..
అస్మాకం తు విశిష్టా యే తాన్నిబోధ ద్విజోత్తమ.
నాయకా మమ సైన్యస్య సంజ్ఞార్థం తాన్ బ్రవీమి తే..7..
భవాన్ భీష్మశ్చ కర్ణశ్చ కృపశ్చ సమితిఞ్జయః.
అశ్వత్థామా వికర్ణశ్చ సౌమదత్తిస్తథైవ చ..8..
అన్యే చ బహవః శూరా మదర్థే త్యక్తజీవితాః.
నానాశస్త్రప్రహరణాః సర్వే యుద్ధవిశారదాః..9..
అపర్యాప్తం తదస్మాకం బలం భీష్మాభిరక్షితమ్.
పర్యాప్తం త్విదమేతేషాం బలం భీమాభిరక్షితమ్..10..
అయనేషు చ సర్వేషు యథాభాగమవస్థితాః.
భీష్మమేవాభిరక్షన్తు భవన్తః సర్వ ఏవ హి..11..
తస్య సఞ్జనయన్ హర్షం కురువృద్ధః పితామహః.
సింహనాదం వినద్యోచ్చైః శఙ్ఖం దధ్మౌ ప్రతాపవాన్..12..
తతః శఙ్ఖాశ్చ భేర్యశ్చ పణవానకగోముఖాః.
సహసైవాభ్యహన్యన్త స శబ్దస్తుములోఽభవత్..13..
తతః శ్వేతైర్హయైర్యుక్తే మహతి స్యన్దనే స్థితౌ.
మాధవః పాణ్డవశ్చైవ దివ్యౌ శఙ్ఖౌ ప్రదధ్మతుః..14..
పాఞ్చజన్యం హృషీకేశో దేవదత్తం ధనఞ్జయః.
పౌణ్డ్రం దధ్మౌ మహాశఙ్ఖం భీమకర్మా వృకోదరః..15..
అనన్తవిజయం రాజా కున్తీపుత్రో యుధిష్ఠిరః.
నకులః సహదేవశ్చ సుఘోషమణిపుష్పకౌ..16..
కాశ్యశ్చ పరమేష్వాసః శిఖణ్డీ చ మహారథః.
ధృష్టద్యుమ్నో విరాటశ్చ సాత్యకిశ్చాపరాజితః..17..
ద్రుపదో ద్రౌపదేయాశ్చ సర్వశః పృథివీపతే.
సౌభద్రశ్చ మహాబాహుః శఙ్ఖాన్ దధ్ముః పృథక్ పృథక్..18..
స ఘోషో ధార్తరాష్ట్రాణాం హృదయాని వ్యదారయత్.
నభశ్చ పృథివీం చైవ తుములో వ్యనునాదయన్..19..
అథ వ్యవస్థితాన్ దృష్ట్వా ధార్తరాష్ట్రాన్ కపిధ్వజః.
ప్రవృత్తే శస్త్రసమ్పాతే ధనురుద్యమ్య పాణ్డవః..20..
హృషీకేశం తదా వాక్యమిదమాహ మహీపతే.
అర్జున ఉవాచ
సేనయోరుభయోర్మధ్యే రథం స్థాపయ మేఽచ్యుత..21..
యావదేతాన్నిరీక్షేఽహం యోద్ధుకామానవస్థితాన్.
కైర్మయా సహ యోద్ధవ్యమస్మిన్ రణసముద్యమే..22..
యోత్స్యమానానవేక్షేఽహం య ఏతేఽత్ర సమాగతాః.
ధార్తరాష్ట్రస్య దుర్బుద్ధేర్యుద్ధే ప్రియచికీర్షవః..23..
సఞ్జయ ఉవాచ
ఏవముక్తో హృషీకేశో గుడాకేశేన భారత.
సేనయోరుభయోర్మధ్యే స్థాపయిత్వా రథోత్తమమ్..24..
భీష్మద్రోణప్రముఖతః సర్వేషాం చ మహీక్షితామ్.
ఉవాచ పార్థ పశ్యైతాన్ సమవేతాన్ కురూనితి..25..
తత్రాపశ్యత్ స్థితాన్ పార్థః పితౄనథ పితామహాన్.
ఆచార్యాన్ మాతులాన్ భ్రాతౄన్ పుత్రాన్ పౌత్రాన్ సఖీంస్తథా..26..
శ్వశురాన్ సుహృదశ్చైవ సేనయోరుభయోరపి.
తాన్ సమీక్ష్య స కౌన్తేయః సర్వాన్ బన్ధూనవస్థితాన్..27..
కృపయా పరయావిష్టో విషీదన్నిదమబ్రవీత్.
అర్జున ఉవాచ
దృష్ట్వేమం స్వజనం కృష్ణ యుయుత్సుం సముపస్థితమ్..28..
సీదన్తి మమ గాత్రాణి ముఖం చ పరిశుష్యతి.
వేపథుశ్చ శరీరే మే రోమహర్షశ్చ జాయతే..29..
గాణ్డీవం స్రంసతే హస్తాత్ త్వక్చైవ పరిదహ్యతే.
న చ శక్నోమ్యవస్థాతుం భ్రమతీవ చ మే మనః..30..
నిమిత్తాని చ పశ్యామి విపరీతాని కేశవ.
న చ శ్రేయోఽనుపశ్యామి హత్వా స్వజనమాహవే..31..
న కాఙ్క్షే విజయం కృష్ణ న చ రాజ్యం సుఖాని చ.
కిం నో రాజ్యేన గోవిన్ద కిం భోగైర్జీవితేన వా..32..
యేషామర్థే కాఙ్క్షితం నో రాజ్యం భోగాః సుఖాని చ.
త ఇమేఽవస్థితా యుద్ధే ప్రాణాంస్త్యక్త్వా ధనాని చ..33..
ఆచార్యాః పితరః పుత్రాస్తథైవ చ పితామహాః.
మాతులాః శ్వశురాః పౌత్రాః శ్యాలాః సమ్బన్ధినస్తథా..34..
ఏతాన్న హన్తుమిచ్ఛామి ఘ్నతోఽపి మధుసూదన.
అపి త్రైలోక్యరాజ్యస్య హేతోః కిం ను మహీకృతే..35..
నిహత్య ధార్తరాష్ట్రాన్నః కా ప్రీతిః స్యాజ్జనార్దన.
పాపమేవాశ్రయేదస్మాన్ హత్వైతానాతతాయినః..36..
తస్మాన్నార్హా వయం హన్తుం ధార్తరాష్ట్రాన్ స్వబాన్ధవాన్.
స్వజనం హి కథం హత్వా సుఖినః స్యామ మాధవ..37..
యద్యప్యేతే న పశ్యన్తి లోభోపహతచేతసః.
కులక్షయకృతం దోషం మిత్రద్రోహే చ పాతకమ్..38..
కథం న జ్ఞేయమస్మాభిః పాపాదస్మాన్నివర్తితుమ్.
కులక్షయకృతం దోషం ప్రపశ్యద్భిర్జనార్దన..39..
కులక్షయే ప్రణశ్యన్తి కులధర్మాః సనాతనాః.
ధర్మే నష్టే కులం కృత్స్నమధర్మోఽభిభవత్యుత..40..
అధర్మాభిభవాత్ కృష్ణ ప్రదుష్యన్తి కులస్త్రియః.
స్త్రీషు దుష్టాసు వార్ష్ణేయ జాయతే వర్ణసఙ్కరః..41..
సఙ్కరో నరకాయైవ కులఘ్నానాం కులస్య చ.
పతన్తి పితరో హ్యేషాం లుప్తపిణ్డోదకక్రియాః..42..
దోషైరేతైః కులఘ్నానాం వర్ణసఙ్కరకారకైః.
ఉత్సాద్యన్తే జాతిధర్మాః కులధర్మాశ్చ శాశ్వతాః..43..
ఉత్సన్నకులధర్మాణాం మనుష్యాణాం జనార్దన.
నరకే నియతం వాసో భవతీత్యనుశుశ్రుమ..44..
అహో బత మహత్పాపం కర్తుం వ్యవసితా వయమ్.
యద్రాజ్యసుఖలోభేన హన్తుం స్వజనముద్యతాః..45..
యది మామప్రతీకారమ్ అశస్త్రం శస్త్రపాణయః.
ధార్తరాష్ట్రా రణే హన్యుస్తన్మే క్షేమతరం భవేత్..46..
సఞ్జయ ఉవాచ
ఏవముక్త్వాఽర్జునః సఙ్ఖ్యే రథోపస్థ ఉపావిశత్.
విసృజ్య సశరం చాపం శోకసంవిగ్నమానసః..47..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే అర్జునవిషాదయోగో నామ ప్రథమోఽధ్యాయః..
సఞ్జయ ఉవాచ
తం తథా కృపయావిష్టమ్ అశ్రుపూర్ణాకులేక్షణమ్.
విషీదన్తమిదం వాక్యమువాచ మధుసూదనః..1..
శ్రీభగవానువాచ
కుతస్త్వా కశ్మలమిదం విషమే సముపస్థితమ్.
అనార్యజుష్టమస్వర్గ్యమకీర్తికరమర్జున..2..
క్లైబ్యం మా స్మ గమః పార్థ నైతత్త్వయ్యుపపద్యతే.
క్షుద్రం హృదయదౌర్బల్యం త్యక్త్వోత్తిష్ఠ పరన్తప..3..
అర్జున ఉవాచ
కథం భీష్మమహం సఙ్ఖ్యే ద్రోణం చ మధుసూదన.
ఇషుభిః ప్రతియోత్స్యామి పూజార్హావరిసూదన..4..
గురూనహత్వా హి మహానుభావాన్
శ్రేయో భోక్తుం భైక్ష్యమపీహ లోకే.
హత్వాఽర్థకామాంస్తు గురూనిహైవ
భుఞ్జీయ భోగాన్ రుధిరప్రదిగ్ధాన్..5..
న చైతద్విద్మః కతరన్నో గరీయో
యద్వా జయేమ యది వా నో జయేయుః.
యానేవ హత్వా న జిజీవిషామః
తేఽవస్థితాః ప్రముఖే ధార్తరాష్ట్రాః..6..
కార్పణ్యదోషోపహతస్వభావః
పృచ్ఛామి త్వాం ధర్మసమ్మూఢచేతాః.
యచ్ఛ్రేయః స్యాన్నిశ్చితం బ్రూహి తన్మే
శిష్యస్తేఽహం శాధి మాం త్వాం ప్రపన్నమ్..7..
న హి ప్రపశ్యామి మమాపనుద్యాద్
యచ్ఛోకముచ్ఛోషణమిన్ద్రియాణామ్.
అవాప్య భూమావసపత్నమృద్ధమ్
రాజ్యం సురాణామపి చాధిపత్యమ్..8..
సఞ్జయ ఉవాచ
ఏవముక్త్వా హృషీకేశం గుడాకేశః పరన్తప.
న యోత్స్య ఇతి గోవిన్దముక్త్వా తూష్ణీం బభూవ హ..9..
తమువాచ హృషీకేశః ప్రహసన్నివ భారత.
సేనయోరుభయోర్మధ్యే విషీదన్తమిదం వచః..10..
శ్రీభగవానువాచ
అశోచ్యానన్వశోచస్త్వం ప్రజ్ఞావాదాంశ్చ భాషసే.
గతాసూనగతాసూంశ్చ నానుశోచన్తి పణ్డితాః..11..
న త్వేవాహం జాతు నాసం న త్వం నేమే జనాధిపాః.
న చైవ న భవిష్యామః సర్వే వయమతః పరమ్..12..
దేహినోఽస్మిన్ యథా దేహే కౌమారం యౌవనం జరా.
తథా దేహాన్తరప్రాప్తిర్ధీరస్తత్ర న ముహ్యతి..13..
మాత్రాస్పర్శాస్తు కౌన్తేయ శీతోష్ణసుఖదుఃఖదాః.
ఆగమాపాయినోఽనిత్యాస్తాంస్తితిక్షస్వ భారత..14..
యం హి న వ్యథయన్త్యేతే పురుషం పురుషర్షభ.
సమదుఃఖసుఖం ధీరం సోఽమృతత్వాయ కల్పతే..15..
నాసతో విద్యతే భావో నాభావో విద్యతే సతః.
ఉభయోరపి దృష్టోఽన్తస్త్వనయోస్తత్త్వదర్శిభిః..16..
అవినాశి తు తద్విద్ధి యేన సర్వమిదం తతమ్.
వినాశమవ్యయస్యాస్య న కశ్చిత్ కర్తుమర్హతి..17..
అన్తవన్త ఇమే దేహా నిత్యస్యోక్తాః శరీరిణః.
అనాశినోఽప్రమేయస్య తస్మాద్యుధ్యస్వ భారత..18..
య ఏనం వేత్తి హన్తారం యశ్చైనం మన్యతే హతమ్.
ఉభౌ తౌ న విజానీతో నాయం హన్తి న హన్యతే..19..
న జాయతే మ్రియతే వా కదాచిత్
నాయం భూత్వా భవితా వా న భూయః.
అజో నిత్యః శాశ్వతోఽయం పురాణో
న హన్యతే హన్యమానే శరీరే..20..
వేదావినాశినం నిత్యం య ఏనమజమవ్యయమ్.
కథం స పురుషః పార్థ కం ఘాతయతి హన్తి కమ్..21..
వాసాంసి జీర్ణాని యథా విహాయ
నవాని గృహ్ణాతి నరోఽపరాణి.
తథా శరీరాణి విహాయ జీర్ణాని
అన్యాని సంయాతి నవాని దేహీ..22..
నైనం ఛిన్దన్తి శస్త్రాణి నైనం దహతి పావకః.
న చైనం క్లేదయన్త్యాపో న శోషయతి మారుతః..23..
అచ్ఛేద్యోఽయమదాహ్యోఽయమక్లేద్యోఽశోష్య ఏవ చ.
నిత్యః సర్వగతః స్థాణురచలోఽయం సనాతనః..24..
అవ్యక్తోఽయమచిన్త్యోఽయమవికార్యోఽయముచ్యతే.
తస్మాదేవం విదిత్వైనం నానుశోచితుమర్హసి..25..
అథ చైనం నిత్యజాతం నిత్యం వా మన్యసే మృతమ్.
తథాఽపి త్వం మహాబాహో నైవం శోచితుమర్హసి..26..
జాతస్య హి ధ్రువో మృత్యుర్ధ్రువం జన్మ మృతస్య చ.
తస్మాదపరిహార్యేఽర్థే న త్వం శోచితుమర్హసి..27..
అవ్యక్తాదీని భూతాని వ్యక్తమధ్యాని భారత.
అవ్యక్తనిధనాన్యేవ తత్ర కా పరిదేవనా..28..
ఆశ్చర్యవత్పశ్యతి కశ్చిదేనమ్
ఆశ్చర్యవద్వదతి తథైవ చాన్యః.
ఆశ్చర్యవచ్చైనమన్యః శృణోతి
శ్రుత్వాఽప్యేనం వేద న చైవ కశ్చిత్..29..
దేహీ నిత్యమవధ్యోఽయం దేహే సర్వస్య భారత.
తస్మాత్ సర్వాణి భూతాని న త్వం శోచితుమర్హసి..30..
స్వధర్మమపి చావేక్ష్య న వికమ్పితుమర్హసి.
ధర్మ్యాద్ధి యుద్ధాచ్ఛ్రేయోఽన్యత్ క్షత్రియస్య న విద్యతే..31..
యదృచ్ఛయా చోపపన్నం స్వర్గద్వారమపావృతమ్.
సుఖినః క్షత్రియాః పార్థ లభన్తే యుద్ధమీదృశమ్..32..
అథ చేత్త్వమిమం ధర్మ్యం సఙ్గ్రామం న కరిష్యసి.
తతః స్వధర్మం కీర్తిం చ హిత్వా పాపమవాప్స్యసి..33..
అకీర్తిం చాపి భూతాని కథయిష్యన్తి తేఽవ్యయామ్.
సమ్భావితస్య చాకీర్తిర్మరణాదతిరిచ్యతే..34..
భయాద్రణాదుపరతం మంస్యన్తే త్వాం మహారథాః.
యేషాం చ త్వం బహుమతో భూత్వా యాస్యసి లాఘవమ్..35..
అవాచ్యవాదాంశ్చ బహూన్ వదిష్యన్తి తవాహితాః.
నిన్దన్తస్తవ సామర్థ్యం తతో దుఃఖతరం ను కిమ్..36..
హతో వా ప్రాప్స్యసి స్వర్గం జిత్వా వా భోక్ష్యసే మహీమ్.
తస్మాదుత్తిష్ఠ కౌన్తేయ యుద్ధాయ కృతనిశ్చయః..37..
సుఖదుఃఖే సమే కృత్వా లాభాలాభౌ జయాజయౌ.
తతో యుద్ధాయ యుజ్యస్వ నైవం పాపమవాప్స్యసి..38..
ఏషా తేఽభిహితా సాఙ్ఖ్యే బుద్ధిర్యోగే త్విమాం శృణు.
బుద్ధ్యా యుక్తో యయా పార్థ కర్మబన్ధం ప్రహాస్యసి..39..
నేహాభిక్రమనాశోఽస్తి ప్రత్యవాయో న విద్యతే.
స్వల్పమప్యస్య ధర్మస్య త్రాయతే మహతో భయాత్..40..
వ్యవసాయాత్మికా బుద్ధిరేకేహ కురునన్దన.
బహుశాఖా హ్యనన్తాశ్చ బుద్ధయోఽవ్యవసాయినామ్..41..
యామిమాం పుష్పితాం వాచం ప్రవదన్త్యవిపశ్చితః.
వేదవాదరతాః పార్థ నాన్యదస్తీతి వాదినః..42..
కామాత్మానః స్వర్గపరా జన్మకర్మఫలప్రదామ్.
క్రియావిశేషబహులాం భోగైశ్వర్యగతిం ప్రతి..43..
భోగైశ్వర్యప్రసక్తానాం తయాఽపహృతచేతసామ్.
వ్యవసాయాత్మికా బుద్ధిః సమాధౌ న విధీయతే..44..
త్రైగుణ్యవిషయా వేదా నిస్త్రైగుణ్యో భవార్జున.
నిర్ద్వన్ద్వో నిత్యసత్త్వస్థో నిర్యోగక్షేమ ఆత్మవాన్..45..
యావానర్థ ఉదపానే సర్వతః సమ్ప్లుతోదకే.
తావాన్ సర్వేషు వేదేషు బ్రాహ్మణస్య విజానతః..46..
కర్మణ్యేవాధికారస్తే మా ఫలేషు కదాచన.
