॥ গোপিকাগীতম্ ॥
॥ গোপীগীতম্ ॥
গোপ্য ঊচুঃ
জযতি তেঽধিকং জন্মনা ভ়্রজঃ
শ্রযত ইন্দিরা শশ্বদত্র হি ।
দযিত দৃশ্যতাং দিক্ষু তাভ়কা-
স্ত্বযি ধৃতাসভ়স্ত্বাং ভ়িচিন্বতে ॥ ১॥
শরদুদাশযে সাধুজাতস-
ৎসরসিজোদরশ্রীমুষা দৃশা ।
সুরতনাথ তেঽশুল্কদাসিকা
ভ়রদ নিঘ্নতো নেহ কিং ভ়ধঃ ॥ ২॥
ভ়িষজলাপ্যযাদ্ব্যালরাক্ষসা-
দ্বর্ষমারুতাদ্বৈদ্যুতানলাৎ ।
ভ়ৃষমযাত্মজাদ্বিশ্বতোভযা-
দৃষভ তে ভ়যং রক্ষিতা মুহুঃ ॥ ৩॥
ন খলু গোপিকানন্দনো ভভ়া-
নখিলদেহিনামন্তরাত্মদৃক্ ।
ভ়িখনসার্থিতো ভ়িশ্বগুপ্তযে
সখ উদেযিভ়ান্সাত্বতাং কুলে ॥ ৪॥
ভ়িরচিতাভযং ভ়ৃষ্ণিধুর্য তে
চরণমীযুষাং সংসৃতের্ভযাৎ ।
করসরোরুহং কান্ত কামদং
শিরসি ধেহি নঃ শ্রীকরগ্রহম্ ॥ ৫॥
ভ়্রজজনার্তিহন্বীর যোষিতাং
নিজজনস্মযধ্বংসনস্মিত ।
ভজ সখে ভভ়ৎকিঙ্করীঃ স্ম নো
জলরুহাননং চারু দর্শয ॥ ৬॥
প্রণতদেহিনাং পাপকর্শনং
তৃণচরানুগং শ্রীনিকেতনম্ ।
ফণিফণার্পিতং তে পদাংবুজং
কৃণু কুচেষু নঃ কৃন্ধি হৃচ্ছযম্ ॥ ৭॥
মধুরযা গিরা ভ়ল্গুভ়াক্যযা
বুধমনোজ্ঞযা পুষ্করেক্ষণ ।
ভ়িধিকরীরিমা ভ়ীর মুহ্যতি-
রধরসীধুনাঽঽপ্যাযযস্ব নঃ ॥ ৮॥
তভ় কথামৃতং তপ্তজীভ়নং
কভ়িভিরীডিতং কল্মষাপহম্ ।
শ্রভ়ণমঙ্গলং শ্রীমদাততং
ভুভ়ি গৃণন্তি তে ভূরিদা জনাঃ ॥ ৯॥
প্রহসিতং প্রিয প্রেমভ়ীক্ষণং
ভ়িহরণং চ তে ধ্যানমঙ্গলম্ ।
রহসি সংভ়িদো যা হৃদিস্পৃশঃ
কুহক নো মনঃ ক্ষোভযন্তি হি ॥ ১০॥
চলসি যদ্ব্রজাচ্চারযন্পশূন্
নলিনসুন্দরং নাথ তে পদম্ ।
শিলতৃণাঙ্কুরৈঃ সীদতীতি নঃ
কলিলতাং মনঃ কান্ত গচ্ছতি ॥ ১১॥
দিনপরিক্ষযে নীলকুন্তলৈ-
র্ভ়নরুহাননং বিভ্রদাভ়ৃতম্ ।
ঘনরজস্বলং দর্শযন্মুহু-
র্মনসি নঃ স্মরং ভ়ীর যচ্ছসি ॥ ১২॥
প্রণতকামদং পদ্মজার্চিতং
ধরণিমণ্ডনং ধ্যেযমাপদি ।
চরণপঙ্কজং শন্তমং চ তে
রমণ নঃ স্তনেষ্বর্পযাধিহন্ ॥ ১৩॥
সুরতভ়র্ধনং শোকনাশনং
স্বরিতভ়েণুনা সুষ্ঠু চুম্বিতম্ ।
ইতররাগভ়িস্মারণং নৃণাং
ভ়িতর ভ়ীর নস্তেঽধরামৃতম্ ॥ ১৪॥
অটতি যদ্ভভ়ানহ্নি কাননং
ত্রুটির্যুগাযতে ত্বামপশ্যতাম্ ।
কুটিলকুন্তলং শ্রীমুখং চ তে
জড উদীক্ষতাং পক্ষ্মকৃদ্দৃশাম্ ॥ ১৫॥
পতিসুতান্বযভ্রাতৃবান্ধভ়া-
নতিভ়িলঙ্ঘ্য তেঽন্ত্যচ্যুতাগতাঃ ।
গতিভ়িদস্তভ়োদ্গীতমোহিতাঃ
কিতভ় যোষিতঃ কস্ত্যজেন্নিশি ॥ ১৬॥
রহসি সংভ়িদং হৃচ্ছযোদযং
প্রহসিতাননং প্রেমভ়ীক্ষণম্ ।
বৃহদুরঃ শ্রিযো ভ়ীক্ষ্য ধাম তে
মুহুরতিস্পৃহা মুহ্যতে মনঃ ॥ ১৭॥
ভ়্রজভ়নৌকসাং ভ়্যক্তিরঙ্গ তে
ভ়ৃজিনহন্ত্র্যলং ভ়িশ্বমঙ্গলম্ ।
ত্যজ মনাক্ চ নস্ত্বৎস্পৃহাত্মনাং
স্বজনহৃদ্রুজাং যন্নিষূদনম্ ॥ ১৮॥
যত্তে সুজাতচরণাম্বুরুহং স্তনেষু
ভীতাঃ শনৈঃ প্রিয দধীমহি কর্কশেষু ।
তেনাটভ়ীমটসি তদ্ব্যথতে ন কিংস্বিৎ
কূর্পাদিভির্ভ্রমতি ধীর্ভভ়দাযুষাং নঃ ॥ ১৯॥
ইতি শ্রীমদ্ভাগভ়তমহাপুরাণে পারমহংস্যাং সংহিতাযাং দশমস্কন্ধে পূর্ভ়ার্ধে রাসক্রীডাযাং গোপীগীতং নামৈকত্রিংশোঽধ্যাযঃ