అక్షమాలికోపనిషత్

అక్షమాలికోపనిషత్
అకారాదిక్షకారాన్తవర్ణజాతకలేవరమ్ .
వికలేవరకైవల్యం రామచన్ద్రపదం భజే ..

ఓం వాఙ్మే మనసి ప్రతిష్ఠితా మనో మే వాచి ప్రతిష్ఠితమావిరావీర్మ ఏధి ..

వేదస్య మ ఆణీస్థః శ్రుతం మే మా ప్రహాసీరనేనాధీతేనారాత్రాన్సన్దధామ్యృతం వదిష్యామి సత్యం వదిష్యామి ..

తన్మామవతు తద్వక్తారమవతు అవతు మామవతు వక్తారమవతు వక్తారమ్ ..

ఓం శాన్తిః శాన్తిః శాన్తిః ..

హరిః ఓం .
అథ ప్రజాపతిర్గుహం పప్రచ్ఛ భో బ్రహ్మన్నక్షమాలాభేదవిధిం బ్రూహీతి .
సా కిం లక్షణా కతి భేదా అస్యాః కతి సూత్రాణి కథం ఘటనాప్రకారః కే వర్ణాః కా ప్రతిష్ఠా కైషాధిదేవతా కిం ఫలం చేతి .
తం గుహః ప్రత్యువాచ ప్రవాలమౌక్తికస్ఫటికశఙ్ఖరజతాష్టాపదచన్దనపుత్రజీవికాబ్జే రుద్రాక్షా ఇతి .
ఆదిక్షాన్తమూర్తిః సావధానభావా .
సౌవర్ణం రాజతం తామ్రం తన్ముఖే ముఖం తత్పుచ్ఛే పుచ్ఛం తదన్తరావర్తనక్రమేణ యోజయేత్ .
యదస్యాన్తరం సూత్రం తద్బ్రహ్మ .
యద్దక్షపార్శ్వే తచ్ఛైవమ్ .
యద్వామే తద్వైష్ణవమ్ .
యన్ముఖం సా సరస్వతీ .
యత్పుచ్ఛం సా గాయత్రీ .
యత్సుషిరం సా విద్యా .
యా గ్రన్థిః సా ప్రకృతిః .
యే స్వరాస్తే ధవలాః .
యే స్పర్శాస్తే పీతాః .
యే పరాస్తే రక్తాః .
అథ తాం పఞ్చభిర్గన్ధైరమృతైః పఞ్చభిర్గవ్యైస్తనుభిః శోధయిత్వా పఞ్చభిర్గవ్యైర్గన్ధోదకేన సంస్నాప్య తస్మాత్సోఙ్కారేణ పత్రకూర్చేన స్నపయిత్వాష్టభిర్గన్ధైరాలిప్య సుమనఃస్థలే నివేశ్యాక్షతపుష్పైరారాధ్య ప్రత్యక్షమాదిక్షాన్తైర్వర్ణైర్భావయేత్ .
ఓమఙ్కార మృత్యుఞ్జయ సర్వవ్యాపక ప్రథమేఽక్షే ప్రతితిష్ఠ .
ఓమాఙ్కారాకర్షణాత్మకసర్వగత ద్వితీయేఽక్షే ప్రతితిష్ఠ .
ఓమిఙ్కారపుష్టిదాక్షోభకర తృతీయేఽక్షే ప్రతితిష్ఠ .
ఓమీఙ్కార వాక్ప్రసాదకర నిర్మల చతుర్థేఽక్షే ప్రతితిష్ఠ .
ఓముఙ్కార సర్వబలప్రద సారతర పఞ్చమేఽక్షే ప్రతితిష్ఠ .
ఓమూఙ్కారోచ్చాటన దుఃసహ షష్ఠేఽక్షే ప్రతితిష్ఠ .
ఓమృఙ్కాకార సంక్షోభకర చఞ్చల సప్తమేఽక్షే ప్రతితిష్ఠ .
ఓమౄఙ్కార సంమోహనకరోజవలాష్టమేఽక్షే ప్రతితిష్ఠ .
ఓమ్లృఙ్కారవిద్వేషణకర మోహక నవమేఽక్షే ప్రతితిష్ఠ .
ఓమ్లౄఙ్కార మోహకర దశమేఽక్షే ప్రతితిష్ఠ .
ఓమేఙ్కార సర్వవశ్యకర శుద్ధసత్త్వైకాదశేఽక్షే ప్రతితిష్ఠ .
ఓమైఙ్కార శుద్ధసాత్త్విక పురుషవశ్యకర ద్వాదశేఽక్షే ప్రతితిష్ఠ .
ఓమోఙ్కారాఖిలవాఙ్మయ నిత్యశుద్ధ త్రయోదశేఽక్షే ప్రతితిష్ఠ .
ఓమౌఙ్కార సర్వవాఙ్మయ వశ్యకర చతుర్దశేఽక్షే ప్రతితిష్ఠ .
ఓమఙ్కార గజాదివశ్యకర మోహన పఞ్చదశేఽక్షే ప్రతితిష్ఠ .
ఓమఃకార మృత్యునాశనకర రౌద్ర షోడశేఽక్షే ప్రతితిష్ఠ .