మా కర్మఫలహేతుర్భూర్మా తే సఙ్గోఽస్త్వకర్మణి..47..
యోగస్థః కురు కర్మాణి సఙ్గం త్యక్త్వా ధనఞ్జయ.
సిద్ధ్యసిద్ధ్యోః సమో భూత్వా సమత్వం యోగ ఉచ్యతే..48..
దూరేణ హ్యవరం కర్మ బుద్ధియోగాద్ధనఞ్జయ.
బుద్ధౌ శరణమన్విచ్ఛ కృపణాః ఫలహేతవః..49..
బుద్ధియుక్తో జహాతీహ ఉభే సుకృతదుష్కృతే.
తస్మాద్యోగాయ యుజ్యస్వ యోగః కర్మసు కౌశలమ్..50..
కర్మజం బుద్ధియుక్తా హి ఫలం త్యక్త్వా మనీషిణః.
జన్మబన్ధవినిర్ముక్తాః పదం గచ్ఛన్త్యనామయమ్..51..
యదా తే మోహకలిలం బుద్ధిర్వ్యతితరిష్యతి.
తదా గన్తాసి నిర్వేదం శ్రోతవ్యస్య శ్రుతస్య చ..52..
శ్రుతివిప్రతిపన్నా తే యదా స్థాస్యతి నిశ్చలా.
సమాధావచలా బుద్ధిస్తదా యోగమవాప్స్యసి..53..
అర్జున ఉవాచ
స్థితప్రజ్ఞస్య కా భాషా సమాధిస్థస్య కేశవ.
స్థితధీః కిం ప్రభాషేత కిమాసీత వ్రజేత కిమ్..54..
శ్రీభగవానువాచ
ప్రజహాతి యదా కామాన్ సర్వాన్ పార్థ మనోగతాన్.
ఆత్మన్యేవాత్మనా తుష్టః స్థితప్రజ్ఞస్తదోచ్యతే..55..
దుఃఖేష్వనుద్విగ్నమనాః సుఖేషు విగతస్పృహః.
వీతరాగభయక్రోధః స్థితధీర్మునిరుచ్యతే..56..
యః సర్వత్రానభిస్నేహస్తత్ తత్ ప్రాప్య శుభాశుభమ్.
నాభినన్దతి న ద్వేష్టి తస్య ప్రజ్ఞా ప్రతిష్ఠితా..57..
యదా సంహరతే చాయం కూర్మోఽఙ్గానీవ సర్వశః.
ఇన్ద్రియాణీన్ద్రియార్థేఽభ్యస్తస్య ప్రజ్ఞా ప్రతిష్ఠితా..58..
విషయా వినివర్తన్తే నిరాహారస్య దేహినః.
రసవర్జం రసోఽప్యస్య పరం దృష్ట్వా నివర్తతే..59..
యతతో హ్యపి కౌన్తేయ పురుషస్య విపశ్చితః.
ఇన్ద్రియాణి ప్రమాథీని హరన్తి ప్రసభం మనః..60..
తాని సర్వాణి సంయమ్య యుక్త ఆసీత మత్పరః.
వశే హి యస్యేన్ద్రియాణి తస్య ప్రజ్ఞా ప్రతిష్ఠితా..61..
ధ్యాయతో విషయాన్ పుంసః సఙ్గస్తేషూపజాయతే.
సఙ్గాత్ సఞ్జాయతే కామః కామాత్ క్రోధోఽభిజాయతే..62..
క్రోధాద్భవతి సమ్మోహః సమ్మోహాత్ స్మృతివిభ్రమః.
స్మృతిభ్రంశాద్బుద్ధినాశో బుద్ధినాశాత్ ప్రణశ్యతి..63..
రాగద్వేషవియుక్తైస్తు విషయానిన్ద్రియైశ్చరన్.
ఆత్మవశ్యైర్విధేయాత్మా ప్రసాదమధిగచ్ఛతి..64..
ప్రసాదే సర్వదుఃఖానాం హానిరస్యోపజాయతే.
ప్రసన్నచేతసో హ్యాశు బుద్ధిః పర్యవతిష్ఠతే..65..
నాస్తి బుద్ధిరయుక్తస్య న చాయుక్తస్య భావనా.
న చాభావయతః శాన్తిరశాన్తస్య కుతః సుఖమ్..66..
ఇన్ద్రియాణాం హి చరతాం యన్మనోఽనువిధీయతే.
తదస్య హరతి ప్రజ్ఞాం వాయుర్నావమివామ్భసి..67..
తస్మాద్యస్య మహాబాహో నిగృహీతాని సర్వశః.
ఇన్ద్రియాణీన్ద్రియార్థేభ్యస్తస్య ప్రజ్ఞా ప్రతిష్ఠితా..68..
యా నిశా సర్వభూతానాం తస్యాం జాగర్తి సంయమీ.
యస్యాం జాగ్రతి భూతాని సా నిశా పశ్యతో మునేః..69..
ఆపూర్యమాణమచలప్రతిష్ఠమ్
సముద్రమాపః ప్రవిశన్తి యద్వత్.
తద్వత్కామా యం ప్రవిశన్తి సర్వే
స శాన్తిమాప్నోతి న కామకామీ..70..
విహాయ కామాన్ యః సర్వాన్ పుమాంశ్చరతి నిఃస్పృహః.
నిర్మమో నిరహఙ్కారః స శాన్తిమధిగచ్ఛతి..71..
ఏషా బ్రాహ్మీ స్థితిః పార్థ నైనాం ప్రాప్య విముహ్యతి.
స్థిత్వాఽస్యామన్తకాలేఽపి బ్రహ్మనిర్వాణమృచ్ఛతి..72..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే సాఙ్ఖ్యయోగో నామ ద్వితీయోఽధ్యాయః ..
అర్జున ఉవాచ
జ్యాయసీ చేత్ కర్మణస్తే మతా బుద్ధిర్జనార్దన.
తత్ కిం కర్మణి ఘోరే మాం నియోజయసి కేశవ..1..
వ్యామిశ్రేణేవ వాక్యేన బుద్ధిం మోహయసీవ మే.
తదేకం వద నిశ్చిత్య యేన శ్రేయోఽహమాప్నుయామ్..2..
శ్రీభగవానువాచ
లోకేఽస్మిన్ ద్వివిధా నిష్ఠా పురా ప్రోక్తా మయాఽనఘ.
జ్ఞానయోగేన సాఙ్ఖ్యానాం కర్మయోగేన యోగినామ్..3..
న కర్మణామనారమ్భాన్నైష్కర్మ్యం పురుషోఽశ్నుతే.
న చ సన్న్యసనాదేవ సిద్ధిం సమధిగచ్ఛతి..4..
న హి కశ్చిత్ క్షణమపి జాతు తిష్ఠత్యకర్మకృత్.
కార్యతే హ్యవశః కర్మ సర్వః ప్రకృతిజైర్గుణైః..5..
కర్మేన్ద్రియాణి సంయమ్య య ఆస్తే మనసా స్మరన్.
ఇన్ద్రియార్థాన్ విమూఢాత్మా మిథ్యాచారః స ఉచ్యతే..6..
యస్త్విన్ద్రియాణి మనసా నియమ్యారభతేఽర్జున.
కర్మేన్ద్రియైః కర్మయోగమసక్తః స విశిష్యతే..7..
నియతం కురు కర్మ త్వం కర్మ జ్యాయో హ్యకర్మణః.
శరీరయాత్రాఽపి చ తే న ప్రసిద్ధ్యేదకర్మణః..8..
యజ్ఞార్థాత్ కర్మణోఽన్యత్ర లోకోఽయం కర్మబన్ధనః.
తదర్థం కర్మ కౌన్తేయ ముక్తసఙ్గః సమాచర..9..
సహయజ్ఞాః ప్రజాః సృష్ట్వా పురోవాచ ప్రజాపతిః.
అనేన ప్రసవిష్యధ్వమేష వోఽస్త్విష్టకామధుక్..10..
దేవాన్ భావయతాఽనేన తే దేవా భావయన్తు వః.
పరస్పరం భావయన్తః శ్రేయః పరమవాప్స్యథ..11..
ఇష్టాన్ భోగాన్ హి వో దేవా దాస్యన్తే యజ్ఞభావితాః.
తైర్దత్తానప్రదాయైభ్యో యో భుఙ్క్తే స్తేన ఏవ సః..12..
యజ్ఞశిష్టాశినః సన్తో ముచ్యన్తే సర్వకిల్బిషైః.
భుఞ్జతే తే త్వఘం పాపా యే పచన్త్యాత్మకారణాత్..13..
అన్నాద్భవన్తి భూతాని పర్జన్యాదన్నసమ్భవః.
యజ్ఞాద్భవతి పర్జన్యో యజ్ఞః కర్మసముద్భవః..14..
కర్మ బ్రహ్మోద్భవం విద్ధి బ్రహ్మాక్షరసముద్భవమ్.
తస్మాత్ సర్వగతం బ్రహ్మ నిత్యం యజ్ఞే ప్రతిష్ఠితమ్..15..
ఏవం ప్రవర్తితం చక్రం నానువర్తయతీహ యః.
అఘాయురిన్ద్రియారామో మోఘం పార్థ స జీవతి..16..
యస్త్వాత్మరతిరేవ స్యాదాత్మతృప్తశ్చ మానవః.
ఆత్మన్యేవ చ సన్తుష్టస్తస్య కార్యం న విద్యతే..17..
నైవ తస్య కృతేనార్థో నాకృతేనేహ కశ్చన.
న చాస్య సర్వభూతేషు కశ్చిదర్థవ్యపాశ్రయః..18..
తస్మాదసక్తః సతతం కార్యం కర్మ సమాచర.
అసక్తో హ్యాచరన్ కర్మ పరమాప్నోతి పూరుషః..19..
కర్మణైవ హి సంసిద్ధిమ్ ఆస్థితా జనకాదయః.
లోకసఙ్గ్రహమేవాపి సమ్పశ్యన్ కర్తుమర్హసి..20..
యద్యదాచరతి శ్రేష్ఠస్తత్తదేవేతరో జనః.
స యత్ ప్రమాణం కురుతే లోకస్తదనువర్తతే..21..
న మే పార్థాస్తి కర్తవ్యం త్రిషు లోకేషు కిఞ్చన.
నానవాప్తమవాప్తవ్యం వర్త ఏవ చ కర్మణి..22..
యది హ్యహం న వర్తేయం జాతు కర్మణ్యతన్ద్రితః.
మమ వర్త్మానువర్తన్తే మనుష్యాః పార్థ సర్వశః..23..
ఉత్సీదేయురిమే లోకా న కుర్యాం కర్మ చేదహమ్.
సఙ్కరస్య చ కర్తా స్యాముపహన్యామిమాః ప్రజాః..24..
సక్తాః కర్మణ్యవిద్వాంసో యథా కుర్వన్తి భారత.
కుర్యాద్విద్వాంస్తథాఽసక్తశ్చికీర్షుర్లోకసఙ్గ్రహమ్..25..
న బుద్ధిభేదం జనయేదజ్ఞానాం కర్మసఙ్గినామ్.
జోషయేత్ సర్వకర్మాణి విద్వాన్ యుక్తః సమాచరన్..26..
ప్రకృతేః క్రియమాణాని గుణైః కర్మాణి సర్వశః.
అహఙ్కారవిమూఢాత్మా కర్తాఽహమితి మన్యతే..27..
తత్త్వవిత్ తు మహాబాహో గుణకర్మవిభాగయోః.
గుణా గుణేషు వర్తన్త ఇతి మత్వా న సజ్జతే..28..
ప్రకృతేర్గుణసమ్మూఢాః సజ్జన్తే గుణకర్మసు.
తానకృత్స్నవిదో మన్దాన్ కృత్స్నవిన్న విచాలయేత్..29..
మయి సర్వాణి కర్మాణి సన్న్యస్యాధ్యాత్మచేతసా.
నిరాశీర్నిర్మమో భూత్వా యుధ్యస్వ విగతజ్వరః..30..
యే మే మతమిదం నిత్యమ్ అనుతిష్ఠన్తి మానవాః.
శ్రద్ధావన్తోఽనసూయన్తో ముచ్యన్తే తేఽపి కర్మభిః..31..
యే త్వేతదభ్యసూయన్తో నానుతిష్ఠన్తి మే మతమ్.
సర్వజ్ఞానవిమూఢాంస్తాన్ విద్ధి నష్టానచేతసః..32..
సదృశం చేష్టతే స్వస్యాః ప్రకృతేర్జ్ఞానవానపి.
ప్రకృతిం యాన్తి భూతాని నిగ్రహః కిం కరిష్యతి..33..
ఇన్ద్రియస్యేన్ద్రియస్యార్థే రాగద్వేషౌ వ్యవస్థితౌ.
తయోర్న వశమాగచ్ఛేత్ తౌ హ్యస్య పరిపన్థినౌ..34..
శ్రేయాన్ స్వధర్మో విగుణః పరధర్మాత్ స్వనుష్ఠితాత్.
స్వధర్మే నిధనం శ్రేయః పరధర్మో భయావహః..35..
అర్జున ఉవాచ
అథ కేన ప్రయుక్తోఽయం పాపం చరతి పూరుషః.
అనిచ్ఛన్నపి వార్ష్ణేయ బలాదివ నియోజితః..36..
శ్రీభగవానువాచ
కామ ఏష క్రోధ ఏష రజోగుణసముద్భవః.
మహాశనో మహాపాప్మా విద్ధ్యేనమిహ వైరిణమ్..37..
ధూమేనావ్రియతే వహ్నిర్యథాఽదర్శో మలేన చ.
యథోల్బేనావృతో గర్భస్తథా తేనేదమావృతమ్..38..
ఆవృతం జ్ఞానమేతేన జ్ఞానినో నిత్యవైరిణా.
కామరూపేణ కౌన్తేయ దుష్పూరేణానలేన చ..39..
ఇన్ద్రియాణి మనో బుద్ధిరస్యాధిష్ఠానముచ్యతే.
ఏతైర్విమోహయత్యేష జ్ఞానమావృత్య దేహినమ్..40..
తస్మాత్ త్వమిన్ద్రియాణ్యాదౌ నియమ్య భరతర్షభ.
పాప్మానం ప్రజహి హ్యేనం జ్ఞానవిజ్ఞాననాశనమ్..41..
ఇన్ద్రియాణి పరాణ్యాహురిన్ద్రియేభ్యః పరం మనః.
మనసస్తు పరా బుద్ధిర్యో బుద్ధేః పరతస్తు సః..42..
ఏవం బుద్ధేః పరం బుద్ధ్వా సంస్తభ్యాత్మానమాత్మనా.
జహి శత్రుం మహాబాహో కామరూపం దురాసదమ్.. 43..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే కర్మయోగో నామ తృతీయోఽధ్యాయః ..
శ్రీభగవానువాచ
ఇమం వివస్వతే యోగం ప్రోక్తవానహమవ్యయమ్.
వివస్వాన్ మనవే ప్రాహ మనురిక్ష్వాకవేఽబ్రవీత్..1..
ఏవం పరమ్పరాప్రాప్తమిమం రాజర్షయో విదుః.
స కాలేనేహ మహతా యోగో నష్టః పరన్తప..2..
స ఏవాయం మయా తేఽద్య యోగః ప్రోక్తః పురాతనః.
భక్తోఽసి మే సఖా చేతి రహస్యం హ్యేతదుత్తమమ్..3..
అర్జున ఉవాచ
అపరం భవతో జన్మ పరం జన్మ వివస్వతః.
కథమేతద్విజానీయాం త్వమాదౌ ప్రోక్తవానితి..4..
శ్రీభగవానువాచ
బహూని మే వ్యతీతాని జన్మాని తవ చార్జున.
తాన్యహం వేద సర్వాణి న త్వం వేత్థ పరన్తప..5..
అజోఽపి సన్నవ్యయాత్మా భూతానామీశ్వరోఽపి సన్.
ప్రకృతిం స్వామధిష్ఠాయ సమ్భవామ్యాత్మమాయయా..6..
యదా యదా హి ధర్మస్య గ్లానిర్భవతి భారత.
అభ్యుత్థానమధర్మస్య తదాత్మానం సృజామ్యహమ్..7..
పరిత్రాణాయ సాధూనాం వినాశాయ చ దుష్కృతామ్.
ధర్మసంస్థాపనార్థాయ సమ్భవామి యుగే యుగే..8..
జన్మ కర్మ చ మే దివ్యమేవం యో వేత్తి తత్త్వతః.
త్యక్త్వా దేహం పునర్జన్మ నైతి మామేతి సోఽర్జున..9..
వీతరాగభయక్రోధా మన్మయా మాముపాశ్రితాః.
బహవో జ్ఞానతపసా పూతా మద్భావమాగతాః..10..
యే యథా మాం ప్రపద్యన్తే తాంస్తథైవ భజామ్యహమ్.
మమ వర్త్మానువర్తన్తే మనుష్యాః పార్థ సర్వశః..11..
కాఙ్క్షన్తః కర్మణాం సిద్ధిం యజన్త ఇహ దేవతాః.
క్షిప్రం హి మానుషే లోకే సిద్ధిర్భవతి కర్మజా..12..
చాతుర్వర్ణ్యం మయా సృష్టం గుణకర్మవిభాగశః.
తస్య కర్తారమపి మాం విద్ధ్యకర్తారమవ్యయమ్..13..
న మాం కర్మాణి లిమ్పన్తి న మే కర్మఫలే స్పృహా.
ఇతి మాం యోఽభిజానాతి కర్మభిర్న స బధ్యతే..14..
ఏవం జ్ఞాత్వా కృతం కర్మ పూర్వైరపి ముముక్షుభిః.
కురు కర్మైవ తస్మాత్త్వం పూర్వైః పూర్వతరం కృతమ్..15..
కిం కర్మ కిమకర్మేతి కవయోఽప్యత్ర మోహితాః.
తత్తే కర్మ ప్రవక్ష్యామి యజ్జ్ఞాత్వా మోక్ష్యసేఽశుభాత్..16..
కర్మణో హ్యపి బోద్ధవ్యం బోద్ధవ్యం చ వికర్మణః.
అకర్మణశ్చ బోద్ధవ్యం గహనా కర్మణో గతిః..17..
కర్మణ్యకర్మ యః పశ్యేదకర్మణి చ కర్మ యః.
స బుద్ధిమాన్ మనుష్యేషు స యుక్తః కృత్స్నకర్మకృత్..18..
యస్య సర్వే సమారమ్భాః కామసఙ్కల్పవర్జితాః.
జ్ఞానాగ్నిదగ్ధకర్మాణం తమాహుః పణ్డితం బుధాః..19..
త్యక్త్వా కర్మఫలాసఙ్గం నిత్యతృప్తో నిరాశ్రయః.
కర్మణ్యభిప్రవృత్తోఽపి నైవ కిఞ్చిత్ కరోతి సః..20..
నిరాశీర్యతచిత్తాత్మా త్యక్తసర్వపరిగ్రహః.
శారీరం కేవలం కర్మ కుర్వన్నాప్నోతి కిల్బిషమ్..21..
యదృచ్ఛాలాభసన్తుష్టో ద్వన్ద్వాతీతో విమత్సరః.
సమః సిద్ధావసిద్ధౌ చ కృత్వాఽపి న నిబధ్యతే..22..
గతసఙ్గస్య ముక్తస్య జ్ఞానావస్థితచేతసః.
యజ్ఞాయాచరతః కర్మ సమగ్రం ప్రవిలీయతే..23..
బ్రహ్మార్పణం బ్రహ్మ హవిర్బ్రహ్మాగ్నౌ బ్రహ్మణా హుతమ్.
బ్రహ్మైవ తేన గన్తవ్యం బ్రహ్మకర్మసమాధినా..24..
దైవమేవాపరే యజ్ఞం యోగినః పర్యుపాసతే.
బ్రహ్మాగ్నావపరే యజ్ఞం యజ్ఞేనైవోపజుహ్వతి..25..
శ్రోత్రాదీనీన్ద్రియాణ్యన్యే సంయమాగ్నిషు జుహ్వతి.
శబ్దాదీన్ విషయానన్య ఇన్ద్రియాగ్నిషు జుహ్వతి..26..
సర్వాణీన్ద్రియకర్మాణి ప్రాణకర్మాణి చాపరే.
ఆత్మసంయమయోగాగ్నౌ జుహ్వతి జ్ఞానదీపితే..27..
ద్రవ్యయజ్ఞాస్తపోయజ్ఞా యోగయజ్ఞాస్తథాఽపరే.
స్వాధ్యాయజ్ఞానయజ్ఞాశ్చ యతయః సంశితవ్రతాః..28..
అపానే జుహ్వతి ప్రాణం ప్రాణేఽపానం తథాఽపరే.
ప్రాణాపానగతీ రుద్ధ్వా ప్రాణాయామపరాయణాః..29..
అపరే నియతాహారాః ప్రాణాన్ ప్రాణేషు జుహ్వతి.
సర్వేఽప్యేతే యజ్ఞవిదో యజ్ఞక్షపితకల్మషాః..30..
యజ్ఞశిష్టామృతభుజో యాన్తి బ్రహ్మ సనాతనమ్.
నాయం లోకోఽస్త్యయజ్ఞస్య కుతోఽన్యః కురుసత్తమ..31..
ఏవం బహువిధా యజ్ఞా వితతా బ్రహ్మణో ముఖే.
కర్మజాన్ విద్ధి తాన్ సర్వానేవం జ్ఞాత్వా విమోక్ష్యసే..32..
శ్రేయాన్ ద్రవ్యమయాద్యజ్ఞాజ్జ్ఞానయజ్ఞః పరన్తప.
సర్వం కర్మాఖిలం పార్థ జ్ఞానే పరిసమాప్యతే..33..
తద్విద్ధి ప్రణిపాతేన పరిప్రశ్నేన సేవయా.
ఉపదేక్ష్యన్తి తే జ్ఞానం జ్ఞానినస్తత్త్వదర్శినః..34..
యజ్జ్ఞాత్వా న పునర్మోహమేవం యాస్యసి పాణ్డవ.
యేన భూతాన్యశేషేణ ద్రక్ష్యస్యాత్మన్యథో మయి..35..
అపి చేదసి పాపేభ్యః సర్వేభ్యః పాపకృత్తమః.
సర్వం జ్ఞానప్లవేనైవ వృజినం సన్తరిష్యసి..36..
యథైధాంసి సమిద్ధోఽగ్నిర్భస్మసాత్ కురుతేఽర్జున.
జ్ఞానాగ్నిః సర్వకర్మాణి భస్మసాత్ కురుతే తథా..37..
న హి జ్ఞానేన సదృశం పవిత్రమిహ విద్యతే.
తత్ స్వయం యోగసంసిద్ధః కాలేనాత్మని విన్దతి..38..
శ్రద్ధావాఀల్లభతే జ్ఞానం తత్పరః సంయతేన్ద్రియః.
జ్ఞానం లబ్ధ్వా పరాం శాన్తిమచిరేణాధిగచ్ఛతి..39..
అజ్ఞశ్చాశ్రద్దధానశ్చ సంశయాత్మా వినశ్యతి.
నాయం లోకోఽస్తి న పరో న సుఖం సంశయాత్మనః..40..
యోగసన్న్యస్తకర్మాణం జ్ఞానసఞ్ఛిన్నసంశయమ్.
ఆత్మవన్తం న కర్మాణి నిబధ్నన్తి ధనఞ్జయ..41..
తస్మాదజ్ఞానసమ్భూతం హృత్స్థం జ్ఞానాసినాత్మనః.
ఛిత్త్వైనం సంశయం యోగమాతిష్ఠోత్తిష్ఠ భారత..42..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే జ్ఞానకర్మసన్న్యాసయోగో నామ చతుర్థోఽధ్యాయః..
అర్జున ఉవాచ
సన్న్యాసం కర్మణాం కృష్ణ పునర్యోగం చ శంససి.
యచ్ఛ్రేయ ఏతయోరేకం తన్మే బ్రూహి సునిశ్చితమ్..1..
శ్రీభగవానువాచ
సన్న్యాసః కర్మయోగశ్చ నిఃశ్రేయసకరావుభౌ.
తయోస్తు కర్మసన్న్యాసాత్కర్మయోగో విశిష్యతే..2..
జ్ఞేయః స నిత్యసన్న్యాసీ యో న ద్వేష్టి న కాఙ్క్షతి.
నిర్ద్వన్ద్వో హి మహాబాహో సుఖం బన్ధాత్ ప్రముచ్యతే..3..
సాఙ్ఖ్యయోగౌ పృథగ్బాలాః ప్రవదన్తి న పణ్డితాః.
ఏకమప్యాస్థితః సమ్యగుభయోర్విన్దతే ఫలమ్..4..
యత్సాఙ్ఖ్యైః ప్రాప్యతే స్థానం తద్యోగైరపి గమ్యతే.
ఏకం సాఙ్ఖ్యం చ యోగం చ యః పశ్యతి స పశ్యతి..5..
సన్న్యాసస్తు మహాబాహో దుఃఖమాప్తుమయోగతః.
యోగయుక్తో మునిర్బ్రహ్మ నచిరేణాధిగచ్ఛతి..6..
యోగయుక్తో విశుద్ధాత్మా విజితాత్మా జితేన్ద్రియః.
సర్వభూతాత్మభూతాత్మా కుర్వన్నపి న లిప్యతే..7..
నైవ కిఞ్చిత్కరోమీతి యుక్తో మన్యేత తత్త్వవిత్.
పశ్యఞ్శృణ్వన్స్పృశఞ్జిఘ్రన్నశ్నఙ్గచ్ఛన్స్వపన్శ్వసన్..8..
ప్రలపన్విసృజన్గృహ్ణన్నున్మిషన్నిమిషన్నపి.
ఇన్ద్రియాణీన్ద్రియార్థేషు వర్తన్త ఇతి ధారయన్..9..
బ్రహ్మణ్యాధాయ కర్మాణి సఙ్గం త్యక్త్వా కరోతి యః.
లిప్యతే న స పాపేన పద్మపత్రమివామ్భసా..10..
కాయేన మనసా బుద్ధ్యా కేవలైరిన్ద్రియైరపి.
యోగినః కర్మ కుర్వన్తి సఙ్గం త్యక్త్వాత్మశుద్ధయే..11..
యుక్తఃకర్మఫలం త్యక్త్వా శాన్తిమాప్నోతి నైష్ఠికీమ్.
అయుక్తః కామకారేణ ఫలే సక్తో నిబధ్యతే..12..
సర్వకర్మాణి మనసా సన్న్యస్యాస్తే సుఖం వశీ.
నవద్వారే పురే దేహీ నైవ కుర్వన్న కారయన్..13..
న కర్తృత్వం న కర్మాణి లోకస్య సృజతి ప్రభుః.
న కర్మఫలసంయోగం స్వభావస్తు ప్రవర్తతే..14..
నాదత్తే కస్యచిత్ పాపం న చైవ సుకృతం విభుః.
అజ్ఞానేనావృతం జ్ఞానం తేన ముహ్యన్తి జన్తవః..15..
జ్ఞానేన తు తదజ్ఞానం యేషాం నాశితమాత్మనః.
తేషామాదిత్యవజ్జ్ఞానం ప్రకాశయతి తత్పరమ్..16..
తద్బుద్ధయస్తదాత్మానస్తన్నిష్ఠాస్తత్పరాయణాః.
గచ్ఛన్త్యపునరావృత్తిం జ్ఞాననిర్ధూతకల్మషాః..17..
విద్యావినయసమ్పన్నే బ్రాహ్మణే గవి హస్తిని.
శుని చైవ శ్వపాకే చ పణ్డితాః సమదర్శినః..18..
ఇహైవ తైర్జితః సర్గో యేషాం సామ్యే స్థితం మనః.
నిర్దోషం హి సమం బ్రహ్మ తస్మాద్బ్రహ్మణి తే స్థితాః..19..
న ప్రహృష్యేత్ ప్రియం ప్రాప్య నోద్విజేత్ ప్రాప్య చాప్రియమ్.
స్థిరబుద్ధిరసమ్మూఢో బ్రహ్మవిద్బ్రహ్మణి స్థితః..20..
బాహ్యస్పర్శేష్వసక్తాత్మా విన్దత్యాత్మని యత్ సుఖమ్.
స బ్రహ్మయోగయుక్తాత్మా సుఖమక్షయమశ్నుతే..21..
యే హి సంస్పర్శజా భోగా దుఃఖయోనయ ఏవ తే.
ఆద్యన్తవన్తః కౌన్తేయ న తేషు రమతే బుధః..22..
శక్నోతీహైవ యః సోఢుం ప్రాక్ శరీరవిమోక్షణాత్.
కామక్రోధోద్భవం వేగం స యుక్తః స సుఖీ నరః..23..
యోఽన్తఃసుఖోఽన్తరారామస్తథాఽన్తర్జ్యోతిరేవ యః.
స యోగీ బ్రహ్మనిర్వాణం బ్రహ్మభూతోఽధిగచ్ఛతి..24..
లభన్తే బ్రహ్మనిర్వాణమృషయః క్షీణకల్మషాః.
ఛిన్నద్వైధా యతాత్మానః సర్వభూతహితే రతాః..25..
కామక్రోధవియుక్తానాం యతీనాం యతచేతసామ్.
అభితో బ్రహ్మనిర్వాణం వర్తతే విదితాత్మనామ్..26..
స్పర్శాన్ కృత్వా బహిర్బాహ్యాంశ్చక్షుశ్చైవాన్తరే భ్రువోః.
ప్రాణాపానౌ సమౌ కృత్వా నాసాభ్యన్తరచారిణౌ..27..
యతేన్ద్రియమనోబుద్ధిర్మునిర్మోక్షపరాయణః.
విగతేచ్ఛాభయక్రోధో యః సదా ముక్త ఏవ సః..28..
భోక్తారం యజ్ఞతపసాం సర్వలోకమహేశ్వరమ్.
సుహృదం సర్వభూతానాం జ్ఞాత్వా మాం శాన్తిమృచ్ఛతి..29..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే కర్మసన్న్యాసయోగో నామ పఞ్చమోఽధ్యాయః ..
శ్రీభగవానువాచ
అనాశ్రితః కర్మఫలం కార్యం కర్మ కరోతి యః.
స సన్న్యాసీ చ యోగీ చ న నిరగ్నిర్న చాక్రియః..1..
యం సన్న్యాసమితి ప్రాహుర్యోగం తం విద్ధి పాణ్డవ.
న హ్యసన్న్యస్తసఙ్కల్పో యోగీ భవతి కశ్చన..2..
ఆరురుక్షోర్మునేర్యోగం కర్మ కారణముచ్యతే.
యోగారూఢస్య తస్యైవ శమః కారణముచ్యతే..3..
యదా హి నేన్ద్రియార్థేషు న కర్మస్వనుషజ్జతే.
సర్వసఙ్కల్పసన్న్యాసీ యోగారూఢస్తదోచ్యతే..4..
ఉద్ధరేదాత్మనాత్మానం నాత్మానమవసాదయేత్.
ఆత్మైవ హ్యాత్మనో బన్ధురాత్మైవ రిపురాత్మనః..5..
బన్ధురాత్మాత్మనస్తస్య యేనాత్మైవాత్మనా జితః.
అనాత్మనస్తు శత్రుత్వే వర్తేతాత్మైవ శత్రువత్..6..
జితాత్మనః ప్రశాన్తస్య పరమాత్మా సమాహితః.
శీతోష్ణసుఖదుఃఖేషు తథా మానాపమానయోః..7..
జ్ఞానవిజ్ఞానతృప్తాత్మా కూటస్థో విజితేన్ద్రియః.
యుక్త ఇత్యుచ్యతే యోగీ సమలోష్టాశ్మకాఞ్చనః..8..
సుహృన్మిత్రార్యుదాసీనమధ్యస్థద్వేష్యబన్ధుషు.
సాధుష్వపి చ పాపేషు సమబుద్ధిర్విశిష్యతే..9..
యోగీ యుఞ్జీత సతతమాత్మానం రహసి స్థితః.
ఏకాకీ యతచిత్తాత్మా నిరాశీరపరిగ్రహః..10..
శుచౌ దేశే ప్రతిష్ఠాప్య స్థిరమాసనమాత్మనః.
నాత్యుచ్ఛ్రితం నాతినీచం చైలాజినకుశోత్తరమ్..11..
తత్రైకాగ్రం మనః కృత్వా యతచిత్తేన్ద్రియక్రియః.
ఉపవిశ్యాసనే యుఞ్జ్యాద్యోగమాత్మవిశుద్ధయే..12..
సమం కాయశిరోగ్రీవం ధారయన్నచలం స్థిరః.
సమ్ప్రేక్ష్య నాసికాగ్రం స్వం దిశశ్చానవలోకయన్..13..
ప్రశాన్తాత్మా విగతభీర్బ్రహ్మచారివ్రతే స్థితః.
మనః సంయమ్య మచ్చిత్తో యుక్త ఆసీత మత్పరః..14..
యుఞ్జన్నేవం సదాత్మానం యోగీ నియతమానసః.
శాన్తిం నిర్వాణపరమాం మత్సంస్థామధిగచ్ఛతి..15..
నాత్యశ్నతస్తు యోగోఽస్తి న చైకాన్తమనశ్నతః.
న చాతిస్వప్నశీలస్య జాగ్రతో నైవ చార్జున..16..
యుక్తాహారవిహారస్య యుక్తచేష్టస్య కర్మసు.
యుక్తస్వప్నావబోధస్య యోగో భవతి దుఃఖహా..17..
యదా వినియతం చిత్తమాత్మన్యేవావతిష్ఠతే.
నిఃస్పృహః సర్వకామేభ్యో యుక్త ఇత్యుచ్యతే తదా..18..
యథా దీపో నివాతస్థో నేఙ్గతే సోపమా స్మృతా.
యోగినో యతచిత్తస్య యుఞ్జతో యోగమాత్మనః..19..
యత్రోపరమతే చిత్తం నిరుద్ధం యోగసేవయా.
యత్ర చైవాత్మనాత్మానం పశ్యన్నాత్మని తుష్యతి..20..
సుఖమాత్యన్తికం యత్తద్బుద్ధిగ్రాహ్యమతీన్ద్రియమ్.
వేత్తి యత్ర న చైవాయం స్థితశ్చలతి తత్త్వతః..21..
యం లబ్ధ్వా చాపరం లాభం మన్యతే నాధికం తతః.
యస్మిన్ స్థితో న దుఃఖేన గురుణాఽపి విచాల్యతే..22..
తం విద్యాద్దుఃఖసంయోగవియోగం యోగసంజ్ఞితమ్.
స నిశ్చయేన యోక్తవ్యో యోగోఽనిర్విణ్ణచేతసా..23..
సఙ్కల్పప్రభవాన్ కామాంస్త్యక్త్వా సర్వానశేషతః.
మనసైవేన్ద్రియగ్రామం వినియమ్య సమన్తతః..24..
శనైః శనైరుపరమేద్బుద్ధ్యా ధృతిగృహీతయా.
ఆత్మసంస్థం మనః కృత్వా న కిఞ్చిదపి చిన్తయేత్..25..
యతో యతో నిశ్చరతి మనశ్చఞ్చలమస్థిరమ్.
తతస్తతో నియమ్యైతదాత్మన్యేవ వశం నయేత్..26..
ప్రశాన్తమనసం హ్యేనం యోగినం సుఖముత్తమమ్.
ఉపైతి శాన్తరజసం బ్రహ్మభూతమకల్మషమ్..27..
యుఞ్జన్నేవం సదాత్మానం యోగీ విగతకల్మషః.
సుఖేన బ్రహ్మసంస్పర్శమత్యన్తం సుఖమశ్నుతే..28..
సర్వభూతస్థమాత్మానం సర్వభూతాని చాత్మని.
ఈక్షతే యోగయుక్తాత్మా సర్వత్ర సమదర్శనః..29..
యో మాం పశ్యతి సర్వత్ర సర్వం చ మయి పశ్యతి.
తస్యాహం న ప్రణశ్యామి స చ మే న ప్రణశ్యతి..30..
సర్వభూతస్థితం యో మాం భజత్యేకత్వమాస్థితః.
సర్వథా వర్తమానోఽపి స యోగీ మయి వర్తతే..31..
ఆత్మౌపమ్యేన సర్వత్ర సమం పశ్యతి యోఽర్జున.
సుఖం వా యది వా దుఃఖం స యోగీ పరమో మతః..32..
అర్జున ఉవాచ
యోఽయం యోగస్త్వయా ప్రోక్తః సామ్యేన మధుసూదన.
ఏతస్యాహం న పశ్యామి చఞ్చలత్వాత్ స్థితిం స్థిరామ్..33..
చఞ్చలం హి మనః కృష్ణ ప్రమాథి బలవద్దృఢమ్.
తస్యాహం నిగ్రహం మన్యే వాయోరివ సుదుష్కరమ్..34..
శ్రీభగవానువాచ
అసంశయం మహాబాహో మనో దుర్నిగ్రహం చలమ్.
అభ్యాసేన తు కౌన్తేయ వైరాగ్యేణ చ గృహ్యతే..35..