ఓం కఙ్కార సర్వవిషహర కల్యాణద సప్తదశేఽక్షే ప్రతితిష్ఠ .
ఓం ఖఙ్కార సర్వక్షోభకర వ్యాపకాష్టాదశేఽక్షే ప్రతితిష్ఠ .
ఓం గఙ్కార సర్వవిఘ్నశమన మహత్తరైకోనవింశేఽక్షే ప్రతితిష్ఠ .
ఓం ఘఙ్కార సౌభాగ్యద స్తమ్భనకర వింశేఽక్షే ప్రతితిష్ఠ .
ఓం ఙకార సర్వవిషనాశకరోగ్రైకవింశేఽక్షే ప్రతితిష్ఠ .
ఓం చఙ్కారాభిచారఘ్న క్రూర ద్వావింశేఽక్షే ప్రతితిష్ఠ .
ఓం ఛఙ్కార భూతనాశకర భీషణ త్రయోవింశేఽక్షే ప్రతితిష్ఠ .
ఓం జఙ్కార కృత్యాదినాశకర దుర్ధర్ష చతుర్వింశేఽక్షే ప్రతితిష్ఠ .
ఓం ఝఙ్కార భూతనాశకర పఞ్చవింశేఽక్షే ప్రతితిష్ఠ .
ఓం ఞకార మృత్యుప్రమథన షడ్వింశేఽక్షే ప్రతితిష్ఠ .
ఓం టఙ్కార సర్వవ్యాధిహర సుభగ సప్తవింశేఽక్షే ప్రతితిష్ఠ .
ఓం ఠఙ్కార చన్ద్రరూపాష్టావింశేఽక్షే ప్రతితిష్ఠ .
ఓం డఙ్కార గరుడాత్మక విషఘ్న శోభనైకోనత్రింశేఽక్షే ప్రతితిష్ఠ .
ఓం ఢఙ్కార సర్వసంపత్ప్రద సుభగ త్రింశేఽక్షే ప్రతితిష్ఠ .
ఓం ణఙ్కార సర్వసిద్ధిప్రద మోహకరైకత్రింశేఽక్షే ప్రతితిష్ఠ .
ఓం తఙ్కార ధనధాన్యాదిసంపత్ప్రద ప్రసన్న ద్వాత్రింశేఽక్షే ప్రతితిష్ఠ .
ఓం థఙ్కార ధర్మప్రాప్తికర నిర్మల త్రయస్త్రింశేఽక్షే ప్రతితిష్ఠ .
ఓం దఙ్కార పుష్టివృద్ధికర ప్రియదర్శన చతుస్త్రింశేఽక్షే ప్రతితిష్ఠ .
ఓం ధఙ్కార విషజ్వరనిఘ్న విపుల పఞ్చత్రింశేఽక్షే ప్రతితిష్ఠ .
ఓం నఙ్కార భుక్తిముక్తిప్రద శాన్త షట్త్రింశేఽక్షే ప్రతితిష్ఠ .
ఓం పఙ్కార విషవిఘ్ననాశన భవ్య సప్తత్రింశేఽక్షే ప్రతితిష్ఠ .
ఓం ఫఙ్కారాణిమాదిసిద్ధిప్రద జ్యోతీరూపాష్టత్రింశేఽక్షే ప్రతితిష్ఠ .
ఓం బఙ్కార సర్వదోషహర శోభనైకోనచత్వారింశేఽక్షే ప్రతితిష్ఠ .
ఓం భఙ్కార భూతప్రశాన్తికర భయానక చత్వారింశేఽక్షే ప్రతితిష్ఠ .
ఓం మఙ్కార విద్వేషిమోహనకరైకచత్వారింశేఽక్షే ప్రతితిష్ఠ .
ఓం యఙ్కార సర్వవ్యాపక పావన ద్విచత్వారింశేఽక్షే ప్రతితిష్ఠ .
ఓం రఙ్కార దాహకర వికృత త్రిచత్వారింశేఽక్షే ప్రతితిష్ఠ .
ఓం లఙ్కార విశ్వంభర భాసుర చతుశ్చత్వారింశేఽక్షే ప్రతితిష్ఠ .
ఓం వఙ్కార సర్వాప్యాయనకర నిర్మల పఞ్చచత్వారింశేఽక్షే ప్రతితిష్ఠ .
ఓం శఙ్కార సర్వఫలప్రద పవిత్ర షట్చత్వారింశేఽక్షే ప్రతితిష్ఠ .
ఓం షఙ్కార ధర్మార్థకామద ధవల సప్తచత్వారింశేఽక్షే ప్రతితిష్ఠ .
ఓం సఙ్కార సర్వకారణ సార్వవర్ణికాష్టచత్వారింశేఽక్షే ప్రతితిష్ఠ .
ఓం హఙ్కార సర్వవాఙ్మయ నిర్మలైకోనపఞ్చాశదక్షే ప్రతితిష్ఠ .
ఓం ళఙ్కార సర్వశక్తిప్రద ప్రధాన పఞ్చాశదక్షే ప్రతితిష్ఠ .
ఓం క్షఙ్కార పరాపరతత్త్వజ్ఞాపక పరంజ్యోతీరూప శిఖామణౌ ప్రతితిష్ఠ .
అథోవాచ యే దేవాః పృథివీపదస్తేభ్యో నమో భగవన్తోఽనుమదన్తు శోభాయై పితరోఽనుమదన్తు శోభాయై జ్ఞానమయీమక్షమాలికామ్ .
అథోవాచ యే దేవా అన్తరిక్షసదస్తేభ్యః
ఓం నమో భగవన్తోఽనుమదన్తు శోభాయై పితరోఽనుమదన్తు శోభాయైజ్ఞానమయీమక్షమాలికామ్ .
అథోవాచ యే దేవా దివిషదస్తేభ్యో నమో భగవన్తోఽనుమదన్తు శోభాయై పితరోఽనుమదన్తు శోభాయై జ్ఞానమయీమక్షమాలికామ్ .
అథోవాచ యే మన్త్రా యా విద్యాస్తేభ్యో నమస్తాభ్యశ్చోన్నమస్తచ్ఛక్తిరస్యాః ప్రతిష్ఠాపయతి .
అథోవాచ యే బ్రహ్మవిష్ణురుద్రాస్తేభ్యః సగుణేభ్య ఓం నమస్తద్వీర్యమస్యాః ప్రతిష్ఠాపయతి .
అథోవాచ యే సాఙ్ఖ్యాదితత్త్వభేదాస్తేభ్యో నమో వర్తధ్వం విరోధేఽనువర్తధ్వమ్ .
అథోవాచ యే శైవా వైష్ణవాః శాక్తాః శతసహస్రశస్తేభ్యో నమోనమో భగవన్తోఽనుమదన్త్వనుగృహ్ణన్తు .
అథోవాచ యాశ్చ మృత్యోః ప్రాణవత్యస్తాభ్యో నమోనమస్తేనైతం మృడయత మృడయత .
పునరేతస్యాం సర్వాత్మకత్వం భావయిత్వా భావేన పూర్వమాలికాముత్పాద్యారభ్య తన్మయీం మహోపహారైరుపహృత్య ఆదిక్షాన్తైరక్షరైరక్షమాలామష్టోత్తరశతం స్పృశేత్ .
అథ పునరుత్థాప్య ప్రదక్షిణీకృత్యోం నమస్తే భగవతి మన్త్రమాతృకేఽక్షమాలే సర్వవశఙ్కర్యోంనమస్తే భగవతి మన్త్రమాతృకేఽక్షమాలికే శేషస్తమ్భిన్యోం నమస్తే భగవతి మన్త్రమాతృకేఽక్షమాలే ఉచ్చాటన్యోంనమస్తే భగవతి మన్త్రమాతృకేఽక్షమాలే విశ్వామృత్యో మృత్యుఞ్జయస్వరూపిణి సకలలోకోద్దీపిని సకలలోకరక్షాధికే సకలలోకోజ్జీవికే సకలలోకోత్పాదికే దివాప్రవర్తికే రాత్రిప్రవర్తికే నద్యన్తరం యాసి దేశాన్తరం యాసి ద్వీపాన్తరం యాసి లోకాన్తరం యాసి సర్వదా స్ఫురసి సర్వహృది వాససి . నమస్తే పరారూపే నమస్తే పశ్యన్తీరూపే నమస్తే మధ్యమారూపే నమస్తే వైఖరీరూపే సర్వతత్త్వాత్మికే సర్వవిద్యాత్మికే సర్వశక్త్యాత్మికే సర్వదేవాత్మికే వసిష్ఠేన మునినారాధితే విశ్వామిత్రేణ మునినోపజీవ్యమానే నమస్తే నమస్తే .
ప్రాతరధీయానో రాత్రికృతం పాపం నాశయతి .
సాయమధీయానో దివసకృతం పాపం నాశయతి .
తత్సాయంప్రాతః ప్రయుఞ్జానః పాపోఽపాపోభవతి .
ఏవమక్షమాలికయా జప్తో మన్త్రః సద్యః సిద్ధికరో
భవతీత్యాహ భగవాన్గుహః ప్రజాపతిమిత్యుపనిషత్ ..

ఓం వాఙ్ మే మనసి ప్రతిష్ఠితా మనో మే వాచి ప్రతిష్ఠితమావిరావీర్మ ఏధి ..

వేదస్య మ ఆణీస్థః శ్రుతం మే మా ప్రహాసీరనేనాధీతేనాహోరాత్రాన్సన్దధామ్యృతం వదిష్యామి సత్యం వదిష్యామి .
తన్మామవతు తద్వక్తారమవతు అవతు మామవతు వక్తారమవతు వక్తారమ్ ..

ఓం శాన్తిః శాన్తిః శాన్తిః ..

హరిః ఓం తత్సత్ ..

.. ఇత్యక్షమాలికోపనిషత్సమాప్తా ..