అసంయతాత్మనా యోగో దుష్ప్రాప ఇతి మే మతిః.
వశ్యాత్మనా తు యతతా శక్యోఽవాప్తుముపాయతః..36..
అర్జున ఉవాచ
అయతిః శ్రద్ధయోపేతో యోగాచ్చలితమానసః.
అప్రాప్య యోగసంసిద్ధిం కాం గతిం కృష్ణ గచ్ఛతి..37..
కచ్చిన్నోభయవిభ్రష్టశ్ఛిన్నాభ్రమివ నశ్యతి.
అప్రతిష్ఠో మహాబాహో విమూఢో బ్రహ్మణః పథి..38..
ఏతన్మే సంశయం కృష్ణ ఛేత్తుమర్హస్యశేషతః.
త్వదన్యః సంశయస్యాస్య ఛేత్తా న హ్యుపపద్యతే..39..
శ్రీభగవానువాచ
పార్థ నైవేహ నాముత్ర వినాశస్తస్య విద్యతే.
న హి కల్యాణకృత్ కశ్చిద్దుర్గతిం తాత గచ్ఛతి..40..
ప్రాప్య పుణ్యకృతాం లోకానుషిత్వా శాశ్వతీః సమాః.
శుచీనాం శ్రీమతాం గేహే యోగభ్రష్టోఽభిజాయతే..41..
అథవా యోగినామేవ కులే భవతి ధీమతామ్.
ఏతద్ధి దుర్లభతరం లోకే జన్మ యదీదృశమ్..42..
తత్ర తం బుద్ధిసంయోగం లభతే పౌర్వదేహికమ్.
యతతే చ తతో భూయః సంసిద్ధౌ కురునన్దన..43..
పూర్వాభ్యాసేన తేనైవ హ్రియతే హ్యవశోఽపి సః.
జిజ్ఞాసురపి యోగస్య శబ్దబ్రహ్మాతివర్తతే..44..
ప్రయత్నాద్యతమానస్తు యోగీ సంశుద్ధకిల్బిషః.
అనేకజన్మసంసిద్ధస్తతో యాతి పరాం గతిమ్..45..
తపస్విభ్యోఽధికో యోగీ జ్ఞానిభ్యోఽపి మతోఽధికః.
కర్మిభ్యశ్చాధికో యోగీ తస్మాద్యోగీ భవార్జున..46..
యోగినామపి సర్వేషాం మద్గతేనాన్తరాత్మనా.
శ్రద్ధావాన్ భజతే యో మాం స మే యుక్తతమో మతః..47..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే ఆత్మసంయమయోగో నామ షష్ఠోఽధ్యాయః ..
శ్రీభగవానువాచ
మయ్యాసక్తమనాః పార్థ యోగం యుఞ్జన్మదాశ్రయః.
అసంశయం సమగ్రం మాం యథా జ్ఞాస్యసి తచ్ఛృణు..1..
జ్ఞానం తేఽహం సవిజ్ఞానమిదం వక్ష్యామ్యశేషతః.
యజ్జ్ఞాత్వా నేహ భూయోఽన్యజ్జ్ఞాతవ్యమవశిష్యతే..2..
మనుష్యాణాం సహస్రేషు కశ్చిద్యతతి సిద్ధయే.
యతతామపి సిద్ధానాం కశ్చిన్మాం వేత్తి తత్త్వతః..3..
భూమిరాపోఽనలో వాయుః ఖం మనో బుద్ధిరేవ చ.
అహఙ్కార ఇతీయం మే భిన్నా ప్రకృతిరష్టధా..4..
అపరేయమితస్త్వన్యాం ప్రకృతిం విద్ధి మే పరామ్.
జీవభూతాం మహాబాహో యయేదం ధార్యతే జగత్..5..
ఏతద్యోనీని భూతాని సర్వాణీత్యుపధారయ.
అహం కృత్స్నస్య జగతః ప్రభవః ప్రలయస్తథా..6..
మత్తః పరతరం నాన్యత్ కిఞ్చిదస్తి ధనఞ్జయ.
మయి సర్వమిదం ప్రోతం సూత్రే మణిగణా ఇవ..7..
రసోఽహమప్సు కౌన్తేయ ప్రభాఽస్మి శశిసూర్యయోః.
ప్రణవః సర్వవేదేషు శబ్దః ఖే పౌరుషం నృషు..8..
పుణ్యో గన్ధః పృథివ్యాం చ తేజశ్చాస్మి విభావసౌ.
జీవనం సర్వభూతేషు తపశ్చాస్మి తపస్విషు..9..
బీజం మాం సర్వభూతానాం విద్ధి పార్థ సనాతనమ్.
బుద్ధిర్బుద్ధిమతామస్మి తేజస్తేజస్వినామహమ్..10..
బలం బలవతాం చాహం కామరాగవివర్జితమ్.
ధర్మావిరుద్ధో భూతేషు కామోఽస్మి భరతర్షభ..11..
యే చైవ సాత్త్వికా భావా రాజసాస్తామసాశ్చ యే.
మత్త ఏవేతి తాన్ విద్ధి న త్వహం తేషు తే మయి..12..
త్రిభిర్గుణమయైర్భావైరేభిః సర్వమిదం జగత్.
మోహితం నాభిజానాతి మామేభ్యః పరమవ్యయమ్..13..
దైవీ హ్యేషా గుణమయీ మమ మాయా దురత్యయా.
మామేవ యే ప్రపద్యన్తే మాయామేతాం తరన్తి తే..14..
న మాం దుష్కృతినో మూఢాః ప్రపద్యన్తే నరాధమాః.
మాయయాఽపహృతజ్ఞానా ఆసురం భావమాశ్రితాః..15..
చతుర్విధా భజన్తే మాం జనాః సుకృతినోఽర్జున.
ఆర్తో జిజ్ఞాసురర్థార్థీ జ్ఞానీ చ భరతర్షభ..16..
తేషాం జ్ఞానీ నిత్యయుక్త ఏకభక్తిర్విశిష్యతే.
ప్రియో హి జ్ఞానినోఽత్యర్థమహం స చ మమ ప్రియః..17..
ఉదారాః సర్వ ఏవైతే జ్ఞానీ త్వాత్మైవ మే మతమ్.
ఆస్థితః స హి యుక్తాత్మా మామేవానుత్తమాం గతిమ్..18..
బహూనాం జన్మనామన్తే జ్ఞానవాన్ మాం ప్రపద్యతే.
వాసుదేవః సర్వమితి స మహాత్మా సుదుర్లభః..19..
కామైస్తైస్తైర్హృతజ్ఞానాః ప్రపద్యన్తేఽన్యదేవతాః.
తం తం నియమమాస్థాయ ప్రకృత్యా నియతాః స్వయా..20..
యో యో యాం యాం తనుం భక్తః శ్రద్ధయాఽర్చితుమిచ్ఛతి.
తస్య తస్యాచలాం శ్రద్ధాం తామేవ విదధామ్యహమ్..21..
స తయా శ్రద్ధయా యుక్తస్తస్యారాధనమీహతే.
లభతే చ తతః కామాన్ మయైవ విహితాన్ హి తాన్..22..
అన్తవత్తు ఫలం తేషాం తద్భవత్యల్పమేధసామ్.
దేవాన్ దేవయజో యాన్తి మద్భక్తా యాన్తి మామపి..23..
అవ్యక్తం వ్యక్తిమాపన్నం మన్యన్తే మామబుద్ధయః.
పరం భావమజానన్తో మమావ్యయమనుత్తమమ్..24..
నాహం ప్రకాశః సర్వస్య యోగమాయాసమావృతః.
మూఢోఽయం నాభిజానాతి లోకో మామజమవ్యయమ్..25..
వేదాహం సమతీతాని వర్తమానాని చార్జున.
భవిష్యాణి చ భూతాని మాం తు వేద న కశ్చన..26..
ఇచ్ఛాద్వేషసముత్థేన ద్వన్ద్వమోహేన భారత.
సర్వభూతాని సమ్మోహం సర్గే యాన్తి పరన్తప..27..
యేషాం త్వన్తగతం పాపం జనానాం పుణ్యకర్మణామ్.
తే ద్వన్ద్వమోహనిర్ముక్తా భజన్తే మాం దృఢవ్రతాః..28..
జరామరణమోక్షాయ మామాశ్రిత్య యతన్తి యే.
తే బ్రహ్మ తద్విదుః కృత్స్నమధ్యాత్మం కర్మ చాఖిలమ్..29..
సాధిభూతాధిదైవం మాం సాధియజ్ఞం చ యే విదుః.
ప్రయాణకాలేఽపి చ మాం తే విదుర్యుక్తచేతసః..30..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే జ్ఞానవిజ్ఞానయోగో నామ సప్తమోఽధ్యాయః ..
అర్జున ఉవాచ
కిం తద్బ్రహ్మ కిమధ్యాత్మం కిం కర్మ పురుషోత్తమ.
అధిభూతం చ కిం ప్రోక్తమధిదైవం కిముచ్యతే..1..
అధియజ్ఞః కథం కోఽత్ర దేహేఽస్మిన్ మధుసూదన.
ప్రయాణకాలే చ కథం జ్ఞేయోఽసి నియతాత్మభిః..2..
శ్రీభగవానువాచ
అక్షరం బ్రహ్మ పరమం స్వభావోఽధ్యాత్మముచ్యతే.
భూతభావోద్భవకరో విసర్గః కర్మసంజ్ఞితః..3..
అధిభూతం క్షరో భావః పురుషశ్చాధిదైవతమ్.
అధియజ్ఞోఽహమేవాత్ర దేహే దేహభృతాం వర..4..
అన్తకాలే చ మామేవ స్మరన్ ముక్త్వా కలేవరమ్.
యః ప్రయాతి స మద్భావం యాతి నాస్త్యత్ర సంశయః..5..
యం యం వాఽపి స్మరన్ భావం త్యజత్యన్తే కలేవరమ్.
తం తమేవైతి కౌన్తేయ సదా తద్భావభావితః..6..
తస్మాత్ సర్వేషు కాలేషు మామనుస్మర యుధ్య చ.
మయ్యర్పితమనోబుద్ధిర్మామేవైష్యస్యసంశయః..7..
అభ్యాసయోగయుక్తేన చేతసా నాన్యగామినా.
పరమం పురుషం దివ్యం యాతి పార్థానుచిన్తయన్..8..
కవిం పురాణమ్ అనుశాసితారమ్
అనోరణీయాంసమ్ అనుస్మరేద్యః.
సర్వస్య ధాతారమ్ అచిన్త్యరూపమ్
ఆదిత్యవర్ణం తమసః పరస్తాత్..9..
ప్రయాణకాలే మనసాఽచలేన
భక్త్యా యుక్తో యోగబలేన చైవ.
భ్రువోర్మధ్యే ప్రాణమావేశ్య సమ్యక్
స తం పరం పురుషముపైతి దివ్యమ్..10..
యదక్షరం వేదవిదో వదన్తి
విశన్తి యద్యతయో వీతరాగాః.
యదిచ్ఛన్తో బ్రహ్మచర్యం చరన్తి
తత్ తే పదం సఙ్గ్రహేణ ప్రవక్ష్యే..11..
సర్వద్వారాణి సంయమ్య మనో హృది నిరుధ్య చ.
మూర్ధ్న్యాధాయాత్మనః ప్రాణమాస్థితో యోగధారణామ్..12..
ఓమిత్యేకాక్షరం బ్రహ్మ వ్యాహరన్ మామనుస్మరన్.
యః ప్రయాతి త్యజన్ దేహం స యాతి పరమాం గతిమ్..13..
అనన్యచేతాః సతతం యో మాం స్మరతి నిత్యశః.
తస్యాహం సులభః పార్థ నిత్యయుక్తస్య యోగినః..14..
మాముపేత్య పునర్జన్మ దుఃఖాలయమశాశ్వతమ్.
నాప్నువన్తి మహాత్మానః సంసిద్ధిం పరమాం గతాః..15..
ఆబ్రహ్మభువనాల్లోకాః పునరావర్తినోఽర్జున.
మాముపేత్య తు కౌన్తేయ పునర్జన్మ న విద్యతే..16..
సహస్రయుగపర్యన్తమహర్యద్బ్రహ్మణో విదుః.
రాత్రిం యుగసహస్రాన్తాం తేఽహోరాత్రవిదో జనాః..17..
అవ్యక్తాద్వ్యక్తయః సర్వాః ప్రభవన్త్యహరాగమే.
రాత్ర్యాగమే ప్రలీయన్తే తత్రైవావ్యక్తసంజ్ఞకే..18..
భూతగ్రామః స ఏవాయం భూత్వా భూత్వా ప్రలీయతే.
రాత్ర్యాగమేఽవశః పార్థ ప్రభవత్యహరాగమే..19..
పరస్తస్మాత్తు భావోఽన్యోఽవ్యక్తోఽవ్యక్తాత్సనాతనః.
యః స సర్వేషు భూతేషు నశ్యత్సు న వినశ్యతి..20..
అవ్యక్తోఽక్షర ఇత్యుక్తస్తమాహుః పరమాం గతిమ్.
యం ప్రాప్య న నివర్తన్తే తద్ధామ పరమం మమ..21..
పురుషః స పరః పార్థ భక్త్యా లభ్యస్త్వనన్యయా.
యస్యాన్తఃస్థాని భూతాని యేన సర్వమిదం తతమ్..22..
యత్ర కాలే త్వనావృత్తిమావృత్తిం చైవ యోగినః.
ప్రయాతా యాన్తి తం కాలం వక్ష్యామి భరతర్షభ..23..
అగ్నిర్జోతిరహః శుక్లః షణ్మాసా ఉత్తరాయణమ్.
తత్ర ప్రయాతా గచ్ఛన్తి బ్రహ్మ బ్రహ్మవిదో జనాః..24..
ధూమో రాత్రిస్తథా కృష్ణః షణ్మాసా దక్షిణాయనమ్.
తత్ర చాన్ద్రమసం జ్యోతిర్యోగీ ప్రాప్య నివర్తతే..25..
శుక్లకృష్ణే గతీ హ్యేతే జగతః శాశ్వతే మతే.
ఏకయా యాత్యనావృత్తిమన్యయావర్తతే పునః..26..
నైతే సృతీ పార్థ జానన్ యోగీ ముహ్యతి కశ్చన.
తస్మాత్ సర్వేషు కాలేషు యోగయుక్తో భవార్జున..27..
వేదేషు యజ్ఞేషు తపఃసు చైవ
దానేషు యత్ పుణ్యఫలం ప్రదిష్టమ్.
అత్యేతి తత్సర్వమిదం విదిత్వా
యోగీ పరం స్థానముపైతి చాద్యమ్..28..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే అక్షరబ్రహ్మయోగో నామ అష్టమోఽధ్యాయః ..
శ్రీభగవానువాచ
ఇదం తు తే గుహ్యతమం ప్రవక్ష్యామ్యనసూయవే.
జ్ఞానం విజ్ఞానసహితం యజ్జ్ఞాత్వా మోక్ష్యసేఽశుభాత్..1..
రాజవిద్యా రాజగుహ్యం పవిత్రమిదముత్తమమ్.
ప్రత్యక్షావగమం ధర్మ్యం సుసుఖం కర్తుమవ్యయమ్..2..
అశ్రద్దధానాః పురుషా ధర్మస్యాస్య పరన్తప.
అప్రాప్య మాం నివర్తన్తే మృత్యుసంసారవర్త్మని..3..
మయా తతమిదం సర్వం జగదవ్యక్తమూర్తినా.
మత్స్థాని సర్వభూతాని న చాహం తేష్వవస్థితః..4..
న చ మత్స్థాని భూతాని పశ్య మే యోగమైశ్వరమ్.
భూతభృన్న చ భూతస్థో మమాత్మా భూతభావనః..5..
యథాకాశస్థితో నిత్యం వాయుః సర్వత్రగో మహాన్.
తథా సర్వాణి భూతాని మత్స్థానీత్యుపధారయ..6..
సర్వభూతాని కౌన్తేయ ప్రకృతిం యాన్తి మామికామ్.
కల్పక్షయే పునస్తాని కల్పాదౌ విసృజామ్యహమ్..7..
ప్రకృతిం స్వామవష్టభ్య విసృజామి పునః పునః.
భూతగ్రామమిమం కృత్స్నమవశం ప్రకృతేర్వశాత్..8..
న చ మాం తాని కర్మాణి నిబధ్నన్తి ధనఞ్జయ.
ఉదాసీనవదాసీనమసక్తం తేషు కర్మసు..9..
మయాఽధ్యక్షేణ ప్రకృతిః సూయతే సచరాచరమ్.
హేతునాఽనేన కౌన్తేయ జగద్విపరివర్తతే..10..
అవజానన్తి మాం మూఢా మానుషీం తనుమాశ్రితమ్.
పరం భావమజానన్తో మమ భూతమహేశ్వరమ్..11..
మోఘాశా మోఘకర్మాణో మోఘజ్ఞానా విచేతసః.
రాక్షసీమాసురీం చైవ ప్రకృతిం మోహినీం శ్రితాః..12..
మహాత్మానస్తు మాం పార్థ దైవీం ప్రకృతిమాశ్రితాః.
భజన్త్యనన్యమనసో జ్ఞాత్వా భూతాదిమవ్యయమ్..13..
సతతం కీర్తయన్తో మాం యతన్తశ్చ దృఢవ్రతాః.
నమస్యన్తశ్చ మాం భక్త్యా నిత్యయుక్తా ఉపాసతే..14..
జ్ఞానయజ్ఞేన చాప్యన్యే యజన్తో మాముపాసతే.
ఏకత్వేన పృథక్త్వేన బహుధా విశ్వతోముఖమ్..15..
అహం క్రతురహం యజ్ఞః స్వధాఽహమహమౌషధమ్.
మన్త్రోఽహమహమేవాజ్యమహమగ్నిరహం హుతమ్..16..
పితాఽహమస్య జగతో మాతా ధాతా పితామహః.
వేద్యం పవిత్రమోఙ్కార ఋక్సామ యజురేవ చ..17..
గతిర్భర్తా ప్రభుః సాక్షీ నివాసః శరణం సుహృత్.
ప్రభవః ప్రలయః స్థానం నిధానం బీజమవ్యయమ్..18..
తపామ్యహమహం వర్షం నిగృణ్హామ్యుత్సృజామి చ.
అమృతం చైవ మృత్యుశ్చ సదసచ్చాహమర్జున..19..
త్రైవిద్యా మాం సోమపాః పూతపాపాః
యజ్ఞైరిష్ట్వా స్వర్గతిం ప్రార్థయన్తే.
తే పుణ్యమాసాద్య సురేన్ద్రలోకమ్
అశ్నన్తి దివ్యాన్ దివి దేవభోగాన్..20..
తే తం భుక్త్వా స్వర్గలోకం విశాలమ్
క్షీణే పుణ్యే మర్త్యలోకం విశన్తి.
ఏవం త్రయీధర్మమనుప్రపన్నాః
గతాగతం కామకామా లభన్తే..21..
అనన్యాశ్చిన్తయన్తో మాం యే జనాః పర్యుపాసతే.
తేషాం నిత్యాభియుక్తానాం యోగక్షేమం వహామ్యహమ్..22..
యేఽప్యన్యదేవతాభక్తా యజన్తే శ్రద్ధయాన్వితాః.
తేఽపి మామేవ కౌన్తేయ యజన్త్యవిధిపూర్వకమ్..23..
అహం హి సర్వయజ్ఞానాం భోక్తా చ ప్రభురేవ చ.
న తు మామభిజానన్తి తత్త్వేనాతశ్చ్యవన్తి తే..24..
యాన్తి దేవవ్రతా దేవాన్ పితౄన్ యాన్తి పితృవ్రతాః.
భూతాని యాన్తి భూతేజ్యా యాన్తి మద్యాజినోఽపి మామ్..25..
పత్రం పుష్పం ఫలం తోయం యో మే భక్త్యా ప్రయచ్ఛతి.
తదహం భక్త్యుపహృతమశ్నామి ప్రయతాత్మనః..26..
యత్ కరోషి యదశ్నాసి యజ్జుహోషి దదాసి యత్.
యత్ తపస్యసి కౌన్తేయ తత్ కురుష్వ మదర్పణమ్..27..
శుభాశుభఫలైరేవం మోక్ష్యసే కర్మబన్ధనైః.
సన్న్యాసయోగయుక్తాత్మా విముక్తో మాముపైష్యసి..28..
సమోఽహం సర్వభూతేషు న మే ద్వేష్యోఽస్తి న ప్రియః.
యే భజన్తి తు మాం భక్త్యా మయి తే తేషు చాప్యహమ్..29..
అపి చేత్ సుదురాచారో భజతే మామనన్యభాక్.
సాధురేవ స మన్తవ్యః సమ్యగ్వ్యవసితో హి సః..30..
క్షిప్రం భవతి ధర్మాత్మా శశ్వచ్ఛాన్తిం నిగచ్ఛతి.
కౌన్తేయ ప్రతిజానీహి న మే భక్తః ప్రణశ్యతి..31..
మాం హి పార్థ వ్యపాశ్రిత్య యేఽపి స్యుః పాపయోనయః.
స్త్రియో వైశ్యాస్తథా శూద్రాస్తేఽపి యాన్తి పరాం గతిమ్..32..
కిం పునర్బ్రాహ్మణాః పుణ్యా భక్తా రాజర్షయస్తథా.
అనిత్యమసుఖం లోకమిమం ప్రాప్య భజస్వ మామ్..33..
మన్మనా భవ మద్భక్తో మద్యాజీ మాం నమస్కురు.
మామేవైష్యసి యుక్త్వైవమాత్మానం మత్పరాయణః..34..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే రాజవిద్యారాజగుహ్యయోగో నామ నవమోఽధ్యాయః ..
శ్రీభగవానువాచ
భూయ ఏవ మహాబాహో శృణు మే పరమం వచః.
యత్తేఽహం ప్రీయమాణాయ వక్ష్యామి హితకామ్యయా..1..
న మే విదుః సురగణాః ప్రభవం న మహర్షయః.
అహమాదిర్హి దేవానాం మహర్షీణాం చ సర్వశః..2..
యో మామజమనాదిం చ వేత్తి లోకమహేశ్వరమ్.
అసమ్మూఢః స మర్త్యేషు సర్వపాపైః ప్రముచ్యతే..3..
బుద్ధిర్జ్ఞానమసమ్మోహః క్షమా సత్యం దమః శమః.
సుఖం దుఃఖం భవోఽభావో భయం చాభయమేవ చ..4..
అహింసా సమతా తుష్టిస్తపో దానం యశోఽయశః.
భవన్తి భావా భూతానాం మత్త ఏవ పృథగ్విధాః..5..
మహర్షయః సప్త పూర్వే చత్వారో మనవస్తథా.
మద్భావా మానసా జాతా యేషాం లోక ఇమాః ప్రజాః..6..
ఏతాం విభూతిం యోగం చ మమ యో వేత్తి తత్త్వతః.
సోఽవికమ్పేన యోగేన యుజ్యతే నాత్ర సంశయః..7..
అహం సర్వస్య ప్రభవో మత్తః సర్వం ప్రవర్తతే.
ఇతి మత్వా భజన్తే మాం బుధా భావసమన్వితాః..8..
మచ్చిత్తా మద్గతప్రాణా బోధయన్తః పరస్పరమ్.
కథయన్తశ్చ మాం నిత్యం తుష్యన్తి చ రమన్తి చ..9..
తేషాం సతతయుక్తానాం భజతాం ప్రీతిపూర్వకమ్.
దదామి బుద్ధియోగం తం యేన మాముపయాన్తి తే..10..
తేషామేవానుకమ్పార్థమ్ అహమజ్ఞానజం తమః.
నాశయామ్యాత్మభావస్థో జ్ఞానదీపేన భాస్వతా..11..
అర్జున ఉవాచ
పరం బ్రహ్మ పరం ధామ పవిత్రం పరమం భవాన్.
పురుషం శాశ్వతం దివ్యమాదిదేవమజం విభుమ్..12..
ఆహుస్త్వామృషయః సర్వే దేవర్షిర్నారదస్తథా.
అసితో దేవలో వ్యాసః స్వయం చైవ బ్రవీషి మే..13..
సర్వమేతదృతం మన్యే యన్మాం వదసి కేశవ.
న హి తే భగవన్ వ్యక్తిం విదుర్దేవా న దానవాః..14..
స్వయమేవాత్మనాత్మానం వేత్థ త్వం పురుషోత్తమ.
భూతభావన భూతేశ దేవదేవ జగత్పతే..15..
వక్తుమర్హస్యశేషేణ దివ్యా హ్యాత్మవిభూతయః.
యాభిర్విభూతిభిర్లోకానిమాంస్త్వం వ్యాప్య తిష్ఠసి..16..
కథం విద్యామహం యోగింస్త్వాం సదా పరిచిన్తయన్.
కేషు కేషు చ భావేషు చిన్త్యోఽసి భగవన్మయా..17..
విస్తరేణాత్మనో యోగం విభూతిం చ జనార్దన.
భూయః కథయ తృప్తిర్హి శృణ్వతో నాస్తి మేఽమృతమ్..18..
శ్రీభగవానువాచ
హన్త తే కథయిష్యామి దివ్యా హ్యాత్మవిభూతయః.
ప్రాధాన్యతః కురుశ్రేష్ఠ నాస్త్యన్తో విస్తరస్య మే..19..
అహమాత్మా గుడాకేశ సర్వభూతాశయస్థితః.
అహమాదిశ్చ మధ్యం చ భూతానామన్త ఏవ చ..20..
ఆదిత్యానామహం విష్ణుర్జ్యోతిషాం రవిరంశుమాన్.
మరీచిర్మరుతామస్మి నక్షత్రాణామహం శశీ..21..
వేదానాం సామవేదోఽస్మి దేవానామస్మి వాసవః.
ఇన్ద్రియాణాం మనశ్చాస్మి భూతానామస్మి చేతనా..22..
రుద్రాణాం శఙ్కరశ్చాస్మి విత్తేశో యక్షరక్షసామ్.
వసూనాం పావకశ్చాస్మి మేరుః శిఖరిణామహమ్..23..
పురోధసాం చ ముఖ్యం మాం విద్ధి పార్థ బృహస్పతిమ్.
సేనానీనామహం స్కన్దః సరసామస్మి సాగరః..24..
మహర్షీణాం భృగురహం గిరామస్మ్యేకమక్షరమ్.
యజ్ఞానాం జపయజ్ఞోఽస్మి స్థావరాణాం హిమాలయః..25..
అశ్వత్థః సర్వవృక్షాణాం దేవర్షీణాం చ నారదః.
గన్ధర్వాణాం చిత్రరథః సిద్ధానాం కపిలో మునిః..26..
ఉచ్చైఃశ్రవసమశ్వానాం విద్ధి మామమృతోద్భవమ్.
ఐరావతం గజేన్ద్రాణాం నరాణాం చ నరాధిపమ్..27..
ఆయుధానామహం వజ్రం ధేనూనామస్మి కామధుక్.
ప్రజనశ్చాస్మి కన్దర్పః సర్పాణామస్మి వాసుకిః..28..
అనన్తశ్చాస్మి నాగానాం వరుణో యాదసామహమ్.
పితౄణామర్యమా చాస్మి యమః సంయమతామహమ్..29..
ప్రహ్లాదశ్చాస్మి దైత్యానాం కాలః కలయతామహమ్.
మృగాణాం చ మృగేన్ద్రోఽహం వైనతేయశ్చ పక్షిణామ్..30..
పవనః పవతామస్మి రామః శస్త్రభృతామహమ్.
ఝషాణాం మకరశ్చాస్మి స్రోతసామస్మి జాహ్నవీ..31..
సర్గాణామాదిరన్తశ్చ మధ్యం చైవాహమర్జున.
అధ్యాత్మవిద్యా విద్యానాం వాదః ప్రవదతామహమ్..32..
అక్షరాణామకారోఽస్మి ద్వన్ద్వః సామాసికస్య చ.
అహమేవాక్షయః కాలో ధాతాఽహం విశ్వతోముఖః..33..
మృత్యుః సర్వహరశ్చాహముద్భవశ్చ భవిష్యతామ్.
కీర్తిః శ్రీర్వాక్చ నారీణాం స్మృతిర్మేధా ధృతిః క్షమా..34..
బృహత్సామ తథా సామ్నాం గాయత్రీ ఛన్దసామహమ్.
మాసానాం మార్గశీర్షోఽహమృతూనాం కుసుమాకరః..35..
ద్యూతం ఛలయతామస్మి తేజస్తేజస్వినామహమ్.
జయోఽస్మి వ్యవసాయోఽస్మి సత్త్వం సత్త్వవతామహమ్..36..
వృష్ణీనాం వాసుదేవోఽస్మి పాణ్డవానాం ధనఞ్జయః.
మునీనామప్యహం వ్యాసః కవీనాముశనా కవిః..37..
దణ్డో దమయతామస్మి నీతిరస్మి జిగీషతామ్.
మౌనం చైవాస్మి గుహ్యానాం జ్ఞానం జ్ఞానవతామహమ్..38..
యచ్చాపి సర్వభూతానాం బీజం తదహమర్జున.
న తదస్తి వినా యత్స్యాన్మయా భూతం చరాచరమ్..39..
నాన్తోఽస్తి మమ దివ్యానాం విభూతీనాం పరన్తప.
ఏష తూద్దేశతః ప్రోక్తో విభూతేర్విస్తరో మయా..40..
యద్యద్విభూతిమత్సత్త్వం శ్రీమదూర్జితమేవ వా.
తత్తదేవావగచ్ఛ త్వం మమ తేజోంశసమ్భవమ్..41..
అథవా బహునైతేన కిం జ్ఞాతేన తవార్జున.
విష్టభ్యాహమిదం కృత్స్నమేకాంశేన స్థితో జగత్..42..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే విభూతియోగో నామ దశమోఽధ్యాయః ..
అర్జున ఉవాచ
మదనుగ్రహాయ పరమం గుహ్యమధ్యాత్మసంజ్ఞితమ్.
యత్త్వయోక్తం వచస్తేన మోహోఽయం విగతో మమ..1..
భవాప్యయౌ హి భూతానాం శ్రుతౌ విస్తరశో మయా.
త్వత్తః కమలపత్రాక్ష మాహాత్మ్యమపి చావ్యయమ్..2..
ఏవమేతద్యథాత్థ త్వమాత్మానం పరమేశ్వర.
ద్రష్టుమిచ్ఛామి తే రూపమైశ్వరం పురుషోత్తమ..3..
మన్యసే యది తచ్ఛక్యం మయా ద్రష్టుమితి ప్రభో.
యోగేశ్వర తతో మే త్వం దర్శయాత్మానమవ్యయమ్..4..
శ్రీభగవానువాచ
పశ్య మే పార్థ రూపాణి శతశోఽథ సహస్రశః.
నానావిధాని దివ్యాని నానావర్ణాకృతీని చ..5..
పశ్యాదిత్యాన్ వసూన్ రుద్రానశ్వినౌ మరుతస్తథా.
బహూన్యదృష్టపూర్వాణి పశ్యాశ్చర్యాణి భారత..6..
ఇహైకస్థం జగత్కృత్స్నం పశ్యాద్య సచరాచరమ్.
మమ దేహే గుడాకేశ యచ్చాన్యద్ద్రష్టుమిచ్ఛసి..7..
న తు మాం శక్యసే ద్రష్టుమనేనైవ స్వచక్షుషా.
దివ్యం దదామి తే చక్షుః పశ్య మే యోగమైశ్వరమ్..8..
సఞ్జయ ఉవాచ
ఏవముక్త్వా తతో రాజన్ మహాయోగేశ్వరో హరిః.
దర్శయామాస పార్థాయ పరమం రూపమైశ్వరమ్..9..
అనేకవక్త్రనయనమనేకాద్భుతదర్శనమ్.
అనేకదివ్యాభరణం దివ్యానేకోద్యతాయుధమ్..10..
దివ్యమాల్యామ్బరధరం దివ్యగన్ధానులేపనమ్.
సర్వాశ్చర్యమయం దేవమనన్తం విశ్వతోముఖమ్..11..
దివి సూర్యసహస్రస్య భవేద్యుగపదుత్థితా.
యది భాః సదృశీ సా స్యాద్భాసస్తస్య మహాత్మనః..12..
తత్రైకస్థం జగత్కృత్స్నం ప్రవిభక్తమనేకధా.
అపశ్యద్దేవదేవస్య శరీరే పాణ్డవస్తదా..13..
తతః స విస్మయావిష్టో హృష్టరోమా ధనఞ్జయః.
ప్రణమ్య శిరసా దేవం కృతాఞ్జలిరభాషత..14..
అర్జున ఉవాచ
పశ్యామి దేవాంస్తవ దేవ దేహే
సర్వాంస్తథా భూతవిశేషసఙ్ఘాన్.
బ్రహ్మాణమీశం కమలాసనస్థమ్
ఋషీంశ్చ సర్వానురగాంశ్చ దివ్యాన్..15..
అనేకబాహూదరవక్త్రనేత్రమ్
పశ్యామి త్వాం సర్వతోఽనన్తరూపమ్.
నాన్తం న మధ్యం న పునస్తవాదిమ్
పశ్యామి విశ్వేశ్వర విశ్వరూప..16..
కిరీటినం గదినం చక్రిణం చ
తేజోరాశిం సర్వతో దీప్తిమన్తమ్.
పశ్యామి త్వాం దుర్నిరీక్ష్యం సమన్తాద్
దీప్తానలార్కద్యుతిమప్రమేయమ్..17..
త్వమక్షరం పరమం వేదితవ్యమ్
త్వమస్య విశ్వస్య పరం నిధానమ్.
త్వమవ్యయః శాశ్వతధర్మగోప్తా
సనాతనస్త్వం పురుషో మతో మే..18..
అనాదిమధ్యాన్తమనన్తవీర్యమ్
అనన్తబాహుం శశిసూర్యనేత్రమ్.
పశ్యామి త్వాం దీప్తహుతాశవక్త్రమ్
స్వతేజసా విశ్వమిదం తపన్తమ్..19..
ద్యావాపృథివ్యోరిదమన్తరం హి
వ్యాప్తం త్వయైకేన దిశశ్చ సర్వాః.
దృష్ట్వాఽద్భుతం రూపముగ్రం తవేదమ్
లోకత్రయం ప్రవ్యథితం మహాత్మన్..20..
అమీ హి త్వాం సురసఙ్ఘా విశన్తి
కేచిద్భీతాః ప్రాఞ్జలయో గృణన్తి.
స్వస్తీత్యుక్త్వా మహర్షిసిద్ధసఙ్ఘాః
స్తువన్తి త్వాం స్తుతిభిః పుష్కలాభిః..21..
రుద్రాదిత్యా వసవో యే చ సాధ్యాః
విశ్వేశ్వినౌ మరుతశ్చోష్మపాశ్చ.
గన్ధర్వయక్షాసురసిద్ధసఙ్ఘాః
వీక్షన్తే త్వాం విస్మితాశ్చైవ సర్వే..22..
రూపం మహత్తే బహువక్త్రనేత్రమ్
మహాబాహో బహుబాహూరుపాదమ్.
బహూదరం బహుదంష్ట్రాకరాలమ్
దృష్ట్వా లోకాః ప్రవ్యథితాస్తథాఽహమ్..23..
నభఃస్పృశం దీప్తమనేకవర్ణమ్
వ్యాత్తాననం దీప్తవిశాలనేత్రమ్.
దృష్ట్వా హి త్వాం ప్రవ్యథితాన్తరాత్మా
ధృతిం న విన్దామి శమం చ విష్ణో..24..
దంష్ట్రాకరాలాని చ తే ముఖాని
దృష్ట్వైవ కాలానలసన్నిభాని.
దిశో న జానే న లభే చ శర్మ
ప్రసీద దేవేశ జగన్నివాస..25..
అమీ చ త్వాం ధృతరాష్ట్రస్య పుత్రాః
సర్వే సహైవావనిపాలసఙ్ఘైః.
భీష్మో ద్రోణః సూతపుత్రస్తథాఽసౌ
సహాస్మదీయైరపి యోధముఖ్యైః..26..
వక్త్రాణి తే త్వరమాణా విశన్తి
దంష్ట్రాకరాలాని భయానకాని.
కేచిద్విలగ్నా దశనాన్తరేషు
సన్దృశ్యన్తే చూర్ణితైరుత్తమాఙ్గైః..27..
యథా నదీనాం బహవోఽమ్బువేగాః
సముద్రమేవాభిముఖా ద్రవన్తి.
తథా తవామీ నరలోకవీరా
విశన్తి వక్త్రాణ్యభివిజ్వలన్తి..28..
యథా ప్రదీప్తం జ్వలనం పతఙ్గాః
విశన్తి నాశాయ సమృద్ధవేగాః.
తథైవ నాశాయ విశన్తి లోకాః
తవాపి వక్త్రాణి సమృద్ధవేగాః..29..
లేలిహ్యసే గ్రసమానః సమన్తాత్
లోకాన్ సమగ్రాన్ వదనైర్జ్వలద్భిః.
తేజోభిరాపూర్య జగత్ సమగ్రమ్
భాసస్తవోగ్రాః ప్రతపన్తి విష్ణో..30..
ఆఖ్యాహి మే కో భవానుగ్రరూపో
నమోఽస్తు తే దేవవర ప్రసీద.
విజ్ఞాతుమిచ్ఛామి భవన్తమాద్యమ్
న హి ప్రజానామి తవ ప్రవృత్తిమ్..31..
శ్రీభగవానువాచ
కాలోఽస్మి లోకక్షయకృత్ ప్రవృద్ధో
లోకాన్ సమాహర్తుమిహ ప్రవృత్తః.
ఋతేఽపి త్వాం న భవిష్యన్తి సర్వే
యేఽవస్థితాః ప్రత్యనీకేషు యోధాః..32..
తస్మాత్ త్వముత్తిష్ఠ యశో లభస్వ
జిత్వా శత్రూన్ భుఙ్క్ష్వ రాజ్యం సమృద్ధమ్.
మయైవైతే నిహతాః పూర్వమేవ
నిమిత్తమాత్రం భవ సవ్యసాచిన్..33..
ద్రోణం చ భీష్మం చ జయద్రథం చ
కర్ణం తథాఽన్యానపి యోధవీరాన్.
మయా హతాంస్త్వం జహి మా వ్యథిష్ఠా
యుధ్యస్వ జేతాసి రణే సపత్నాన్..34..
సఞ్జయ ఉవాచ
ఏతచ్ఛ్రుత్వా వచనం కేశవస్య
కృతాఞ్జలిర్వేపమానః కిరీటీ.
నమస్కృత్వా భూయ ఏవాహ కృష్ణమ్
సగద్గదం భీతభీతః ప్రణమ్య..35..
అర్జున ఉవాచ
స్థానే హృషీకేశ తవ ప్రకీర్త్యా
జగత్ ప్రహృష్యత్యనురజ్యతే చ.
రక్షాంసి భీతాని దిశో ద్రవన్తి
సర్వే నమస్యన్తి చ సిద్ధసఙ్ఘాః..36..
కస్మాచ్చ తే న నమేరన్ మహాత్మన్
గరీయసే బ్రహ్మణోఽప్యాదికర్త్రే.
అనన్త దేవేశ జగన్నివాస
త్వమక్షరం సదసత్తత్పరం యత్..37..
త్వమాదిదేవః పురుషః పురాణః
త్వమస్య విశ్వస్య పరం నిధానమ్.
వేత్తాఽసి వేద్యం చ పరం చ ధామ
త్వయా తతం విశ్వమనన్తరూప..38..
వాయుర్యమోఽగ్నిర్వరుణః శశాఙ్కః
ప్రజాపతిస్త్వం ప్రపితామహశ్చ.
నమో నమస్తేఽస్తు సహస్రకృత్వః
పునశ్చ భూయోఽపి నమో నమస్తే..39..
నమః పురస్తాదథ పృష్ఠతస్తే
నమోఽస్తు తే సర్వత ఏవ సర్వ.
అనన్తవీర్యామితవిక్రమస్త్వమ్
సర్వం సమాప్నోషి తతోఽసి సర్వః..40..
సఖేతి మత్వా ప్రసభం యదుక్తమ్
హే కృష్ణ హే యాదవ హే సఖేతి.
అజానతా మహిమానం తవేదమ్
మయా ప్రమాదాత్ప్రణయేన వాఽపి..41..
యచ్చావహాసార్థమసత్కృతోఽసి
విహారశయ్యాసనభోజనేషు.
ఏకోఽథవాఽప్యచ్యుత తత్ సమక్షమ్
తత్ క్షామయే త్వామహమప్రమేయమ్..42..
పితాఽసి లోకస్య చరాచరస్య
త్వమస్య పూజ్యశ్చ గురుర్గరీయాన్.
న త్వత్సమోఽస్త్యభ్యధికః కుతోఽన్యో
లోకత్రయేఽప్యప్రతిమప్రభావ..43..
తస్మాత్ ప్రణమ్య ప్రణిధాయ కాయమ్
ప్రసాదయే త్వామహమీశమీడ్యమ్.
పితేవ పుత్రస్య సఖేవ సఖ్యుః
ప్రియః ప్రియాయార్హసి దేవ సోఢుమ్..44..
అదృష్టపూర్వం హృషితోఽస్మి దృష్ట్వా
భయేన చ ప్రవ్యథితం మనో మే.
తదేవ మే దర్శయ దేవ రూపమ్
ప్రసీద దేవేశ జగన్నివాస..45..
కిరీటినం గదినం చక్రహస్తమ్
ఇచ్ఛామి త్వాం ద్రష్టుమహం తథైవ.
తేనైవ రూపేణ చతుర్భుజేన
సహస్రబాహో భవ విశ్వమూర్తే..46..
శ్రీభగవానువాచ
మయా ప్రసన్నేన తవార్జునేదమ్
రూపం పరం దర్శితమాత్మయోగాత్.
తేజోమయం విశ్వమనన్తమాద్యమ్
యన్మే త్వదన్యేన న దృష్టపూర్వమ్..47..
న వేదయజ్ఞాధ్యయనైర్న దానైః
న చ క్రియాభిర్న తపోభిరుగ్రైః.
ఏవం రూపః శక్య అహం నృలోకే
ద్రష్టుం త్వదన్యేన కురుప్రవీర..48..
మా తే వ్యథా మా చ విమూఢభావో
దృష్ట్వా రూపం ఘోరమీదృఙ్మమేదమ్.
వ్యపేతభీః ప్రీతమనాః పునస్త్వమ్
తదేవ మే రూపమిదం ప్రపశ్య..49..
సఞ్జయ ఉవాచ
ఇత్యర్జునం వాసుదేవస్తథోక్త్వా
స్వకం రూపం దర్శయామాస భూయః.
ఆశ్వాసయామాస చ భీతమేనమ్
భూత్వా పునః సౌమ్యవపుర్మహాత్మా..50..
అర్జున ఉవాచ
దృష్ట్వేదం మానుషం రూపం తవ సౌమ్యం జనార్దన.
ఇదానీమస్మి సంవృత్తః సచేతాః ప్రకృతిం గతః..51..
శ్రీభగవానువాచ
సుదుర్దర్శమిదం రూపం దృష్టవానసి యన్మమ.
దేవా అప్యస్య రూపస్య నిత్యం దర్శనకాఙ్క్షిణః..52..
నాహం వేదైర్న తపసా న దానేన న చేజ్యయా.
శక్య ఏవంవిధో ద్రష్టుం దృష్టవానసి మాం యథా..53..
భక్త్యా త్వనన్యయా శక్యమ్ అహమేవంవిధోఽర్జున.
జ్ఞాతుం ద్రష్టుం చ తత్త్వేన ప్రవేష్టుం చ పరన్తప..54..
మత్కర్మకృన్మత్పరమో మద్భక్తః సఙ్గవర్జితః.
నిర్వైరః సర్వభూతేషు యః స మామేతి పాణ్డవ..55..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే విశ్వరూపదర్శనయోగో నామ ఏకాదశోఽధ్యాయః ..
అర్జున ఉవాచ
ఏవం సతతయుక్తా యే భక్తాస్త్వాం పర్యుపాసతే.
యే చాప్యక్షరమవ్యక్తం తేషాం కే యోగవిత్తమాః..1..
శ్రీభగవానువాచ
మయ్యావేశ్య మనో యే మాం నిత్యయుక్తా ఉపాసతే.
శ్రద్ధయా పరయోపేతాః తే మే యుక్తతమా మతాః..2..
యే త్వక్షరమనిర్దేశ్యమ్ అవ్యక్తం పర్యుపాసతే.
సర్వత్రగమచిన్త్యం చ కూటస్థమ్ అచలం ధ్రువమ్..3..
సన్నియమ్యేన్ద్రియగ్రామం సర్వత్ర సమబుద్ధయః.
తే ప్రాప్నువన్తి మామేవ సర్వభూతహితే రతాః..4..
క్లేశోఽధికతరస్తేషామ్ అవ్యక్తాసక్తచేతసామ్.
అవ్యక్తా హి గతిర్దుఃఖం దేహవద్భిరవాప్యతే..5..
యే తు సర్వాణి కర్మాణి మయి సన్న్యస్య మత్పరః.
అనన్యేనైవ యోగేన మాం ధ్యాయన్త ఉపాసతే..6..
తేషామహం సముద్ధర్తా మృత్యుసంసారసాగరాత్.
భవామి న చిరాత్ పార్థ మయ్యావేశితచేతసామ్..7..
మయ్యేవ మన ఆధత్స్వ మయి బుద్ధిం నివేశయ.
నివసిష్యసి మయ్యేవ అత ఊర్ధ్వం న సంశయః..8..
అథ చిత్తం సమాధాతుం న శక్నోషి మయి స్థిరమ్.
అభ్యాసయోగేన తతో మామిచ్ఛాప్తుం ధనఞ్జయ..9..
అభ్యాసేఽప్యసమర్థోఽసి మత్కర్మపరమో భవ.
మదర్థమపి కర్మాణి కుర్వన్ సిద్ధిమవాప్స్యసి..10..
అథైతదప్యశక్తోఽసి కర్తుం మద్యోగమాశ్రితః.
సర్వకర్మఫలత్యాగం తతః కురు యతాత్మవాన్..11..
శ్రేయో హి జ్ఞానమభ్యాసాజ్జ్ఞానాద్ధ్యానం విశిష్యతే.
ధ్యానాత్ కర్మఫలత్యాగస్త్యాగాచ్ఛాన్తిరనన్తరమ్..12..
అద్వేష్టా సర్వభూతానాం మైత్రః కరుణ ఏవ చ.
నిర్మమో నిరహఙ్కారః సమదుఃఖసుఖః క్షమీ..13..
సన్తుష్టః సతతం యోగీ యతాత్మా దృఢనిశ్చయః.
మయ్యర్పితమనోబుద్ధిర్యో మద్భక్తః స మే ప్రియః..14..
యస్మాన్నోద్విజతే లోకో లోకాన్నోద్విజతే చ యః.
హర్షామర్షభయోద్వేగైర్ముక్తో యః స చ మే ప్రియః..15..
అనపేక్షః శుచిర్దక్ష ఉదాసీనో గతవ్యథః.
సర్వారమ్భపరిత్యాగీ యో మద్భక్తః స మే ప్రియః..16..
యో న హృష్యతి న ద్వేష్టి న శోచతి న కాఙ్క్షతి.
శుభాశుభపరిత్యాగీ భక్తిమాన్ యః స మే ప్రియః..17..
సమః శత్రౌ చ మిత్రే చ తథా మానాపమానయోః.
శీతోష్ణసుఖదుఃఖేషు సమః సఙ్గవివర్జితః..18..
తుల్యనిన్దాస్తుతిర్మౌనీ సన్తుష్టో యేన కేనచిత్.
అనికేతః స్థిరమతిర్భక్తిమాన్ మే ప్రియో నరః..19..
యే తు ధర్మ్యామృతమిదం యథోక్తం పర్యుపాసతే.
శ్రద్దధానా మత్పరమా భక్తాస్తేఽతీవ మే ప్రియాః..20..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే భక్తియోగో నామ ద్వాదశోఽధ్యాయః ..
శ్రీభగవానువాచ
ఇదం శరీరం కౌన్తేయ క్షేత్రమిత్యభిధీయతే.
ఏతద్యో వేత్తి తం ప్రాహుః క్షేత్రజ్ఞ ఇతి తద్విదః..1..
క్షేత్రజ్ఞం చాపి మాం విద్ధి సర్వక్షేత్రేషు భారత.
క్షేత్రక్షేత్రజ్ఞయోర్జ్ఞానం యత్తజ్జ్ఞానం మతం మమ..2..
తత్ క్షేత్రం యచ్చ యాదృక్చ యద్వికారి యతశ్చ యత్.
స చ యో యత్ప్రభావశ్చ తత్సమాసేన మే శృణు..3..
ఋషిభిర్బహుధా గీతం ఛన్దోభిర్వివిధైః పృథక్.
బ్రహ్మసూత్రపదైశ్చైవ హేతుమద్భిర్వినిశ్చితైః..4..
మహాభూతాన్యహఙ్కారో బుద్ధిరవ్యక్తమేవ చ.
ఇన్ద్రియాణి దశైకం చ పఞ్చ చేన్ద్రియగోచరాః..5..
ఇచ్ఛా ద్వేషః సుఖం దుఃఖం సఙ్ఘాతశ్చేతనా ధృతిః.
ఏతత్ క్షేత్రం సమాసేన సవికారముదాహృతమ్..6..
అమానిత్వమదమ్భిత్వమహింసా క్షాన్తిరార్జవమ్.
ఆచార్యోపాసనం శౌచం స్థైర్యమాత్మవినిగ్రహః..7..
ఇన్ద్రియార్థేషు వైరాగ్యమనహఙ్కార ఏవ చ.
జన్మమృత్యుజరావ్యాధిదుఃఖదోషానుదర్శనమ్..8..
అసక్తిరనభిష్వఙ్గః పుత్రదారగృహాదిషు.
నిత్యం చ సమచిత్తత్వమిష్టానిష్టోపపత్తిషు..9..
మయి చానన్యయోగేన భక్తిరవ్యభిచారిణీ.
వివిక్తదేశసేవిత్వమ్ అరతిర్జనసంసది..10..
అధ్యాత్మజ్ఞాననిత్యత్వం తత్త్వజ్ఞానార్థదర్శనమ్.
ఏతజ్జ్ఞానమితి ప్రోక్తమజ్ఞానం యదతోఽన్యథా..11..
జ్ఞేయం యత్తత్ప్రవక్ష్యామి యజ్జ్ఞాత్వాఽమృతమశ్నుతే.
అనాదిమత్పరం బ్రహ్మ న సత్తన్నాసదుచ్యతే..12..
సర్వతః పాణిపాదం తత్ సర్వతోఽక్షిశిరోముఖమ్.
సర్వతః శ్రుతిమల్లోకే సర్వమావృత్య తిష్ఠతి..13..
సర్వేన్ద్రియగుణాభాసం సర్వేన్ద్రియవివర్జితమ్.
అసక్తం సర్వభృచ్చైవ నిర్గుణం గుణభోక్తృ చ..14..
బహిరన్తశ్చ భూతానామచరం చరమేవ చ.
సూక్ష్మత్వాత్తదవిజ్ఞేయం దూరస్థం చాన్తికే చ తత్..15..
అవిభక్తం చ భూతేషు విభక్తమివ చ స్థితమ్.
భూతభర్తృ చ తజ్జ్ఞేయం గ్రసిష్ణు ప్రభవిష్ణు చ..16..
జ్యోతిషామపి తజ్జ్యోతిస్తమసః పరముచ్యతే.
జ్ఞానం జ్ఞేయం జ్ఞానగమ్యం హృది సర్వస్య విష్ఠితమ్..17..
ఇతి క్షేత్రం తథా జ్ఞానం జ్ఞేయం చోక్తం సమాసతః.
మద్భక్త ఏతద్విజ్ఞాయ మద్భావాయోపపద్యతే..18..
ప్రకృతిం పురుషం చైవ విద్ధ్యనాది ఉభావపి.
వికారాంశ్చ గుణాంశ్చైవ విద్ధి ప్రకృతిసమ్భవాన్..19..
కార్యకారణకర్తృత్వే హేతుః ప్రకృతిరుచ్యతే.
పురుషః సుఖదుఃఖానాం భోక్తృత్వే హేతురుచ్యతే..20..
పురుషః ప్రకృతిస్థో హి భుఙ్క్తే ప్రకృతిజాన్ గుణాన్.
కారణం గుణసఙ్గోఽస్య సదసద్యోనిజన్మసు..21..
ఉపద్రష్టాఽనుమన్తా చ భర్తా భోక్తా మహేశ్వరః.
పరమాత్మేతి చాప్యుక్తో దేహేఽస్మిన్ పురుషః పరః..22..
య ఏవం వేత్తి పురుషం ప్రకృతిం చ గుణైః సహ.
సర్వథా వర్తమానోఽపి న స భూయోఽభిజాయతే..23..
ధ్యానేనాత్మని పశ్యన్తి కేచిదాత్మానమాత్మనా.
అన్యే సాఙ్ఖ్యేన యోగేన కర్మయోగేన చాపరే..24..
అన్యే త్వేవమజానన్తః శ్రుత్వాఽన్యేభ్య ఉపాసతే.
తేఽపి చాతితరన్త్యేవ మృత్యుం శ్రుతిపరాయణాః..25..
యావత్ సఞ్జాయతే కిఞ్చిత్ సత్త్వం స్థావరజఙ్గమమ్.
క్షేత్రక్షేత్రజ్ఞసంయోగాత్ తద్విద్ధి భరతర్షభ..26..
సమం సర్వేషు భూతేషు తిష్ఠన్తం పరమేశ్వరమ్.
వినశ్యత్స్వవినశ్యన్తం యః పశ్యతి స పశ్యతి..27..
సమం పశ్యన్ హి సర్వత్ర సమవస్థితమీశ్వరమ్.
న హినస్త్యాత్మనాత్మానం తతో యాతి పరాం గతిమ్..28..
ప్రకృత్యైవ చ కర్మాణి క్రియమాణాని సర్వశః.
యః పశ్యతి తథాత్మానమకర్తారం స పశ్యతి..29..
యదా భూతపృథగ్భావమేకస్థమనుపశ్యతి.
తత ఏవ చ విస్తారం బ్రహ్మ సమ్పద్యతే తదా..30..
అనాదిత్వాన్నిర్గుణత్వాత్ పరమాత్మాఽయమవ్యయః.
శరీరస్థోఽపి కౌన్తేయ న కరోతి న లిప్యతే..31..
యథా సర్వగతం సౌక్ష్మ్యాదాకాశం నోపలిప్యతే.
సర్వత్రావస్థితో దేహే తథాత్మా నోపలిప్యతే..32..
యథా ప్రకాశయత్యేకః కృత్స్నం లోకమిమం రవిః.
క్షేత్రం క్షేత్రీ తథా కృత్స్నం ప్రకాశయతి భారత..33..
క్షేత్రక్షేత్రజ్ఞయోరేవమ్ అన్తరం జ్ఞానచక్షుషా.
భూతప్రకృతిమోక్షం చ యే విదుర్యాన్తి తే పరమ్..34..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే క్షేత్రక్షేత్రజ్ఞవిభాగయోగో నామ త్రయోదశోఽధ్యాయః ..
శ్రీభగవానువాచ
పరం భూయః ప్రవక్ష్యామి జ్ఞానానాం జ్ఞానముత్తమమ్.
యజ్జ్ఞాత్వా మునయః సర్వే పరాం సిద్ధిమితో గతాః..1..
ఇదం జ్ఞానముపాశ్రిత్య మమ సాధర్మ్యమాగతాః.
సర్గేఽపి నోపజాయన్తే ప్రలయే న వ్యథన్తి చ..2..
మమ యోనిర్మహద్బ్రహ్మ తస్మిన్గర్భం దధామ్యహమ్.
సమ్భవః సర్వభూతానాం తతో భవతి భారత..3..
సర్వయోనిషు కౌన్తేయ మూర్తయః సమ్భవన్తి యాః.
తాసాం బ్రహ్మ మహద్యోనిరహం బీజప్రదః పితా..4..
సత్త్వం రజస్తమ ఇతి గుణాః ప్రకృతిసమ్భవాః.
నిబధ్నన్తి మహాబాహో దేహే దేహినమవ్యయమ్..5..
తత్ర సత్త్వం నిర్మలత్వాత్ ప్రకాశకమనామయమ్.
సుఖసఙ్గేన బధ్నాతి జ్ఞానసఙ్గేన చానఘ..6..
రజో రాగాత్మకం విద్ధి తృష్ణాసఙ్గసముద్భవమ్.
తన్నిబధ్నాతి కౌన్తేయ కర్మసఙ్గేన దేహినమ్..7..
తమస్త్వజ్ఞానజం విద్ధి మోహనం సర్వదేహినామ్.
ప్రమాదాలస్యనిద్రాభిస్తన్నిబధ్నాతి భారత..8..
సత్త్వం సుఖే సఞ్జయతి రజః కర్మణి భారత.
జ్ఞానమావృత్య తు తమః ప్రమాదే సఞ్జయత్యుత..9..
రజస్తమశ్చాభిభూయ సత్త్వం భవతి భారత.
రజః సత్త్వం తమశ్చైవ తమః సత్త్వం రజస్తథా..10..
సర్వద్వారేషు దేహేఽస్మిన్ ప్రకాశ ఉపజాయతే.
జ్ఞానం యదా తదా విద్యాద్వివృద్ధం సత్త్వమిత్యుత..11..
లోభః ప్రవృత్తిరారమ్భః కర్మణామశమః స్పృహా.
రజస్యేతాని జాయన్తే వివృద్ధే భరతర్షభ..12..
అప్రకాశోఽప్రవృత్తిశ్చ ప్రమాదో మోహ ఏవ చ.
తమస్యేతాని జాయన్తే వివృద్ధే కురునన్దన..13..
యదా సత్త్వే ప్రవృద్ధే తు ప్రలయం యాతి దేహభృత్.
తదోత్తమవిదాం లోకానమలాన్ ప్రతిపద్యతే..14..
రజసి ప్రలయం గత్వా కర్మసఙ్గిషు జాయతే.
తథా ప్రలీనస్తమసి మూఢయోనిషు జాయతే..15..
కర్మణః సుకృతస్యాహుః సాత్త్వికం నిర్మలం ఫలమ్.
రజసస్తు ఫలం దుఃఖమజ్ఞానం తమసః ఫలమ్..16..
సత్త్వాత్సఞ్జాయతే జ్ఞానం రజసో లోభ ఏవ చ.
ప్రమాదమోహౌ తమసో భవతోఽజ్ఞానమేవ చ..17..
ఊర్ధ్వం గచ్ఛన్తి సత్త్వస్థా మధ్యే తిష్ఠన్తి రాజసాః.
జఘన్యగుణవృత్తిస్థా అధో గచ్ఛన్తి తామసాః..18..
నాన్యం గుణేభ్యః కర్తారం యదా ద్రష్టాఽనుపశ్యతి.
గుణేభ్యశ్చ పరం వేత్తి మద్భావం సోఽధిగచ్ఛతి..19..
గుణానేతానతీత్య త్రీన్ దేహీ దేహసముద్భవాన్.
జన్మమృత్యుజరాదుఃఖైర్విముక్తోఽమృతమశ్నుతే..20..
అర్జున ఉవాచ
కైర్లిఙ్గైస్త్రీన్ గుణానేతానతీతో భవతి ప్రభో.
కిమాచారః కథం చైతాంస్త్రీన్ గుణానతివర్తతే..21..
శ్రీభగవానువాచ
ప్రకాశం చ ప్రవృత్తిం చ మోహమేవ చ పాణ్డవ.
త ద్వేష్టి సమ్ప్రవృత్తాని న నివృత్తాని కాఙ్క్షతి..22..
ఉదాసీనవదాసీనో గుణైర్యో న విచాల్యతే.
గుణా వర్తన్త ఇత్యేవ యోఽవతిష్ఠతి నేఙ్గతే..23..
సమదుఃఖసుఖః స్వస్థః సమలోష్టాశ్మకాఞ్చనః.
తుల్యప్రియాప్రియో ధీరస్తుల్యనిన్దాత్మసంస్తుతిః..24..
మానాపమానయోస్తుల్యస్తుల్యో మిత్రారిపక్షయోః.
సర్వారమ్భపరిత్యాగీ గుణాతీతః స ఉచ్యతే..25..
మాం చ యోఽవ్యభిచారేణ భక్తియోగేన సేవతే.
స గుణాన్ సమతీత్యైతాన్ బ్రహ్మభూయాయ కల్పతే..26..
బ్రహ్మణో హి ప్రతిష్ఠాఽహమమృతస్యావ్యయస్య చ.
శాశ్వతస్య చ ధర్మస్య సుఖస్యైకాన్తికస్య చ..27..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే గుణత్రయవిభాగయోగో నామ చతుర్దశోఽధ్యాయః ..
శ్రీభగవానువాచ
ఊర్ధ్వమూలమధఃశాఖమశ్వత్థం ప్రాహురవ్యయమ్.
ఛన్దాంసి యస్య పర్ణాని యస్తం వేద స వేదవిత్..1..
అధశ్చోర్ధ్వం ప్రసృతాస్తస్య శాఖాః
గుణప్రవృద్ధా విషయప్రవాలాః.
అధశ్చ మూలాన్యనుసన్తతాని
కర్మానుబన్ధీని మనుష్యలోకే..2..
న రూపమస్యేహ తథోపలభ్యతే
నాన్తో న చాదిర్న చ సమ్ప్రతిష్ఠా.
అశ్వత్థమేనం సువిరూఢమూలమ్
అసఙ్గశస్త్రేణ దృఢేన ఛిత్త్వా..3..
తతః పదం తత్ పరిమార్గితవ్యమ్
యస్మిన్ గతా న నివర్తన్తి భూయః.
తమేవ చాద్యం పురుషం ప్రపద్యే
యతః ప్రవృత్తిః ప్రసృతా పురాణీ..4..
నిర్మానమోహా జితసఙ్గదోషాః
అధ్యాత్మనిత్యా వినివృత్తకామాః.
ద్వన్ద్వైర్విముక్తాః సుఖదుఃఖసంజ్ఞైః
గచ్ఛన్త్యమూఢాః పదమవ్యయం తత్..5..
న తద్భాసయతే సూర్యో న శశాఙ్కో న పావకః.
యద్గత్వా న నివర్తన్తే తద్ధామ పరమం మమ..6..
మమైవాంశో జీవలోకే జీవభూతః సనాతనః.
మనఃషష్ఠానీన్ద్రియాణి ప్రకృతిస్థాని కర్షతి..7..
శరీరం యదవాప్నోతి యచ్చాప్యుత్క్రామతీశ్వరః.
గృహీత్వైతాని సంయాతి వాయుర్గన్ధానివాశయాత్..8..
శ్రోత్రం చక్షుః స్పర్శనం చ రసనం ఘ్రాణమేవ చ.
అధిష్ఠాయ మనశ్చాయం విషయానుపసేవతే..9..
ఉత్క్రామన్తం స్థితం వాఽపి భుఞ్జానం వా గుణాన్వితమ్.
విమూఢా నానుపశ్యన్తి పశ్యన్తి జ్ఞానచక్షుషః..10..
యతన్తో యోగినశ్చైనం పశ్యన్త్యాత్మన్యవస్థితమ్.
యతన్తోఽప్యకృతాత్మానో నైనం పశ్యన్త్యచేతసః..11..
యదాదిత్యగతం తేజో జగద్భాసయతేఽఖిలమ్.
యచ్చన్ద్రమసి యచ్చాగ్నౌ తత్తేజో విద్ధి మామకమ్..12..
గామావిశ్య చ భూతాని ధారయామ్యహమోజసా.
పుష్ణామి చౌషధీః సర్వాః సోమో భూత్వా రసాత్మకః..13..
అహం వైశ్వానరో భూత్వా ప్రాణినాం దేహమాశ్రితః.
ప్రాణాపానసమాయుక్తః పచామ్యన్నం చతుర్విధమ్..14..
సర్వస్య చాహం హృది సన్నివిష్టో
మత్తః స్మృతిర్జ్ఞానమపోహనం చ.
వేదైశ్చ సర్వైరహమేవ వేద్యో
వేదాన్తకృద్వేదవిదేవ చాహమ్..15..
ద్వావిమౌ పురుషౌ లోకే క్షరశ్చాక్షర ఏవ చ.
క్షరః సర్వాణి భూతాని కూటస్థోఽక్షర ఉచ్యతే..16..
ఉత్తమః పురుషస్త్వన్యః పరమాత్మేత్యుదాహృతః.
యో లోకత్రయమావిశ్య బిభర్త్యవ్యయ ఈశ్వరః..17..
యస్మాత్ క్షరమతీతోఽహమ్ అక్షరాదపి చోత్తమః.
అతోఽస్మి లోకే వేదే చ ప్రథితః పురుషోత్తమః..18..
యో మామేవమసమ్మూఢో జానాతి పురుషోత్తమమ్.
స సర్వవిద్భజతి మాం సర్వభావేన భారత..19..
ఇతి గుహ్యతమం శాస్త్రమిదముక్తం మయాఽనఘ.
ఏతద్బుద్ధ్వా బుద్ధిమాన్ స్యాత్ కృతకృత్యశ్చ భారత..20..
..ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే పురుషోత్తమయోగో నామ పఞ్చదశోఽధ్యాయః..
శ్రీభగవానువాచ
అభయం సత్త్వసంశుద్ధిర్జ్ఞానయోగవ్యవస్థితిః.
దానం దమశ్చ యజ్ఞశ్చ స్వాధ్యాయస్తప ఆర్జవమ్..1..
అహింసా సత్యమక్రోధస్త్యాగః శాన్తిరపైశునమ్.
దయా భూతేష్వలోలుప్త్వం మార్దవం హ్రీరచాపలమ్..2..
తేజః క్షమా ధృతిః శౌచమద్రోహో నాతిమానితా.
భవన్తి సమ్పదం దైవీమభిజాతస్య భారత..3..
దమ్భో దర్పోఽభిమానశ్చ క్రోధః పారుష్యమేవ చ.
అజ్ఞానం చాభిజాతస్య పార్థ సమ్పదమాసురీమ్..4..
దైవీ సమ్పద్విమోక్షాయ నిబన్ధాయాసురీ మతా.
మా శుచః సమ్పదం దైవీమభిజాతోఽసి పాణ్డవ..5..
ద్వౌ భూతసర్గౌ లోకేఽస్మిన్ దైవ ఆసుర ఏవ చ.
దైవో విస్తరశః ప్రోక్త ఆసురం పార్థ మే శృణు..6..
ప్రవృత్తిం చ నివృత్తిం చ జనా న విదురాసురాః.
న శౌచం నాపి చాచారో న సత్యం తేషు విద్యతే..7..
అసత్యమప్రతిష్ఠం తే జగదాహురనీశ్వరమ్.
అపరస్పరసమ్భూతం కిమన్యత్ కామహైతుకమ్..8..
ఏతాం దృష్టిమవష్టభ్య నష్టాత్మానోఽల్పబుద్ధయః.
ప్రభవన్త్యుగ్రకర్మాణః క్షయాయ జగతోఽహితాః..9..
కామమాశ్రిత్య దుష్పూరం దమ్భమానమదాన్వితాః.
మోహాద్గృహీత్వాఽసద్గ్రాహాన్ ప్రవర్తన్తేఽశుచివ్రతాః..10..
చిన్తామపరిమేయాం చ ప్రలయాన్తాముపాశ్రితాః.
కామోపభోగపరమా ఏతావదితి నిశ్చితాః..11..
ఆశాపాశశతైర్బద్ధాః కామక్రోధపరాయణాః.
ఈహన్తే కామభోగార్థమ్ అన్యాయేనార్థసఞ్చయాన్..12..
ఇదమద్య మయా లబ్ధమిమం ప్రాప్స్యే మనోరథమ్.
ఇదమస్తీదమపి మే భవిష్యతి పునర్ధనమ్..13..
అసౌ మయా హతః శత్రుర్హనిష్యే చాపరానపి.
ఈశ్వరోఽహమహం భోగీ సిద్ధోఽహం బలవాన్ సుఖీ..14..
ఆఢ్యోఽభిజనవానస్మి కోఽన్యోస్తి సదృశో మయా.
యక్ష్యే దాస్యామి మోదిష్య ఇత్యజ్ఞానవిమోహితాః..15..
అనేకచిత్తవిభ్రాన్తా మోహజాలసమావృతాః.
ప్రసక్తాః కామభోగేషు పతన్తి నరకేఽశుచౌ..16..
ఆత్మసమ్భావితాః స్తబ్ధా ధనమానమదాన్వితాః.
యజన్తే నామయజ్ఞైస్తే దమ్భేనావిధిపూర్వకమ్..17..
అహఙ్కారం బలం దర్పం కామం క్రోధం చ సంశ్రితాః.
మామాత్మపరదేహేషు ప్రద్విషన్తోఽభ్యసూయకాః..18..
తానహం ద్విషతః క్రూరాన్ సంసారేషు నరాధమాన్.
క్షిపామ్యజస్రమశుభాన్ ఆసురీష్వేవ యోనిషు..19..
ఆసురీం యోనిమాపన్నా మూఢా జన్మని జన్మని.
మామప్రాప్యైవ కౌన్తేయ తతో యాన్త్యధమాం గతిమ్..20..
త్రివిధం నరకస్యేదం ద్వారం నాశనమాత్మనః.
కామః క్రోధస్తథా లోభస్తస్మాదేతత్త్రయం త్యజేత్..21..
ఏతైర్విముక్తః కౌన్తేయ తమోద్వారైస్త్రిభిర్నరః.
ఆచరత్యాత్మనః శ్రేయస్తతో యాతి పరాం గతిమ్..22..
యః శాస్త్రవిధిముత్సృజ్య వర్తతే కామకారతః.
న స సిద్ధిమవాప్నోతి న సుఖం న పరాం గతిమ్..23..
తస్మాచ్ఛాస్త్రం ప్రమాణం తే కార్యాకార్యవ్యవస్థితౌ.
జ్ఞాత్వా శాస్త్రవిధానోక్తం కర్మ కర్తుమిహార్హసి..24..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే దైవాసురసమ్పద్విభాగయోగో నామ షోడశోఽధ్యాయః ..
అర్జున ఉవాచ
యే శాస్త్రవిధిముత్సృజ్య యజన్తే శ్రద్ధయాఽన్వితాః.
తేషాం నిష్ఠా తు కా కృష్ణ సత్త్వమాహో రజస్తమః..1..
శ్రీభగవానువాచ
త్రివిధా భవతి శ్రద్ధా దేహినాం సా స్వభావజా.
సాత్త్వికీ రాజసీ చైవ తామసీ చేతి తాం శృణు..2..
సత్త్వానురూపా సర్వస్య శ్రద్ధా భవతి భారత.
శ్రద్ధామయోఽయం పురుషో యో యచ్ఛ్రద్ధః స ఏవ సః..3..
యజన్తే సాత్త్వికా దేవాన్ యక్షరక్షాంసి రాజసాః.
ప్రేతాన్ భూతగణాంశ్చాన్యే యజన్తే తామసా జనాః..4..
అశాస్త్రవిహితం ఘోరం తప్యన్తే యే తపో జనాః.
దమ్భాహఙ్కారసంయుక్తాః కామరాగబలాన్వితాః..5..
కర్షయన్తః శరీరస్థం భూతగ్రామమచేతసః.
మాం చైవాన్తఃశరీరస్థం తాన్ విద్ధ్యాసురనిశ్చయాన్..6..
ఆహారస్త్వపి సర్వస్య త్రివిధో భవతి ప్రియః.
యజ్ఞస్తపస్తథా దానం తేషాం భేదమిమం శృణు..7..
ఆయుఃసత్త్వబలారోగ్యసుఖప్రీతివివర్ధనాః.
రస్యాః స్నిగ్ధాః స్థిరా హృద్యా ఆహారాః సాత్త్వికప్రియాః..8..
కట్వమ్లలవణాత్యుష్ణతీక్ష్ణరూక్షవిదాహినః.
ఆహారా రాజసస్యేష్టా దుఃఖశోకామయప్రదాః..9..
యాతయామం గతరసం పూతి పర్యుషితం చ యత్.
ఉచ్ఛిష్టమపి చామేధ్యం భోజనం తామసప్రియమ్..10..
అఫలాకాఙ్క్షిభిర్యజ్ఞో విధిదృష్టో య ఇజ్యతే.
యష్టవ్యమేవేతి మనః సమాధాయ స సాత్త్వికః..11..
అభిసన్ధాయ తు ఫలం దమ్భార్థమపి చైవ యత్.
ఇజ్యతే భరతశ్రేష్ఠ తం యజ్ఞం విద్ధి రాజసమ్..12..
విధిహీనమసృష్టాన్నం మన్త్రహీనమదక్షిణమ్.
శ్రద్ధావిరహితం యజ్ఞం తామసం పరిచక్షతే..13..
దేవద్విజగురుప్రాజ్ఞపూజనం శౌచమార్జవమ్.
బ్రహ్మచర్యమహింసా చ శారీరం తప ఉచ్యతే..14..
అనుద్వేగకరం వాక్యం సత్యం ప్రియహితం చ యత్.
స్వాధ్యాయాభ్యసనం చైవ వాఙ్మయం తప ఉచ్యతే..15..
మనః ప్రసాదః సౌమ్యత్వం మౌనమాత్మవినిగ్రహః.
భావసంశుద్ధిరిత్యేతత్ తపో మానసముచ్యతే..16..
శ్రద్ధయా పరయా తప్తం తపస్తత్ త్రివిధం నరైః.
అఫలాకాఙ్క్షిభిర్యుక్తైః సాత్త్వికం పరిచక్షతే..17..
సత్కారమానపూజార్థం తపో దమ్భేన చైవ యత్.
క్రియతే తదిహ ప్రోక్తం రాజసం చలమధ్రువమ్..18..
మూఢగ్రాహేణాత్మనో యత్ పీడయా క్రియతే తపః.
పరస్యోత్సాదనార్థం వా తత్తామసముదాహృతమ్..19..
దాతవ్యమితి యద్దానం దీయతేఽనుపకారిణే.
దేశే కాలే చ పాత్రే చ తద్దానం సాత్త్వికం స్మృతమ్..20..
యత్తు ప్రత్యుపకారార్థం ఫలముద్దిశ్య వా పునః.
దీయతే చ పరిక్లిష్టం తద్దానం రాజసం స్మృతమ్..21..
అదేశకాలే యద్దానమ్ అపాత్రేభ్యశ్చ దీయతే.
అసత్కృతమవజ్ఞాతం తత్తామసముదాహృతమ్..22..
ఓం తత్సదితి నిర్దేశో బ్రహ్మణస్త్రివిధః స్మృతః.
బ్రాహ్మణాస్తేన వేదాశ్చ యజ్ఞాశ్చ విహితాః పురా..23..
తస్మాదోమిత్యుదాహృత్య యజ్ఞదానతపఃక్రియాః.
ప్రవర్తన్తే విధానోక్తాః సతతం బ్రహ్మవాదినామ్..24..
తదిత్యనభిసన్ధాయ ఫలం యజ్ఞతపఃక్రియాః.
దానక్రియాశ్చ వివిధాః క్రియన్తే మోక్షకాఙ్క్షిభిః..25..
సద్భావే సాధుభావే చ సదిత్యేతత్ ప్రయుజ్యతే.
ప్రశస్తే కర్మణి తథా సచ్ఛబ్దః పార్థ యుజ్యతే..26..
యజ్ఞే తపసి దానే చ స్థితిః సదితి చోచ్యతే.
కర్మ చైవ తదర్థీయం సదిత్యేవాభిధీయతే..27..
అశ్రద్ధయా హుతం దత్తం తపస్తప్తం కృతం చ యత్.
అసదిత్యుచ్యతే పార్థ న చ తత్ ప్రేత్య నో ఇహ..28..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే శ్రద్ధాత్రయవిభాగయోగో నామ సప్తదశోఽధ్యాయః ..
అర్జున ఉవాచ
సన్న్యాసస్య మహాబాహో తత్త్వమిచ్ఛామి వేదితుమ్.
త్యాగస్య చ హృషీకేశ పృథక్కేశినిషూదన..1..
శ్రీభగవానువాచ
కామ్యానాం కర్మణాం న్యాసం సన్న్యాసం కవయో విదుః.
సర్వకర్మఫలత్యాగం ప్రాహుస్త్యాగం విచక్షణాః..2..
త్యాజ్యం దోషవదిత్యేకే కర్మ ప్రాహుర్మనీషిణః.
యజ్ఞదానతపఃకర్మ న త్యాజ్యమితి చాపరే..3..
నిశ్చయం శృణు మే తత్ర త్యాగే భరతసత్తమ.
త్యాగో హి పురుషవ్యాఘ్ర త్రివిధః సమ్ప్రకీర్తితః..4..
యజ్ఞదానతపఃకర్మ న త్యాజ్యం కార్యమేవ తత్.
యజ్ఞో దానం తపశ్చైవ పావనాని మనీషిణామ్..5..
ఏతాన్యపి తు కర్మాణి సఙ్గం త్యక్త్వా ఫలాని చ.
కర్తవ్యానీతి మే పార్థ నిశ్చితం మతముత్తమమ్..6..
నియతస్య తు సన్న్యాసః కర్మణో నోపపద్యతే.
మోహాత్తస్య పరిత్యాగస్తామసః పరికీర్తితః..7..
దుఃఖమిత్యేవ యత్కర్మ కాయక్లేశభయాత్ త్యజేత్.
స కృత్వా రాజసం త్యాగం నైవ త్యాగఫలం లభేత్..8..
కార్యమిత్యేవ యత్కర్మ నియతం క్రియతేఽర్జున.
సఙ్గం త్యక్త్వా ఫలం చైవ స త్యాగః సాత్త్వికో మతః..9..
న ద్వేష్ట్యకుశలం కర్మ కుశలే నానుషజ్జతే.
త్యాగీ సత్త్వసమావిష్టో మేధావీ ఛిన్నసంశయః..10..
న హి దేహభృతా శక్యం త్యక్తుం కర్మాణ్యశేషతః.
యస్తు కర్మఫలత్యాగీ స త్యాగీత్యభిధీయతే..11..
అనిష్టమిష్టం మిశ్రం చ త్రివిధం కర్మణః ఫలమ్.
భవత్యత్యాగినాం ప్రేత్య న తు సన్న్యాసినాం క్వచిత్..12..
పఞ్చైతాని మహాబాహో కారణాని నిబోధ మే.
సాఙ్ఖ్యే కృతాన్తే ప్రోక్తాని సిద్ధయే సర్వకర్మణామ్..13..
అధిష్ఠానం తథా కర్తా కరణం చ పృథగ్విధమ్.
వివిధాశ్చ పృథక్చేష్టా దైవం చైవాత్ర పఞ్చమమ్..14..
శరీరవాఙ్మనోభిర్యత్ కర్మ ప్రారభతే నరః.
న్యాయ్యం వా విపరీతం వా పఞ్చైతే తస్య హేతవః..15..
తత్రైవం సతి కర్తారమాత్మానం కేవలం తు యః.
పశ్యత్యకృతబుద్ధిత్వాన్న స పశ్యతి దుర్మతిః..16..
యస్య నాహం కృతో భావో బుద్ధిర్యస్య న లిప్యతే.
హత్వాఽపి స ఇమాఀల్లోకాన్న హన్తి న నిబధ్యతే..17..
జ్ఞానం జ్ఞేయం పరిజ్ఞాతా త్రివిధా కర్మచోదనా.
కరణం కర్మ కర్తేతి త్రివిధః కర్మసఙ్గ్రహః..18..
జ్ఞానం కర్మ చ కర్తా చ త్రిధైవ గుణభేదతః.
ప్రోచ్యతే గుణసఙ్ఖ్యానే యథావచ్ఛృణు తాన్యపి..19..
సర్వభూతేషు యేనైకం భావమవ్యయమీక్షతే.
అవిభక్తం విభక్తేషు తజ్జ్ఞానం విద్ధి సాత్త్వికమ్..20..
పృథక్త్వేన తు యజ్జ్ఞానం నానాభావాన్ పృథగ్విధాన్.
వేత్తి సర్వేషు భూతేషు తజ్జ్ఞానం విద్ధి రాజసమ్..21..
యత్తు కృత్స్నవదేకస్మిన్ కార్యే సక్తమహైతుకమ్.
అతత్త్వార్థవదల్పం చ తత్తామసముదాహృతమ్..22..
నియతం సఙ్గరహితమరాగద్వేషతః కృతమ్.
అఫలప్రేప్సునా కర్మ యత్తత్సాత్త్వికముచ్యతే..23..
యత్తు కామేప్సునా కర్మ సాహఙ్కారేణ వా పునః.
క్రియతే బహులాయాసం తద్రాజసముదాహృతమ్..24..
అనుబన్ధం క్షయం హింసామనపేక్ష్య చ పౌరుషమ్.
మోహాదారభ్యతే కర్మ యత్తత్తామసముచ్యతే..25..
ముక్తసఙ్గోఽనహంవాదీ ధృత్యుత్సాహసమన్వితః.
సిద్ధ్యసిద్ధ్యోర్నిర్వికారః కర్తా సాత్త్విక ఉచ్యతే..26..
రాగీ కర్మఫలప్రేప్సుర్లుబ్ధో హింసాత్మకోఽశుచిః.
హర్షశోకాన్వితః కర్తా రాజసః పరికీర్తితః..27..
అయుక్తః ప్రాకృతః స్తబ్ధః శఠో నైష్కృతికోఽలసః.
విషాదీ దీర్ఘసూత్రీ చ కర్తా తామస ఉచ్యతే..28..
బుద్ధేర్భేదం ధృతేశ్చైవ గుణతస్త్రివిధం శృణు.
ప్రోచ్యమానమశేషేణ పృథక్త్వేన ధనఞ్జయ..29..
ప్రవృత్తిం చ నివృత్తిం చ కార్యాకార్యే భయాభయే.
బన్ధం మోక్షం చ యా వేత్తి బుద్ధిః సా పార్థ సాత్త్వికీ..30..
యయా ధర్మమధర్మం చ కార్యం చాకార్యమేవ చ.
అయథావత్ ప్రజానాతి బుద్ధిః సా పార్థ రాజసీ..31..
అధర్మం ధర్మమితి యా మన్యతే తమసాఽవృతా.
సర్వార్థాన్ విపరీతాంశ్చ బుద్ధిః సా పార్థ తామసీ..32..
ధృత్యా యయా ధారయతే మనఃప్రాణేన్ద్రియక్రియాః.
యోగేనావ్యభిచారిణ్యా ధృతిః సా పార్థ సాత్త్వికీ..33..
యయా తు ధర్మకామార్థాన్ ధృత్యా ధారయతేఽర్జున.
ప్రసఙ్గేన ఫలాకాఙ్క్షీ ధృతిః సా పార్థ రాజసీ..34..
యయా స్వప్నం భయం శోకం విషాదం మదమేవ చ.
న విముఞ్చతి దుర్మేధా ధృతిః సా పార్థ తామసీ..35..
సుఖం త్విదానీం త్రివిధం శృణు మే భరతర్షభ.
అభ్యాసాద్రమతే యత్ర దుఃఖాన్తం చ నిగచ్ఛతి..36..
యత్తదగ్రే విషమివ పరిణామేఽమృతోపమమ్.
తత్సుఖం సాత్త్వికం ప్రోక్తమ్ ఆత్మబుద్ధిప్రసాదజమ్..37..
విషయేన్ద్రియసంయోగాద్యత్తదగ్రేఽమృతోపమమ్.
పరిణామే విషమివ తత్సుఖం రాజసం స్మృతమ్..38..
యదగ్రే చానుబన్ధే చ సుఖం మోహనమాత్మనః.
నిద్రాలస్యప్రమాదోత్థం తత్తామసముదాహృతమ్..39..
న తదస్తి పృథివ్యాం వా దివి దేవేషు వా పునః.
సత్త్వం ప్రకృతిజైర్ముక్తం యదేభిః స్యాత్ త్రిభిర్గుణైః..40..
బ్రాహ్మణక్షత్రియవిశాం శూద్రాణాం చ పరన్తప.
కర్మాణి ప్రవిభక్తాని స్వభావప్రభవైర్గుణైః..41..
శమో దమస్తపః శౌచం క్షాన్తిరార్జవమేవ చ.
జ్ఞానం విజ్ఞానమాస్తిక్యం బ్రహ్మకర్మ స్వభావజమ్..42..
శౌర్యం తేజో ధృతిర్దాక్ష్యం యుద్ధే చాప్యపలాయనమ్.
దానమీశ్వరభావశ్చ క్షాత్రం కర్మ స్వభావజమ్..43..
కృషిగౌరక్ష్యవాణిజ్యం వైశ్యకర్మ స్వభావజమ్.
పరిచర్యాత్మకం కర్మ శూద్రస్యాపి స్వభావజమ్..44..
స్వే స్వే కర్మణ్యభిరతః సంసిద్ధిం లభతే నరః.
స్వకర్మనిరతః సిద్ధిం యథా విన్దతి తచ్ఛృణు..45..
యతః ప్రవృత్తిర్భూతానాం యేన సర్వమిదం తతమ్.
స్వకర్మణా తమభ్యర్చ్య సిద్ధిం విన్దతి మానవః..46..
శ్రేయాన్ స్వధర్మో విగుణః పరధర్మాత్స్వనుష్ఠితాత్.
స్వభావనియతం కర్మ కుర్వన్నాప్నోతి కిల్బిషమ్..47..
సహజం కర్మ కౌన్తేయ సదోషమపి న త్యజేత్.
సర్వారమ్భా హి దోషేణ ధూమేనాగ్నిరివావృతాః..48..
అసక్తబుద్ధిః సర్వత్ర జితాత్మా విగతస్పృహః.
నైష్కర్మ్యసిద్ధిం పరమాం సన్న్యాసేనాధిగచ్ఛతి..49..
సిద్ధిం ప్రాప్తో యథా బ్రహ్మ తథాప్నోతి నిబోధ మే.
సమాసేనైవ కౌన్తేయ నిష్ఠా జ్ఞానస్య యా పరా..50..
బుద్ధ్యా విశుద్ధయా యుక్తో ధృత్యాత్మానం నియమ్య చ.
శబ్దాదీన్ విషయాంస్త్యక్త్వా రాగద్వేషౌ వ్యుదస్య చ..51..
వివిక్తసేవీ లఘ్వాశీ యతవాక్కాయమానసః.
ధ్యానయోగపరో నిత్యం వైరాగ్యం సముపాశ్రితః..52..
అహఙ్కారం బలం దర్పం కామం క్రోధం పరిగ్రహమ్.
విముచ్య నిర్మమః శాన్తో బ్రహ్మభూయాయ కల్పతే..53..
బ్రహ్మభూతః ప్రసన్నాత్మా న శోచతి న కాఙ్క్షతి.
సమః సర్వేషు భూతేషు మద్భక్తిం లభతే పరామ్..54..
భక్త్యా మామభిజానాతి యావాన్ యశ్చాస్మి తత్త్వతః.
తతో మాం తత్త్వతో జ్ఞాత్వా విశతే తదనన్తరమ్..55..
సర్వకర్మాణ్యపి సదా కుర్వాణో మద్వ్యపాశ్రయః.
మత్ప్రసాదాదవాప్నోతి శాశ్వతం పదమవ్యయమ్..56..
చేతసా సర్వకర్మాణి మయి సన్న్యస్య మత్పరః.
బుద్ధియోగముపాశ్రిత్య మచ్చిత్తః సతతం భవ..57..
మచ్చిత్తః సర్వదుర్గాణి మత్ప్రసాదాత్ తరిష్యసి.
అథ చేత్త్వమహఙ్కారాన్న శ్రోష్యసి వినఙ్క్ష్యసి..58..
యదహఙ్కారమాశ్రిత్య న యోత్స్య ఇతి మన్యసే.
మిథ్యైష వ్యవసాయస్తే ప్రకృతిస్త్వాం నియోక్ష్యతి..59..
స్వభావజేన కౌన్తేయ నిబద్ధః స్వేన కర్మణా.
కర్తుం నేచ్ఛసి యన్మోహాత్ కరిష్యస్యవశోఽపి తత్..60..
ఈశ్వరః సర్వభూతానాం హృద్దేశేఽర్జున తిష్ఠతి.
భ్రామయన్ సర్వభూతాని యన్త్రారూఢాని మాయయా..61..
తమేవ శరణం గచ్ఛ సర్వభావేన భారత.
తత్ప్రసాదాత్పరాం శాన్తిం స్థానం ప్రాప్స్యసి శాశ్వతమ్..62..
ఇతి తే జ్ఞానమాఖ్యాతం గుహ్యాద్గుహ్యతరం మయా.
విమృశ్యైతదశేషేణ యథేచ్ఛసి తథా కురు..63..
సర్వగుహ్యతమం భూయః శృణు మే పరమం వచః.
ఇష్టోఽసి మే దృఢమితి తతో వక్ష్యామి తే హితమ్..64..
మన్మనా భవ మద్భక్తో మద్యాజీ మాం నమస్కురు.
మామేవైష్యసి సత్యం తే ప్రతిజానే ప్రియోఽసి మే..65..
సర్వధర్మాన్ పరిత్యజ్య మామేకం శరణం వ్రజ.
అహం త్వా సర్వపాపేభ్యో మోక్షయిష్యామి మా శుచః..66..
ఇదం తే నాతపస్కాయ నాభక్తాయ కదాచన.
న చాశుశ్రూషవే వాచ్యం న చ మాం యోఽభ్యసూయతి..67..
య ఇదం పరమం గుహ్యం మద్భక్తేష్వభిధాస్యతి.
భక్తిం మయి పరాం కృత్వా మామేవైష్యత్యసంశయః..68..
న చ తస్మాన్మనుష్యేషు కశ్చిన్మే ప్రియకృత్తమః.
భవితా న చ మే తస్మాదన్యః ప్రియతరో భువి..69..
అధ్యేష్యతే చ య ఇమం ధర్మ్యం సంవాదమావయోః.
జ్ఞానయజ్ఞేన తేనాహమిష్టః స్యామితి మే మతిః..70..
శ్రద్ధావాననసూయశ్చ శృణుయాదపి యో నరః.
సోఽపి ముక్తః శుభాఀల్లోకాన్ ప్రాప్నుయాత్ పుణ్యకర్మణామ్..71..
కచ్చిదేతచ్ఛ్రుతం పార్థ త్వయైకాగ్రేణ చేతసా.
కచ్చిదజ్ఞానసమ్మోహః ప్రనష్టస్తే ధనఞ్జయ..72..
అర్జున ఉవాచ
నష్టో మోహః స్మృతిర్లబ్ధా త్వత్ప్రసాదాన్మయాఽచ్యుత.
స్థితోఽస్మి గతసన్దేహః కరిష్యే వచనం తవ..73..
సఞ్జయ ఉవాచ
ఇత్యహం వాసుదేవస్య పార్థస్య చ మహాత్మనః.
సంవాదమిమమశ్రౌషమద్భుతం రోమహర్షణమ్..74..
వ్యాసప్రసాదాచ్ఛ్రుతవాన్ ఏతద్గుహ్యమహం పరమ్.
యోగం యోగేశ్వరాత్ కృష్ణాత్ సాక్షాత్ కథయతః స్వయమ్..75..
రాజన్ సంస్మృత్య సంస్మృత్య సంవాదమిమమద్భుతమ్.
కేశవార్జునయోః పుణ్యం హృష్యామి చ ముహుర్ముహుః..76..
తచ్చ సంస్మృత్య సంస్మృత్య రూపమత్యద్భుతం హరేః.
విస్మయో మే మహాన్ రాజన్ హృష్యామి చ పునః పునః..77..
యత్ర యోగేశ్వరః కృష్ణో యత్ర పార్థో ధనుర్ధరః.
తత్ర శ్రీర్విజయో భూతిర్ధ్రువా నీతిర్మతిర్మమ..78..
.. ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే మోక్షసన్న్యాసయోగో నామ అష్టాదశోఽధ్యాయః ..